بالاعا قارايتىن ادام جوقتا قايتۋ كەرەك؟ شاڭحايدا تۇڭعىش توپتاعى «جۇمىسشى – قىزمەتكەرلەردىڭ پەرزەنتتەرىنە قارايتىن ورىن» اشىلدى، قىزمەتكەر اتا – انالاردىڭ كوكەيتەستى ماسەلەلەرىن شەشىم ەتتى
ەكىنشى بالالى بولۋعا جاپپاي ەرىك بەرۋ ساياساتى اتقارىلعاننان كەيىن، بالا باعاتىن ادام تابا الماۋ ماسەلەسى اتا – انالار قينالاتىن ىسكە اينالدى. شاڭحاي قالالىق باس جۇمىسشىلار ۇيىمىنىڭ تەكسەرۋ ناتيجەسىنە قاراعاندا، جاس ايەل قىزمەتكەرلەردىڭ %80تى وسى جاعىنداعى ۋايىمىن بىلدىرگەن.
قىزمەتكەر اتا – انالاردىڭ بالاعا قارايتىن ادام تابا الماۋ ۋايىمىن شەشەتىن ءارى قىزمەتىنە دە نۇقسان كەلتىرمەيتىن امال بار ما؟ بيىل ناۋرىز ايىندا شاڭحاي قالالىق باس جۇمىسشىلار ۇيىمى جاڭا شارا اتقارىپ، «جۇمىسشى – قىزمەتكەرلەردىڭ پەرزەنتتەرىن قارايتىن ورىن» قۇرىپ، جۇمىسشى – قىزمەتكەرلەردىڭ وسى جاعىنداعى قاجەتسىنۋى جوعارى ءارى شارت – جاعدايى كەلەتىن كاسىپورىن – ءىسورىنداردا جۇمىسشى – قىزمەتكەرلەردىڭ پەرزەنتتەرىن كەشكى ۋاقىتتا، جازعى كانيكول مەزگىلىندە، قىسقى كانيكول مەزگىلىندە قاراپ بەرەتىن ءتۇرلى فورماداعى بالا قاراۋ قىزمەت وتەۋ تۇرلەرىن سىناق ەتپەكشى. قازىر العاشقى توپتا سىناق ەتىلەتىن 12 كاسىپورىن مەن ءىسورىنداعى «جۇمىسشى – قىزمەتكەرلەردىڭ پەرزەنتتەرىن قارايتىن ورىن» شاڭحاي باس جۇمىسشىلار ۇيىمى تاراتقان ۋيۆەسكاعا يە بولدى، جاس اتا – انالاردىڭ بالالارىن ەرتىپ قىزمەتكە شىعۋى ارماننان شىندىققا اينالدى.
قايتكەندە جاستاردىڭ بالاعا قاراۋمەن بىرگە قىزمەتىن دەن قويا ىستەۋىنە شارت – جاعداي جاراتۋعا بولادى؟ شاڭحاي قالالىق باس جۇمىسشىلار ۇيىمىنىڭ قولداۋىندا، شاڭحاي قالاسىنداعى ءىشىنارا كاسىپورىن – ءىسورىندار قىزمەت ورنىندا «جۇمىسشى – قىزمەتكەرلەردىڭ پەرزەنتتەرىنە قارايتىن ورىن» قۇرىپ، قىزمەتكەردىڭ بالانى ءوزىنىڭ قىزمەت ورنىنداعى بالا قاراۋ ۇيىنە باقتىرۋىن سىناق ەتتى، وسىلايشا، اتا – انالاردىڭ قىزمەتكە كەلىپ – كەتەتىن ۋاقىتىنا سايكەسىپ، «قىزمەت پەن بالا قاراۋدى بىردەي اقساتپاۋدى» ىسكە اسىردى. جۇڭشان شيپاحاناسىنىڭ «كەشكى ۋاقىتتا بالا قاراۋ كلاسى» وسىنداي سىناق تۇيىندەرىنىڭ ءبىرى.
كەشكى ۋاقىتتا بالا قاراۋ كلاسى دەگەنىمىز باستاۋىش مەكتەپ وقۋشىلارى تۇستەن كەيىن ساعات 3 اينالاسىندا وقۋدان تاراعاننان كەيىن، اتا – اناسى ساعات 6 ~ 7دە قىزمەتتەن تۇسكەنگە دەيىنگى ۋاقىتتا بالاعا قاراپ بەرەتىن كلاس. جۇڭشان شيپاحاناسى جۇمىسشىلار ۇيىمى ءتوراعاسىنىڭ ورىنباسارى چين سىسۇي: بالا وقۋدان تاراعاننان كەيىن، قىزمەت ورنىمىزدىڭ اۆتوكولىگى مەكتەپتەن بالالاردى الىپ ەمحاناداعى بالا قاراۋ ۇيىنە جەتكىزەدى، اتا – اناسى قىزمەتتەن تۇسكەننەن كەيىن، بالانى ۇيىنە الىپ قايتادى، - دەيدى.
