تيانشان تورى   ›   زاڭ تارازى   ›   زاڭ - ەرەجە

شينجياڭ ۇيعۇر اۆتونوميالى رايونىنىڭ شەكارا باسقارۋ ەرەجەسى

    شينجياڭ ۇيعۇر اۆتونوميالى رايوندىق 12 - كەزەكتى حالىق قۇرىلتايى تۇراقتى كوميتەتىنىڭ حابارلاندىرۋى

    (43 - ءنومىرلى)

    «شينجياڭ ۇيعۇر اۆتونوميالى رايونىنىڭ شەكارا باسقارۋ ەرەجەسى» شينجياڭ ۇيعۇر اۆتونوميالى رايوندىق 12 - كەزەكتى حالىق قۇرىلتايى تۇراقتى كوميتەتىنىڭ 5 - ماجىلىسىندە 2016 - جىلى 1 - جەلتوقسان كۇنى وزگەرىس ەنگىزىلىپ ماقۇلداندى، قازىر جاريالاپ وتىرمىز. 2017 - جىلى 1 - قاڭتاردان باستاپ اتقارىلادى.

    مۇنى ەرەكشە حابارلاندىرامىز

    شينجياڭ ۇيعۇر اۆتونوميالى رايوندىق حالىق قۇرىلتايى تۇراقتى كوميتەتى

    2016 - جىلى 1 - جەلتوقسان

    (شينجياڭ ۇيعۇر اۆتونوميالى رايوندىق 10 - كەزەكتى حالىق قۇرىلتايى تۇراقتى كوميتەتىنىڭ 20 - ماجىلىسىندە 2005 - جىلى 25 - قاراشا كۇنى ماقۇلداندى، شينجياڭ ۇيعۇر اۆتونوميالى رايوندىق 11 - كەزەكتى حالىق قۇرىلتايى تۇراقتى كوميتەتى 18 - ءماجىلىسىنىڭ «شينجياڭ ۇيعۇر اۆتونوميالى رايونىنىڭ شەكارا باسقارۋ ەرەجەسىنە وزگەرىس ەنگىزۋ جونىندەگى قارارىنا» ساي، 2010 - جىلى 3 - ماۋسىم كۇنى وزگەرىس ەنگىزىلدى، شينجياڭ ۇيعۇر اۆتونوميالى رايوندىق 12 - كەزەكتى حالىق قۇرىلتايى تۇراقتى كوميتەتىنىڭ 25 - ماجىلىسىندە 2016 - جىلى 1 - جەلتوقسان كۇنى وزگەرىس ەنگىزىلدى)

    ءبىرىنشى تاراۋ جالپى ەرەجە

    1 - تارماق بۇل ەرەجە شەكارا باسقارۋدى كۇشەيتۋ، مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋ، شەكارا رايونىنىڭ حاۋىپسىزدىگى مەن ورنىقتىلىعىن ساقتاۋ، شەكارا رايون ەكونوميكاسىنىڭ، قوعامىنىڭ دامۋىن جەبەۋ ءۇشىن، قاتىستى زاڭدارعا، زاڭ - ەرەجەلەرگە ساي، اۆتونوميالى رايوننىڭ ناقتى جاعدايىنا ۇشتاستىرىلىپ جاسالدى.

    2 - تارماق اۆتونوميالى رايونىمىزدىڭ شەكارا رايوندارىنا قونىستانعان، بارعان، وندا وندىرىسپەن جانە باسقا دا قيمىلدارمەن شۇعىلدانعان ورىندار مەن جەكەلەر وسى ەرەجەگە بويسۇنۋى كەرەك.

    3 - تارماق وسى ەرەجەدە ايتىلعان شەكارا رايونى دەگەندە، قۇرلىقتا كورشى ەلدەرمەن شەكارالاسقان اۆتونوميالى رايونىمىزداعى اۋداندىق (قالالىق) اكىمشىلىك وڭىرلەر مەڭزەلەدى.

    شەكارا باسقارۋ رايونى دەگەندە، شەكارا رايوندا بەلگىلى كولەمگە بولىنگەن ءارى جاريالانعان ەرەكشە باسقارىلاتىن ءوڭىر مەڭزەلەدى. مەملەكەت شەكاراسى (شەكارا) بويىنداعى اۋىلدىڭ (قالاشىقتىڭ) ەگىن، مال شارۋاشىلىق تۋان الاڭدارىنىڭ قاراستىلىعىنداعى وڭىرلەر مەن شەكارا بەلدەۋى، وتكەل، شەكارالىق وتكەل، شەكارا اتتاعان ەكونوميكالىق، ساۋدا سەلبەستىك رايونى، شەكارالىق ەرەكشە مەڭگەرىلەتىن رايون، شەكاراداعى حالىقتىڭ بازار ساۋدا رايونى (ءتۇيىنى)، ساياحات كورىنىس رايونى (ءتۇيىنى) سياقتى وڭىرلەردى قامتيدى.

    شەكارا بەلدەۋى مەملەكەت شەكارا سىزىعىنىڭ (شەكارا) 2000 مەتر ىشىندەگى ءوڭىردى كورسەتەدى. ءبىراق مەملەكەت شەكارا سىزىعىنا (شەكارا) ەڭ جاقىن ارالىق 20 مەتردەن كەم بولسا بولمايدى.

    4 - تارماق اۆتونوميالى رايون، سونداي - اق شەكارادا تۇرعان وبلىستار، قالالار (ايماقتار)، اۋداندار (قالالار) پارتيا، ۇكىمەت، ارميا، ساقشى، بيڭتۋان، حالىق سايكەسىپ ارەكەت جاسايتىن بىرىككەن شەكارا باسقارۋ - مەڭگەرۋ مەحانيزمىن ورناتىپ، ءوز اكىمشىلىك وڭىرىندەگى شەكارا باسقارۋ - مەڭگەرۋ قىزمەتىنە جەتەكشىلىك ەتەدى، ونى سايكەستىرەدى، تەكسەرەدى جانە باقىلايدى، ادام كۇشىندىك، زات كۇشىندىك، تەحنيكالىق قورعانىس ءوزارا ۇشتاسقان شەكارالىق سترەولى ساقتانۋ، مەڭگەرۋ جۇيەسى قۇرىلىسىن كەمەلدەندىرىپ، قاتىستى شەكارا باسقارۋ - مەڭگەرۋ جونىندەگى كەلەلى ماسەلەلەردى بەلگىلى مەرزىمدە اقىلداسىپ شەشەدى.

    5 - تارماق اۆتونوميالى رايوندىق حالىق ۇكىمەتى، سونداي - اق شەكارادا تۇرعان وبلىستىق، قالالىق (ايماقتىق)، اۋداندىق (قالالىق) حالىق ۇكىمەتى (اكىمشىلىك مەكەمەسى) شەكارا رايونداعى قاتىناسقا، حابارلاسۋعا، ەلەكترگە، مادەنيەتكە، وقۋ - اعارتۋعا، ەمدەۋ - دەنساۋلىق ساقتاۋعا ۇسىنىلىمدى مولايتىپ، شەكارا قورعاۋشىلاردىڭ كومەك اقشاسى، شەكارا قورعانىس نەگىزدىك قۇرىلعى قۇرىلىسى سياقتىلارعا جۇمسالاتىن شەكارا باسقارۋ قاراجاتتارىن قامتاماسىز ەتۋ قىزمەتىن تىڭعىلىقتى ىستەۋى كەرەك.

    6 - تارماق قوعام حاۋىپسىزدىگى شەكارا قورعانىس تاراۋى شەكارا باسقارۋ وڭىرىندە قوعام اماندىعىن باسقارۋ، شەكارادان كىرىپ - شىعاتىنداردى شەكارا قورعانىسىندىق تەكسەرۋ، جولاۋشىلاردى تەكسەرۋ سياقتى قىزمەت مىندەتىن زاڭ بويىنشا وتەيدى.

    سىرتقى ىستەر تاراۋى شەكارا رايوندا شەتەلگە ساياتىن قىزمەت پەن مەملەكەت شەكاراسىنىڭ (شەكارا) شەكارا ىستەرىن باسقارۋ قىزمەتىنە جەتەكشىلىك ەتۋگە جانە ونى باسقارۋعا جاۋاپتى بولادى.

    مەملەكەت حاۋىپسىزدىگى، مەملەكەت جەر بايلىعى، كەدەن، تەكسەرۋ - كارانتيندەۋ سياقتى تاراۋلار ءوز قىزمەت مىندەتىنە ساي، ءوزارا سايكەسىپ، شەكارا باسقارۋ قىزمەتىن بىرگە تىڭعىلىقتى ىستەيدى.

    7 - تارماق قوعام حاۋىپسىزدىگى شەكارا قورعانىس تاراۋى، حالىق ازاتتىق ارمياسىنىڭ شەكارا قورعانىس بولىمدەرى (تومەندە قىسقارتىپ شەكارا قورعانىس بولىمدەرى دەلىنەدى) جانە قاتىستى تاراۋلار شەكارا قورعاۋشىلار قوسىنى قۇرىلىسى مەن ونى باسقارۋدى كۇشەيتىپ، وزدەرىنىڭ شەكارانى قورعاۋ رولىن ساۋلەلەندىرۋى كەرەك.

    8 - تارماق ءارقانداي ورىن مەن جەكە مەملەكەت شەكاراسىن (شەكارا) قورعاۋعا، مەملەكەت شەكارا (شەكارا) بەلگىلەرى مەن شەكارا قورعانىسى قۇرىلعىلارىن، شەكارا رايونىنىڭ قوعام ءتارتىبى مەن اماندىعىن قورعاۋعا بورىشتى.

    شەكارا رايونداعى كاسىپورىندار، ءىسورىندار جانە نەگىزگى ساتىداعى بۇقارالىق ءوزىن - ءوزى باسقارۋ ۇيىمدارى بۇقارالىق اماندىق بىرلەسىپ قورعانۋ ۇيىمىن قۇرىپ، شەكارا قورعانىسىن باسقارۋ قىزمەتىن ورىستەتۋگە سايكەسەدى.

    9 - تارماق اۆتونوميالى رايوندىق حالىق ۇكىمەتى، سونداي - اق شەكارادا تۇراتىن وبلىستىق، قالالىق (ايماقتىق)، اۋداندىق (قالالىق) حالىق ۇكىمەتى (اكىمشىلىك مەكەمەسى) شەكارا باسقارۋدا ناتيجەسى كورنەكتى بولعان ورىندار مەن جەكەلەردى ماداقتايدى جانە سيلايدى.

   ەكىنشى تاراۋ مەملەكەت شەكاراسىن (شەكارا) باسقارۋ

    10 - تارماق شەكارا بەلگىسىن، شەكارا قازىعىن نەمەسە مەملەكەت شەكاراسىن (شەكارا) كورسەتەتىن باسقا دا ماڭگىلىك بەلگىلەردى ورناتۋ، قورعاۋ نەمەسە قايتا ورناتۋ ەلىمىزدىڭ كورشى ەلدەرمەن جاساسقان شەكارا شارتىنا، كەلىسىمگە نەمەسە كەلىسىمحاتقا ساي (تومەندە ءبىر تۇتاس كەلىسىم دەلىنەدى) اتقارىلادى.

    11 - تارماق شەكارادان كىرىپ - شىعاتىن ادامدار، سونداي - اق قاتىناس - تاسىمال قۇرالدارى «جۇڭحۋا حالىق رەسپۋبليكاسىنىڭ شەكارادان كىرىپ - شىعۋدى باسقارۋ زاڭىنداعى» بەلگىلەمەلەرگە ساي، شەكارادان كىرىپ - شىعۋ جونىنەن شەكارا قورعانىس تەكسەرۋىن قابىلداۋى كەرەك.

    12 - تارماق شەكارا قورعانىس كەڭەستەرىندە كەزدەسەتىندەر جانە باسقا دا مەملەكەت قىزمەتكەرلەرى مەن ونىڭ قاتىناس قۇرالى مەملەكەت شەكاراسىنان (شەكارا) ۋاقىتشا كىرىپ - شىعاتىن بولسا، ەلىمىزدىڭ كورشى ەلدەرمەن جاساسقان كەلىسىمى بويىنشا اتقارىلادى.

    13 - تارماق شەكارا اتتاعان ەكونوميكا - ساۋدا سەلبەستىك رايونىنا كىرىپ - شىعاتىن ادامدار، سونداي - اق قاتىناس - تاسىمال قۇرالدارى شەكارادان كىرىپ - شىعۋدى، شەكارا قورعانىسىندىق تەكسەرۋ ءتاسىلى بويىنشا تەكسەرىلەدى.

    شەكارا اتتاعان ەكونوميكا - ساۋدا سەلبەستىك رايونىنا كىرەتىن ادامدار ەلىمىزدىڭ كورشى ەلدەرمەن جاساسقان كەلىسىمىندە بەلگىلەنگەن كۋالىگىن الا ءجۇرۋى ءارى شەكتى ۋاقىتتا، بەلگىلەنگەن وڭىردە قيمىل جاساۋى كەرەك.

    14 - تارماق سىرتقا اشىلعان وتكەلدەر وتكەلدىڭ شەكتەلگەن ءوڭىرىن بەلگىلەسە بولادى.

    وتكەلدىڭ شەكتەلگەن ءوڭىرىن ايىرۋدى وتكەل تۇرعان جەردەگى قوعام حاۋىپسىزدىگى شەكارا قورعانىس تاراۋى وتكەل باسقارۋ سياقتى تاراۋلارمەن بىرگە كورسەتەدى، وتكەل تۇرعان جەردەگى وبلىستىق، قالالىق (ايماقتىق) حالىق ۇكىمەتىنە (اكىمشىلىك مەكەمەسى) بەكىتتىرگەننەن كەيىن اتقارادى.

    15- تارماق ءارقانداي ورىن مەن جەكەنىڭ مىناداي ارەكەتتەردى ىستەۋىنە بولمايدى:

    (1) مەملەكەت شەكارا (شەكارا) بەلگىسىن، سونداي - اق اۋاشالاۋ، باقىلاۋ - مەڭگەرۋ، ساقتاندىرۋ سياقتى شەكارا قورعانىس قۇرىلعىلارىن ويرانداۋىنا، جىلجىتۋىنا، بۇزۋىنا، وشىرۋىنە، بىلعاۋىنا؛

    (2) ۇشۋ اسپابى، كەڭىستىكتە قالىقتايتىن زات سياقتىلاردىڭ زاڭعا قايشى مەملەكەت شەكاراسىنان (شەكارا) وتۋىنە؛

    (3) شەكارا وڭىردە راديو قويۋ، ايعايلاۋ، ۇگىت زاتتارىن قويۋ، كۇشتى جارىق ءتۇسىرۋ سياقتى تاسىلدەر ارقىلى مەملەكەت شەكاراسىن (شەكارا) باسقارۋعا ىقپال جاساۋىنا؛

    (4) شەكارا اتتاعان ەكونوميكا - ساۋدا سەلبەستىك رايونىندا جۇڭگو جاق وڭىرىندەگى اۋاشالاۋ قۇرىلعىلارىنىڭ ەكى جاعىنا بۇيىمداردى لاقتىرىپ بەرۋىنە، جەتكىزۋىنە نەمەسە لاقتىرىپ بەرگەن، جەتكىزگەن بۇيىمداردى قابىلداۋىنا، جاسىرۋىنا؛

    (5) شەكارا اتتاعان ەكونوميكا - ساۋدا رايونىنا زاڭسىز كىرىپ - شىعۋعا؛

    (6) زاڭداردا، زاڭ - ەرەجەلەردە ىستەۋگە بولمايدى دەپ بەلگىلەنگەن باسقا دا ارەكەتتەر.

    16 - تارماق ءارقانداي ورىن مەن جەكەنىڭ مەملەكەت شەكاراسى (شەكارا) باعىتىن وزگەرتەتىن نەمەسە وزگەرتۋى مۇمكىن بولعان، شەكارا وزەندەردىڭ، شەكارا باسقارۋ رايونىنداعى شەكارا اتتاعان وزەندەردىڭ ورنىقتىلىعىىنا ىقپال جاسايتىن نەمەسە ىقپال جاساۋى مۇمكىن بولعان قيمىلداردى ءوز بەتىمەن ىستەۋىنە بولمايدى؛ شىنىندا ىستەۋگە تۋرا كەلسە، ەلىمىزدىڭ كورشى ەلدەرمەن جاساسقان كەلىسىمگە جانە ەلىمىز قاتىستى بەلگىلەمەلەرىنە ساي اتقارۋ كەرەك.

    مەملەكەتكە بەكىتتىرمەي تۇرىپ شەكارا بەلدەۋىندە عيمارات، قۇرىلعى سالۋعا بولمايدى.

    ءۇشىنشى تاراۋ شەكارا رايوندى باسقارۋ

    17 - تارماق شەكارا باسقارۋ رايونىن اۆتونوميالى رايوندىق حالىق ۇكىمەتى شەكارا قورعانىسىن باسقارۋ قاجەتىنە ساي ايىرادى جانە رەتتەيدى، شەكارا اتتاعان ەكونوميكا - ساۋدا سەلبەستىك رايونىن ەلىمىز كورشى ەلدەرمەن جاساسقان كەلىسىم بويىنشا ايىرادى جانە رەتتەيدى. اۆتونوميالى رايوندىق حالىق ۇكىمەتى شەكارا باسقارۋ رايونىندا، شەكارا اتتاعان ەكونوميكا - ساۋدا سەلبەستىك رايونىندا سايكەستى بەلگى ورناتادى.

    شەكاراداعى ەرەكشە شەكتەلگەن ءوڭىردى وبلىستىق، قالالىق (ايماقتىق) حالىق ۇكىمەتى (اكىمشىلىك مەكەمەسى) شەكارانى باسقارۋ، لاڭكەستىككە قارسى تۇرىپ، ورنىقتىلىقتى قورعاۋ قاجەتىنە ساي ايىرادى جانە رەتتەيدى ءارى اۆتونوميالى رايوندىق حالىق ۇكىمەتىنە ەستەلىككە الدىرادى. ەرەكشە مەڭگەرىلەتىن مەزگىلدە قوعام حاۋىپسىزدىگى شەكارا قورعانىس تاراۋىنىڭ ماقۇلداۋىنسىز ءارقانداي ادامنىڭ شەكاراداعى ەرەكشە شەكتەلگەن وڭىرگە كىرۋىنە بولمايدى.

    18 - تارماق شەكارا باسقارۋ وڭىرىندە شەكارادان كىرىپ - شىعاتىن ادامدار ءوزىنىڭ شەكارادان كىرىپ - شىعۋداعى كۇشكە يە كۋالىگى ارقىلى شەكارا باسقارۋ رايونىنان كىرىپ - شىعادى. شەتەلدىكتەر شەكارادان كىرىپ - شىعۋدان سىرت، شەكارا وڭىرىنە كىرۋىنە بولمايدى.

    شەكارا باسقارۋ رايونىندا تۇراقتى قونىستانعان ادامدار ءوزىنىڭ تۇرعىندار ازاماتتىق كۋالىگىمەن تۇراقتى قونىستانعان جەردەگى شەكارا باسقارۋ رايونىنان كىرىپ - شىعادى.

    باسقا ادامدار شەكارا باسقارۋ رايونىنا كىرىپ - شىققاندا، «شەكارا باسقارۋ رايونى جولحاتىن» نەمەسە قوعام حاۋىپسىزدىگى شەكارا قورعانىس تاراۋى مويىندايتىن باسقا دا كۇشكە يە كۋالىگىن الا ءجۇرۋى كەرەك.

    19 - تارماق مىناداي جايتتەردىڭ بىرىندە «شەكارا باسقارۋ رايونى جولحاتىن» بەرۋگە بولمايدى:

    (1) قىلمىستىق ىستەر جازاسىنا كەسىلىپ جازانى اتقارىپ بولماعاندار نەمەسە قىلمىستىق ىستەر دەلوسىنداعى ايىپكەرلەر، قىلمىس كۇماندىلارى؛

    (2) اتكەزشىلىك ىستەۋ، مەملەكەت شەكاراسىن (شەكارا) باسقارۋعا زالال جەتكىزۋ سياقتى قىلمىستىق ارەكەتتەر سالدارىنان سوتتالعاندار، جازاعا تارتىلىپ، جازانى اتقارىپ بولعانىنا ءبىر جىل تولماعاندار؛

    (3) مەملەكەت شەكاراسىن (شەكارا) باسقارۋعا زالال جەتكىزۋ سياقتى زاڭعا قايشىلىق جاساۋ ارەكەتتەرى سالدارىنان اكىمشىلىك جازاعا تارتىلىپ ءبىر جىلعا تولماعاندار؛

    (4) زاڭداردا، زاڭ - ەرەجەلەردە بەرۋگە بولمايدى دەپ بەلگىلەنگەن باسقا دا جايتتەر.

    20 - تارماق ءارقانداي ورىن مەن جەكەنىڭ مىناداي ارەكەتتەردى ىستەۋىنە بولمايدى:

    (1) كۇشكە يە كۋالىگى جوق ادامداردى شەكارا باسقارۋ رايونىنان كىرىپ - شىعۋعا ۇيىمداستىرۋىنا، ودان وتكىزۋىنە، ەنگىزۋىنە؛

    (2) كۇشكە يە كۋالىگى جوق ادامدارعا شەكارا باسقارۋ رايونىنان كىرىپ - شىعاتىن ءتيىمدى شارت - جاعداي جاراتۋىنا؛

    (3) كۇشكە يە كۋالىگى جوق ادامداردى شەكارا باسقارۋ رايونىنا تۇرعىزۋىنا، ورنالاستىرۋىنا؛

    (4) زاڭداردا، زاڭ - ەرەجەلەردە شەكارا باسقارۋ رايونىن باسقارۋعا قايشى دەپ بەلگىلەنگەن باسقا دا ارەكەتتەر.

    21 - تارماق قوعام حاۋىپسىزدىگى شەكارا قورعانىس تاراۋى شەكارا باسقارۋ رايونىندا شەكارالىق تەكسەرۋ پۋنكتىن قۇرىپ، شەكارا باسقارۋ رايونىنان كىرىپ - شىعاتىنداردى جانە ونىڭ كەرەك - جاراق بۇيىمدارىن، قاتىناس - تاسىمال قۇرالىن جانە تيەلگەن زاتتارىن تەكسەرەدى.

    قوعام حاۋىپسىزدىگى شەكارا قورعانىس تاراۋى شەكارا باسقارۋ قاجەتىنە ساي، شەكارا رايوندا نەمەسە شەكارا رايونعا كەلىپ - كەتەتىن قاتىناس ماڭىزدى جولدارىنا ۋاقىتشا تەكسەرۋ ءتۇيىنىن (قاراۋىل) قۇرىپ، زاڭ بويىنشا شەكارالىق تەكسەرۋ جۇرگىزسە بولادى.

    22 - تارماق شەكارا باسقارۋ رايونىندا ەمەس تۇرعىندار، شەكارا باسقارۋ وڭىرىندە تۇراقتى قونىستانباعان ادامدار شەكارا باسقارۋ رايونىندا تۇنەيتىن بولسا، تۇنەتەتىن ورىن نەمەسە جەكە تۇنەيتىن ادامنىڭ اتى - ءجونى، مەكەن - جايى، كەلۋ سەبەبى سياقتى احۋالدارىن ەستەلىككە الۋى ءارى 24 ساعات ىشىندە قوعام حاۋىپسىزدىگى شەكارا قورعانىس ساقشى بولمشەسىنە مالىمدەپ تىزىمدەتۋى كەرەك.

    23 - تارماق شەكارا باسقارۋ رايونىندا بارلاۋ، كەن قازۋ، اعاش كەسۋ، تاس، توپىراق قازۋ، ءدارى ءشوپ جيناۋ، بالىق اۋلاۋ، قوپارۋ سياقتى ءوندىرىس قيمىلدارىمەن شۇعىلداناتىن ورىندار مەن جەكەلەر 15 كۇن بۇرىن قاتىستى اكىمشىلىك باسقارۋ تاراۋى بەكىتكەن حۇجاتتى الىپ، تۇرعان جەرىندەگى قوعام حاۋىپسىزدىگى شەكارا قورعانىس تاراۋىنا ءوندىرىس قيمىلىنىڭ مەرزىم شەگىن، كاسىپكەرلەردىڭ ينفورماتسيالارىن، ت. ب احۋالىن مالىمدەۋى كەرەك. ماۋسىم بويىنشا ءوندىرىستى توقتاتاتىن نەمەسە قايتا جۇمىس ىستەيتىن ورىندار ءار رەت جۇمىس توقتاتقاننان كەيىن نەمەسە قايتا جۇمىس ىستەۋدەن بۇرىن 24 ساعات ىشىندە ءوندىرىستى توقتاتاتىن نەمەسە جۇمىستى قايتا باستايتىن ۋاقىتتىڭ مەرزىم شەگى، جۇمىسكەرلەردىڭ ينفورماتسيالارى سياقتى احۋالداردى تۇرعان جەرىندەگى قوعام حاۋىپسىزدىگى شەكارا قورعانىس ساقشى بولىمشەسىنە ەستەلىككە الدىرۋى كەرەك.

    مەملەكەت شەكاراسىنىڭ (شەكارا) ءبىز جاقتاعى 1000 مەتر كولەم ىشىندە الدىنعى تارماقشادا بەلگىلەنگەن قيمىلدارمەن شۇعىلدانسا دا تۇرعان جەرىندەگى شەكارا قورعانىس قوسىنىنا مالىمدەۋى كەرەك.

    24 - تارماق شەكارا وڭىرىندە ولشەۋ - سىزۋ، فيلمگە ءتۇسىرۋ، عىلمي تەكسەرۋ جۇرگىزۋ، جەر ورتەۋ سياقتى قيمىلدارمەن شۇعىلدانعاندا، الدىمەن سول جەردەگى قوعام حاۋىپسىزدىگى شەكارا قورعانىس تاراۋىنا، شەكارا قورعانىس قوسىنىنا مالىمدەۋ ءارى جۇمىستى بەلگىلەنگەن كولەمدە ىستەۋى كەرەك. ۇشاقپەن ولشەۋ، ۇشاقپەن سۋرەتكە الۋ جۇمىسىمەن شۇعىلداناتىن بولسا، مەملەكەتتىڭ قاتىستى بەلگىلەمەسى بويىنشا اتقارىلادى.

    شەكارا وڭىرىندە بەلگىلەمەگە قايشى وق شىعارۋعا بولمايدى.

    25 - تارماق شەكارا وڭىرىندە مال باققاندار مال سوڭىنان قالماۋى، مالدىڭ شەكارا سىزىعىنان ءوتىپ كەتۋىنەن ساقتانۋى كەرەك. ءبىز جاقتىڭ مالى كورشى ەلدىڭ شەكاراسىنا ءوتىپ كەتسە، جەكەلەردىڭ ءوز بەتىمەن شەكارادان ءوتىپ مالىن قايىرۋىنا، الىپ قايتۋىنا بولمايدى، سول جەردەگى قوعام حاۋىپسىزدىگى شەكارا تاراۋىنا نەمەسە شەكارا قورعانىس اسكەري بولىمىنە دەر كەزىندە مالىمدەۋى، شەكارا قورعانىس اسكەري ءبولىمى قاتىستى بەلگىلەمەگە ساي ءبىر جاقتى ەتۋى كەرەك؛ كورشى ەل تاپىسرىپ بەرگەن ءبىز جاقتىڭ مالىن شەكارا قورعانىس قوسىنى تاپسىرىپ العاننان كەيىن، سول جەردەگى قوعام حاۋىپسىزدىگى شەكارا قورعانىس تاراۋىنا تاپسىرىپ، قاتىستى بەلگىلەمە بويىنشا ءبىر جاقتى ەتىلەدى.

    كورشى ەلدىڭ مالى ەلىمىز شەكاراسى سىزىعىنان كىرىپ، مەملەكەت شەكاراسىنا (شەكارا) تاياۋ ماڭدا بولسا، سول جەردىڭ وزىندە ايداپ شىعارادى؛ ەلىمىز شەكارا سىزىعىنان (شەكارا) ءبىرشاما ىشكەرىلەپ كەتسە، سول جەردەگى قوعام حاۋىپسىزدىگى شەكارا قورعانىس تاراۋىنا نەمەسە شەكارا قورعانىس اسكەري بولىمىنە دەر كەزىندە تاپىسرۋى كەرەك. جاسىرۋعا، پايدالانۋعا، الىپ ساتۋعا نەمەسە سويۋعا بولمايدى.

    26 - تارماق شەكارا وڭىردەن شەكارا وتكەلى جولىن، ساياحات كورىنىس رايونىن )ءتۇيىنىن( قۇراتىن، كەڭەيتىپ سالاتىن بولسا، اۆتونوميالى رايوندىق قوعام حاۋىپسىزدىگى شەكارا قورعانىس تاراۋىنىڭ، شەكارا قورعانىس ءبولىمىنىڭ، سونداي - اق سىرتقى ىستەر تاراۋىنىڭ پىكىرىن الۋ، مەملەكەتتىڭ قاتىستى بەلگىلەمەسىنە ساي قاتىستى راسمياتتاردى وتەۋ كەرەك.

    27 - تارماق ءارقانداي ورىن مەن جەكە شەكارادان زاڭسىز وتكەندەردى، شەكارا باسقارۋ رايونىنا زاڭسىز كىرگەندەردى نەمەسە باسقا دا كۇماندى ادامداردى بايقاسا، قوعام حاۋىپسىزدىگى شەكارا قورعانىس تاراۋىنا نەمەسە شەكارا قورعانىس بولىمىنە دەر كەزىندە مالىمدەۋى كەرەك.

    82 - تارماق شەكارا وزەنىنەن، شەكارا باسقارۋ رايونىنداعى شەكارا اتتاعان وزەننەن ءسۇزىپ الىنعان كۇماندى قالقىما زاتتاردى نەمەسە شەكارا باسقارۋ رايونىنان تاۋىپ الىنعان كۇماندى زاتتاردى ءوز بەتىمەن ءبىر جاقتى ەتپەي، قوعام حاۋىپسىزدىگى شەكارا قورعانىس تاراۋىنىڭ نەمەسە شەكارا قورعانىس ءبولىمىنىڭ ءبىر جاقتى ەتۋىنە دەر كەزىندە تاپسىرۋ كەرەك.

    ءتورتىنشى تاراۋ زاڭدىق جاۋاپكەرلىك

    29 - تارماق وسى ەرەجەدەگى بەلگىلەمەلەرگە قايشىلىق جاساپ، شەكارا قورعانىس تەكسەرۋ پۋنكتىنىڭ، اتقارۋ ءتۇيىنىنىڭ (قاراۋىلدىڭ) ۇكىمەت جۇمىسىن زاڭ بويىنشا اتقارۋىنان باس تارتسا، شەكارا قورعانىس تەكسەرۋ پۋنكتى نەمەسە اتقارۋ ءتۇيىنى (قاراۋىل) قاراستى قوعام حاۋىپسىزدىگى شەكارا قورعانىس ساقشى بولىمشەسى ەسكەرتۋ بەرەدى. تۇزەتۋگە بۇيىرادى؛ تۇزەتۋدەن باس تارتسا، 50 يۋاننان جوعارى، 200 يۋاننان تومەن ايىپ سالادى.

    30 - تارماق وسى ەرەجەدەگى بەلگىلەمەگە قايشىلىق جاساپ مىناداي ارەكەتتەردىڭ ءبىرىن كەزىكتىرسە، ەسكەرتۋ بەرىلەدى ءارى 200 يۋاننان جوعارى 500 يۋاننان تومەن ايىپ سالىنادى؛ كۇناسى اۋىر بولسا، 500 يۋاننان جوعارى، 2000 يۋاننان تومەن ايىپ سالىنادى:

    (1) شەكارا باسقارۋ رايونىنا كىرىپ - شىعاتىن كۇشكە يە كۋالىكتەرى بولماسا؛

    (2) كۇشكە يە كۋالىگى جوق ادامعا شەكارا باسقارۋ رايونىنا كىرىپ - شىعۋعا ءتيىمدى شارت - جاعداي ازىرلەسە؛

    (3) كۇشكە يە كۋالىگى جوق ادامدى شەكارا باسقارۋ رايونىنا تۇرعىزسا، ورنالاستىرسا؛

    (4) شەكارا باسقارۋ رايونىندا ەمەس تۇرعىنداردى، شەكارا باسقارۋ رايونىندا تۇراقتى قونىستانباعان ادامداردى تۇنەتكەن ورىندار نەمەسە جەكەلەر بەلگىلەنگەن مەرزىم شەگى بويىنشا قوعام حاۋىپسىزدىگى شەكارا قورعانىس ساقشى بولىمشەسىنە مالىمدەپ تىزىمدەتپەسە؛

    (5) شەكارا وڭىرىندە باعىپ جۇرگەن مالى شەكارادان ءوتىپ كەتسە؛

    (6) شەكارا وزەننەن، شەكارا باسقارۋ رايونىنداعى شەكارا اتتاعان وزەننەن ءسۇزىپ الىنعان كۇماندى قالقىما زاتتاردى جانە شەكارا باسقارۋ رايونىنان تاۋىپ العان كۇماندى زاتتاردى ءوز بەتىمەن ءبىر جاقتى ەتسە.

    31 - تارماق وسى ەرەجەدەگى بەلگىلەمەگە قايشىلىق جاساپ، شەكارا اتتاعان ەكونوميكا - ساۋدا سەلبەستىك رايونىنان زاڭعا قايشىلىق جاساپ كىرىپ - شىقسا نەمەسە شەكارا اتتاعان ەكونوميكا - ساۋدا وڭىرىنە كىرگەن ادامدار شەكتى ۋاقىتتا شىعىپ كەتپەسە 500 يۋاننان جوعارى، 1000 يۋاننان تومەن ايىپ سالىنادى؛ كۇناسى اۋىر بولسا 1000 يۋاننان جوعارى، 5000 يۋاننان تومەن ايىپ سالىنادى.

    وسى ەرەجەدەگى بەلگىلەمەگە قايشىلىق جاساپ، شەكارا اتتاعان ەكونوميكا - ساۋدا سەلبەستىك رايونىنىڭ جۇڭگو جاق وڭىرىندەگى اۋاشالاۋ قۇرىلعىلارىنىڭ ەكى جاعىنا زات لاقتىرسا، جىبەرىپ بەرسە نەمەسە لاقتىرىپ جىبەرىپ بەرگەن زاتتى قابىلداسا، جاسىرسا، زات قۇنىنىڭ 3 ەسەسىندەي اقشالاي ايىپ سالىنادى ءارى زاڭعا قايشى دۇنيە - مۇلكى تاركىلەنەدى؛ قىلمىسقا تولعاندارىنىڭ قىلمىستىق ىستەر جاۋاپكەرلىگى زاڭ بويىنشا قۋزاستىرىلادى.

    32 - تارماق وسى ەرەجەدەگى بەلگىلەمەگە قايشىلىق جاساپ مىناداي ارەكەتتەردىڭ ءبىرىن كەزىكتىرسە، 1000 يۋاننان جوعارى، 5000 يۋاننان تومەن ايىپ سالىنادى؛ كۇناسى اۋىر بولسا، 5000 يۋاننان جوعارى، 10 مىڭ يۋاننان تومەن ايىپ سالىنادى؛ زاڭعا قايشى دۇنيە - مۇلكى بولسا تاركىلەنەدى:

    (1) شەكاراداعى ەرەكشە مەڭگەرىلەتىن رايونعا ءوز بەتىمەن كىرسە؛

    (2) كۇشكە يە كۋالىگى جوق ادامداردى شەكارا باسقارۋ رايونىنان كىرىپ - شىعۋعا ۇيىمداستىرسا، وتكىزىپ قويسا نەمەسە شەكارادان زاڭعا قايشى وتكەندەردى جاسىرسا، وعان قارجىلاي كومەكتەسسە؛

    (3) شەكارا باسقارۋ رايونىندا بارلاۋ، كەن قازۋ، اعاش كەسۋ، توپىراق، تاس قازۋ، ءدارى ءشوپ جيناۋ، بالىق اۋلاۋ، قوپارۋ سياقتى ءوندىرىس قيمىلدارىمەن شۇعىلدانىپ، بەلگىلەمە بويىنشا شەكتى مەرزىمدە مالىمدەمەسە نەمەسە ەستەلىككە الدىرماسا؛

    (4) شەكارا وڭىرىندە جەر ورتەۋ قيمىلىمەن شۇعىلدانعاندا، بەلگىلەمە بويىنشا مالىمدەمەسە نەمەسە كورسەتىلگەن كولەم ىشىندە جۇمىس ىستەمەسە؛

    (5) شەتەلدىكتەر شەكارا وڭىرىنە الباتى كىرسە؛

    (6) كورشى ەلدىڭ ەلىمىز شەكاراسىنان كىرگەن مالىن جاسىرسا، پايدالانسا، الىپ ساتسا نەمەسە سويسا؛

    (7) ۇشۋ اسپابى، كەڭىستىكتە قالىقتايتىن زات سياقتىلاردى مەملەكەت شەكاراسىن (شەكارا) اتتاپ وتكىزسە؛

    (8) شەكارا وڭىرىندە راديو قويۋ، ايعايلاۋ، ۇگىت زاتتارىن قويۋ، كۇشتى جارىق ءتۇسىرۋ سياقتى تاسىلدەر ارقىلى مەملەكەت شەكاراسىن (شەكارا) باسقارۋعا ىقپال جاساسا.

    33 - تارماق وسى ەرەجەدەگى بەلگىلەمەگە قايشىلىق جاساپ مىناداي جايتتەردىڭ ءبىرىن كەزىكتىرسە، 5000 يۋاننان جوعارى، 10 مىڭ يۋاننان تومەن ايىپ سالىنادى؛ زاڭعا قايشى دۇنيە - مۇلكى بولسا، تاركىلەنەدى؛ قىلمىسقا تولعاندارىنىڭ قىلمىستىق ىستەر جاۋاپكەرلىگى زاڭ بويىنشا قۋزاستىرىلادى:

    (1) مەملەكەت شەكاراسىنداعى (شەكارا) بەلگىلەردى بۇزسا، وشىرسە، بىلعاسا، سونداي - اق اۋاشالاۋ، باقىلاۋ - مەڭگەرۋ، ساقتاندىرۋ سياقتى شەكارا قورعانىس قۇرىلعىلارىن ويرانداسا، جىلجىتسا، بۇزسا، وشىرسە، بىلعاسا؛

    (2) شەكارا وڭىرىندە ولشەۋ - سىزۋ، فيلمگە ءتۇسىرۋ، عىلمي تەكسەرۋ سياقتى قيمىلدارمەن شۇعىلدانعاندا بەلگىلەمە بويىنشا مالىمدەمەسە، كورسەتىلگەن كولەمدە قيمىل جۇرگىزبەسە؛

    (3) شەكارا وڭىرىندە بەلگىلەمەگە قايشىلىق جاساپ وق شىعارسا.

    34 - تارماق وسى ەرەجەدەگى بەلگىلەمەگە قايشىلىق جاساپ، مەملەكەت شەكاراسى (شەكارا) باعىتىن وزگەرتسە نەمەسە وزگەرتۋى مۇمكىن بولسا، شەكارا وزەنىنىڭ، شەكارا باسقارۋ رايونىنداعى شەكارا اتتاعان وزەننىڭ ورنىقتىلىعىنا ىقپال جاسايتىن نەمەسە ىقپال جاساۋ مۇمكىندىگى بار قيمىلداردى ىستەسە؛ بەكىتتىرمەي تۇرىپ شەكارا بەلدەۋىنەن عيمارات، قۇرىلعى سالسا؛ بۇرىنعى كۇيىن قالپىنا كەلتىرۋگە بۇيىرادى، 10 مىڭ يۋاننان جوعارى، 50 مىڭ يۋاننان تومەن ايىپ قوسا سالىنادى.

    35 - تارماق شەكارا باسقارۋ قىزمەتكەرلەرى قىزمەتىنە نەمقۇرايدى قاراپ، قىزمەت ۇقىعىن الباتى پايدالانىپ، بەتكە قاراپ، جولدان تايسا، تۇرعان ورنى نەمەسە جوعارى دارەجەلى باسقارۋشى تاراۋ زاڭ بويىنشا شارا قولدانادى؛ قىلمىسقا تولعاندارىنىڭ قىلمىستىق ىستەر جاۋاپكەرلىگى زاڭ بويىنشا قۋزاستىرىلادى.

    36 - تارماق وسى ەرەجەدە بەلگىلەنگەن اكىمشىلىك جازانىڭ 29 - تارماعىنان باسقاسىن اۋدان دارەجەلىدەن جوعارى قوعام حاۋىپسىزدىگى شەكارا قورعانىس تاراۋى بەلگىلەيدى؛ مۇندا ەسكەرتۋ بەرۋ جانە 500 يۋاننان تومەن ايىپ سالۋ جازاسىن قوعام حاۋىپسىزدىگى شەكارا قورعانىس ساقشى بولىمشەسى بەلگىلەيدى.

    37 - تارماق وسى ەرەجەگە قايشىلىق جاساپ، جازالاۋعا ءتيىستى باسقا دا ارەكەتى بارلار قاتىستى زاڭدارداعى، زاڭ - ەرەجەلەردەگى بەلگىلەمەلەرگە ساي جازالانادى.

 بەسىنشى تاراۋ قوسىمشا ەرەجە

    38 - تارماق وسى ەرەجەدەگى كەي سوزدەردىڭ ماعىناسى:

    (1) شەكارا اتتاعان ەكونوميكا - ساۋدا سەلبەستىك رايونى دەگەندە، ەلىمىز كورشى ەلدەرمەن جاساسقان كەلىسىمگە ساي قۇرىلعان، ەكى جاق شەكاراسىنداعى تۇيىلىسكەن رايونىنا ورنالاسقان، جابىق باسقارۋ جۇرگىزەتىن ساۋدا، ەكونوميكا جانە قارجى قوسۋ سەلبەستىك ورتالىعى مەڭزەلەدى.

    (2) شەكارالىق ەرەكشە مەڭگەرىلەتىن رايون دەگەندە، شەكارا باسقارۋ رايونىنا ايىرىپ بەرىلگەن بەلگىلى كولەمدەگى ۋاقىتشا ەرەكشە باسقارىلاتىن ءوڭىر مەڭزەلەدى.

    (3) شەكاراداعى تۇرعىنداردىڭ بازار ساۋدا رايونى (ءتۇيىنى) دەگەندە، ەلىمىز قۇرلىقتىق شەكاراسىنان 20 كيلومەتر ىشكەرى، اۆتونوميالى رايوندىق حالىق ۇكىمەتى بەكىتكەن، ەلىمىزدىڭ شەكارا تۇرعىندارى مەن كورشى ەلدەردىڭ شەكارا تۇرعىندارى بەلگىلەنگەن سومادان نەمەسە ساننان اسىرماي تاۋار ساۋداسى قيمىلىن ورىستەتەتىن اشۋ تۇيىندەرى مەن بەلگىلەنگەن شوعىرلى بازار مەڭزەلەدى.

    (4) شەكارا وتكەل جولى دەگەندە، ەلىمىز بەن كورشى ەلدەر جاساسقان كەلىسىمگە ساي قۇرىلعان، كىرىپ - شىعاتىن شەكارا وتكەلىنەن باسقا مەملەكەت شەكاراسىنىڭ (شەكارا) قۇرلىقتىق وتكەلى مەڭزەلەدى.

    39 - تارماق شەكارا باسقارۋ قىزمەتىندە شەكارا قورعانىس بولىمىنە ساياتىن شەكارا قورعانىس ىستەرى مەملەكەتتىڭ قاتىستى بەلگىلەمەسى بويىنشا اتقارىلادى.

    40 - تارماق بۇل ەرەجە 2017 - جىلى 1 - قاڭتاردان باستاپ اتقارىلادى.

    (اۋدارماسىن اۆتونوميالى رايوندىق حالىق قۇرىلتايى تۇراقتى كوميتەتى كەڭسەسىنىڭ زاڭ - ەرەجەلەر اۋدارماسىن قاراپ بەكىتۋ گرۋپپاسى قاراپ بەكىتتى)

جاۋاپتى رەداكتور : الىمبەك نۇرالين

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.

  • وسى كەزەكتى جۇڭگو − ازيا - ەۆروپا كورمەسى تۇڭعىش رەت نەگىزگى قوناق ولكەلەردى بەلگىلەدى
  • تاپسىرىس ونىمدەردى جەدەل ءوندىرىپ، قامداۋدى قامتاماسىز ەتتى
  • جىلدىق مىندەتتى ءساتتى ورىنداۋعا شىنايى كەپىلدىك ەتتى
  • شينجياڭ جۇڭتاي توبى دۇنيە جۇزىندەگى 500 قۋاتتى كاسىپورىن قاتارىنا ءوتتى
  • جەل - جارىق ەنەرگياسى ءوزارا تولىقتىردى