− باس شۋجي شي جينپيڭنىڭ شينجياڭ ۋاكىلدەر ۇيىرمەسىنىڭ تالقىسىنا قاتىناسقانى تۋرالى
تىلشىلەرىمىز ياۋ تۇڭ، لي ياڭ
3-ايدىڭ 10-كۇنى ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ مەملەكەتتىك 12 - كەزەكتى حالىق قۇرىلتايىنىڭ 5 - ماجىلىسىنە قاتىناسىپ جاتقان شينجياڭ ۋاكىلدەر ۇيىرمەسىنىڭ تالقىسىنا قاتىناستى. سۋرەتتە: شي جينپيڭ ۋاكىلدەرمەن ىستىق ىقىلاسپەن اڭگىمەلەسۋدە. (شينحۋا اگەنتتىگى)
3-ايدىڭ 10-كۇنى ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ مەملەكەتتىك 12 - كەزەكتى حالىق قۇرىلتايىنىڭ 5 - ماجىلىسىنە قاتىناسىپ جاتقان شينجياڭ ۋاكىلدەر ۇيىرمەسىنىڭ تالقىسىنا قاتىناستى. حوتان ايماعىنان كەلگەن ۋاكىل مامەترەيىم ءمامتىمىن قۇربان اتايدىڭ وتباسىنداعىلاردىڭ سۋرەتىن باس شۋجيگە كورسەتتى. باس شۋجي سۋرەتكە مۇقيات ءۇڭىلىپ، قۇربان اتايدىڭ وتباسىنداعىلاردىڭ قىزمەت، تۇرمىس جاعدايىن ەگجەي - تەگجەيلى ۇعىسىپ، ولارعا مامەترەيىم ءمامتىمىن ارقىلى سالەم جولدادى. (شينحۋا اگەنتتىگى)
3- ايداعى بەيجيڭ. ماگنوليا شەشەك اتقان، اسپاندا تەڭگەدەي بۇلت جوق. حالىق سارايىنىڭ شينجياڭ زالىنان جىلى لەپ ەستى، شينجياڭداعى تيانشان تاۋىنىڭ تۇستىگى مەن تەرىستىگى وسى جىلى لەپپەن جەلپىنگەندەي.
3-ايدىڭ 10-كۇنى تۇستەن بۇرىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ مەملەكەتتىك 12 - كەزەكتى حالىق قۇرىلتايىنىڭ 5 - ماجىلىسىنە قاتىناسىپ جاتقان شينجياڭ ۋاكىلدەر ۇيىرمەسىنە كەلىپ، ۋاكىلدەرگە امانداسىپ، كوپشىلىكپەن بىرگە مەملەكەت ىستەرىن اقىلداستى.
ىقىلاستى قامقورلىقتى ماڭگى ۇمىتپايمىز، ءار ۇلت حالقى پارتياعا جان تارتادى
شينجياڭ ۋاكىلدەر ۇيىرمەسىندەگى ۋاكىلدەر حالىق سارايىنىڭ شينجياڭ زالىنا ەرتە كەلىپ العان، ءبارىنىڭ دە جۇزىنەن باقىت كۇلكىسى ەسكەن، ولشەۋسىز قۋانىش پەن اسەرلى كوڭىل كۇيلەرىن باسا الماي، تاقاتسىزدانا كۇتۋمەن بولدى.
ساعات 9دا باس شۋجي شي جينپيڭ شينجياڭ زالىنا كۇلىمسىرەي كەلىپ كىرگەندە، دۋ قول شاپالاق ءۇنى كوپكە دەيىن باسىلمادى. شاتىرلاعان وسى شاپالاق ءۇنى شينجياڭ ۋاكىلدەر ۇيىرمەسىندەگى جالپى ۋاكىلدەردىڭ باس شۋجيگە دەگەن شىنايى قولداۋى مەن شەكسىز قۇرمەتىن اڭعارتىپ، شينجياڭداعى ءار ۇلت حالقىنىڭ شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا قوعام ورنىقتىلىعى مەن باياندى تىنىشتىق باس نىساناسىن دايەكتى تياناقتاندىرۋ جونىندەگى بەرىك سەنىمىن بەينەلەدى.
«قادىرلى باس شۋجي، سالەمەتسىز بە، مەن قاشقاردان كەلگەن رايحانگۇل يمىرمىن، مەن شينجياڭداعى ءار ۇلت حالقى اتىنان سىزگە دوپپا تارتۋ ەتپەكشىمىن، وسى ارقىلى وسكەلەڭ قۇرمەتىمىزدى بەينەلەپ، سىزگە ەڭ ىزگى تىلەكتەر تىلەيمىز...». ۇلتتىق كيىم كيگەن ۋاكىل رايحانگۇل يمىر مەن ۋاكىل مامەترەيىم ءمامتىمىن باس شۋجيگە بادام دوپپا تارتۋ ەتتى، باس شۋجي ولاردىڭ تارتۋىن قۋانا قابىل الدى.
باس شۋجي شي جينپيڭ ۋاكىلدەرمەن ءبىر - بىرلەپ قول الىسىپ، ىقىلاستى امانداستى، ءالسىن - ءالى توقتاي قالىپ، ءاربىر ۋاكىلدىڭ ناقتى جاعدايىن ىقىلاسپەن ۇعىستى. شاتتىق پەن اسەرلى كوڭىل كۇي وسىنداعى ءاربىر جاندى ايىرىقشا تولقىتىپ، تەرەڭ تەبىرەنتتى.
كوپشىلىك باس شۋجي شي جينپيڭنىڭ شينجياڭعا قاي - قاشان دا ىقىلاس تانىتىپ، شينجياڭداعى ءار ۇلت حالقىن ايالاپ، بايىنعولين موڭعۇل اۆتونوميالى وبلىسى، قاشقار، قارامايلى، شىحىزى، ۋجياچۇي، ءۇرىمجى قاتارلى جەرلەرگە بارعانىن ۇمىتا المايدى. وتە - موتە، پارتيانىڭ 18 - قۇرىلتايىنان بەرى، باس شۋجي شينجياڭ سىندى ىرىستى توپىراقتى، شينجياڭداعى ءار ۇلت كادر - جۇرتشىلىعىن قاي - قاشان دا ەسىنەن شىعارماي، ورتالىق كوميتەت ساياسي بيۋروسىنىڭ تۇراقتى كوميتەت ءماجىلىسىن، ورتالىق كوميتەت ساياسي بيۋروسىنىڭ ءماجىلىسىن تالاي رەت اشىپ، شينجياڭ قىزمەتىنە زەرتتەۋ جۇرگىزىپ، ورنالاستىرۋ جاسادى؛ شينجياڭنىڭ ورنىقتىلىعى، دامۋى جونىنەن ءبىرسىپىرا ماڭىزدى نۇسقاۋ بەردى؛ لوپنۇر اۋدانى شيڭپيڭ اۋىلى داشي قىستاعىنىڭ جالپى تۇرعىندارى مەن قۇربان اتايدىڭ ۇرپاقتارىنا ىلگەرىندى - كەيىندى جاۋاپ حات جازىپ، شينجياڭداعى ءار ۇلت حالقىنا دەگەن كوكەي تەستى ءۇمىتىن ءبىلدىردى؛ 2014 - جىلى ساۋىردە شينجياڭدا قىزمەت تەكسەرىپ، شينجياڭداعى ءار دارەجەلى پارتكوم مەن ۇكىمەتتەن ورتالىقتىڭ جاڭا جاعدايداعى شينجياڭ قىزمەتى جونىندەگى نەگىزگى ساياسات، باعىتتارىن مۇقيات اتقارىپ،
قوعام ورنىقتىلىعى مەن باياندى تىنىشتىقتى قىزمەتتىڭ كوزدەۋ ءتۇيىنى جانە كۇش سالۋ ءتۇيىنى ەتىپ، ءارقايسى جاقتاعى قىزمەتتەردى ءبىر تۇتاس جوسپارلاي وتىرىپ العا ىلگەرىلەتۋدى تالاپ ەتتى؛ 2014 - جىلى مامىردا ورتالىقتىڭ شينجياڭ قىزمەتى جونىندەگى 2 - رەتكى اڭگىمە ءماجىلىسىن باسقارىپ اشىپ، ماڭىزدى ءسوز سويلەپ، شينجياڭ قىزمەتىن ونان سايىن تىڭعىلىقتى جاقسى ىستەۋدىڭ باعىتىن ايقىنداپ، مىندەتىن اشالاپ، قۇدىرەتتى قوزعاۋشى كۇش قوستى. شينجياڭداعى 23 ميلليوننان استام ءار ۇلت حالقى مۇنى ماڭگى باقي ۇمىتپايدى.
مەملەكەتتىك 12 - كەزەكتى حالىق قۇرىلتايىنىڭ 5 - ءماجىلىسى بۇكىل ەل پارتيا 19 - قۇرىلتايىنىڭ جەڭىسپەن اشىلۋىن نىق سەنىممەن، قۋانىشپەن قارسى العان ماڭىزدى كەزەڭدە اشىلعان ءبىر رەتكى توتەنشە ماڭىزدى ءماجىلىس. باس شۋجي شي جينپيڭنىڭ قات - قابات قاربالاستىقتان ارنايى ۋاقىت شىعارىپ، شينجياڭ ۋاكىلدەر ۇيىرمەسىندەگى ۋاكىلدەرگە ىقىلاستى تۇردە امانداسىپ، مەملەكەتتىك حالىق قۇرىلتايىنىڭ شينجياڭداعى ءار ۇلت ۋاكىلدەرىمەن بىرگە تالقىلاپ، دامۋ ىستەرىن بىرگە اقىلداسۋى باس شۋجي شي جينپيڭنىڭ شينجياڭ قىزمەتىنە وسكەلەڭ ءمان بەرەتىندىگىن، شينجياڭداعى ءار ۇلت حالقىنا دەگەن ىقىلاستى قامقورلىعىن تاعى ءبىر رەت تولىق ايگىلەدى.
ىقىلاستى سوزدەر جۇرەككە جىلۋ باعىشتاپ، شىنايى سۇيىسپەنشىلىك تيانشاندى تەبىرەنتتى
اسەرىن سويلەپ، وزگەرىستەردى تىلگە الىپ، ناقتى جاعدايدى بايانداپ، ۇسىنىس قويدى، 3 ساعاتتىق تالقى كەزىندە چىن چۋانگو، شوكىرات زاكىر، سۇن جينلۇڭ، شى جيانيۇڭ، ءابدىراقىپ ءتۇمۇرنياز، مامەترەيىم ءمامتىمىن، فۋ چۇنلي، رايحانگۇل يمىر قاتارلى 8 جولداس ىلگەرىندى - كەيىندى لەبىز ءبىلدىردى. كوپشىلىك اقتارىلا سويلەپ، ءماجىلىس سونشالىقتى قىزۋ بەينەدە اشىلدى.
باس شۋجي شي جينپيڭ كوپشىلىكتىڭ ءسوزىن ەرەكشە زەر سالا تىڭداپ، مۇقيات ەستەلىك الىپ، ءالسىن - ءالى ءسوز قىستىرىپ، جاعدايدى تاپتىشتەي ۇعىسىپ، كوپشىلىكپەن ىشكەرىلەي اۋىس - كۇيىس جاساستى.
چىن چۋانگونىڭ، شوكىرات زاكىردىڭ، سۇن جينلۇڭنىڭ ءسوزىن مۇقيات تىڭداعاننان كەيىن، باس شۋجي شي جينپيڭ شينجياڭنىڭ وتكەن ءبىر جىلداعى قىزمەتتەرىن تولىق تۇراقتاندىردى.
بايىنعولين موڭعۇل اۆتونوميالى وبلىسىنداعى موڭعۇل ۇلتىنىڭ ۋاكىلى شى جيانيۇڭ كورلا المۇرتىن تىرەكتى ءتۇر ەتىپ جەمىس ورمان شارۋاشىلىعىن زور كۇشپەن دامىتۋ جاعدايىن تانىستىردى. سول كەزدە باس شۋجي ءسوز قىستىرىپ، كورلا المۇرتىنىڭ ەگىمشىلىك كولەمىن، ءتۇرىن، ماركاسىن، بازارداعى ساتىلىمىن ەگجەي - تەگجەيلى ۇعىستى ءارى ءوز كەزىندە كورلا المۇرت باعىنا بارىپ ناقتى تەكسەرۋ جۇرگىزگەن ساتتەرىن ەسكە الدى. كورلا المۇرتىنىڭ شەتەلدەردە ساتىلا باستاعانىن ەستىگىندە، باس شۋجي شي جينپيڭ مۇنى قۇپتايتىنىن ءبىلدىردى.
«ءدىني سەنىم ەركىندىگى ساياساتى شينجياڭدا وتە جاقسى تياناقتاندىرىلۋدا، دىنگە سەنەتىن ءار ۇلت جۇرتشىلىعى، وتانشىل ءدىني قايراتكەرلەر پارتيا مەن ۇكىمەتكە شىن جۇرەكتەن العىس ايتادى». ءابدىراقىپ ءتۇمۇرنياز باس شۋجيگە: وتانشىل ءدىني قايراتكەر، قاشقار ايتىكار مەشىتىنىڭ يمامى جۇما تايىر داموللا قاستاندىققا ۇشىراعاننان كەيىن، باس شۋجيدىڭ ىقىلاستى قامقورلىعىندا اۆتونوميالى رايون ونىڭ وتباسىنداعىلارعا ەرەكشە قامقورلىق جاساپ، ولاردىڭ كاسىپتەنۋ، وقۋ، تۇرعىن ءۇي قيىنشىلىعىن شەشىپ بەردى، - دەدى. «ونىڭ ايەلى ماعان ارنايى كەلىپ، ەگەر باس شۋجيمەن ءديدارلاساتىن وراي بولسا، ءسوز جوق، وتباسىمىزدىڭ باس شۋجيگە دەگەن العىس سەزىمىمىزدى جەتكىزىپ قويعايسىز. باس شۋجي ايرىقشا قامقورلىق جاساپ، بارلىق قيىنشىلىعىمىزدى شەشىپ بەردى ءارى ۇنەمى ادام جىبەرىپ حال - جاعدايىمىزدى ۇعىسىپ تۇرادى، بۇكىل وتباسىمىز بۇدان قاتتى اسەرلەندى، قاتتى ءسۇيىندى دەگەن ەدى».
ءابدىراقىپ ءتۇمۇرنيازدىڭ ءسوزىن تىڭداعاننان كەيىن، باس شۋجي شي جينپيڭ: ولارعا مەنەن سالەم ايتىڭىز، - دەدى.
وسىدان سوڭ حوتاننان كەلگەن ۋاكىل مامەترەيىم ءمامتىمىن ءسوز كەزەگىن الدى. باس شۋجي شي جينپيڭ ونان قىستاقتاعى ءاربىر وتباسىنىڭ ەگىستىك جەرىنىڭ مۋ سانىن، استىق ەگەتىنىن، الدە جەمىس اعاشتارىن ەگەتىنىن، جۇپ قۇراپ، تۋىس بولعان - بولماعانىن، ونىڭ ءونىمى قانداي ەكەنىن ەگجەي - تەگجەيلى سۇراپ ۇعىستى. باس شۋجي شي جينپيڭ: بۇل قىزمەتتى تىڭعىلىقتى قانات جايدىرىپ، جۇپ قۇراۋ، تۋىس بولۋدا ناقتى ونىمدىلىككە قول جەتكىزۋ كەرەك، - دەدى. مامەترەيىم ءمامتىمىن: پارتيانىڭ ساياساتى جاقسى! - دەدى. باس شۋجي بۇعان: جاقسى! - دەپ ىلە جاۋاپ قاتتى.
«قۇربان اتايدىڭ ۇيىندەگىلەر ماعان وزدەرىنىڭ سالەمىن باس شۋجيگە جەتكىز دەپ قايتا - قايتا تاپسىردى». بيىل كوكتەم مەرەكەسى قارساڭىندا، باس شۋجي شي جينپيڭ قۇربان تۇلىمنىڭ قىزى توحتىحان وتباسىنا جاۋاپ حات جازىپ، ۇيىندەگىلەر مەن اۋىلداستارىنا سالەم جولداپ، ءار ۇلت بۇقاراسىنان پارتيانىڭ باسشىلىعىندا شينجياڭنىڭ ەرتەڭىن اناعۇرلىم كوركەم ەتە تۇسۋگە تىزە قوسا قۇلشىنۋدى ءۇمىت ەتتى. مەملەكەتتىك ەكى ءماجىلىس كەزىندە، بيىل جاسى 90 عا تاياعان توحتىحان اجەي مامەترەيىم مامتىمىنگە وتباسىنداعىلاردىڭ بىرگە تۇسكەن سۋرەتىن باس شۋجيگە اپارىپ بەر دەپ ارنايى تاپسىردى. ءسوزى اياقتاعاننان كەيىن، مامەترەيىم ءمامتىمىن باتىلدانا ءتۇسىپ، سۋرەتتى قولىنا الىپ باس شۋجيدىڭ جانىنا باردى. باس شۋجي سۋرەتكە زەر سالا قاراپ، قۇربان اتايدىڭ ۇيىندەگىلەردىڭ قىزمەت، تۇرمىس جاعدايىن تاپتىشتەپ سۇراستىردى.
«بۇل ۇيدەگىلەر قازىر دە سول جەردە تۇرمىس كەشىرىپ جاتىر ما؟».
«كوپشىلىگى سوندا، مىناۋ توحتىحان، جانىندا تۇرعان سىزگە حات جازعان رۋحيام بولادى».
باس شۋجي شي جينپيڭ مامەترەيىم مامتىمىنگە ءوزىنىڭ قۇربان اتايدىڭ ۇلكەن قىزى توحتىحان وتباسىنا دەگەن سالەمىن جەتكىزۋدى تاپسىردى.
مامەترەيىم ءمامتىمىن اسەرلەنە: قانداي كەرەمەت! 1958 - جىلى قۇربان اتاي بەيجيڭگە كەلىپ ءتوراعا ماۋ زىدۇڭمەن كەزدەستى، مەن بۇگىن شي توراعامەن كەزدەستىم. باس شۋجي، الاڭسىز بولىڭىز، ءبىز پارتيانىڭ مەيىرىن ماڭگى ەستە ساقتاپ، اناردىڭ دانىندەي تىعىز ۇيىسىپ، ءار ۇلت حالقى ءبىر ءۇيلى جانداي بەرەكەلى وتەمىز، - دەدى. زالدان دۋ قول شاپالاق ءۇنى كوتەرىلدى.
سىبە ۋاكىل فۋ چۇنلي ءسوز سويلەگەن كەزدە، باس شۋجي شي جينپيڭ سىبە ۇلتىنىڭ جان سانى جانە جەرگىلىكتى ورىننىڭ ەكونوميكالىق، قوعامدىق دامۋ جاعدايىن دەن قويا سۇرادى.
«باس شۋجيمەن بەتپە - بەت تۇرىپ اتا مەكەنىمنىڭ وزگەرىستەرىن باياندايمىن دەپ مۇلدە ويلاماعان ەدىم». باس شۋجيمەن تۇڭعىش رەت كەزدەسكەن رايحانگۇل يمىر ازداپ قىسىلىپ تۇردى. «بۇرىن ىشكەرىنىڭ قاي جەرىندە جۇمىس ىستەگەن ەدىڭ؟ ۋنيۆەرسيتەتتى قايدا وقىدىڭ؟». باس شۋجيدىڭ قامقورلىققا تولى سوزدەرى مەن مەيىرلى جانارىنان رايحانگۇل يمىر اسا ءبىر مەيىرباندىقتى سەزىنىپ، باعاناعى قىسىلىڭقى كوڭىل كۇيىنەن ءاپ - ساتتە ارىلدى.
قوعام ورنىقتىلىعى مەن باياندى تىنىشتىق باس نىساناسىن ارقاۋ ەتىپ، جۇڭگوشا سوتسياليستىك شينجياڭدى گۇلدەندىرەيىك
كوپشىلىكتىڭ ءسوزى اياقتاعاننان كەيىن، باس شۋجي شي جينپيڭ ماڭىزدى ءسوز سويلەدى. شينجياڭداعى وتكەن ءبىر جىلداعى قىزمەتتەردى تۇراقتاندىرعاننان كەيىن، شي جينپيڭ باسا دارىپتەپ بىلاي دەدى: شينجياڭ ەلىمىزدىڭ باتىس سولتۇستىندەگى ماڭىزدى حاۋىپسىزدىك قورعانى، ستراتەگيالىق ورنى ەرەكشە، ءدوپ كەلگەن ماسەلەلەرى دە ەرەكشە، شينجياڭ قىزمەتىن تىڭعىلىقتى ىستەۋدىڭ ماڭىزى زور. قوعام ورنىقتىلىعى مەن باياندى تىنىشتىق باس نىساناسىن ارقاۋ ەتۋ، شينجياڭدى جونگە سالۋ جۇيەسى مەن جونگە سالۋ قابىلەتىنە وسىزامانداندىرۋ ارقىلى جەتەكشىلىك ەتۋ، ەكونوميكانى دامىتۋ مەن حالىق تۇرمىسىن جاقسارتۋدى نەگىز ەتۋ، وتاننىڭ تۇتاستىعىن قورعاپ، ۇلتتار ىنتىماعىن جەبەۋ سياقتىلاردى ءتۇيىن ەتىپ، قوعامنىڭ جاراسىمدىلىعىن، ورنىقتىلىعىن باتىل قورعاپ، جاڭا دامۋ يدەياسىن شىن مانىندە دايەكتىلەندىرىپ، حالىق تۇرمىسىن بار كۇشپەن قامتاماسىز ەتىپ جانە جاقسارتىپ، ۇلتتار ىنتىماعىن ۇزدىكسىز بەكەمدەپ، ىنتىماقتى دا جاراسىمدى، گۇلدەنىپ - كوركەيگەن، وركەنيەتتى دە العاباسار، حالقى الاڭسىز تىرشىلىك ەتەتىن جۇڭگوشا ەرەكشەلىككە يە سوتسياليستىك شينجياڭدى گۇلدەندىرەيىك!
شي جينپيڭ بىلاي دەپ اتاپ كورسەتتى: ورنىقتىلىقتى قورعاۋدى ساياسي مىندەت ەتۋدەن جازباي، ەرتە يگەرۋ، كىشكەنەدەن يگەرۋ، تەز يگەرۋ، مىقتاپ يگەرۋدى تياناق ەتىپ، ۇزاق بولاشاقتىق جوبا - جوسپار جاساپ، نەگىزدى بەكەمدەۋ شارالارىن اتقارىپ، باياندى تىنىشتىق اۋقىمىن ساقتاپ، باياندى بيلىكتى جۇزەگە اسىرۋ كەرەك. جاڭا دامۋ يدەياسىن دايەكتىلەندىرىپ، دامۋ ساپاسى مەن ونىمدىلىگىن جوعارىلاتۋدى وزەك ەتۋدەن جازباي، قامداۋ جاعىنداعى قۇرىلىمدىق رەفورمانى نەگىزگى جەلى ەتىپ، ەرەكشە، باسىمدىققا يە كاسىپتەردى جەتىلدىرىپ جانە ۇلعايتىپ، نەگىزدىك قۇرىلعى قۇرىلىسىن كۇشەيتىپ، ەكولوگيالىق ورتانى قورعاۋدى نىعايتىپ، «ۇشتە جوعارى» نىسانداردىڭ شينجياڭعا كىرۋىن قاتاڭ شەكتەپ، لاستانۋدىڭ الدىن الۋ، جونگە سالۋ جانە قۇمايتتانۋدىڭ الدىن الۋ، قۇمايتتانۋدى جونگە سالۋ كۇشەمەلىلىگىن ارتتىرىپ، اسپانى اشىق، جەرى جاسىل، سۋى تۇنىق كوركەم شينجياڭدى قۇلشىنا قۇرۋ كەرەك. شينجياڭدى ورنىقتىرۋدىڭ، شينجياڭنىڭ تىنىشتىعىنىڭ ستراتەگيالىق تۇرعىسىن تياناق ەتىپ، ءار ۇلت بۇقاراسىنىڭ الاڭسىز ءومىر كەشۋىن مىقتاپ ارقاۋ ەتىپ، ءوندىرىس، تۇرمىس شارت - جاعدايىن جاقسارتاتىن نىسانداردى كوپتەپ اتقارىپ، حالىق تۇرمىسىنا ساياتىن ناقتى ىستەردى كوپتەپ تىندىرىپ، ءار ۇلت بۇقاراسىنىڭ كوكەي تەستى ماسەلەلەرىن كوپتەپ شەشىپ، ءار ۇلت بۇقاراسىنا پارتيانىڭ قامقورلىعى مەن وتاننىڭ ۇلى شاڭىراعىنىڭ مەيىرىن شىنايى سەزىندىرۋ كەرەك. كەدەيلەردى دالمە - ءدال سۇيەمەلدەۋدى، كەدەيلىكتەن دالمە - ءدال قۇتىلدىرۋدى جاپپاي اتقارىپ، وڭتۇستىك شينجياڭداعى كەدەي وڭىرلەردى كەدەيلىكتەن قۇتىلدىرۋدان قامال الۋدىڭ نەگىزگى شايقاس مايدانى ەتىپ، اۋىل - قىستاقتارداعى بەيقۇت ءۇي جانە مالشىلاردى وتىرىقتاندىرۋ ينجەنەرياسىن، قالا - قالاشىقتارداعى قامتاماسىز ەتۋ سيپاتىنداعى بەيقۇت ءۇي ينجەنەرياسىن جاقسى اتقارىپ، ەگىنشىلىك، مال شارۋاشىلىق وڭىرلەر مەن شەكارا وڭىرلەردەگى نەگىزگى الەۋمەتتىك قىزمەت كورسەتۋدى كەمەلدەندىرىپ، ءار ۇلت بۇقاراسىنىڭ اناعۇرلىم تاماشا تۇرمىس وتكىزۋى ءۇشىن قۇلشىنۋ كەرەك.
شي جينپيڭ مىنالاردى اتاپ كورسەتتى: ەلىمىز ءبىر تۇتاس كوپ ۇلتتى مەملەكەت، جۇڭحۋا ۇلتىنىڭ تاريحى ۇلتتاردىڭ ىنتىماقتاسىپ، شوعىرلانۋ، تىزە قوسا العا ىلگەرىلەۋ تاريحى. ۇلتتار ىنتىماعى − ءار ۇلت حالقىنىڭ جان تامىرى، شينجياڭنىڭ دامىپ، العاباسۋىنىڭ ءتۇبىرلى نەگىزى ءارى ءبىر ميلليارد 300 ميلليوننان استام جۇڭگو حالقىنىڭ ورتاق ەركى. ۇلتتار ىنتىماعىن قورعاپ، ارميا مەن ۇكىمەتتىڭ ىنتىماعىن، ارميا مەن حالىقتىڭ ىنتىماعىن، ساقشى مەن حالىقتىڭ ىنتىماعىن، بيڭتۋان مەن جەرگىلىكتى ورىننىڭ ىنتىماعىن كۇشەيتىپ، ءار ۇلت حالقىنىڭ تىزە قوسىپ وتاننىڭ تۇتاستىعىن قورعايتىن، ۇلتتاردىڭ ىنتىماعىن قورعايتىن، قوعامنىڭ ورنىقتىلىعىن قورعايتىن قۇرىش قورعانىن بەكەمدەۋ كەرەك. پارتيانىڭ ۇلت جونىندەگى ساياساتىن جاپپاي دايەكتىلەندىرىپ، ۇلتتاردىڭ ۇلى ىنتىماق تۋىن بيىك ۇستاپ، ءار ۇلت بۇقاراسىن ۇلى وتانعا، جۇڭحۋا ۇلتىنا، جۇڭحۋا مادەنيەتىنە، جۇڭگو كوممۋنيستىك پارتياسىنا، جۇڭگوشا ەرەكشەلىككە يە سوتسياليزمگە دەگەن ورتاق تانىمدى كۇشەيتۋگە جەتەكتەپ، ۇلتتار ىنتىماعىن كوز قاراشىعىمىزداي قورعاپ، ۇلتتار ىنتىماعىن ءوز جانىمىزداي قاستەرلەپ، اناردىڭ دانىندەي تىعىز ۇيىسۋىمىز كەرەك. «ۇلتتار ىنتىماعىنىڭ بەرەكەلى شاڭىراعى» جانە ۇلتتار ىنتىماعىنىڭ دوستاسۋ قيمىلىن تىڭعىلىقتى قانات جايدىرۋدان جازباي، ۇلتتار ىنتىماعىن كۇندەلىكتى تۇرمىستا، قىزمەتتە، ۇيرەنۋدە تياناقتاندىرىپ، مەكتەپ تاربيەسىنىڭ، وتباسى تاربيەسىنىڭ، قوعامدىق تاربيەنىڭ ءار بۋىنىنا، ءار جاعىنا ءسىڭىرىپ، ۇلتتار ىنتىماعى گۇلىن ماڭگى شەشەك اتتىرىپ، ۇزاق گۇلدەندىرۋ كەرەك.
شي جينپيڭ بىلاي دەپ باسا دارىپتەدى: بيڭتۋان − شينجياڭنىڭ قوعامدىق، ەكونوميكالىق دامۋىنداعى ماڭىزدى كۇش. رەفورما جاساۋ، دامىتۋدىڭ مىندەتتەرىن بەلسەندى دە ورنىقتى تياناقتاندىرىپ، بيڭتۋاننىڭ ەرەكشە باسىمدىعى مەن دامۋداعى ومىرشەڭدىك كۇشىن تولىق ايگىلەۋ كەرەك.
«باس شۋجي شي جينپيڭنىڭ ماڭىزدى ءسوزى باس شۋجيدىڭ شينجياڭ قىزمەتىنە دەگەن وسكەلەڭ ءمان بەرەتىنىن ايگىلەدى، شينجياڭداعى ءار ۇلت حالقىنا دەگەن ەرەكشە قامقورلىعىن ايگىلەدى. ءبىز باس شۋجيدىڭ ءتالىمى مەن تاپسىرماسىن ەستە بەرىك ساقتاپ، باس شۋجي شي جينپيڭنىڭ ماڭىزدى ءسوزىنىڭ رۋحىن مۇقيات جاقسى ۇيرەنىپ، جاقسى ۇگىتتەپ، جاقسى دايەكتىلەندىرىپ، تىڭعىلىقتى تياناقتاندىرىپ، بىلەك سىبانىپ قۇلشىنا ىستەپ، ورنىقتىلىق پەن دامۋداعى ناقتى ارەكەتىمىز ارقىلى باس شۋجيدى الاڭسىز ەتەمىز، ءار ۇلت حالىق بۇقاراسىن الاڭسىز ەتەمىز». چىن چۋانگونىڭ سەنىمگە تولى سوزدەرى شينجياڭداعى ءار ۇلت كادر - بۇقارانىڭ ورتاق ءۇنى مەن بەرىك سەنىمىنە ۋاكىلدىك ەتتى.
تالقى اقىرلاسقان كەزدە ۋاكىلدەر قوشتاسۋعا قيماي، تۇتاس شينجياڭداعى ءار ۇلت حالقىنىڭ قۇرمەتتى دە ارداقتى باس شۋجيىن ورتاعا الىپ، قىزۋ ىنتامەن قول الىسىپ قوش ايتىپ، وتاننىڭ شەكاراسىنداعى حالىقتىڭ ەڭ تاماشا تىلەگىن جەتكىزدى.
