سۇراۋ: كورشى قىستاققا جاقىن جول بويىنان 1982 - جىلى ماعان ءبولىپ بەرىلگەن 24 ءتۇپ تەرەك بار بولاتىن. كورشى قىستاقتاعى ا XX 2007 - جىلى جازعىتۇرىم ءبىر تەرەگىمدى كەسىپ تاستاعاننان كەيىن، تەرەكتىڭ ءبارى وزىمدىكى دەپ كۇش كورسەتتى. قالاشىقتاعى ءادىليا ورنىنا بارىپ جاعدايدى اڭىس ەتسەم، ولار تەرەكتىڭ جاعدايىنا تەكسەرۋ جۇرگىزدى، ءبىراق وسى كەزدە ا XX ادام توپتاپ كەلىپ سويقان شىعاردى. ءادىليا ورنىنداعىلار تىنىشتىقتى ويلاپ، سويقاندى باسىپ، مەنىڭ 6 اعاشىمدى وعان ءبولىپ بەردى. سونىمەن امالسىز جاراستىرۋ حاتىنا قول قويدىم. ا XX مۇنىمەن قويماي، ۇنەمى پالە ىزدەپ تىنىشتىق بەرمەدى. قازىر ا XXكە ءبولىپ بەرىلگەن 6 تەرەكتىڭ دە ماعان تاۋەلدى ەكەندىگىن سىپاتتايتىن كۋاگەر جانە كۋالىك قاعازى بار، سول سەبەپتى جاراستىرۋ حاتىن كۇشىنەن قالدىرىپ، ا XX تەن تەرەكتەرىمدى قايتارىپ بەرۋدى تالاپ ەتسەم بولا ما؟ وسى جايلى كەڭەس بەرسەڭىزدەر.
جاۋاپ: «حالىقتىق جاراستىرۋ زاڭىندا»: «حالىقتىق جاراستىرۋ القاسىنىڭ جاراستىرۋىمەن جاراسۋ كەلىسىمى جاسالعاننان كەيىن، داۋلى ادامدار اراسىندا جاراسۋ كەلىسىمىن اتقارۋدا نەمەسە جاراسۋ كەلىسىمىنىڭ مازمۇنىندا تالاس - تارتىس تۋىلسا، داۋلى ادامنىڭ ءبىر جاعى حالىق سوتى مەكەمەسىنە ارىز - شاعىم ايتسا بولادى» دەپ بەلگىلەنگەن. «توقتام زاڭىندا»: «جاسالعان كەزدە ءادىل بولماعان، داۋلى ادامنىڭ ءبىر جاعى الداۋ، زورلاۋ فورمالارىن قولدانىپ نەمەسە قيىن جاعدايدا قالعاندىعىنان پايدالانىپ، قارسى جاقتىڭ ناقتى تىلەگىنە قايشى جاعدايدا جاسالعان توقتام بولسا، زياندالۋشى جاق ونى وزگەرتىپ بەرۋ نەمەسە كۇشىنەن قالدىرۋ جونىندە حالىق سوتى مەكەمەسىنە نەمەسە تورەلىك ايتۋ ورىندارىنا ءوتىنىش بەرۋىنە بولادى؛ كۇشىنەن قالدىرۋ ۇقىعى بار قاتىستى ادامدار كۇشىنەن قالدىرۋ سەبەبىن نەمەسە بىلۋگە ءتيىستى بولعان كۇننەن باستاپ ءبىر جىلعا دەيىن كۇشىنەن قالدىرۋ ۇقىعىن ىستەتپەگەن بولسا، كۇشىنەن قالدىرۋ ۇقىعىنان ايرىلادى» دەپ بەلگىلەنگەن. دەمەك، كەزىندە جاراستىرۋ حاتىنا امالسىز قول قويعان، قازىر جاڭا دالەل - سىپات، كۋاگەر بولعان جاعدايدا ءبىر جىل ىشىندە حالىق سوتى مەكەمەسىنە ارىز بەرىپ جاراستىرۋ حاتىن كۇشىنەن قالدىرۋدى تالاپ ەتسەڭىز بولار ەدى، ءبىراق ءسىز ارىزدانۋ ۋاقىتىن وتكىزىپ الىپسىز، سول سەبەپتى تالابىڭىز زاڭنىڭ قولداۋىنا يە بولا المايدى.