بايىنعولين تىلشىلەر پۋنكتىندەگى ءتىلشىمىز زوۋ يانجۇڭ
«احات، قولىڭ بوسادى ما؟ تەز كەلە قال، قايتالاي كورەيىك».
«تۇرا تۇر، ەرەن بازاردىڭ ەسىگىن قۇلىپتاي سالايىن، از كۇت».
20 - قازان ساعات 22دە ياڭ شينفىڭ جاقىن دوسى احات نايىپقا تەلەفون جالعاپ، 19 - قۇرىلتايدىڭ حابارلارىن تەلەۆيزوردان بىرگە قايتالاي كورۋگە شاقىردى.
ياڭ شينفىڭ باعراش اۋدانى باعراش اۋىلدىق شيپاحانانىڭ باستىعى. احات باعراش اۋىلى كودايلىك قىستاعىنىڭ تۇرعىنى، بۇرىن اۆتوبۋز شوفەرى بولعان ول قازىر ەرەن بازار اشىپ الىپتى. 20 نەشە جىل كورشى وتىرعان ولار تالاي اۋىرتپالىقتى بىرگە وتكەرگەن جاقىن دوستار سانالادى.
ياڭ شينفىڭ كۇندىز شيپاحانادا جۇمىس ىستەسە، احات ەرەن بازاردىڭ جۇمىستارىنان قولى بوساماي ەكەۋى نەشە كۇننەن بەرى كەزدەسە الماي قالعان بولاتىن. جاپپاي دوڭگەلەك داۋلەتتى قوعامنان وسىزاماندانعان قۇدىرەتتى ەلگە اينالۋعا دەيىن، اۋىل - قىستاق مادەنيەت قيمىلىنان مادەنيەتكە دەگەن سەنىمگە دەيىن، اۋرۋ كورسەتۋ قيىن بولۋدان جالپى حالىقتىڭ دەنساۋلىعىن تەگىن تەكسەرتۋگە دەيىن، تاستاق جولدان اسفالت جولعا دەيىن... قاتىستى مازمۇنداردى ءبىر جاعىنان كورىپ، ەندى ءبىر جاعىنان اڭگىمە دۇكەنىن قۇرعان ولاردىڭ بولاشاقتاعى تۇرمىسقا دەگەن سەنىمدەرى ەسەلەپ ارتا ءتۇستى.
باعراش اۋىلىن جەرگىلىكتى جۇرتشىلىق نانشان دەپ اتاسادى، بۇل اۋىل باعراش اۋدانىنان نەبارى 40 نەشە كيلومەتر قاشىقتىقتا بولسا دا، ەكى جەردىڭ اراسىن قۇمدى دالا ءبولىپ جاتادى. بۇرىن نانشاننان اۋدان قالاشىعىنا بارۋ ءۇشىن كورلا قالاسىنىڭ تاشدەن قالاشىعى ارقىلى قاراءشار حۇيزۋ اۆتونوميالى اۋدانىنىڭ اۋدان قالاشىعىن اينالىپ 100 نەشە كيلومەتر جۇرۋگە تۋرا كەلەتىن، ونىڭ ۇستىنە جول دا ناشار، اسىرەسە، نانشاننان تاشدەنگە دەيىنگى جول ويلى - شۇڭقىر اربا جول ەدى. مۇنداي جولدا كولىكپەن ءجۇرۋ قاتتى ماشاقاتتى بولاتىن، اۋا رايى ناشار كەزدەردە نانشاننان اۋدان قالاشىعىنا بارىپ ءىس ءبىتىرۋ ءۇشىن ءبىر كۇن كەتەتىن.
ياڭ شينفىڭ بىلاي دەدى: نانشانعا العاش بارعانىمدا سونشالىقتى سۋىندىم... 1995 - جىلى حىنانداعى جىڭجوۋ دەنساۋلىق ساقتاۋ مەكتەبىنەن وقۋ تاۋىسقاننان كەيىن باعراش اۋىلدىق شيپاحاناعا قىزمەتكە ءبولىندىم. ول كەزدە شيپاحانادا نەبارى بىرنەشە بولمەلى جاتاعان ءۇي بار ەدى، 3 شيپاگەر سەسترالىق قىزمەتتى دە قوسا ىستەيتىن.
ول كەزدە نانشانعا قاتىنايتىن 2 اۆتوبۋز عانا بار ەدى، بىرەۋىن احات، ەندى بىرەۋىن كودايلىك قىستاعىنىڭ تۇرعىنى ياسىن قادىر جۇرگىزەتىن، ءاربىر اۆتوبۋز كۇنىنە ءبىر - اق رەت قاتىنايتىن.
ياڭ شينفىڭ تەلەۆيزور كورىپ وتىرىپ احاتقا: ول كەزدە سەنى كوپ اۋرەلەۋشى ەدىم، - دەدى.
ياڭ شينفىڭ اپتا سايىن ءبىر رەت اۋدانعا بارىپ ءدارى - دارمەك الىپ، مالىمەت كەستەسىن تاپسىراتىن، قىزمەتتەن مالىمەت بەرىپ، تۇرمىستىق بۇيىمداردى ساتىپ الىپ قايتاتىن.
اۆتوبۋز تاشدەندەگى ءبىر شاعىن دۇكەننىڭ الدىنا توقتاپ، جولاۋشىلار كورلا، قاراءشار، باعراش سياقتى جەرلەرگە ءىس بىتىرۋگە جونەلەتىن، ال اۆتوبۋز تۇستەن كەيىنگى كەلىسكەن ۋاقىتتا كەرى قايتاتىن. ياڭ شينفىڭنىڭ جۇمىسى بىتپەيتىندىكتەن وزگەلەردەن كوپ كەيىن قايتاتىن، ال احات ونى ءار جولى سوڭىنا دەيىن كۇتىپ، ياڭ شينفىڭ كەلگەننەن كەيىن ءبىراق جۇرەتىن، كەيدە كوپ كۇتىپ قالعاندا، كەي جولاۋشىلار بۇعان نارازى بولاتىن، مۇندايدا احات ولارعا ءبىر - بىردەن تۇسىندىرەتىن.
1999 - جىلى ياڭ شينفىڭ بايىنعولين موڭعۇل اۆتونوميالى وبلىستىق دەنساۋلىق ساقتاۋ مەكتەبىنە ءبىلىم تولىقتاۋعا باردى. سول جىلى تامىزدىڭ ءبىر كۇنى ياڭ شينفىڭ احاتپەن كەلىسىپ، احاتتىڭ كولىگىمەن شيپاحاناعا قايتىپ بارىپ ءىس تىندىرماقشى بولدى. ءبىراق ازىن - اۋلاق جۇمىس سەبەبىنەن ياڭ شينفىڭ ءبىراز ايالداپ قالدى دا، تاشىديانعا قايتىپ كەلگەندە قاس قارايىپ كەتىپ، جولاۋشىلار ياسىننىڭ كولىگىمەن كەتىپ قالدى، ال بۇل كەزدە احات ياڭ شينفىڭنىڭ قايتىپ كەلۋىن توسىپ وتىرعان ەدى.
«كەزىندە مەن دە سەنى كوپ اۋرەلەدىم ەمەس پە...»، - دەدى احات ياڭ شينفىڭنىڭ يىعىن قاعىپ.
احاتتىڭ ۇل - قىزى كىشكەنە كەزىندە اۋرۋشاڭ بولدى، بالالار كوبىنەسە تۇندە اۋىرىپ قالاتىن، مۇندايدا احات پەن جۇبايى گۇلنيساحان توقتى ءتۇن ورتاسىندا ياڭ شينفىڭنىڭ ۇيىنە بارىپ، بالالارىنىڭ ناۋقاسىن كورىپ بەرۋگە شاقىراتىن.
بىرەۋى اۆتوبۋزبەن ەندى بىرەۋىن كۇتسە؛ بىرەۋى ەندى بىرەۋى ءۇشىن ءتۇن ورتاسىندا اۋرۋ كورۋگە اتتاناتىن. ەكەۋىنىڭ دوستىعى، ەكى وتباسىنىڭ سۇيىسپەنشىلىگى مىنە وسىلايشا جىلدار بويىندا نىعايىپ، بەكەمدەلە ءتۇستى. بىرنەشە كۇن كەزدەسپەي قالسا ۇلكەندەر، بالالار ءبىرىن - ءبىرى ىزدەيتىن، مەرەكە - مەيرامداردا ءتىپتى تۋىستار سياقتى بارىپ - كەلىپ تۇراتىن.
بىلتىر جالپى حالىقتىڭ دەنساۋلىعىن تەگىن تەكسەرتۋ كەزىندە احاتتىڭ اق قان اۋرۋىنا شالدىققانى انىقتالدى.
بۇعان ياڭ شينفىڭنىڭ دا سەنگىسى كەلمەدى. گۇلنيساحان مەن قىزى ياڭ شينفىڭنان اقىل سۇرادى. احات وتباسىنىڭ سۇيەنىشىنە اينالعان ياڭ شينفىڭ سابىر ساقتاپ، ءبىر جاعىنان، قاتىستى ورىندارعا جاعدايدى مالىمدەپ، ەندى ءبىر جاعىنان، شيپاحانامەن بايلانىس جاساپ، احاتتىڭ جوعارى ورىنعا بارىپ ەمدەلۋ راسمياتتارىن ءبىتىردى.
ياڭ شينفىڭنىڭ ۇسىنىسى مەن كومەگىندە احات ىلگەرىندى - كەيىندى ءۇرىمجى قالاسىنداعى، چيڭحاي ولكەسىندەگى شيپاحانالاردا ەمدەلىپ، اۋرۋى ءونىمدى تىزگىندەلدى.
20 جىلدىڭ الدىندا احات ياڭ شينفىڭنىڭ قامىن جەپ، «سىرت جەردە زيان شەگىپ قالا ما» دەپ الاڭداۋشى ەدى!
20 جىلدان كەيىن ياڭ شينفىڭ احاتتىڭ قامىن جەپ، «سالماقتى اۋرۋعا توتەپ بەرە الماي قالا ما» دەپ الاڭدادى!
ءتۇن قاراڭعىلىعى قويۋلانا ءتۇستى، اڭگىمەنىڭ قىزىعىنا ءتۇسىپ كەتكەن ەكەۋى قالعانىن ەرتەڭ كەشتە جالعاستىرۋعا ۋادەلەستى.
