سانيحان ھەيتام (وڭنان ءبىرىنشى) قارتتارمەن بىرگە.
فۋكاڭ قالاسى فۋشين كوشەسى مادەنيەت جولى الەۋمەتتىك اۋماقتا، ءبىر قاراپايىم اۋلا بار. بۇل ارادا ءبىر جىلدىڭ ءتورت ماۋسىمىندا شاتتىق كۇلكىسى كەتپەيدى. بۇل ۇقساماعان 36 ۇلت قارتىنىڭ جانۇياسى.
اۋلانىڭ يەسى سانيحان ھەيتام ەسىمدى قاراپايىم ۇيعۇر ايەل، 7 جىلدان بەرى 36 جەسىر قارتتى ءوز اتا-اناسىنداي كورىپ كەلەدى. ول قارتتاردىڭ جاناشىرى.
سانيحان مەن قارتتاردىڭ اڭگىمەسىن بىلگىڭىز كەلسە، ونىڭ ەنەسى دۇنيەدە بار كەزدەن باستاۋعا تۋرا كەلەدى.
سانيحاننىڭ ەنەسىنىڭ سالماقتى بۋىن قابىنۋ ناۋقاسى بار، 1996-جىلدىڭ قاقاعان قىسىنان كەيىن، قارت سالدانىپ توسەك تارتىپ جاتىپ قالادى، ونىڭ جولداسى قۇربان وتباسىن اسىراۋدىڭ قامىمەن ءۇي جۇمىستارىنا قارايلاسا المايدى، ەنەسىن باعۋدىڭ سالماعى سانيحانعا تۇسەدى، ول كەزدە ەكى بالاسى ءالى كىشكەنە ەدى، الايدا، سانيحان قاباق شىتپاي، ءۇن-ءتۇنسىز قارايلاستى.
سانيحان ءار كۇنى ەرتە تۇرىپ، ەنەسىنىڭ تاماعىن ىستەپ، ءدارىسىن بەرەدى. تاماق ىستىق بولسا ۇرلەپ، ونان سوڭ قاسىقتاپ جەگىزەدى. ەنەسى ۇزاق ۋاقىت توسەك تارتىپ جاتىپ قالعاندىقتان، دارەتىنە يە بولا المايدى ءارى ۇنەمى ءىشى قاتادى، سانيحان ءارى-سارى بولماستان دارەتىن قولمەن الادى. ەنەسىنىڭ تۇندە اۋناۋىنا قولايلى بولۋى ءۇشىن ءبىر بولمەدە تۇرادى، ەنەسى ونىڭ ءجۇزىن كورگەن سايىن، اسەرلەنگەنىنەن كوز جاسىنا يە بولا المايدى.
ۇيدە ناۋقاس ادام بار بولعاندىقتان، بولمەنىڭ اۋاسىن ۇنەمى الماستىرىپ تۇرۋعا تۋرا كەلەدى. ول كۇندە تاماق ىستەۋدەن سىرت، ەنەسىنىڭ دەنەسىن ءسۇرتىپ، تاماعىن، ءدارىسىن بەرەدى، بولمەلەردى جيناستىرادى. ونىڭ ۇيىنە ۇنەمى بارىپ تۇراتىنداردىڭ ءوزى، ەگەر ايتپاسا، بۇل ۇيدە ناۋقاس ادام بار ەكەنىن بىلمەيدى ەكەنبىز دەيدى.
سانيحان تۇرعان الەۋمەتتىك اۋماقتا كوپتەگەن جالعىز باستى قارتتار بار، ول ەنەسى زەرىگىپ قالماسىن دەپ ولاردى ۇنەمى ۇيىنە شاقىرىپ تۇرادى. ونىڭ ىجداعاتپەن قاراۋىنىڭ ارقاسىندا، ەنەسىنىڭ رۋحى دا جاقسارىپ قالدى. 2011-جىلى، 98 جاستاعى ەنەسى كوزجۇمار الدىندا كەلىنىڭ قولىنان ۇستاپ تۇرىپ: «كەلەسى ومىرىمدە سەن تاعى دا مەنىڭ كەلىنىم بول»،-دەيدى.
سانيحان ھەيتامنىڭ اۋلاسى
2017-جىلى، الەۋمەتتىك اۋماقتاعى جەسىر قارتتار مەن جالعىز باستى قارتتاردىڭ سوڭعى ومىرلەرىن الاڭسىز وتكىزۋلەرى ءۇشىن، الەۋمەتتىك اۋماقتىڭ تەڭشەۋىمەن سانيحان ءوز اۋلاسىنان قارتتار كۇتىمدەۋ ورنىن اشتى. سودان باستاپ، ونىڭ اۋلاسى ءار ۇلت حالقى قارتتارىنىڭ كوڭىل اشۋ ورنىنا اينالدى.
2016-جىلى 6-مامىردا، سانيحاننىڭ جولداسى قوربان راك ناۋقاسىنان قايتىس بولادى. سانيحان شارشاپ كەلىپ، اۋلانىڭ ەسىگىن اشقاندا، 30 دان استام قارتتىڭ رەتتى بولىپ ءوزىن توسىپ وتىرعانىن كورەدى. سول كەزدە، سانيحان قارتتاردىڭ قولىن ۇستاپ تۇرىپ: «مەن جالعىز ءومىر سۇرىپ جاتقان جوقپىن، سىزدەرگە جاقسى قارايلاسامىن»،-دەيدى.
2016-جىلى 6-ماۋسىمدا، فۋكاڭ قالالىق پارتكوم، قالالىق ۇكىمەت، سونداي-اق قوعامنىڭ ءارسالاسىنداعىلاردىڭ قامقورلىعىندا، «سانيحان ۇلتتار ىنتىماعىنىڭ العاباسارلىعى يگىلىك قورىنىڭ» ماڭدايشالىعىن استى، قازىر 40 مىڭ يۋاننان استام جىلۋ جيناعان، جالپى 200دەن استام كەدەيلەردى سۇيەمەلدەپ حال سۇراعان.
بۇگىندە سانيحان ھەيتام فۋكاڭ قالاسىندا تانىمال بولعان. ونىڭ شابىتتاندىرۋىندا، فۋكاڭدا ءبىر توپ ۇلتتار ىنتىماعىنىڭ ۇلگىلەرى جارىققا شىعىپ، «سانيحان ھەيتام توبىن» قالىپتاستىردى.
2016-جىلى جەلتوقساندا، سانيحان ھەيتامنىڭ وتباسى تۇڭعىش كەزەكتى «بۇكىل مەملەكەتتىك مادەنيەتتى وتباسى» بولىپ باعالانىپ، باس شۋجي شي جينپيڭنىڭ قابىلداۋىندا بولدى.
