اسەن قايسا ۇلى حابارلايدى. پارتيا 19-قۇرىلتايىنىڭ رۋحىن ىشكەرىلەي ۇيرەنۋ، دايەكتىلەندىرۋ، پارتيا مۇشەلەرىنىڭ، كادرلاردىڭ، حالىق جۇرتشىلىعىنىڭ يدەياسى مەن ءىس - ارەكەتىن پارتيا 19 - قۇرىلتايىنىڭ رۋحى نەگىزىندە بىرلىككە كەلتىرۋ ءارى كادرلاردىڭ 19 - قۇرىلتاي مازمۇنى مەن جاڭادان وزگەرىس ەنگىزىلگەن «پارتيا ۋستاۆىن» يگەرۋ دەڭگەيىن سىناۋ ءۇشىن، 27-قاراشادا، جەمەنەي اۋداندىق پارتكوم ۇگىت ءبولىمى، اۋدانعا توتە قاراستى ورگان كوميتەتى، اۋداندىق وداق كوميتەتى، اۋداندىق كىتاپحانا بىرلەسىپ وتكىزگەن جەمەنەي اۋدانىنىڭ پارتيا 19-قۇرىلتاي بىلىمدەرىنەن زەيىن سىناۋ جارىسىنىڭ سارالاۋ جارىسى اۋداندىق ۇكىمەت جيىن زالىندا وتكىزىلدى. جيىنى 22 ورگان (مەكەمە)، اۋىلدىق (قالاشىق ) گرۋپپاسى جارىسقا قاتىناسىپ، ناتيجەسى جوعارى 10 ورىن شەشۋشى جارىسقا جولداما الدى.
29-قاراشادا، دايىندىق جارىستان سارالانعان 10 گرۋپپاداعى 30 شاباندوز شەشۋشى جارىسقا قاتىناستى. جارىس جەكە ادام جاۋاپ قايتارۋ، گرۋپپا بويىنشا جاۋاپ قايتارۋ، تالاسا جاۋاپ قايتارۋ جانە كۇردەلى سۇراققا جاۋاپ قايتارۋ سىندى باسقىشتار بويىنشا ءجۇرىلدى. جارىس بارىسىندا ءار گرۋپپاداعى شاباندوزدار ءوز ونەرلەرىن ورتاعا سالىپ، جۇلدەنى قانجىعالاۋعا تىرىستى. جارىس قيان-كەسكى ءارى قىزعىندى بولىپ، كورەرمەندەردىڭ شاپالاق ءۇنى تولاستامادى.
سوڭىندا، اۋداندىق مال شارۋاشىلىق - مال شيپاگەرلىك مەكەمەسىنىڭ شاباندوزدارى قارا ءۇزىپ الدىعا شىعىپ، اعاجۇلدەگەرلىكتى قانجىعالارىنا بايلادى ءارى وسى گرۋپپانىڭ مۇشەسى قالي سەنباي ۇلى مەن اۋداندىق اۋرۋدىڭ الدىن الۋ ورتالىعىنىڭ شاباندوزى يۇي مين ۇزدىك شاباندوز سيلىعىن ەنشىلەدى.
ءتىلشىنىڭ قىزمەت ورنى: جەمەنەي اۋداندىق حالىق قۇرىلتايى تۇراقتى كوميتەتى
