− شينجياڭ فۋليدا تالشىق شەكتەۋلى سەرىكتەستىگىنىڭ وڭتۇستىك شينجياڭنان كەلگەن قىزمەتكەرلەرى جاڭا تۇرمىستارىن باستادى
شيا چيڭ
بيىل ءساۋىر ايىنان بەرى كورلا ەكونوميكالىق - تەحنيكالىق اشۋ رايونى شينجياڭ فۋليدا تالشىق شەكتەۋلى سەرىكتەستىگى قاشقارداعى جانە حوتانداعى ارتىق ەڭبەككۇشتەردى باسقا كاسىپ سالالارىنا ويىستىرۋ قىزمەتىنە بەلسەنە ات سالىسىپ، وڭتۇستىك شينجياڭنىڭ اۋىل - قىستاقتارىنان 180 ارتىق ەڭبەككۇشتى جۇمىسقا قابىلداپ، «جۇمىسقا الىپ قالۋ، ويداعىداي ىستەتۋ، شىنايى كوڭىل ءبولۋ، قاتاڭ تالاپ قويۋ» سىندى ۇستانىمدى تياناقتاندىرىپ، ولاردىڭ «ەكىنشى اتا مەكەندەرىنىڭ» تىرەكتى قۇرۋشىسى بولۋىنا، قالاعا ءسىڭىپ، تامىر تارتىپ، جاڭا تۇرمىستارىن باستاۋىنا مۇمكىندىك جاسادى.
وزگەشە بۇرىلىس: ادەتتەگى ديقاننان ونەركاسىپ جۇمىسشىسىنا اينالۋ
29 - قاراشادا شينجياڭ فۋليدا تالشىق شەكتەۋلى سەرىكتەستىگىنىڭ وڭدەۋ 2 - سەحىندا وڭتۇستىك شينجياڭنان كەلگەن قىزمەتكەر ارزىگۇل ابىلا اسپاپتاردى جاتىق مەڭگەرۋدە ءارى داپتەرىنە اۋىق - اۋىق ەستەلىك الىپ جاتتى.
ارزىگۇلدىڭ ءۇيى قاعىلىق اۋدانى تەتىر اۋىلىنىڭ رامازانباق قىستاعىندا تۇرادى، 2013 - جىلى شاڭحاي فينانس ۋنيۆەرسيتەتىنە قابىلدانعان ول وتباسى قيىنشىلىعى سەبەبىنەن امالسىزدان وقۋىن تاستاپ، اۋىلىنا قايتىپ ديقان بولادى. سىرتقا شىعىپ جۇمىس ىستەۋ حابارىن ەستىگەن ارزىگۇل ءبىرىنشى بولىپ تىزىمدەلەدى.
«پويەزدەن تۇسە سالىپ بويىمدى ءبىر ءتۇرلى سەزىم بيلەدى، كاسىپورىنعا بارعاننان كەيىن شەكسىز قامقورلىققا بولەندىم. كاسىپورنىمىز كىسى باسىنا 1000 يۋان تۇرمىستىق قاراجات تاراتتى، اۋىل ساعىنىشىمىزدى باسۋ ءۇشىن تۋعان كۇنىمىزدى، مەرەكەلەرىمىزدى تويلاپ بەردى. مەن، ءسوز جوق، قۇلشىنا قىزمەت ىستەپ، بەرىلە ۇيرەنىپ، كوپشىلىكتىڭ كۇتكەن جەرىنەن شىعامىن»، - دەپ ارزىگۇل تىلشىگە ءوزىنىڭ وسى بىرنەشە ايداعى باسىنان كەشكەن تەبىرەنىستى اڭگىمەلەرىن ايتقاندا، كوزىنە ىستىق جاس الدى.
بۇل كۇندەرى ارزىگۇلدىڭ ايلىق كىرىسى 4000 يۋاننان اسادى، ونىمەن بىرگە كەلگەن 180 اۋىلداسى دا 4 ايلىق كۋرستى جانە پراكتيكالارىن ءبىتىرىپ، تۇگەلدەي قىزمەتكە شىقتى، ولار حاۋىپسىزدىك جانە ورتانى قورعاۋ ءبولىمى، ءوندىرىس تەحنيكا ءبولىمى، قوزعالىس ورتالىعى، وڭدەۋ سەحى سياقتى بولىمدەرگە ءبولىنىپ، رەسمي جۇمىسشى - قىزمەتكەرلەرمەن بىردەي مامىلەگە يە بولدى.
فۋليدا سەرىكتەستىگى قىزمەتكەرلەر جۇمىسى، كاسىپورىن باسقارۋ ءبولىمىنىڭ ورىنباسار باستىعى ۋ لياڭ بىلاي دەدى: ءبىز قىزمەت ورنىنا قاراي ەڭبەكاقى تاراتامىز، وڭتۇستىك شينجياڭنان كەلگەن وسى رەتكى جۇمىسشىلاردىڭ ەڭبەكاقىسى 4100 يۋاننان 5300 يۋان ارالىعىندا.
وڭتۇستىك شينجياڭداعى ارتىق ەڭبەككۇشتەردى باسقا سالالارعا ويىستىرىپ جۇمىسقا ورنالاستىرۋ ساياساتى ارزىگۇل سياقتى جاستاردىڭ تاۋ قويناۋىنداعى ديقاننان ونەركاسىپ جۇمىسشىسىنا اينالۋىنا مۇمكىندىك جاسادى.
ارزىگۇل تىلشىگە مىناداي جاقسى حاباردى جەتكىزدى: مەن سياقتى جاستاردىڭ ۋنيۆەرسيتەتتە وقۋ ارمانىن جۇزەگە اسىرۋىنا شابىت بەرىپ، كومەكتەسۋ ءۇشىن، سەرىكتەستىك ۇيرەنۋگە ىنتالى، تالپىنىسى جاقسى قىزمەتكەرلەردى ەڭبەكاقىسىن توقتاتپاي ۋنيۆەرسيتەتتە وقىتۋعا بەلسەنە دايىندالىپ جاتىر، بۇل مەن ءۇشىن ءومىردىڭ ءبىر تىڭ بەلەسى بولماقشى.
قامقورلىققا بولەنۋ: بولاشاققا دەگەن سەنىمىمىز كامىل
30 - قاراشا تۇستەن كەيىن ساعات 6دا، فۋليدا سەرىكتەستىگىنىڭ سۋدى ءبىر جاقتى ەتۋ جۇمىسشىسى اۋەزحان مامەت زاۆودتىڭ ماڭىنداعى التىن كۇن بالا باقشاسىنان وقۋدان تارايتىن ۇلكەن ۇلى يمىران روزىنى الىپ قايتۋعا كەلدى.
كەريا اۋدانى مۇعاللا قالاشىعى باققۇم قىستاعىنىڭ 25 جاستاعى تۇرعىنى اۋەزحان مەن كۇيەۋى روزى ءماتتۇرسىن قولدارىندا ەشقانداي ونەرى جوق بولعاندىقتان، اۋىلدا ەگىنشىلىكپەن شۇعىلداناتىن. بيىل ناۋرىزدا اۋەزحان مەن كۇيەۋى جەرگىلىكتى ۇكىمەت ۇيىمداستىرعان تەگىن كۋرسقا قاتىناسىپ، فۋليدا سەرىكتەستىگىنە بارىپ جۇمىسشى بولۋعا وزدىكتەرىنەن تىزىمدەلەدى. ءبىر ايدان كەيىن ەرلى - زايىپتى ەكەۋى پويەزبەن كورلا ەكونوميكالىق - تەحنيكالىق اشۋ رايونىنا كەلدى.
روزى بىلاي دەدى: فۋليداعا جۇمىسقا كەلگەنىمىزدە ۇكىمەت جول اقىمىزدى كوتەردى، قامسىزداندىرۋعا دا قاتىناستىردى، ونىڭ ۇسىتىنە، ارنايى كادر جىبەرىپ ءبىزدىڭ تۇرمىسىمىزعا قارايلاستى، پارتيا مەن ۇكىمەتتىڭ بىزگە دەگەن قامقورلىعى شەكسىز.
وڭتۇستىك شينجياڭنان كەلگەن قىزمەتكەرلەرگە دايىندالعان ەرلى - زايىپتىلار جاتاعىنىڭ ىشىندە قوس ادامدىق توسەك، كيىم شكابى، كىتاپ ۇستەلى، تەلەۆيزور سياقتىلاردىڭ ءبارى بار. اۋەزحان قۋانا: مەن وسى جەردى جاقسى كورەمىن، ءوز ءۇيىم ىسپەتتى، بىرنەشە كۇننىڭ الدىندا 2 جاستاعى قىزىمدى دا اكەلىپ الدىم، - دەدى.
فۋليداعا كەلگەن 180 قىزمەتكەردىڭ ىشىندە 32 جۇپ ەرلى - زايىپتى بار، وڭتۇستىك شينجياڭنان كەلگەن قىزمەتكەرلەردىڭ 87 بالاسى التىن كۇن بالا باقشاسىندا مەكتەپكە دەيىنگى تاربيەنى قابىلداۋدا.
«وسى رەت سىرتقا شىعىپ جۇمىس ىستەگەننەن كەيىن ۇلتتار ىنتىماعى جونىندە تەرەڭ تۇسىنىككە يە بولدىم، زاۆود باسشىلارى تاماعىمىزدىڭ ءدامدى بولعان - بولماعانىنا، جاتاعىمىزدىڭ جىلى - سۋىقتىعىنا دەيىنگى ۇلكەندى - كىشى ىستەردىڭ بارلىعىنا كوڭىل بولەدى، سىرتقا شىعىپ قىزمەت ىستەۋ بىزگە وتان ۇلى شاڭىراعىنىڭ مەيىرىن سەزىندىردى». تۇراقتى كىرىسى بار اۋەزحاننىڭ بولاشاققا دەگەن سەنىمى بەكەم ەكەن: «مەن بۇل قالانى جاقسى كورەمىن، اقشا جيناپ وسى ارادان ءۇي الۋدى، وسى ارادا تامىر تارتۋدى جوسپارلاپ جاتىرمىز».
جۇپ قۇراپ سۇيەمەلدەۋ: ىشكەرىلەي ارالاسۋ، ىشتەسۋ، توعىسۋ
30 - قاراشا تۇستە، يبىرايىم ابدىرەيىم وزىمەن جاستى ۇستازى ياڭ حۋشانمەن فۋليدا سەرىكتەستىگىنىڭ جىبەك ءيىرۋ سەحىنىڭ دەمالىس ۇيىندە قىزمەت اسەرىن اڭگىمەلەسۋدە، تۇسىنبەي قالعاندا يبىرايىم دەرەۋ جانقالتاسىنان داپتەرىن الىپ شىقتى، ياڭ حۋشان وعان قىزمەتتەگى اتاۋ سوزدەردى پينيىنى بويىنشا ءتۇسىندىرىپ بەردى.
ياڭ حۋشان كۇلىمسىرەي: يبىرايىمنىڭ پينيىنى وتە جاقسى، ول وسى ارقىلى كوپتەگەن تەحنيكالىق اتاۋلاردى جاتتاپ الدى، مىناۋ ونىڭ ەكىنشى داپتەرى، - دەدى.
30 جاستاعى يبىرايىم مارالباسى اۋدانى شۇڭقىرشاق اۋىلى كونە شۇڭقىرشاق قىستاعىنىڭ تۇرعىنى، وتباسىنداعى 3 جان اينالدىرعان 6 مۋ جەرگە سۇيەنىپ ءۇپى - ءتاپى تۇرمىس كەشىرەتىن. بيىل 23 - ساۋىردە مارالباسى اۋدانى اۋىل - قىستاقتارداعى ارتىق ەڭبەككۇشتەردى سىرتقا شىعىپ جۇمىس ىستەۋگە ۇيىمداستىرادى، وتباسىنىڭ ەكونوميكالىق جاعدايىن جاقسارتۋدى ويلاپ باسى قاتىپ جۇرگەن يبىرايىم وسىلايشا كورلاعا كەلەدى.
فۋليدا سەرىكتەستىگىنە كەلگەننەن كەيىن، سەحتاعى مايتالمان قىزمەتكەر ياڭ حۋشان يبىرايىمنىڭ ۇستازى بولىپ بەلگىلەنەدى. ۇستازىنىڭ شابىتتاندىرۋى مەن كومەگىندە ونىڭ حانزۋ ءتىلى ورەسى جوعارىلاپ، مەڭگەرۋ تەحنيكاسىنا دا كۇن ساناپ ىسىلا باستايدى.
ۇكىمەتتىڭ سىرتقا شىعىپ جۇمىس ىستەۋگە ۇيىمداستىرۋىنا يبىرايىمنىڭ باسقالارعا قاراعاندا تەرەڭ تۇسىنىگى بار ەكەن: ۇيدەن الىستاپ شىققاندا عانا، وزىڭە تاۋەلدى ءورىس اشا الاسىڭ. ۇلتتار ىنتىماعىن ويداعىداي جاقسارتقاندا عانا، تەحنيكالىق قابىلەتتى جوعارىلاتىپ، تەز ىلگەرىلەۋگە بولادى.
يبىرايىمنىڭ ايتىپ وتىرعان وسى تۇسىنگىن فۋليدا سەرىكتەستىگىنىڭ وڭتۇستىك شينجياڭنان كەلگەن قىزمەتكەرلەرگە جاساعان قامقورلىعىنىڭ، باۋىرمالدىلىعىنىڭ ارقاسى دەۋگە بولادى. سەرىكتەستىك الۋان فورماداعى دەنە تاربيە، كوركەمونەر قيمىلدارىن ورىستەتۋ ارقىلى حانزۋ قىزمەتكەرلەر مەن از ۇلت قىزمەتكەرلەرىنىڭ ءوزارا تۇسىنىسۋىنە مۇمكىندىك جاسادى ءارى «جۇپ قۇراۋدى، تەحنيكا ۇيرەنۋدى، كومەكتەسۋگە جەبەۋدى» تاقىرىپ ەتكەن جۇپ قۇراپ، تۋىس بولۋ قيمىلىن جۇرگىزىپ، وڭتۇستىك شينجياڭنان كەلگەن قىزمەتكەرلەردىڭ سول جەردىڭ تۇرمىسىنا تەزىرەك ۇيىرلەسۋىنە مۇمكىندىك جاسادى.
يبىرايىم مەن ياڭ حۋشاننىڭ اڭگىمەسى وڭتۇستىك شينجياڭنان كەلگەن جۇمىسكەرلەر مەن جەرگىلىكتى قىزمەتكەرلەردىڭ ارالاسۋىنىڭ، ىشتەسۋىنىڭ، توعىسۋىنىڭ ىقشام كورىنسى عانا. كەزەكتە فۋليدا سەرىكتەستىگىنىڭ ساقا قىزمەتكەرلەرى وڭتۇستىك شينجياڭنان كەلگەن جاڭا قىزمەتكەرلەرمەن تۇگەلدەي جۇپ قۇراپ، ولاردى سۇيەمەلدەدى.
