ەركىنعازى احىمەتباي ۇلى حابارلايدى. جۋىردا، كۇيتۇن قالاسىنىڭ جينشيۋيۋان كورىنىس رايونى مەملەكەتتىك 3A دارەجەلى كورىنىس رايونى بولىپ باعالانىپ، كۇيتۇن قالاسىندا مەملەكەتتىك A دارەجەلى كورىنىس رايونى جوق بولۋداي بوستىقتى تولتىردى.
كۇيتۇن قالاسىنداعى جينشيۋيۋان كورىنىس رايونى − كۇيتۇن قالاسىنىڭ بەيجيڭ باتىس جولىنداعى بۇرىنعى باتىس باقشا. بۇل ءوڭىر وتانشىلدىق تاربيە ورىستەتۋ، ادامزات مادەنيەتىن ايگىلەۋ، بايىرعى قۇرىلىستاردان ۇلگى الۋ، وسىمدىك تۋرالى عىلىمداردى جالپىلاستىرۋ، سەيىل قۇرۋ سىندىلاردى ءبىرتۇلعالاندىرعان ۋنيۆەرسال باقشا. بۇل باقشانىڭ جالپى جەر كولەمى 989 مۋ بولىپ، لين زىشۇي باقشاسىن نەگىز ەتكەن جۇڭحۋانىڭ ءداستۇرلى مادەنيەت باقشاسى، ساياحات باقشاسى، ۇلتتىق ءتۇس العان باقشا، وسىمدىك باقشاسى، حايۋاناتتار باقشاسى جانە كوگىلدىر كول سىندى «6 باقشا، ءبىر كولدەن» قۇرام تاپقان.
باقشا ىشىندە جۇڭحۋانىڭ كوپتەگەن ءداستۇرلى قۇرىلىستارى نەگىز ەتىلگەن بولىپ، لين زىشۇي باقشاسىن نەگىز ەتكەن كۇيتۇن قالاسىنىڭ وتانشىلدىق تاربيە بازاسى وسى اراعا ورنالاسقان. مۇنداعى 618.5 مۋ جەردىڭ الۋان ءتۇرلى گۇل - شوپتەرى تولىق بولىپ، سيرەك كەزدەسەتىن گۇل - شوپتەردى ارناۋلى ەگەتىن رايون سىندى 12 وسىمدىكتەر باقشاسى كۇيتۇن قالاسىنىڭ عىلىمدى جالپىلاستىرۋ - تاربيەلەۋ بازاسى ەتىپ بەلگىلەنگەن. كورىنىس رايونىنىڭ جاسىلداندىرىلعان جەر كولەمى 65.72 پايىزعا جەتىپ، بۇل رايون «التىن اتىراۋ» رايونىنداعى، ءتىپتى، سولتۇستىك شينجياڭداعى ساياحاتشىلاردىڭ ەڭ الدىمەن تاڭدايتىن ورىندارىنىڭ بىرىنە اينالعان.
2012 - جىلدان بەرى، كۇيتۇن قالاسى سولتۇستىك شينجياڭداعى ساياحاتشىلاردى شوعىرلى تاراتۋ ورنىن قۇرۋدى نىسانا ەتىپ، مەملەكەتتىك A دارەجەلى كورىنىس رايونىنىڭ نەگىزگى تۇلعاسىن قۇرىپ، كۇيتۇننىڭ ساياحات ماركاسىن جاراتىپ، ىلگەرىندى - كەيىندى 400 ميلليون يۋان قارجى قوسىپ، كورىنىس رايونىن شىت جاڭا جوبالاپ، دارەجەسىن جوعارىلاتىپ، 10 نەشە كورىنىس ورنىن سالىپ، ساياحاتشىلاردى باۋرادى.
جينشيۋيۋان كورىنىس رايونىنىڭ مەملەكەتتىك 3A دارەجەلى كورىنىس رايونى بولىپ باعالانۋى كۇيتۇن قالاسىنىڭ ساياحات كورىنىس رايونىنىڭ دامۋىن جەبەپ، دارەجەسىن جوعارىلاتۋمەن بىرگە كۇيتۇن قالاسىنىڭ ساياحات كاسىبىن دامىتۋدى ىلگەرىلەتۋدە بەلسەندى رول اتقاردى.
ءتىلشىنىڭ قىزمەت ورنى: كۇيتۇن حالىق راديو ستانسياسى
