چىن چۋانگو، سىمايىل تىلەۋالدى، نايىم ياسىن، نۇرلان ءابىلماجىن ۇلى، سۇن جينلۇڭ، لي پىڭشين ءتوراعالار مىنبەسىنەن ورىن الدى
شوكىرات زاكىر ۇكىمەت قىزمەتىنەن بايانداما جاسادى، ءماجىلىستى ۋاڭ يۇڭميڭ باسقاردى
اۆتونوميالى رايوندىق 13 - كەزەكتى حالىق قۇرىلتايىنىڭ 1 - ءماجىلىسى 22 - قاڭتار ءتۇستىڭ الدىندا شينجياڭ حالىق سارايىندا اشىلدى. سۋرەتتە: ءماجىلىس ءساتى
تيانشاننىڭ تۇستىگى مەن تەرىستىگىنەن كەلگەن اۆتونوميالى رايوندىق حالىق قۇرىلتايىنىڭ ۋاكىلدەرى 23 ميلليوننان استام ءار ۇلت حالقىنىڭ ماڭىزدى تاپسىرماسىن ارقالاپ، كوكىرەك كەرنەگەن سەزىممەن شينجياڭ حالىق سارايىنا قادام قويىپ، نەگىزگى زاڭ مەن زاڭداردا جۇكتەلگەن قاسيەتتى بورىشتارىن وتەدى. 1000 ادامدىق جيىن زالى ايبىندى بەينەگە ەندى، مەملەكەت گەربى ءتوراعالار مىنبەسىنىڭ قاق ورتاسىنا بيىك ىلىنگەن، جيىن زالى سالتاناتتى دا قىزۋ مەرەيگە شومدى.
ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى چىن چۋانگو، شوكىرات زاكىر، سۇن جينلۇڭ، لي پىڭشين، لي ۋي، شاۋكەت يمىن، شۇي حايرۇڭ، لي شۋەجۇن، ەركىن تۇنياز، ما شۋەجۇن، تيان ۋىن، لو دۇڭچۋان، سارقىت اقان ۇلى، جاڭ چۇنلين، ۋاڭ يۇڭميڭ، دۇڭ شينگۋاڭ، مانەن زەينەل ۇلى ءتوراعالار مىنبەسىنىڭ الدىڭعى قاتارىنان ورىن الدى.
سىمايىل تىلەۋالدى، نايىم ياسىن، نۇرلان ءابىلماجىن ۇلى، اسحات كەرىمباي ۇلى، ليۋ ۋانلۇڭ، پىڭ جيارۇي جانە اۆتونوميالى رايوننىڭ پارتيا، ۇكىمەت، ارميا ورىندارىنىڭ، سونداي - اق شينجياڭ ءوندىرىس - قۇرىلىس بيڭتۋانىنىڭ باسشىلارى، ءماجىلىس ءتوراعالار القاسىنىڭ قۇرامىنداعىلار ءتوراعالار مىنبەسىنەن ورىن الدى.
اۆتونوميالى رايوندىق 13 - كەزەكتى حالىق قۇرىلتايىنىڭ 1 - ماجىلىسىنە قاتىناسۋعا ءتيىستى ۋاكىل سانى 548. بۇگىنگى ماجىلىسكە 528 ۋاكىل قاتىناستى، بۇل زاڭدا بەلگىلەنگەن ادام سانىنا ۇيلەسەدى.
تۇستەن بۇرىن ساعات 10نان 30 مينۋت وتكەندە، ءماجىلىستىڭ اشىلۋ جينالىسىن باسقارۋشى ۋاڭ يۇڭميڭ شينجياڭ ۇيعۇر اۆتونوميالى رايوندىق 13 - كەزەكتى حالىق قۇرىلتايى 1 - ءماجىلىسىنىڭ اشىلعاندىعىن جاريالادى. زالداعى جالپى قاۋىم ورىندارىنان تۇرىپ، مەملەكەت گيمنىن ورىندادى.
ءماجىلىستىڭ كەڭەستىك ءتارتىبى بويىنشا، اۆتونوميالى رايوننىڭ ءتوراعاسى شوكىرات زاكىر اۆتونوميالى رايوندىق حالىق ۇكىمەتى اتىنان ۇكىمەت قىزمەتىنەن بايانداما جاسادى. بايانداما 3 بولىمگە بولىنگەن: ءبىرىنشى، وتكەن 5 جىلعى جانە 2017 - جىلعى قىزمەتتەرگە ايال؛ ەكىنشى، الداعى 5 جىلداعى قىزمەتتەر جونىندە جالپىلىق ورنالاستىرۋ؛ ءۇشىنشى، 2018 - جىلعى نەگىزگى قىزمەتتەر.
شوكىرات زاكىر وتكەن 5 جىلداعى قىزمەتتەرگە جالپىلىق ەكونوميكالىق قۋاتتىڭ كورنەكتى نىعايعانى، نەگىزدىك قۇرىلعىلاردىڭ شارت - جاعدايىنىڭ ايتارلىقتاي جاقسارعانى، رەفورما جاساۋ، ەسىك اشۋدا ماڭىزدى قادام تاستالعانى، حالىق جۇرتشىلىعىنىڭ تۇرمىسى ايتارلىقتاي جاقسارعانى، ەكولوگيالىق ورتانىڭ جاعدايى تۇتاسىمەن جاقسارعانى سياقتى 5 جاقتان جان - جاقتى ايالدادى؛ 2017 - جىلعى قىزمەتتەردى قوعامدىق جالپى جاعدايدىڭ ورنىقتىلىعىنىڭ كۇش سالا قورعالعاندىعى، ەكونوميكانىڭ ءۇرتىس، اقاۋسىز دامۋىنىڭ كۇش سالا ىلگەرىلەتىلگەندىگى، نەگىزدىك قۇرىلعى قۇرىلىستارىنىڭ كۇش سالا ىلگەرىلەتىلگەندىگى، حالىق تۇرمىسىنىڭ كۇش سالا قامتاماسىز ەتىلگەندىگى جانە جاقسارتىلعاندىعى، ۇلتتار ىنتىماعى مەن ءدىن جاراسىمدىلىعىنىڭ كۇش سالا جەبەلگەندىگى، قوعامدىق ىستەردىڭ كۇش سالا دامىتىلعاندىعى، ەكولوگيالىق وركەنيەت قۇرىلىسىنىڭ كۇش سالا نىعايتىلعاندىعى، شينجياڭعا باعىتتامالى كومەكتەسۋ قىزمەتىنىڭ كۇش سالا ىلگەرىلەتىلگەندىگى، ۇكىمەتتىڭ ءوز قۇرىلىسىنىڭ كۇش سالا نىعايتىلعاندىعى سياقتى 9 جاقتان جۇيەلى قورىتىندىلادى.
شوكىرات زاكىر بىلاي دەدى: وتكەن 5 جىل − شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جانە پارتيا 19 - قۇرىلتايىنىڭ رۋحىن جاپپاي دايەكتىلەندىرگەن، تياناقتاندىرعان 5 جىل، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ شينجياڭدى جونگە سالۋ جالپى جوباسىن دايەكتىلەندىرىپ، شينجياڭنىڭ قوعام ورنىقتىلىعى مەن باياندى تىنىشتىعىن ىلگەرىلەتكەن 5 جىل. اسىرەسە، ج ك پ اۆتونوميالى رايوندىق 9 - قۇرىلتايىنان بەرى، اۆتونوميالى رايوندىق پارتكوم بۇكىل اۆتونوميالى رايونداعى ءار ۇلت حالىق جۇرتشىلىعىن ىنتىماقتاستىرىپ جانە باستاپ، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن ىشكەرىلەي ۇيرەنىپ جانە دايەكتىلەندىرىپ، ورنىقتىلىق، دامۋ قىزمەتتەرىن ءبىر تۇتاس ىلگەرىلەتىپ، شينجياڭ قىزمەتىندە شىت جاڭا جاعداي اشتى. اۆتونوميالى رايوندىق 12 - كەزەكتى حالىق ۇكىمەتى اۆتونوميالى رايوندىق پارتكومنىڭ شەشىم - ورنالاستىرۋلارى بويىنشا ءتۇرلى ىستەردى بايىپتى قاداممەن ىلگەرىلەتتى، قوعامدىق جالپى جاعداي نەگىزىنەن ورنىقتىلىقتى ساقتادى، «12 - بەسجىلدىق» جوبا تابىسپەن ورىندالىپ، «13 - بەسجىلدىق» جوبا ءساتتى تۇردە اتقارىلا باستادى، ەكونوميكالىق، قوعامدىق دامۋدا تاريحي جەتىستىكتەرگە قول جەتتى، وسى كەزەكتى ۇكىمەتتىڭ مىندەت اتقارۋ مەرزىمىندەگى نىسانالار تولىق ىسكە استى.
بايانداماداعى الداعى 5 جىلداعى قىزمەتتىڭ جالپى ورنالاستىرۋىنا ايالداعاندا، شوكىرات زاكىر شينجياڭ ءدوپ كەلىپ وتىرعان كوپتەگەن وراي مەن ءتيىمدى شارت - جاعدايعا تالداۋ جاساپ، الداعى 5 جىلداعى ۇكىمەت قىزمەتىنىڭ جالپى وي جەلىسىن، ءتۇيىندى مىندەتىن بايىمدادى. ول بىلاي دەپ اتاپ كورسەتتى: پارتيا 19 - قۇرىلتايى جۇڭگوشا سوتسياليزم ۇلى تۋىن بيىك ۇستاپ، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن پارتيامىز، ءسوز جوق، ۇزاق ۋاقىت تاباندى بولۋعا ءتيىستى جەتەكشى يدەيا ەتىپ بەلگىلەپ، جۇڭحۋا ۇلتىنىڭ ۇلى گۇلدەنۋىن ىسكە اسىرۋدىڭ ايبىندى جوباسىن ايقىن العا قويدى، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىنىڭ شينجياڭ تاراۋىن كوڭىلدەگىدەي جازۋىمىزعا قۇدىرەتتى يدەيالىق قارۋ جانە ارەكەت باعدارناماسىن ازىرلەپ، بۇكىل اۆتونوميالى رايونداعى ءار ۇلت حالقىنا بارىنشا دەم بەرىپ، شابىتتاندىردى. شي جينپيڭ جولداستى ۇيتقى ەتكەن پارتيا ورتالىق كوميتەتى شينجياڭدى جونگە سالۋدىڭ جالپى جوباسىن، اسىرەسە، قوعام ورنىقتىلىعى مەن باياندى تىنىشتىق باس نىساناسىن تۇراقتاندىرىپ، ءبىزدىڭ شينجياڭ قىزمەتىن ويداعىداي ىستەۋىمىزگە العا باسۋ بەتالىسىن كورسەتىپ، ءتۇبىرلى نەگىز ازىرلەدى. پارتيا ورتالىق كوميتەتى «ءبىر بەلدەۋ، ءبىر جول» ستراتەگياسىن ىشكەرىلەي ىلگەرىلەتىپ، جىبەك جولى ەكونوميكالىق بەلدەۋى وزەكتى رايونى قۇرىلىسىن العا ىلگەرىلەتىپ، باتىس بولىكتى اشۋ تەبىنىن ارتتىرىپ، شينجياڭنىڭ ەكونوميكالىق، قوعامدىق دامۋىنا كەڭ ءورىس ازىرلەدى. ءبىز پارتيا ورتالىق كوميتەتىنىڭ پارمەندى باسشىلىعىندا شينجياڭنىڭ ءتۇرلى قىزمەتىندە جاڭا جاعداي اشۋعا مىعىم بەل بايلاپ، نىق سەنىم ارتىپ وتىرمىز!
شوكىرات زاكىردىڭ بايانداماسىنداعى بيىلعى ەكونوميكالىق، قوعامدىق دامۋدىڭ باستى بولجالدى نىسانالارى مىناداي: وڭىرلىك ءوندىرىس جالپى ءونىم قۇنى %7 مولشەرىندە ارتادى، قالا، اۋىل تۇرعىندارىنىڭ تابىسى %8.5 مولشەرىندە ارتادى، تۇرعىنداردىڭ تۇتىنۋ باعاسىنىڭ قىمباتتاۋى %3.5 ىشىندە مەڭگەرىلەدى. شوكىرات زاكىر مىنالاردى ءبىلدىردى: وسى ايتىلعان نىسانالار مەن مىندەتتەردى ورىنداۋ ءۇشىن، مىنا بىرنەشە جاقتاعى قىزمەتتەردى باسا يگەرۋ قاجەت: (1) نازاردى باس نىساناعا شوعىرلاندىرىپ، جاراسىمدى دا ورنىقتى قوعامدىق ورتانى قۇلشىنا تۇلعالاۋ؛ (2) ەرەكشە باسىمدىققا يە شارۋاشىلىقتاردى جەتىلدىرىپ جانە زورايتىپ، ناقتى ەكونوميكانىڭ دامۋىن بار كۇشپەن جەبەۋ؛ (3) قامداۋ جاعىنداعى قۇرىلىمدىق رەفورمانى ىشكەرىلەي ىلگەرىلەتىپ، ءتۇرلى بازار سۋبيەكتىلەرىنىڭ ومىرشەڭدىگىن تاسقىنداتۋ؛ (4) كەدەيلىكتەن دالمە - ءدال قۇتىلدىرۋدان قامال الۋ شايقاسىن ويداعىداي جۇرگىزىپ، كەدەيلىكتەن قۇتىلدىرۋ شارالارىنىڭ دالمە - ءدال تياناقتانۋىنا شىنايى كەپىلدىك ەتۋ؛ (5) اۋىل - قىستاقتاردى وركەندەتۋ ستراتەگياسىن بەلسەندىلىكپەن اتقارىپ، اۋىل شارۋاشىلىعى مەن اۋىل - قىستاقتاردىڭ دامۋىندا جاڭا جاعداي اشۋ؛ (6) بازار مەحانيزمىنىڭ رولىن تولىق ساۋلەلەندىرىپ، نەگىزدىك قۇرىلعى قۇرىلىستارىن ورنىقتى ىلگەرىلەتۋ؛ (7) حالىق تۇرمىسىن بار كۇشپەن قامتاماسىز ەتىپ جانە جاقسارتىپ، ءار ۇلت حالقىنىڭ تاماشا تۇرمىسقا دەگەن كۇن ساناپ ارتقان قاجەتىن ۇزبەي قاناعاتتاندىرۋ؛ (8) اۋىر حاۋىپ - قاتەرلەردەن ساقتانۋدان جانە ونى جويۋدان قامال الۋ شايقاسىن ويداعىداي جۇرگىزىپ، قازىنا - سالىقتىڭ، فينانستىڭ تىرەكتىك رولىن كۇشەيتۋ؛ (9) ۇلتتار ىنتىماعى، العاباسارلىعى ىستەرىن بار كۇشپەن ىلگەرىلەتىپ، ءدىندى سوتسياليستىك قوعامعا سايكەسۋگە بەلسەنە باستاۋ؛ (10) لاستانۋدىڭ الدىن الۋدان، ونى وڭاۋدان قامال الۋ شايقاسىن ويداعىداي جۇرگىزىپ، كورىكتى شينجياڭ قۇرۋدى جەدەلدەتۋ؛ (11) جىبەك جولى ەكونوميكالىق بەلدەۋى وزەكتى رايونى قۇرىلىسىن جەدەلدەتىپ، شار تاراپقا ەسىك اشۋ جاعدايىن قالىپتاستىرۋ؛ (12) بيڭتۋاننىڭ رەفورما، دامۋ ىستەرىنە بار كۇشپەن قولداۋ كورسەتىپ، بيڭتۋاننىڭ «ورنىقتىرعىش، دومنا پەش، ۇلگى كورسەتۋشى رايون» رەتىندەگى ەرەكشە رولىن تولىق ساۋلەلەندىرۋ.
شوكىرات زاكىر مەملەكەت قورعانىسى مەن اسكەري قوسىن قۇرىلىسىن قولداۋ، باستان - اياق پارتيانىڭ باسشىلىعىنا تاباندى بولۋ، ۇكىمەتتىڭ وزىندىك قۇرىلىسىن كۇشەيتۋ سياقتى جاقتاردا دا بايىمداۋ جاسادى.
ءماجىلىستىڭ كەڭەستىڭ تارتىبىنە سايكەس، ءماجىلىس اۆتونوميالى رايوننىڭ 2017 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ جاعدايى جانە 2018 - جىلعى حالىق شارۋاشىلىعى مەن قوعامدىق دامۋ جوسپارى جوباسى جونىندەگى باياندامانى، اۆتونوميالى رايوننىڭ 2017 - جىلعى مەجە ەسەبىنىڭ اتقارىلۋى جاعدايى جانە 2018 - جىلعى مەجە ەسەپ جوباسى جونىندەگى باياندامانى باسىپ تاراتىپ، تەكسەرىپ بەكىتۋگە ۇسىندى.
ءماجىلىس داۋىسقا سالۋ ارقىلى اۆتونوميالى رايوندىق 13 - كەزەكتى حالىق قۇرىلتايى 1 - ءماجىلىسىنىڭ سايلاۋ ءادىسىن ماقۇلدادى، اۆتونوميالى رايوندىق 13 - كەزەكتى حالىق قۇرىلتايىنىڭ ارناۋلى كوميتەتتەرىن قۇرۋ، سونداي - اق ولاردىڭ مەڭگەرۋشى مۇشەلەرى، ورىنباسار مەڭگەرۋشى مۇشەلەرى، مۇشەلەرى كانديداتتارىن داۋىسقا سالۋ ءادىسىن ماقۇلدادى؛ اۆتونوميالى رايوندىق 13 - كەزەكتى حالىق قۇرىلتايى قازىنا - ەكونوميكا كوميتەتىنىڭ مەڭگەرۋشى مۇشەسىنىڭ، ورىنباسار مەڭگەرۋشى مۇشەلەرىنىڭ، مۇشەلەرىنىڭ ەسىمدىگىن ماقۇلدادى.
ساياسي كەڭەس اۆتونوميالى رايوندىق 12 - كەزەكتى كوميتەتىنىڭ 1 - ماجىلىسىنە قاتىناسقان ساياسي كەڭەس مۇشەلەرى ماجىلىسكە سىرتتاي قاتىناستى.
اۆتونوميالى رايونداعى دەمالىسقا، پەنسياعا شىققان ولكە دارەجەلى ءىشىنارا باسشى كادرلار ۇسىنىس بويىنشا ءماجىلىستىڭ اشىلۋ جينالىسىنا قاتىناستى. اۆتونوميالى رايونعا (ورتالىققا) توتە قاراستى ورىندارداعى، سونداي - اق ايماق، وبلىس، قالالاردىڭ قاتىستى ورىندارىنداعى جاۋاپتى جولداستار ماجىلىسكە سىرتتاي قاتىناستى.
