ۇيگە جاقىن، جاتاعى جاقسى، تاماعى تەگىن، ارناۋلى كولىك بار...
قاشقار ەكونوميكالىق اشۋ رايونى شىنجىن كاسىپ باقشاسىنىڭ جۇمىسقا ورنالاستىرۋعا جان - جاقتى قىزمەت كورسەتۋىنەن وسىنداعى ەڭبەكشى «گۇلدەر» −
تىلشىلەرىمىز لۇي فىڭباۋ، بارشا تەگىس قىزى
22 - قاڭتاردا نيساگۇل ۇسەيىن (وڭدا)قاشقار مودىڭرۇيلەي كيىم - كەشەك شەكتى سەرىكتەستىگىنىڭ تىگىنشىلىك سەحىندا جاڭا جۇمىسشىلارعا كيىم تىگۋدىڭ ءجونىن كورسەتۋدە. سۋرەتتى ءتىلشىمىز بارشا تەگىس قىزى تۇسىرگەن
«وسىندا جۇمىستامىن، ايلىق تابىسىم 2500 يۋان. ۇيگە جاقىن، جاتاعى جاقسى، تۇستە زاۆود تەگىن تاماق بەرەدى، جۇمىستان كەيىن ارناۋلى كولىكپەن جەتكىزىپ سالادى، مەن رازىمىن»، - دەدى شىنجىن كاسىپ باقشاسىنداعى كاسىپورىن − قاشقار مودىڭرۇيلەي كيىم - كەشەك شەكتى سەرىكتەستىگىنىڭ جۇمىسشىسى انيگۇل ابلاحات.
باس شۋجي شي جينپيڭ پارتيا 19 - قۇرىلتايىنىڭ بايانداماسىندا «بارلىق ادامنىڭ ادال ەڭبەكپەن ءوز دامۋىن ىسكە اسىرۋىنا مۇمكىندىك جاساۋ كەرەك» دەپ اتاپ كورسەتكەن بولاتىن.
شىنجىن كاسىپ باقشاسىندا قازىر 76 كاسىپورىن قارجى سالىپ، وندىرىسپەن شۇعىلدانىپ، جەرگىلىكتى اۋىل - قىستاقتارداعى ارتىق ەڭبەككۇشتەردەن 10 مىڭنان اسا ادامدى جۇمىسقا قابىلداپ وتىر، بۇل 2016 - جىلداعىدان 5000 ادام كوپ. كولەمدىك اسەردى بىرتە - بىرتە ىسكە اسىرۋمەن قاتار، كاسىپ باقشاسى قامداعان جان - جاقتى الەۋمەتتىك قىزمەت كورسەتۋ فۋنكتسياسى دا ۇزدىكسىز كۇشەيۋدە. تىڭعىلىقتى، ۇقىپتى كورسەتىلگەن قىزمەت وسىنداعى ەڭبەكشىلەردى قاجىرلىلىقپەن جۇمىس ىستەۋگە ۇيرەتىپ، ولاردىڭ تۇرمىسىن ءماندى ەتىپ، بولاشاققا دەگەن سەنىمىن كۇشەيتتى.
«اۋىلدان ۇزاماي اقشا تاۋىپ وتىرمىن،بۇنىڭ قادىرىنە جەتەمىن»
توحتىگۇل تۇرعۇن جۇمىس كيىمىمەن ءوندىرىس جەلىسىنىڭ جانىندا وتىرىپ، ماشىقتى قولدارىمەن كيىم تىگىپ وتىر.
توحتىگۇل − قاشقار قالاسى بەشكىرەم اۋىلى قاراقۇم قىستاعىنىڭ ادامى، ۇيىندە 8 مۋ جەرى بار، جۇگەرى، ءبيداي ەگۋدەن جىلىنا 6000 يۋان اقشا تابادى.
2014 - جىلى شىنجىن كاسىپ باقشاسىنىڭ 1 - مەرزىمى پايدالانۋعا بەرىلدى، كيىم - كەشەك، ەلەكترون سياقتى ەڭبەككۇشتى كوپ قاجەتسىنەتىن قىرۋار كاسىپورىن كاسىپ باقشاسىنا ىرگە تەۋىپ، قاشقارداعى ءار ۇلت بۇقاراسىنا ءۇيدىڭ الدىندا جۇمىسقا ورنالاسۋ ورايىن ازىرلەدى.
«اۋىلدان الىستاماي - اق اقشا تابامىن». توحتىگۇلدىڭ قۋانىشىندا شەك جوق. 2016 - جىلى ساۋىردە ول شىنجىن كاسىپ باقشاسىنداعى كاسىپورىن − مەيلي - اۋ كيىم - كەشەك سەرىكتەستىگىنە جۇمىسقا تۇرادى، ايلىق ەڭبەكاقىسى 2000 يۋان شاماسىندا. «كاسىپورىن مەن ءۇشىن زەينەتكەرلىك قامسىزداندىرۋىنا جارنا تاپسىرادى، بىزگە شىنايى جەڭىلدىك جاسالىپ وتىر، بۇنىڭ ءبارى پارتيانىڭ ساياساتىنىڭ جاقسىلىعىنان».
تۇراقتى تابىسقا قول جەتكىزگەن توحتىگۇل بالالارىنا جاڭا كيىم، ۇيىنە جاڭا جيھازدار الىپتى، وتباسىنىڭ تۇرمىسى بىرتە - بىرتە تۇزەلىپ كەلەدى ەكەن.
وتكەن جىلى مامىردا توحتىگۇلدىڭ تانىستىرۋىمەن ونىڭ جەڭگەسى دە زاۆودقا جۇمىسقا تۇرىپتى. بۇل كۇندە ەكەۋى قىستاقتاعى جۇرت تامسانا قارايتىن وبيەكتىگە اينالىپ وتىر. «پارتيا مەن ۇكىمەت قاشقاردان وسىنشاما كوپ كاسىپورىن اشىپ وتىر، اۋىلدان الىستاماي - اق جۇمىسقا تۇرىپ، اقشا تاباتىن بولدىق، مەن وسىنىڭ قادىرىنە جەتىپ، اقشا تاۋىپ، جاقسى تۇرمىس كەشەمىن»، - دەدى توحتىگۇل.
«تەك قۇلشىنا جۇمىس ىستەسەم بولعانى، وسى نىسانالاردىڭ بارلىعى ىسكە اسادى»
قاشقار مودىڭرۇيلەي كيىم - كەشەك شەكتى سەرىكتەستىگىنىڭ سەحىندا ءوندىرىس گرۋپپاسىنىڭ باستىعى نيساگۇل ۇسەيىن تىنىم تاپپاي ارالاپ، جۇمىسشىلاردىڭ قيىس كەتكەن جەرى بولسا دەرەۋ تۇزەتۋ جاساپ، نۇسقاۋ بەرىپ وتىرادى.
وسىدان ءبىراز جىل ىلگەرى نيساگۇلدىڭ تۇرمىسى بۇنداي ەمەس ەدى. «ول كەزدە ءۇيىمىزدىڭ كۇن كورىسى ءۇپى - ءتاپى بولاتىن»، - دەدى نيساگۇل تىلشىگە.
شىنجىن كاسىپ باقشاسىنا ىرگە تەپكەن كيىم - كەشەك، ەلەكترون كاسىپورىندارىنىڭ ۇزدىكسىز كوبەيۋىنە ىلەسە، قىرۋار جۇمىسشى قاجەت بولدى دا، كورىنەرلىك تابىس كوزى شار تاراپتاعى ەگىنشى - مالشىلاردى زاۆودقا كەلىپ جۇمىسقا تۇرۋعا تارتتى.
2015 - جىلى قاراشادا نيساگۇل شىنجىن كاسىپ باقشاسىنداعى ءبىر كاسىپورىنعا جۇمىسقا تۇردى، تىگىنشىلىك شەبەرلىگىنىڭ ارقاسىندا، ايىنا 2000 يۋان اقشا تاباتىن بولدى.
جۇمىسقا تۇرعانىنا 2 جىلدان اسقاندا، ەكى تىلگە جۇيرىك، تەحنيكالىق نەگىزى بار، بايلانىسقا شەبەر نيساگۇلدىڭ تەحنيكاسى ۇزدىكسىز كوتەرىلىپ، باسقارۋ تاجىريبەسى مولىعىپ، ءوندىرىس گرۋپپاسىنىڭ باستىعى بولادى، ايلىق ەڭبەكاقىسى 2500 يۋانعا وسەدى. دەمالىس كەزىندە وتباسىندا تاپسىرىسپەن كيىم تىگەتىن ونىڭ ايلىق تابىسى 4000 يۋانعا جاقىندايدى.
نيساگۇل الدىنا ماقسات - نىسانا قويىپ وتىر: «پارتيا مەن ۇكىمەت بىزگە وسىنشا تاماشا شارت - جاعداي ازىرلەپ وتىر، مەن ىشكى ولكەلەرگە بارىپ ساياحاتتاپ، سىرتقى دۇنيەنى كورىپ - بىلگىم كەلەدى؛ ءبىلىمىمدى تەرەڭدەتىپ، ءوزىمنىڭ كيىم جوبالاۋ دەڭگەيىمدى تاعى ءبىر بەلەسكە كوتەرسەم دەيمىن. تەك قۇلشىنا جۇمىس ىستەسەم بولعانى، وسى نىسانالاردىڭ بارلىعىنىڭ ىسكە اساتىنىنا كامىل سەنەمىن».
«جاقسى ىستەي بەرسەم، بولاشاقتاعى تۇرمىسىم بۇدان دا جاقسى بولادى»
شىنجىن كاسىپ باقشاسى قوجالىق باسقارۋدى بازارلاندىرىپ جۇرگىزۋ مودەلىن قولدانىپ، باقشا رايونىنىڭ ورتا تازالىعى، كۇزەت، اس - سۋ، قاتىناس، حابارلاسۋ سياقتىلارىن تەڭ قادامدا قامتاماسىز ەتىپ، جۇمىس ىستەۋشىلەرگە باقشا رايونىنىڭ جىلىلىعىن سەزىندىرە ءتۇستى.
شىنجىن كاسىپ باقشاسىنداعى كاسىپورىنداردىڭ بىرىندە جۇمىسقا تۇرعان انيگۇل جۇمىسقا كاسىپ باقشاسىنىڭ اۆتوبۋزىمەن كەلىپ - قايتادى، ءار كۇنى 100 اۆتوبۋز جۇمىسشى - قىزمەتكەرلەردى ماڭايداعى اۋىل - قالاشىقتارعا جەتكىزىپ قويادى. ونىڭ باقشا رايونىنداعى جاتاقحانادا جاتۋىنا دا بولادى، قازىر باقشا رايونىندا 460 جاتاق سالىنعان، تاعى دا 8 جاتاقحانا عيماراتى سالىنۋ ۇستىندە، قۇرىلىس اياقتاعاننان كەيىن 15 مىڭ ادامنىڭ جاتاقتا جاتۋىنا بولادى.
«بۇرىن ءۇيىمىز كەدەي، تابىسىم ماردىمسىز بولدى، اكە - شەشەمنىڭ دە دەنساۋلىعى جاقسى ەمەس ەدى». ول زاۆودقا كىرگەننەن كەيىن، ايىنا 2000 يۋان اقشا تابادى. اپتا اياعىنداعى دەمالىستا تۋىس - تۋعان، دوس - جاراندارىنىڭ تاپسىرۋىمەن كيىم تىگىپ، ايلىق تابىسىنا تاعى دا 1000 يۋان شاماسىندا ۇستەيدى. انيگۇلدىڭ كۇيەۋى دە ءبىر اسحاناعا جۇمىسقا تۇرعان، ايىنا 2000 يۋانداي اقشا تابادى.
انيگۇل كەلەشەكتە بالالارىن ۋنيۆەرسيتەتتەن وقىتۋ ءۇشىن، ايلىق ەڭبەكاقىسىنان 1000 يۋاندى ارنايى بانكەگە قويادى. «مەنىڭ ءبىلىمىم جوعارى ەمەس، سونىڭ دەرتىن كوپ تارتتىم، مەن بالامدى ۋنيۆەرسيتەتتەن وقىتىپ، ءومىرىن ءماندى ەتسەم دەپ ويلايمىن».
كاسىپ باقشاسىنداعى كاسىپورىندار جۇمىسشى - قىزمەتكەرلەرگە تاماق بەلەتىن تاراتادى، تاماق بەلەتىمەن كاسىپ باقشاسىنىڭ اسحاناسىنان تەگىن تاماق ىشۋگە بولادى.
ءتىلشى اسحانادان تاماقتىڭ ءتۇرى وتە كوپ ەكەنىن، پالاۋ، كاۋاپ، تورت، قۋىرماش، ت.ب بار ەكەنىن، جۇمىسشىلاردىڭ تەرەزە الدىندا تارتىپپەن قاتارعا تۇرىپ، تاماق الىپ تۇرعانىن كوردى.
انيگۇل پالاۋ الىپ، اسپاي - ساسپاي جەي باستادى. «مەن وسىنداعى جۇمىس ورايىن قادىرلەيمىن، جاقسى ىستەي بەرسەم، بولاشاقتاعى تۇرمىسىم بۇدان دا جاقسى بولادى»، - دەدى انيگۇل.
