شينحۋا اگەنتتىگىنىڭ 12 - اقپاندا چىڭدۋدان بەرگەن حابارى. جۇڭحۋا ۇلتىنىڭ ءداستۇرلى مەرەكەسى − كوكتەم مەرەكەسى قارساڭىندا، ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 10 - اقپاندا سىچۋاندا تۇراتىن اسكەري بولىمدەردىڭ بەلگىلى بازاسىنا كەلىپ، ۇشىرۋ ورنىنا جانە تەحنيكالىق زاۆود ۇيلەرىنە بارىپ، اسكەري بولىمدەگى كوماندير - جاۋىنگەرلەرگە امانداسىپ، ولاردان حال سۇراپ، پارتيا ورتالىق كوميتەتى مەن ورتالىق اسكەري ىستەر كوميتەتى اتىنان، ازاتتىق ارمياداعى بارلىق كوماندير - جاۋىنگەرلەردەن، قارۋلى ساقشى اسكەري بولىمدەرىندەگى بارلىق وفيتسەر - جاۋىنگەرلەردەن، زاپاستاعى حالىق جاساقتارىنان شىنايى حال سۇرادى جانە كوكتەم مەرەكەسى بايلانىسىمەن ىزگى تىلەك ءبىلدىردى. ول بىلاي دەپ باسا دارىپتەدى: پارتيا 19 - قۇرىلتايىنىڭ رۋحىن مۇقيات دايەكتىلەندىرىپ، جاڭا داۋىردەگى پارتيانىڭ ارميانى قۇدىرەتتەندىرۋ يدەياسىن ىشكەرىلەي دايەكتىلەندىرىپ، ارميانى ساياسي جاقتان قۇرۋعا، رەفورما ارقىلى قۇدىرەتتەندىرۋگە، عىلىم - تەحنيكا ارقىلى گۇلدەندىرۋگە، زاڭ ارقىلى جونگە سالۋعا تاباندى بولىپ، نازاردى سوعىس دايىندىعىنا شوعىرلاندىرىپ، جاڭالىق اشا دامۋدى تەزدەتىپ، بورىشتى، مىندەتتى وتەۋ قابىلەتىن جاپپاي ءوسىرىپ، پارتيانىڭ جاڭا داۋىردەگى ارميانى قۇدىرەتتەندىرۋ نىساناسىن جۇزەگە اسىرۋعا جاڭا، ءتىپتى، زور ۇلەس قوسۋ كەرەك.
اقپان ايىندا چۋانشي دالاسىندا جىلى لەپ ەسىپ، بارلىق جەردەن كوكتەمنىڭ سىبدىرى بىلىنە باستادى. تۇستەن كەيىن ساعات 4 شاماسىندا، شي جينپيڭ بەلگىلى بازانىڭ ۇشىرۋ الاڭىنا كەلدى. ول اۆتوموبيلدەن تۇسە سالا ۇشىرۋ ورنىنا قاراي تارتتى. ەڭسەلى ۇشىرۋ مۇناراسى ەرەكشە ايبىندى كورىنەدى. شي جينپيڭ تانىستىرۋدى تىڭداپ، ۇشىرۋ الاڭىنىڭ ورنالاسۋىنىڭ تۇسىندىرمە سۋرەتىن كورىپ، ۇشىرۋ الاڭىنىڭ قۇرىلىمدىق فۋنكتسياسىن ەگجەي - تەگجەيلى ۇعىسىپ، قاتىستى ماسەلەلەردى سۇرادى. قىزمەتكەر 3 - ءنومىرلى ۇشىرۋ ورنىنىڭ يقۋاتىنىڭ كەمەلدى ەكەنىن، ءار تۇرپاتتاعى راكەتالار مەن عارىش اسپاپتارىن ۇشىرۋعا بولاتىنىن، ەلىمىزدىڭ عارىش تاريحىنداعى كوپتەگەن تۇڭعىشتاردى جارىققا شىعارعانىن تانىستىردى. شي جينپيڭ باسىن يزەپ القادى. تاياۋ جەردەگى 2 - ءنومىرلى ۇشىرۋ ورنى ونداعان رەت ۇشىرۋ مىندەتىن ورىنداپتى، جوسپار بويىنشا تاياۋدا بەيدوۋ − 3 جاساندى سەرىگىن ۇشىرادى ەكەن.
قولباسشىلىق زالىندا، بازاداعى كوماندير - جاۋىنگەرلەر قاربالاس جۇمىس ۇستىندە ەدى. شي جينپيڭ بەيدوۋ − 3 جاساندى سەرىگىن ۇشىرۋ مىندەتىنىڭ دايىندىق جاعدايىنا ەرەكشە كوڭىل ءبولىپ، وسى اراعا ارنايى كەلىپ كوپشىلىككە امانداستى. ءتوراعا شي جينپيڭنىڭ كەلگەنىن كورىپ، كوپشىلىك ەرەكشە تەبىرەندى، ورىندارىنان تۇرىپ قىزۋ شاپالاق سوقتى.
شي جينپيڭ ۇشىرۋ ورنىنداعى كوماندير - جاۋىنگەرلەرمەن ءبىر - بىرلەپ قول الىسىپ، عىلىم - تەحنيكا قىزمەتكەرلەرىمەن ىقىلاسپەن اڭگىمەلەسىپ، جولداستاردىڭ عىلمي زەرتتەۋ قىزمەتىن جانە تۇرمىس جاعدايىن ەگجەي - تەگجەيلى ۇعىستى. كوپشىلىكتىڭ تاۋ قويناۋىنا تامىر تارتىپ، عارىش ىستەرىنە وزدەرىن ارناپ، كوپ ءتۇرلى تاپقىرلىق پاتەنتتەرىن العانىن ەستىگەندە، شي جينپيڭ ولارعا العىس سەزىممەن قارادى. شي جينپيڭ جاساندى سەرىك ۇشىرۋدىڭ دايىندىق جۇمىستارىن ۇعىسىپ، كوپشىلىككە كەمەلدەندىرە تۇسەتىن قىزمەت ستيلىن ساقتاپ، ەشقانداي اعاتتىق جىبەرمەۋدى تاپسىردى.
كوكتەم مەرەكەسى تاياپ قالدى. شي جينپيڭ نەگىزگى ساتىداعى كوماندير - جاۋىنگەرلەردى ەسىنەن شىعارمادى، ول ارنايى تۇردە بەينە ەكران ارقىلى اسكەري بولىمدەردەن حال سۇراپ، كوماندير - جاۋىنگەرلەرگە، سونداي - اق ولاردىڭ وتباسىنداعىلارعا مەرەكە بايلانىسىمەن ىزگى تىلەك ءبىلدىردى. تەڭىز سۋى مارجان قۇزداردى ۇرىپ، اق جال تولقىندار كوتەرىلەدى. شي جينپيڭ شيشاداعى بەلگىلى ولشەۋ - مەڭگەرۋ تۇيىنىندەگى كوماندير - جاۋىنگەرلەرمەن تەلەفوندا سويلەسىپ، ارال ورتاسىنا ۇيلەسكەن - ۇيلەسپەگەندىكتەرىن، مەرەكەگە قالاي دايىندالىپ جاتقاندارىن سۇرادى... ارالداعى شارت - جاعدايدىڭ ءبىرشاما كەمەلدى ەكەنىن، كوكتەم مەرەكەسىندە ءتۇشپارا ءتۇيۋ، كارا OK، شاحمات جانە دوپ جارىستارىن ورنالاستىرعانىن ەستىپ، شي جينپيڭ قاتتى رازى بولدى، ول مەرەكە كەزىندە جاۋىنگەرلەردىڭ تۇرمىسىن ايتارلىقتاي ورنالاستىرىپ، ولاردىڭ كوكتەم مەرەكەسىن شات - شادىمان وتكىزۋىنە مۇمكىندىك جاساۋدى تاپسىردى. تەڭىز بويىنداعى بەلگىلى ۇشىرۋ - سىناۋ پۋنكتىندە، اسكەري بولىمدەگى كوماندير - جاۋىنگەرلەر ۇشىرۋ مۇناراسىنىڭ تۇبىندە اسقاق رۋحپەن ساپ تۇزەپ، بەينە ەكران ارقىلى ءتوراعا شي جينپيڭنىڭ مەرەكەسىنە قۇتتى بولسىن ايتتى. شي جينپيڭ ولارعا العىس ايتىپ، ولاردى بورىشتى ەستەن شىعارماي، بورىشتى ارقالاپ، قايراتتانا رەفورما جاساپ، جاڭالىق اشىپ، ءتىپتى زور ناتيجەلەرگە قول جەتكىزۋگە جىگەرلەندىردى.
قولباسشىلىق زالىنان شىققان سوڭ، شي جينپيڭ تەحنيكالىق زاۆود ۇيىنە بارىپ، كورمە تاقتاسى ارقىلى بازانىڭ دامۋ جاعدايىن ۇعىسىپ، بازانىڭ جۇڭگونىڭ عارىش ىستەرىنە قوسقان ماڭىزدى ۇلەسىن تولىق تۇراقتاندىردى. شي جينپيڭ بازاعا قاراستى قاتىستى اسكەري ءبولىمنىڭ ورىنباسار پولكتەن جوعارى دارەجەلى كادرلارىن ىقىلاسپەن قابىلدادى ءارى ماڭىزدى ءسوز سويلەدى. شي جينپيڭ بىلاي دەپ باسا دارىپتەدى: بورىش ارقالاۋدى كۇشەيتىپ، عارىش ىستەرى ارقىلى وتان ءۇمىتىن اقتاۋ مۇراتىن نىعايتىپ، عارىش ىستەرى ارقىلى مەملەكەتتى قۇدىرەتتەندىرۋ سەنىمىن نىعايتىپ، «ەكى بومبى، ءبىر سەرىك» رۋحىن، عارىش رۋحىن ساۋلەلەندىرىپ، ءتىپتى كوپ جۇڭگو كەرەمەتتەرىن جاراتۋ كەرەك. سوعىستا جەڭۋ قابىلەتىن كۇشەيتىپ، شىنايى سوعىس كۇيىندەگى اسكەري جاتتىعۋدى بارىنشا يگەرىپ، سوعىس ادىستەرىن، جاتتىعۋ ادىستەرىن زەرتتەۋدى، قاراستىرۋدى تەرەڭدەتىپ، عارىشقا ۇشۋ جانە سوعىس جۇرگىزۋ قابىلەتىن ءوسىرىپ، بۇكىل ارميانىڭ بىرىككەن سوعىس جۇرگىزۋ جۇيەسىمەن توعىسىپ، دۇنيە ءجۇزى بويىنشا بىرەگەي ارميا قۇرۋعا، عارىش ىستەرىندەگى قۇدىرەتتى مەملەكەت قۇرۋعا مىعىم تىرەك ازىرلەۋ كەرەك. رەفورمادا جاڭالىق اشۋدى كۇشەيتىپ، تۇرلەندىرىپ دامىتۋدى جەدەل ىلگەرىلەتىپ، عىلىم - تەحنيكالىق جاسامپازدىقتان قوزعاۋشى كۇش الۋعا تاباندى بولىپ، وزەكتى، شەشۋشى تەحنيكالاردان قامال الۋدى كۇشەيتىپ، حالىقارالىق باسەكەدەگى ىرىقتىلىقتى ساقتاۋ كەرەك. ساياسي كەپىلدىكتى كۇشەيتىپ، يدەيالىق - ساياسي قۇرىلىستى كۇشەيتىپ، ءار دارەجەلى پارتيا ۇيىمى قۇرىلىسىن ويداعىداي يگەرىپ، نەگىزگى ساتىنى يگەرۋ، نەگىز قالاۋ قىزمەتىن ويداعىداي ىستەۋ كەرەك. اسكەري بولىمدەردى جاپپاي، قاتاڭ تاربيەلەپ، باسقارىپ، اسكەري بولىمدەردىڭ ابسوليۋتتى ادالدىعىنا، ابسوليۋتتى كىرشىكسىزدىگىنە، ابسوليۋتتى سەنىمدىلىگىنە شىنايى كەپىلدىك ەتۋ كەرەك.
12 - اقپاندا ۇزاق جورىقB3 تاسىمال راكەتاسى جويقىن كۇشپەن بەيدوۋ − 3 جاساندى سەرىگىن الىپ جەردەن كەڭىستىككە كوتەرىلدى. بازاداعى كوماندير - جاۋىنگەرلەر ءتوراعا شي جينپيڭنىڭ تاپسىرماسىن ەستە بەرىك ساقتاپ، عارىش ارمانىنىڭ تاعى ءبىر جەڭىستى شەرۋىن ورىنداپ، وتان مەن حالىققا ەرەكشە مەرەكەلىك تارتۋ ۇسىندى.
12 - اقپان تۇستەن كەيىن شي جينپيڭ چىڭدۋدا وسىندا تۇراتىن اسكەري بولىمدەردىڭ ديۆيزيادان جوعارى باسشى كادرلارىن جانە پولك ورىندارىنىڭ نەگىزگى باسشىلارىن ىقىلاسپەن قابىلداپ، كوپشىلىكپەن بىرگە ەستەلىك سۋرەتكە ءتۇستى.
جاڭ يۋشيا قاتارلىلار قيمىلدارعا بىرگە قاتىناستى.
