جۇرەك كوشىرۋ وپەراتسياسىن جاساتقان لي چيڭرىن 15 جىلدىعىن قۇتتىقتاپ، بالاۋىزشامدى ءوشىردى
3-ايدىڭ 6-كۇنى، شينجياڭدا تۇڭعىش رەت «جۇرەك كوشىرۋ» وپەراتسياسىن جاساتقان 54 جاستاعى لي چيڭرىن اۆتونوميالى رايوندىق حالىق شيپاحاناسىنداعى شيپاگەرلەر مەن سەستىرالاردىڭ اق تىلەگىمەن 15 جىلدىعىن قۇتتىقتادى.
لي چيڭرىن التاي قالاسى شەمىرشەك اۋىلىنىڭ قاراپايىم ەگىنشىسى. 2002-جىلى 38 جاستاعى لي چيڭرىن كەنەتتەن قىزۋى ورلەپ، دەمى سىعىلىپ، توقتاماي جوتەلىپ، مازاسىزدانادى. سوڭىنان جۇرەك ەتىنىڭ شەكتەن تىس قابىنۋى دەپ دياگنوز قويىلادى.
2003-جىلى 3-ايدىڭ 4-كۇنى، اۆتونوميالى رايوندىق حالىق شيپاحاناسى جۇرەك سىرتقى اۋرۋلار ءبولىمىنىڭ شيپاگەرى لي چيڭرىنعا جۇرەك كوشىرۋ وپەراتسياسىن جاساپ، وعان جاڭادان «ادام دەنەسىندەگى قوزعالتقىشتى» ورناتتى.
«قايتادان ومىرگە كەلگەن» لي چيڭرىن ءار جىلى 3-ايدىڭ 4-كۇنىن ءوزىنىڭ تۋىلعان كۇنى ەتىپ بەكىتكەن ەدى. ءار جىلى وسى ۋاقىتتا، اۆتونوميالى رايوندىق حالىق شيپاحاناسىنىڭ شيپاگەرلەرى مەن سەسترالارى بىرلىكتە وعان تۋىلعان كۇنىن قۇتتىقتاپ بەرەتىن. شيپاحانا تاعى دالي چيڭرىن مەن ونىڭ زايبىنا قولدارىنان كەلەتىن قىزمەتپەن قامداۋدان سىرت، 4 مىڭنان ارتىق ەمدەۋ قىزمەتكەرلەرى ءار ايدا ەڭبەكاقىسىنان 2 يۋان جىلۋ جيناپ، لي چيڭرىننىڭ ءدارى-دارمەككە ىستەتۋىنە بەرەدى.
«15 جىل بولدى، ەندى ويلاسام، ءومىرىمنىڭ ءار كۇنىن باسقالار ماعان سيلاعان ەكەن. سەبەبى مەن ءبىر رەت ‹ولگەنمىن›، سوندىقتان دا، مەن ءار كۇنىمدى قادىرلەيمىن. جانە 40 جىل جاساۋعا تىرىسىپ، ءوزىمنىڭ تىرىسشاڭدىعىم ارقىلى قوعامعا جاۋاپ بەرەمىن»،- دەيدى لي چيڭرىن.
