تيانشان تورابى   ›   جاڭالىقتار   ›   ەل ءىشى حابارى

ساياسي كەڭەس مەملەكەتتىك 13 - كەزەكتى كوميتەتىنىڭ 1 - ءماجىلىسى ءۇشىنشى جالپى جيىنىن وتكىزدى

جيىندا 14 مۇشە ساياسي، قوعام، مادەنيەت قۇرىلىستارى جانە بىرلىكساپ، ساياسي كەڭەس قىزمەتتەرى توڭىرەگىندە سوزگە شىقتى

  شينحۋا اگەنتتىگىنىڭ 3 - ايدىڭ 10 - كۇنى بەيجيڭنەن بەرگەن حابارى (تىلشىلەر جاڭ شۇيدۇڭ، شيۇڭ جىڭيان، لين حۇي). ساياسي كەڭەس مەملەكەتتىك 13 - كەزەكتى كوميتەتىنىڭ 1 - ءماجىلىسى 3 - ايدىڭ 10 - كۇنى تۇستەن كەيىن حالىق سارايىندا ءۇشىنشى جالپى جيىنىن وتكىزدى. جيىندا 14 مۇشە ساياسي، قوعام، مادەنيەت قۇرىلىستارى جانە بىرلىكساپ، ساياسي كەڭەس قىزمەتتەرى توڭىرەگىندە سوزگە شىقتى. ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ساياسي كەڭەس مەملەكەتتىك 13 - كەزەكتى كوميتەتى 1 - ءماجىلىسى ءتوراعالار القاسىنىڭ ءماجىلىس باسقارۋشىسى ۋاڭ ياڭ جيىنعا قاتىناستى.

  جيىننىڭ اتقارۋشى ءتوراعالارى − لۋ جانگۇڭ، ما بياۋ، چىن شياۋگۋاڭدار بولدى. جالپى جيىندى چىن شياۋگۋاڭ باسقاردى.

  ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت شۋجيچۋىنىڭ شۋجيى، ورتالىق كوميتەت ۇگىت ءبولىمىنىڭ باستىعى حۋاڭ كۇنميڭ، ج ك پ ورتالىق كوميتەتى شۋجيچۋىنىڭ شۋجيى، ورتالىق كوميتەت بىرلىكساپ ءبولىمىنىڭ باستىعى يوۋ چۋان، سونداي - اق ج ك پ ورتالىق كوميتەتىنىڭ، مەملەكەتتىك كەڭەستىڭ قاتىستى تاراۋلارىنىڭ جاۋاپتىلارى جيىنعا قاتىناسىپ، سوزدەردى تىڭدادى.

  مۇشە شاۋ حۇڭ «3 - قىركۇيەك» ءىلمي قوعامى ورتالىق كوميتەتى اتىنان سوزگە شىققاندا بىلاي دەدى: 70 جىلدىڭ الدىندا ج ك پ ورتالىق كوميتەتىنىڭ «1 - مامىر ۇرانىن» دەموكراتيالىق پارتيا - توپتار، پارتيادا، توپتا جوق قايراتكەرلەر جانە حالىقتىق ۇيىمدار ىستىق ىقىلاسپەن قۇپتاپ، مەملەكەت قۇرۋ تۋرالى كەڭەستىڭ شىمىلدىعىن اشقان ەدى. بۇگىنگى كۇندە شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ باسشىلىعىندا، اۋەلگى ماقساتتى ۇمىتپاي، ىنتىماقتاسا كۇرەس جۇرگىزىپ، كوپ پارتيا سەلبەستىگى مەن حالىقتىق ساياسي كەڭەس ىستەرىنىڭ جاڭا شۇعىلاسىن جاراتۋعا ءتيىسپىز.

  مۇشە مو رۇڭ مىنالاردى اتاپ كورسەتتى: جوعارى ساپالى جۇمىسقا ورنالاستىرۋ − ەلىمىز ەكونوميكاسىنىڭ جوعارى جىلدامدىقتى ارتۋ كەزەڭىنەن جوعارى ساپالى دامۋ كەزەڭىنە بۇرىلىس جاساۋىنىڭ ىشكى تالابى. جۇمىسقا ورنالاستىرۋ ساياساتىنىڭ بولاشاق مۇمكىندىكتەرىن كوتەرىپ، جۇمىسقا ورنالاستىرۋعا جان - جاقتى قىزمەت كورسەتۋدى كەمەلدەندىرىپ، ادىلەتتى ورتا ازىرلەپ، جوعارى ساپالى جۇمىسقا ورنالاستىرۋدىڭ قازىرگى ەكونوميكالىق جۇيەگە دەمەۋشىلىك رولىن ساۋلەلەندىرىپ، حالىق تابىسىنىڭ قادامداس ارتۋىن ىسكە اسىرۋدى ۇسىنىس ەتەمىن.

  مۇشە ياۋ زىڭكى مىنالاردى اتاپ كورسەتتى: فورماشىلدىق، تورەشىلدىك جايتتەرى كەي جەرلەردە ءالى دە ءباز - باياعىسىنداي ورىن تەۋىپ، پارتيا مەن بۇقارانىڭ قارىم - قاتىناسىنا ورەسكەل ىقپال ەتىپ، پارتيا مەن ۇكىمەتتىڭ الەۋمەتتىك سەنىمدىلىگىنە زالال كەلتىرىپ وتىر. «اۋەلگى ماقساتتى ۇمىتپاي، بورىشتى ەستە بەرىك ساقتاۋ» تاقىرىپتىق تاربيەسىن تىڭعىلىقتى ورىستەتۋ ارقىلى باسشى كادرلاردىڭ حالىق قىزمەتكەرى تانىمى مەن دۇرىس قىزمەت ناتيجەسى كوزقاراسىن ورناتۋىنا مۇمكىندىك جاساپ، باسشى كادرلاردى تەكسەرۋ، باعالاۋ جۇيەسى مەن اعاتتىقتىڭ الدىن الۋ، اعاتتىققا توزىممەن قاراۋ، اعاتتىقتى تۇزەتۋ مەحانيزمىن كەمەلدەندىرىپ، «4 بۇرىس ستيلدى» تەرەڭدەي تەزگە سالىپ، حۇجاتباستىلىق پەن ءماجىلىسقورلىققا ۇزدىكسىز باتىل ءۇن قاتۋ كەرەك.

  مۇشە جۋ يۇڭشين جۇڭگو دەموكراتيانى ىلگەرىلەتۋ قوعامى اتىنان سوزگە شىققاندا بىلاي دەدى: ورتا دارەجەلى كاسىپتىك ءبىلىم بەرۋدىڭ كەدەيلىكتەن قۇتىلدىرۋدان قامال الۋداعى ەرەكشە رولىن ساۋلەلەندىرىپ، «ورتا دارەجەلى كاسىپتىك ءبىلىم بەرۋ ارقىلى كەدەيلەردى سۇيەمەلدەۋدىڭ مەملەكەتتىك ينجەنەرياسىن»، «شوعىرلى، تۇتاسىپ كەتكەن كەدەي وڭىرلەردىڭ ورتا دارەجەلى كاسىپتىك ءبىلىم بەرۋ قابىلەتىن جوعارىلاتۋ جوسپارىن» جانە «شىعىس، باتىس بولىكتەردىڭ ورتا دارەجەلى كاسىپتىك ءبىلىم بەرۋ بويىنشا سەلبەستىك جوسپارىن» اتقارىپ، كەدەي وقۋشىلاردىڭ ءبىلىم الۋى مەن جۇمىسقا تۇرۋىنا مۇمكىندىك جاساۋدى ۇسىنىس ەتەمىن.

  مۇشە لي يىڭشين بىلاي دەدى: ءادىليا ءتۇزىلىسى رەفورماسى ءبىرىنشى شەپتەگى سۋديالاردى سوت تابيعاتىنا ورالىتتى، قولدا بار سوتتاۋ ۇقىعىن ونان سايىن قاستەرلەۋ − سوت مەكەمەلەرى جۇمىسىنىڭ ساپاسىن كوتەرىپ، تيىمدىلىگىن ارتتىراتىن وزىندىك توڭكەرىس. بۇكىل قوعامنىڭ ءادىليا ءتۇزىلىسى رەفورماسىنا تۇسىنىكپەن قاراۋىن، كوڭىل ءبولۋىن، قولداۋ كورسەتۋىن تىلەيمىن، سۋديالاردىڭ رەسميلەنۋ، ارنايىلانۋ، ماماندانۋ قۇرىلىسىنىڭ تەبىنىن ارتتىرۋ قاجەت، قوعامنىڭ ءار سالاسىنىڭ قوعامدىق قايشىلىقتاردى جاراستىرۋعا، شەشۋگە بەلسەندى تۇردە ات سالىسىپ، مەملەكەتتى جونگە سالۋ جۇيەسىن وسىزامانداندىرۋدى ىلگەرىلەتۋىن ءۇمىت ەتەمىن.

  مۇشە چۇي فىڭحۇڭ جۇڭگو شارۋا - جۇمىسشى پارتياسى ورتالىق كوميتەتى اتىنان سوزگە شىققاندا بىلاي دەدى: سالاماتتىق بويىنشا كەدەيلىكتەن دالمە - ءدال قۇتىلدىرۋدان قامال الۋ شايقاسىندا جەڭىسكە جەتۋدە ماسەلەنى نىشان ەتۋدەن جازباي، وسال جەرلەر مەن قيىن ماسەلەلەردى شەشىپ، مەديتسينالىق جاردەم بەرۋ ۇلگىسىن جاڭالاپ، اۋىر كەدەي وڭىرلەردە سالاماتتىق بويىنشا كەدەيلىكتەن دالمە - ءدال قۇتىلدىرۋ تۇزىمدىك كەپىلدىگىن ورناتىپ، ەمدەۋ قامسىزداندىرۋ ساياساتتارىن كەمەلدەندىرىپ، كەدەي قاۋىمدى سالماقتى اۋرۋلار بويىنشا قامتاماسىزداندىرۋ نەگىزىن بەكەمدەپ، فۋجيانداعى ەمدەۋ رەفورماسىنىڭ تاجىريبەلەرىن جالپىلاستىرىپ، كەدەيلەردىڭ دەنساۋلىعىن قامتاماسىزداندىرۋدى رەفورما ارقىلى جەبەۋ كەرەك.

  مۇشە ليۋ شياۋجۋاڭ بىلاي دەدى: ج ك پ 18 - قۇرىلتايى اشىلعاننان بەرى، شي جينپيڭنىڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە اۋىل سالتى وركەنيەت قۇرىلىسىندا كورنەكتى ناتيجەگە قول جەتتى، دەگەنمەن ءالى ءبىرتالاي ەلەۋسىز قاراۋعا بولمايتىن ماسەلە ورىن تەۋىپ وتىر. پارتيا ستيلى، اكىمشىلىك ستيل ارقىلى جەتەكشىلىك ەتۋدى كۇشەيتىپ، ارناۋلى وڭاۋدى قانات جايدىرىپ، اۋىل اقىلماندارىنىڭ رولىن ساۋلەلەندىرىپ، ءتۇزىم قۇرىلىسىن كۇشەيتىپ، جۇڭگونىڭ كەڭ - بايتاق اۋىل - قىستاقتارىنىڭ بار الابىن وركەنيەتتىڭ سامالىنا مالىندىرۋ كەرەك.

  مۇشە ساۋ شياۋحۇڭ جۇڭگو ادىلەت پارتياسى ورتالىق كوميتەتى اتىنان سوزگە شىققاندا مىنالاردى اتاپ كورسەتتى: قان سورعىش قۇرت اۋرۋىن جاپپاي جويۋدان قامال الۋ شايقاسىن ويداعىداي جۇرگىزۋ ءۇشىن، قان سورعىش قۇرت اۋرۋىنىڭ الدىن الۋ قىزمەتى بويىنشا بىرلەسىپ ساقتانۋ، بىرلەسىپ تىزگىندەۋدىڭ قۋاتتى بىرىككەن كۇشىن قالىپتاستىرىپ، اتقارىلعانىنا ۇزاق جىل بولعان قان سورعىش قۇرت اۋرۋىنىڭ الدىن الۋ جانە ونى ەمدەۋ ەرەجەسىنە وزگەرىس ەنگىزىپ، قان سورعىش قۇرت اۋرۋىنىڭ الدىن الۋ تەحنيكاسىنداعى قيىن تۇيىندەردى شەشۋ بويىنشا عىلمي زەرتتەۋ تەبىنىن ارتتىرىپ، ءتۇزىلىس پەن مەحانيزمدى جاڭالاپ، قان سورعىش قۇرت اۋرۋىنىڭ الدىن الۋ قىزمەت قوسىنىنىڭ قۇرىلىسىن شىن مانىندە كۇشەيتۋدى ۇسىنىس ەتەمىن.

  مۇشە ۋاڭ حۋان مىنالاردى اتاپ كورسەتتى: مۇعالىمداردىڭ، اتا - انالاردىڭ، اسىرەسە، وقۋشىلاردىڭ اۋىرتپالىعى ءالى دەگەندەي جەڭىلدەي قويعان جوق، ويتكەنى، ساپالى وقۋ - اعارتۋ بايلىعى قاجەتسىنۋدى قامداي الماي وتىر، نەگىزدىك وقۋ - اعارتۋعا «نەگىزدىك» ەمەس ءبىرتالاي دۇنيەنىڭ جۇگى ارتىلعان، وقۋ - اعارتۋ كەشەندى رەفورماسى دەگەندەي تەرەڭدەگەن جوق. مىندەتتى ءبىلىم بەرۋدىڭ بىركەلكى دامۋىن كۇشەيتىپ، ساباق قۇرىلىمىن ارناعا ءتۇسىرىپ، باعالاۋ رەفورماسىن تەرەڭدەتىپ، ساباقحانا وقىتۋىنىڭ تيىمدىلىگىن كوتەرىپ، «نەگىزدىك تاربيە ادامنىڭ دامۋىنا تاعان ازىرلەيدى» دەگەن قۇن بەتالىسىن بار كۇشپەن ۇگىتتەۋدى ۇسىنىس ەتەمىن.

  مۇشە تۋ حايميڭ مىنالاردى ۇسىنىس ەتتى: «جاراسىم» مادەنيەتىن شەتەلدەرگە مادەنيەت تاراتۋدىڭ ماڭىزدى مازمۇنى ەتىپ، تاراتۋدىڭ ناقتى ونىمدىلىگىن كۇشەيتىپ، «جاراسىم» مادەنيەتىنىڭ ۇستانىمدارى ارقىلى جۇڭگونىڭ بەيبىت دامۋىنا تۇسىنىك جاساۋ قاجەت. تاراتۋ وبيەكتىلەرىن اشالاپ، بۇقارالىق بايلانىستارعا ءمان بەرىپ، تاراتۋ ءتاسىلىن جاڭالاپ، «كىمگە تاراتامىز»، «كىم تاراتادى»، «قالاي تاراتامىز» دەگەن سياقتى ماسەلەلەردى شەشۋدى ۇسىنىس ەتەمىن.

  مۇشە چىڭ پيڭ مىنالاردى اتاپ كورسەتتى: ەلىمىزدىڭ قازىرگى تەڭىزدە قۇتقارۋ جۇيەسى جاڭا ءداۋىردىڭ تالاپتارىنان ءالى ءبىرشاما الشاق جاتىر. تانىمدى جوعارىلاتىپ، مەحانيزمدى كەمەلدەندىرىپ، ۇيلەسىمدى ورنالاستىرىپ، عىلىم - تەحنيكادا جاڭالىق اشىپ، تەڭىزدە قۇتقارۋ تۋرالى زاڭدىق ەرەجەلەردى كەمەلدەندىرىپ، زاڭ بويىنشا قۇتقارۋدى ىسكە اسىرىپ، قاراجاتقا قامتاماسىز ەتىپ، يگىلىكتى جوعارىلاتىپ، ىسكەر، ءونىمدى، ماماندانعان قوسىن قۇرۋدى ۇسىنىس ەتەمىن.

  مۇشە ياڭ فاميڭ بىلاي دەدى: ءىسلام ءدىنىن جۇڭگوشالاندىرۋ بەتالىسىنا تاباندى بولىپ، ءسوز جوق، وتاندى ءسۇيۋ، ءدىندى قادىرلەۋ ۇلى تۋىن بيىك ۇستاپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇمىلا ىسكە اسىرۋ كەرەك. جۇڭگو ءىسلام ءدىنى قوعامى وسى ماقساتتا سوتسياليستىك وزەكتى قۇن كوزقاراسى تاربيەسىن مەشىتتەرگە ەنگىزۋ، جۇڭحۋانىڭ تاڭداۋلى ءداستۇرلى مادەنيەتىن مەشىتتەرگە ەنگىزۋ سياقتى 5 ءتۇرلى قۋاتتامانى ورتاعا قويدى، قالىڭ مۇسىلماندار رەفورما جاساۋ، ەسىك اشۋ ىستەرى مەن سوتسياليستىك وسىزامانداندىرۋ قۇرىلىسىنا بەلسەنە ات سالىسۋى قاجەت.

  مۇشە ياڭ جيان تايۋان دەموكراتيالىق اۆتونوميا وداعى ورتالىق كوميتەتى اتىنان سوزگە شىققاندا بىلاي دەدى: ەكى جاعالاۋدىڭ دارىندىلار الماسۋى بارعان سايىن نىعايىپ، ءداۋىر اعىمىنا اينالىپ وتىر، تايۋان بيلەۋشىلەرىن ەكى جاعالاۋ قاتىناسىنىڭ بەيبىت دامۋىنىڭ دۇرىس جولىنا تەزىرەك ورالۋعا ۇندەيمىن. مەملەكەتتىڭ قاتىستى تاراۋلارىنىڭ ەكى جاعالاۋدىڭ دارىندىلار الماسۋ ارناسىن بەلسەنە كەڭەيتىپ، تايۋاندىق باۋىرلاستاردىڭ ۇلى قۇرلىقتا جۇمىسقا تۇرۋىنىڭ ءتۇرى مەن كولەمىن ۇيلەسىمدى كەڭەيتىپ، باعىتتامالى ۇگىت - جەتەكشىلىكتى كۇشەيتىپ، تايۋاندىق باۋىرلاستاردى ۋايىمنان ارىلتۋعا بەلسەندى جۇمىس جاساۋىن ۇسىنىس ەتەمىن.

  مۇشە ياڭ لي - ۋي بىلاي دەدى: جۇڭگو حالىق ازاتتىق ارمياسىنىڭ عارىشكەرلەر اترەتى قۇرىلعان 20 جىلدان بەرى، جالپى عارىشكەرلەر وتان مەن حالىقتىڭ تاپسىرماسىن ەستە بەرىك ساقتاپ، 6 رەتكى عارىشقا ۇشۋ مىندەتىن ورىنداۋدا ەرلىكپەن جاپپاي جەڭىسكە جەتتى. عارىشكەرلەر قۇربان بەرۋدەن قورىقپايتىن كۇرەسكەرلىك رۋحپەن، جۇڭحۋا ۇلتىنىڭ جاڭا داۋىردەگى عارىش ارمانىن ىسكە اسىرۋ ءۇشىن، عارىش بەكەتىنە، اي شارىنا جانە عارىشتىڭ تەرەڭ دە الىس قويناۋىنا قاراي ۇزدىكسىز ساپار شەگەدى.

    ساياسي كەڭەس مەملەكەتتىك 13 - كەزەكتى كوميتەتى 1 - ءماجىلىسى ءتوراعالار القاسىنىڭ تۇراقتى ءتوراعالارى جاڭ چيڭلي، ليۋ چيباۋ، پابالا گىلەلاڭجيە، ۋان گاڭ، حى حوۋحۋا، ۋاڭ جىڭۋي، لياڭ جىنيىڭ جيىنعا قاتىناستى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورابى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

بىزبەن بايلانىس جارناما قىزمەتى لەبىز قالدىرۋ ءبىز تۋرالى