ءتاڭىرتاۋ تورابى   ›   جاڭالىقتار   ›   ماڭىزدى حابارلار

شي جينپيڭ ازاتتىق ارميا جانە قارۋلى ساقشى بولىمدەرى ۋاكىلدەر ۇيىرمەسىنىڭ جالپى جيىنىنا قاتىناسقاندا ارميا مەن حالىقتىڭ توعىسا تەرەڭدەي دامۋىن تىڭعىلىقتى ىلگەرىلەتىپ، جۇڭگو ارمانىن، ارميانى قۇدىرەتتەندىرۋ ارمانىن جۇزەگە اسىرۋدى قۇدىرەتتى قوزعاۋشى كۇشپەن جانە ستراتەگيالىق تىرەكپەن قامتاماسىز ەتۋدى باسا دارىپتەدى

ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 3 - ايدىڭ 12 - كۇنى تۇستەن بۇرىن مەملەكەتتىك 13 - كەزەكتى حالىق قۇرىلتايىنىڭ 1 - ماجىلىسىنە قاتىناسقان ازاتتىق ارميا جانە قارۋلى ساقشى بولىمدەرى ۋاكىلدەر ۇيىرمەسىنىڭ جالپى جيىنىنا قاتىناستى جانە ماڭىزدى ءسوز سويلەدى. (شينحۋا اگەنتتىگى)

  شينحۋا اگەنتتىگىنىڭ 3 - ايدىڭ 12 - كۇنى بەيجيڭنەن بەرگەن حابارى (تىلشىلەر لي شۋانلياڭ، مەي شىشيۇڭ). ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 3 - ايدىڭ 12 - كۇنى تۇستەن بۇرىن مەملەكەتتىك 13 - كەزەكتى حالىق قۇرىلتايىنىڭ 1 - ماجىلىسىنە قاتىناسقان ازاتتىق ارميا جانە قارۋلى ساقشى بولىمدەرى ۋاكىلدەر ۇيىرمەسىنىڭ جالپى جيىنىنا قاتىناسقاندا مىنانى باسا دارىپتەدى: ارميا مەن حالىق توعىسا دامۋ ستراتەگياسىن اتقارۋ − مەملەكەتتىڭ ءبىر تۇلعالانعان ستراتەگيالىق جۇيەسى مەن قابىلەتىن قالىپتاستىرۋدىڭ تابيعي تالعامى، سونداي - اق پارتيانىڭ جاڭا داۋىردەگى ارميانى قۇدىرەتتەندىرۋ نىساناسىن جۇزەگە اسىرۋدىڭ تابيعي تالعامى. ستراتەگيالىق جەتەكشىلىكتى كۇشەيتۋ، رەفورما جاساپ، جاڭالىق اشۋدى كۇشەيتۋ، ارميا مەن جەرگىلىكتى ورىننىڭ سايكەسۋىن كۇشەيتۋ، مىندەتتەردىڭ تياناقتانۋىن كۇشەيتۋ، جاڭا داۋىردە ارميا مەن حالىقتىڭ توعىسا تەرەڭدەي دامۋىنىڭ جاڭا جاعدايىن قۇلشىنا تۇلعالاۋ، جۇڭگو ارمانىن، ارميانى قۇدىرەتتەندىرۋ ارمانىن جۇزەگە اسىرۋدى قۇدىرەتتى قوزعاۋشى كۇشپەن جانە ستراتەگيالىق تىرەكپەن قامتاماسىز ەتۋ كەرەك.

  شي جينپيڭ جيىن زالىنا كىرگەن كەزدە، زالدان شاتىرلاعان شاپالاق ءۇنى كوتەرىلدى. شي جينپيڭ كوپشىلىكپەن ىقىلاستى تۇردە قول الىسىپ، ۋاكىلدەرمەن بىرگە مەملەكەت ىستەرىن اقىلداسۋ ءۇشىن ازاتتىق ارميا جانە قارۋلى ساقشى بولىمدەرى ۋاكىلدەر ۇيىرمەسىنە كەلگەنىنە ايرىقشا قۋانىشتى ەكەنىن ءبىلدىردى.

  جيىندا لي حوحۇي، گو پۋشياۋ، جاڭ شۋەيۇي، ۋاڭ حۇيچيڭ، ياڭچۋگىشي، لي ۋي، جۋ چىڭ، ۋاڭ نيڭ قاتارلى 8 ۋاكىل ارميا مەن حالىقتىڭ توعىسۋىن ىلگەرىلەتۋ، ناقتى سوعىستىق جاتتىعۋلاردى كۇشەيتۋ، عارىش سالاسىنىڭ دامۋىن جەدەلدەتۋ، ساياسات - تۇزىمدەر رەفورماسىن تەرەڭدەتۋ، قارۋلى ساقشى بولىمدەرىنىڭ رەفورماسىن ويداعىداي جۇرگىزۋ، قوسىننان شەگىنگەن اسكەريلەردى باسقارۋ - قامتاماسىز ەتۋدى كەمەلدەندىرۋ سياقتى ماسەلەلەردى ارقاۋ ەتىپ پىكىر جانە ۇسىنىس ورتاعا قويدى. شي جينپيڭ ۋاكىلدەرمەن ىشكەرىلەي پىكىرلەسىپ، قاتىستى جاعدايلاردى ەگجەي - تەگجەيلى سۇراستىردى، جيىندا كوپشىلىك بەلسەنە ءسوز كەزەگىن الدى، جيىن قىزۋ مەرەيدە ءوتتى.

  ۋاكىلدەردىڭ ءسوزىن تىڭداعاننان كەيىن، شي جينپيڭ ماڭىزدى ءسوز سويلەدى. ول مىنالاردى اتاپ كورسەتتى: پارتيا 19 - قۇرىلتايىنان بەرى، بۇكىل ارميا پارتيا ورتالىق كوميتەتى مەن ورتالىق اسكەري ىستەر كوميتەتىنىڭ شەشىمدەرى مەن نۇسقاۋلارىن باتىل دايەكتىلەندىرىپ، پارتيا 19 - قۇرىلتايىنىڭ رۋحىن مۇقيات ۇيرەنىپ، دايەكتىلەندىرىپ، جاڭا داۋىردەگى پارتيانىڭ ارميانى قۇدىرەتتەندىرۋ يدەياسىن ىشكەرىلەي ۇيرەنىپ، دايەكتىلەندىرىپ، پارتيانىڭ جاڭا داۋىردەگى ارميانى قۇدىرەتتەندىرۋ نىساناسىن جۇزەگە اسىرۋدى، حالىق ارمياسىن الەمدىك بىرەگەي ارميا ەتىپ جاپپاي قۇرىپ شىعۋدى ارقاۋ ەتىپ، اسكەر جاتتىقتىرۋدى، سوعىس دايىندىعىن كۇشەيتىپ، مەملەكەت قورعانىسى مەن ارميا رەفورماسىن تەرەڭدەتىپ، ارميانى جاپپاي قاتاڭ جونگە سالۋدى مىقتى يگەرىپ، مەملەكەت قورعانىسى مەن ارميانى وسىزامانداندىرۋ قۇرىلىسىن جەدەلدەتىپ، ارميانى قۇدىرەتتەندىرۋ ىسىندە جاڭا قادام تاستاپ، جاڭا بەينە ايگىلەدى.

      شي جينپيڭ ارميا مەن حالىق توعىسا دامۋ ستراتەگياسىن اتقارۋ، مەملەكەت قورعانىسى مەن ارميا قۇرىلىسىن جەدەلدەتۋ جونىندە تالاپ قويدى. ول مىنالاردى باسا دارىپتەدى: مەملەكەت قورعانىسىندا عىلىم - تەحنيكالىق جاڭالىق اشۋدى كۇشەيتۋ، ارميا مەن حالىق توعىسا جاڭالىق اشۋ جۇيەسىن جەدەل ورناتۋ، مەملەكەت قورعانىسى عىلىم - تەحنيكاسىندا دەربەس جاڭالىق اشۋ قابىلەتىن كۇش سالا جوعارىلاتۋ، وزىق عىلىم - تەحنيكالىق تابىستاردىڭ قولدانىلۋ سەرپىنىن ارتتىرۋ، ارميا قۇرىلىسىنىڭ ساپالى، ءونىمدى ۇلگىگە جانە عىلىم - تەحنيكا شوعىرلانعان ۇلگىگە قاراي بۇرىلىس جاساۋىن ىلگەرىلەتۋ كەرەك. دۇنيە جۇزىندەگى اسكەري عىلىم - تەحنيكالار مەن قارۋ - جاراقتاردىڭ دامۋ بەتالىسىنا ءجىتى نازار اۋدارىپ، ءتۇيىندى سالالاردا ارميا مەن حالىقتىڭ سايكەسىپ جاڭالىق اشۋىن ءتۇيىندى تۇردە مىقتى يگەرىپ، ماڭىزدى عىلىم - تەحنيكالىق نىسانداردى ءبىر تۇلعا بولا وتىرىپ دالەلدەۋدى جانە اتقارۋدى ىلگەرىلەتىپ، عىلىم - تەحنيكالىق جاڭالىق اشۋدىڭ ستراتەگيالىق بيىگىن باعىندىرۋعا قۇلشىنۋ كەرەك. اشىق بولۋ جانە بىرگە يگىلىكتەنۋ ۇستانىمىن كۇشەيتىپ، تۇيىقتىقتى، مونوپوليانى باتىل تالقانداپ، عىلىم - تەحنيكالىق جاڭالىق اشۋ بايلىقتارىنىڭ ساپالى سەپتەلۋىن كۇشەيتىپ، بۇكىل قوعامنىڭ عىلىم - تەحنيكالىق جاڭالىق اشۋ مۇمكىندىكتەرىن ىسكە قوسىپ، مەملەكەت قورعانىسى عىلىم - تەحنيكاسىندا قالىڭ كەمە باسەكەلەسىپ، جارىسا جەلكەن كوتەرگەن جالىندى جاعداي قالىپتاستىرۋ كەرەك.

  شي جينپيڭ مىنالاردى اتاپ كورسەتتى: پارتيا 18 - قۇرىلتايىنان بەرى، مەملەكەت قورعانىسى مەن ارميا رەفورماسىن تەرەڭدەتۋدە اۋقىمدى، قارقىندى جۇمىستار اتقارىلىپ، قاۋىرت، كولەمدى وزگەرىستەر جاسالىپ، ءجىتى ءارى ورنىقتى قادام تاستالىپ، ارميامىزدىڭ ۇيىمدىق قۇرىلىمى مەن كۇش - قۋات جۇيەسىنىڭ تۇتاس تۇلعالىق توڭكەرىستىك قايتا سومدالۋى جۇزەگە اسىپ، ارميامىز قۇرىلىسىن تەجەپ وتىرعان تۇزىلىستىك كەدەرگىلەر، قۇرىلىمدىق قايشىلىقتار ءونىمدى تۇردە شەشىلدى. ساياسات - ءتۇزىم رەفورماسىن تىڭعىلىقتى ىلگەرىلەتىپ، وسى زامانعى اسكەري ساياسات - ءتۇزىم جۇيەسىن جەدەل ورناتىپ، ءار جاقتاعى تۇزىلىستىك - مەحانيزمدىك كىناراتتاردى باتىل جويىپ، رەفورمانى باتىلدىقپەن ءۇزىلدى - كەسىلدى جۇرگىزۋ كەرەك. اسكەر جاتتىقتىرۋ، سوعىس دايىندىعى قىزمەتىندە ورىن تەپكەن كورنەكتى ماسەلەلەردى رەفورما جاساۋ ويىمەن جانە ادىسىمەن شەشۋگە تاباندى بولىپ، ناقتى سوعىستىق اسكەري جاتتىعۋلاردى قاۋىرت جۇرگىزىپ، ارميامىزدىڭ جاۋىنگەرلىك قۋاتىن جەدەل كوتەرۋ كەرەك. بۇكىل ارميا پارتيا مەن مەملەكەت قۇرىلىمدارى رەفورماسىن تەرەڭدەتۋدى باتىل قۋاتتاپ جانە قولداپ، قاتىستى جاقتاردا سايكەسۋدى، سەلبەسۋدى كۇشەيتىپ، ارميا مەن جەرگىلىكتى ورىندى قامتىعان رەفورما مىندەتتەرىن بىرگە ويداعىداي تياناقتاندىرۋ كەرەك. قوسىننان شەگىنگەن اسكەريلەردى باسقارۋ - قامتاماسىز ەتۋ قۇرىلىمدارىن قۇرۋ − قوسىننان شەگىنگەن اسكەريلەرگە اناعۇرلىم ويداعىداي قىزمەت كورسەتۋدە، اسكەري قىزمەتتىڭ بۇكىل قوعام ارداقتايتىن كاسىپكە اينالۋىنا مۇمكىندىك جاساۋدا ماڭىزدى مانگە يە، مۇنداي جاقسى ءىستى ويداعىداي، ناقتى تىندىرۋ كەرەك.

  شي جينپيڭ مىنالاردى باسا دارىپتەدى: ارميانى زاڭ بويىنشا جونگە سالۋ سەرپىنىن ارتتىرۋ، زاڭمەن جونگە سالۋ سەنىمىن جانە زاڭمەن جونگە سالۋ تۇرعىسىندا وي جۇگىرتۋدى كۇشەيتۋ، اسكەري ىستەردى زاڭمەن جونگە سالۋدىڭ جۇڭگوشا جۇيەسىن جەدەل ورناتىپ، ارميانى جونگە سالۋ تاسىلىندە تۇبەگەيلى بۇرىلىس جاساۋدى جەدەل ىلگەرىلەتۋ كەرەك. بۇكىل ارميا نەگىزگى زاڭ تانىمىن كۇشەيتۋى، نەگىزگى زاڭ رۋحىن اسقاقتاتۋى، نەگىزگى زاڭدى ادال قادىرلەۋشى، وعان سانالى بويسۇنۋشى، ونى باتىل قورعاۋشى بولۋلارى كەرەك. پارتيانىڭ ءتارتىپ تەكسەرۋ ءتۇزىلىسى مەن مەملەكەتتىڭ باقىلاۋ - تەكسەرۋ ءتۇزىلىسى رەفورماسىنىڭ تالاپتارىنا ۇيلەسىپ، اسكەري قوسىننىڭ ناقتى جاعدايىمەن بىرلەستىرىپ قاتىستى قىزمەتتەردى ويداعىداي ىستەۋ كەرەك. مەملەكەتتىڭ زاڭ شىعارۋ قىزمەتىمەن ۇشتاسۋدى كۇشەيتىپ، سوعىس دايىندىعىنا شۇعىل قاجەتتى، رەفورمادا شۇعىل قولدانىلاتىن، كوماندير - جاۋىنگەرلەر شىنايى كۇتكەن اسكەري زاڭ - ەرەجە، ءتۇزىم قۇرىلىسىن كورنەكتىلەندىرە كۇشەيتۋ كەرەك. قاتاڭدىقتى ماڭداي الدى ورىنعا قويۋعا تاباندى بولىپ، ءتارتىپتىڭ اتقارىلۋىن، زاڭنىڭ اتقارىلۋىن باقىلاۋدى كۇشەيتىپ، جاۋاپكەرشىلىكتى قاتاڭ قۋزاپ، قاتاڭ جاۋاپقا تارتىپ، زاڭ بويىنشا قاتاڭ بولۋدى مەملەكەت قورعانىسى مەن ارميا قۇرىلىسىنىڭ ءار سالاسىنا، جالپى بارىسىنا ءسىڭىرۋ كەرەك.

  شي جينپيڭ مىنالاردى اتاپ كورسەتتى: مەملەكەت قورعانىسى مەن ارميا قۇرىلىسى − بۇكىل پارتيانىڭ، بۇكىل ارميانىڭ، بۇكىل ەلدەگى ءار ۇلت حالقىنىڭ ورتاق ءىسى. ورتالىق جانە مەملەكەتتىك ورگاندار، جەرگىلىكتى ءار دارەجەلى پارتكومدار مەن ۇكىمەتتەر مەملەكەت قورعانىسى مەن ارميا قۇرىلىسىنا بار كۇشپەن قولداۋ كورسەتۋ، بۇكىل ارميا جەرگىلىكتى ورىنداردىڭ ەكونوميكالىق، قوعامدىق دامۋىنا بەلسەنە كومەكتەسۋ كەرەك. ارميا مەن جەرگىلىكتى ورىندار ارميا حالىقتى سۇيەتىن، حالىق ارميانى قولدايتىن داڭقتى ءداستۇردى اسقاقتاتۋ، ارميا مەن ۇكىمەتتىڭ، ارميا مەن حالىقتىڭ قارىم - قاتىناسىن ۇزدىكسىز بەكەمدەۋ، «قوس 100 جىلدىق» كۇرەس نىساناسىن جۇزەگە اسىرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ ءۇشىن بىرگە كۇرەس جۇرگىزۋ كەرەك.

  جيىننىڭ الدىندا، شي جينپيڭ مەملەكەتتىك 13 - كەزەكتى حالىق قۇرىلتايى 1 - ماجىلىسىنە قاتىناسقان ازاتتىق ارميا جانە قارۋلى ساقشى بولىمدەرى ۋاكىلدەر ۇيىرمەسىنىڭ بارلىق ۋاكىلدەرىمەن ىقىلاستى تۇردە كەزدەستى، سونداي - اق كوپشىلىكپەن بىرگە سۋرەتكە ءتۇسىپ، ەستەلىك قالدىردى.

  ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق اسكەري ىستەر كوميتەتىنىڭ ورىنباسار ءتوراعاسى شۇي چيلياڭ جيىندى باسقاردى، ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق اسكەري ىستەر كوميتەتىنىڭ ورىنباسار ءتوراعاسى جاڭ يوۋشيا، ورتالىق اسكەري ىستەر كوميتەتىنىڭ مۇشەلەرى ۋي فىڭحى، لي زوچىڭ، مياۋ حۋا، جاڭ شىڭمين جيىنعا قاتىناستى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «ءتاڭىرتاۋ تورابىنان» الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

بىزبەن بايلانىس جارناما قىزمەتى لەبىز قالدىرۋ ءبىز تۋرالى