ايجان جەكەن قىزى حابارلايدى. 3-ايدىڭ 15-كۇنى، التاي قالاسى قۇندۇڭ قالاشىعى بوكەنبۇلاق قىستاعىنىڭ كوكونىسى بازارعا سالىندى. بوكەنبۇلاق قىستاعىندا جيىنى 162 سەميا بار بولىپ، وسىنىڭ ىشىندە 80 گە تاياۋ سەميادا 150 كوكونىس قالتقىسى بار. قالالىق ارىز - شاعىم مەكەمەسىنەن تۇسكەن قىزمەت اترەتىنىڭ ورىنباسار اترەت باستىعى ەركىنبەكتىڭ تانىستىرۋىنا قاراعاندا، قازىردىڭ وزىندە 20 عا تاياۋ كوكونىس قالتقىسىنداعى كوكونىس پىسىپ، بازارعا سالىنعان.
قىستاق باستىعى ما شىڭيۋڭنىڭ ايتۋىنشا، كوكونىستىڭ بازارعا سالىنۋ ۋاقىتى كوكونىستىڭ ءتۇرى مەن ءوسۋ احۋالىنا قاراي بەلگىلەنەدى. بيىلعى كوكونىس 1 - ايدان باستاپ سالىنىپ، قازىر جالاڭاش سۇلى، جازدىق ٴبايساي، ارتەمەزيا بازارعا سالىنۋدا. ٴبىراز ۋاقىتتان كەيىن، اس جۋا، قيار، قىزاناق پىسىپ، 6-ايدا كوكونىس جالپى بەتتىك بازارعا سالىنىپ بولادى.
قىزمەت اترەتى قىستاقتىڭ جالپى جاعدايىن يگەرە وتىرىپ، كوكونىس قالتقىسىنىڭ كىرىسى باسقا كىرىس كوزىمەن سالىستىرعاندا ءبىرشاما كورنەكتى ەكەندىگىن بايقايدى. قىزمەت اترەتىنىڭ باستىعى حوۋ چىڭچىڭ جيىن اشىپ، قىستاق ەكى القاسىمەن تالقى جۇرگىزىپ، قىستاقتىڭ اۋلا ەكونوميكاسىن دامىتۋدى جوسپارعا كىرگىزەدى. قىزمەت اترەتى باس بولىپ، اي سايىن قىستاق ارالاپ، كوكونىستىڭ ءوسۋ جاعدايىن باقىلاپ، ديقانداردىڭ قيىنشىلىقتارىنىڭ شەشىلۋىنە كومەكتەسەدى.
قىستاق تۇرعىنى پىڭ جيڭيۇن بىلاي دەدى : «ءبىر كوكونىس قالتقىسىنان جىلىنا مولشەرمەن 20 مىڭ يۋان تازا كىرىس كىرەدى. بيىل اۋلامداعى ەكى كوكونىس قالتقىسىنان سىرت، تاعى دا ءبىر كوكونىس قالتقىسىن مايلاپ وتىرمىن،ءونىم مولشەرى ويداعىداي. قىزمەت اترەتىندەگى جولداستار ءجيى كەلىپ، كوكونىستىڭ ارام ءشوبىن وتاۋعا كومەكتەسەدى. قىستاقتىڭ سۋ ناسوسى بۇزىلعان ەدى، قىزمەت اترەتى دەركەزىندە ساتۋشىلارمەن قابارلاسىپ، زاكاز بەردى. قىزمەت اترەتىندەگى جولداستارعا راقىمەت ايتامىن».
ءتىلشىنىڭ قىزمەت ورنى : التاي قالالىق پارتيا كوميتەتىنىڭ ۇيىمداستىرۋ ءبولىمى
