شي جينپيڭ مەملەكەتتىڭ ءتوراعالىعىنا، ورتالىق اسكەري ىستەر كوميتەتىنىڭ ءتوراعالىعىنا تولىق داۋىسپەن سايلاندى
لي جانشۋ مەملەكەتتىك حالىق قۇرىلتايى تۇراقتى كوميتەتىنىڭ باستىعىنا سايلاندى
ۋاڭ چيشان مەملەكەتتىڭ ورىنباسار ءتوراعالىعىنا سايلاندى
جاڭادان سايلانعان مەملەكەت باسشىلارى نەگىزگى زاڭ الدىندا سەرت بەردى
ءماجىلىس مەملەكەتتىك كەڭەس قۇرىلىمدارىنا رەفورما جاساۋ جوباسىن بەكىتتى
جۇڭحۋا حالىق رەسپۋبليكاسىنىڭ ءتوراعاسى
جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى
شي جينپيڭ
شينحۋا اگەنتتىگىنىڭ 3 - ايدىڭ 17 - كۇنى بەيجيڭنەن بەرگەن حابارى. مەملەكەتتىك 13 - كەزەكتى حالىق قۇرىلتايى 1 - ءماجىلىسى 3 - ايدىڭ 177 - كۇنى تۇستەن بۇرىن شي جينپيڭدى جۇڭحۋا حالىق رەسپۋبليكاسىنىڭ ءتوراعالىعىنا، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعالىعىنا سايلادى.
وسى سايلاۋ ناتيجەسى جاريالانعان كەزدە، بۇكىل زالدى ۇزاققا دەيىن شاتىرلاعان شاپالاق ءۇنى كەرنەدى.
جيىن سونىمەن بىرگە لي جانشۋدى مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ باستىعىنا، ۋاڭ چيشاندى جۇڭحۋا حالىق رەسپۋبليكاسىنىڭ ورىنباسار ءتوراعالىعىنا سايلادى.
تۇستەن بۇرىن ساعات 9دا، مەملەكەتتىك 13 - كەزەكتى حالىق قۇرىلتايى 1 - ءماجىلىسىنىڭ بەسىنشى جالپى جيىنى حالىق سارايىندا وتكىزىلدى.
شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ جيىنعا قاتىناستى.
جيىنعا قاتىناسۋعا ءتيىستى ۋاكىل 2980 ادام، قاتىناسقانى 2970 ادام، 10 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
جيىندى ءماجىلىستىڭ اتقارۋشى ءتوراعاسى، ءتوراعالار القاسىنىڭ تۇراقتى ءتوراعاسى چىن شي باسقاردى. ءماجىلىستىڭ اتقارۋشى ءتوراعالارى ۋاڭ دۇڭميڭ، شۇي چيلياڭ، جاڭ شۋان، لوۋ چينجيان، لو حۇينيڭ، جياڭ چاۋلياڭ ءتوراعالار مىنبەسىنىڭ اتقارۋشى ءتوراعالار ورنىنا جايعاستى.
جيىن الدىمەن مەملەكەتتىك 13 - كەزەكتى حالىق قۇرىلتايى 1 - ءماجىلىسىنىڭ مەملەكەتتىك كەڭەس قۇرىلىمدارىنا رەفورما جاساۋ جوباسى جونىندەگى قاۋلىسىن داۋىسقا سالىپ ماقۇلداپ، وسى جوبانى بەكىتتى. جيىن مىنانى تالاپ ەتتى: مەملەكەتتىك كەڭەس پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعىنا تاباندى بولىپ، دەن قويا ۇيىمداستىرىپ، ەگجەي - تەگجەيلى ورنالاستىرىپ، مەملەكەتتىك كەڭەس قۇرىلىمدارىنا رەفورما جاساۋ مىندەتىن ورىنداۋعا كەپىلدىك ەتۋ كەرەك.
جيىن مەملەكەتتىك 13 - كەزەكتى حالىق قۇرىلتايى 1 - ءماجىلىسىنىڭ سايلاۋ جانە مىندەتكە تاعايىنداۋدى ۇيعارۋ ءادىسىن داۋىسقا سالىپ ماقۇلدادى.
ساعات 9دان 23 مينۋتتا، سايلاۋ رەسمي باستالدى. بەلەت باقىلاۋشىلار جيىن زالىنا قويىلعان 28 ەلەكتروندىق بەلەت ساندىعىنا، ەلەكتروندىق سايلاۋ جۇيەسىنە تەكسەرۋ جۇرگىزدى. ىلە - شالا، قىزمەتكەرلەر سايلاۋ بەلەتىن تاراتا باستادى. 4 ءتۇرلى رەڭدەگى سايلاۋ بەلەتى ءاربىر ۋاكىلگە تاراتىلدى. سايلاۋ بەلەتى حانزۋ جازۋىمەن جانە 7 ءتۇرلى از ۇلت جازۋىمەن باسىلدى.
وسىدان سوڭ، ۋاكىلدەر بەلەت تولتىرا باستادى. جيىن زالىنىڭ ارتقى جاعىنا قۇپيا بەلەت تولتىرۋ ورنى ورنالاستىرىلدى.
سايلاۋ جانە مىندەتكە تاعايىنداۋدى ۇيعارۋ ءادىسى بويىنشا، جۇڭحۋا حالىق رەسپۋبليكاسىنىڭ ءتوراعاسى، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى، مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ باستىعى، ورىنباسار باستىقتارى، باس حاتشىسى، جۇڭحۋا حالىق رەسپۋبليكاسىنىڭ ورىنباسار ءتوراعاسى تەڭ سانمەن سايلانادى.
ساعات 9دان 41 مينۋتتا، باس بەلەت باقىلاۋشى، بەلەت باقىلاۋشىلار الدىمەن بەلەت تاستادى. ونان سوڭ، ۋاكىلدەر بەلەت تاستاي باستادى. بەلەت تاستاۋ اياقتاعان سوڭ، باس بەلەت باقىلاۋشى سايلاۋ بەلەتىنىڭ تاراتىلۋ جانە جينالۋ جاعدايىن ايتىپ، سايلاۋدىڭ كۇشكە يە بولعانىن مالىمدەدى.
قىزمەتكەرلەر بەلەت ساناۋ ناتيجەسىن وقىدى.
بەلەت ساناۋ ناتيجەسى مەملەكەت ءتوراعاسىن، ورتالىق اسكەري ىستەر كوميتەتىنىڭ ءتوراعاسىن سايلاۋدا شي جينپيڭنىڭ بارلىق 2970 قۇپتاۋ بەلەتىنە يە بولعانىن كورسەتتى، بۇكىل زالداعىلار قىزۋ شاپالاق سوقتى.
باسقارۋشى بىلاي دەپ جاريالادى:
شي جينپيڭ جولداس جۇڭحۋا حالىق رەسپۋبليكاسىنىڭ ءتوراعالىعىنا سايلاندى.
شي جينپيڭ ورنىنان تۇرىپ، ۋاكىلدەرگە ءيىلىپ ىززەت ءبىلدىردى. بارلىق ۋاكىل ورىندارىنان تۇرىپ، قىزۋ شاپالاق سوعىپ، شي جينپيڭگە قۇرمەت ءبىلدىردى. قاسىندا تۇرعان لي كىچياڭ، جاڭ دىجياڭ شي جينپيڭمەن جەكە - جەكە قول الىسىپ، قۇتتىقتادى.
باسقارۋشى شي جينپيڭ جولداستىڭ جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعالىعىنا سايلانعانىن جاريالاعان كەزدە، زالدى تاعى ءبىر مارتە شاتىرلاعان شاپالاق ءۇنى كەرنەدى، شي جينپيڭ تاعى ءبىر رەت ورنىنان تۇرىپ، ۋاكىلدەرگە ءيىلىپ ىززەت ءبىلدىردى.
وسىدان سوڭ، باسقارۋشى مىنالاردى كەزەكپەن جاريالادى:
لي جانشۋ جولداس مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ باستىعىنا سايلاندى.
ۋاڭ چيشان جولداس جۇڭحۋا حالىق رەسپۋبليكاسىنىڭ ورىنباسار ءتوراعالىعىنا سايلاندى.
ۋاڭ چىن، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ەركىن يمىرباقى، ۋان ىشياڭ، چىن جۋ، ۋاڭ دۇڭميڭ، بايماچىلين، ديڭ جۇڭلي، حاۋ ميڭجين، ساي دافىڭ، ۋ ۋيحۋا جولداستار مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ ورىنباسار باستىعىنا سايلاندى.
ياڭ جىن - ۋ جولداس مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ باس حاتشىسىنا سايلاندى.
ءار سايلاۋدىڭ ناتيجەسى جاريالانعان سايىن، زالدان شاتىرلاعان شاپالاق ءۇنى كوتەرىلدى.
شاپالاق ءۇنى ىشىندە، مەملەكەتتىك حالىق قۇرىلتايى تۇراقتى كوميتەتىنىڭ جاڭادان سايلانعان باستىعى لي جانشۋ ورنىنان تۇرىپ، ۋاكىلدەرگە ءيىلىپ قۇرمەت ءبىلدىردى. وسىدان سوڭ، ول شي جينپيڭنىڭ قاسىنا بارىپ، ەكەۋى ىقىلاستى قول الىستى، شي جينپيڭ ونى قۇتتىقتادى. لي جانشۋ تاعى مەملەكەتتىك 12 - كەزەكتى حالىق قۇرىلتايى تۇراقتى كوميتەتىنىڭ باستىعى جاڭ دىجياڭمەن قول الىسىپ، ءوزارا قۇرمەت ءبىلدىرىستى. جاڭ دىجياڭ دا شي جينپيڭمەن قول الىسىپ، العىس ايتىپ، قۇرمەت ءبىلدىردى.
شاپالاق ءۇنى ىشىندە مەملەكەتتىڭ جاڭادان سايلانعان ورىنباسار ءتوراعاسى ۋاڭ چيشان ۋاكىلدەرگە ءيىلىپ قۇرمەت ءبىلدىردى. شي جينپيڭ ونىمەن ىقىلاستى قول الىسىپ، ونى قۇتتىقتادى.
مەملەكەتتىك 13 - كەزەكتى حالىق قۇرىلتايى 1 - ءماجىلىسى ءتوراعالار القاسىنىڭ نەگىزگى زاڭ الدىندا سەرت بەرۋ جونىندەگى ۇيىمدىق ءادىسى بويىنشا، جالپى جيىننىڭ كەڭەستىك تارتىپتەرى اياقتاعان سوڭ، جۇڭحۋا حالىق رەسپۋبليكاسى مەملەكەتتىك 13 - كەزەكتى حالىق قۇرىلتايى 1 - ءماجىلىسىنىڭ نەگىزگى زاڭ الدىندا سەرت بەرۋ سالتى وتكىزىلدى.
ساعات 10نان 49 مينۋتتا جۇڭگو حالىق ازاتتىق ارمياسىنىڭ اسكەري وركەسترى زالدا سەرت بەرۋ سالتى مۋزيكاسىن ورىندادى.
قۇرلىق، تەڭىز، اۋە 3 ارميانىڭ 12 قۇرمەت قاراۋىلى 2 قاتارعا ءبولىنىپ، جيىن زالىنىڭ ارتقى جاعىنان ساپتىق قاداممەن ءجۇرىپ، ءتوراعالار مىنبەسىنىڭ الدىنا كەلىپ تۇردى.
بارلىق ادام ورنىنان تۇردى. ءتوراعالار مىنبەسىندە 3 قۇرمەت قاراۋىلى ساپتىق قاداممەن «جۇڭحۋا حالىق رەسپۋبليكاسىنىڭ نەگىزگى زاڭىن» قاراۋىلداپ الىپ كەلىپ، نەگىزگى زاڭدى سەرت بەرۋ مىنبەرىنىڭ ۇستىنە قويدى.
اسكەري وركەستردىڭ سۇيەمەلدەۋىندە بۇكىل زالداعىلار جۇڭحۋا حالىق رەسپۋبليكاسىنىڭ مەملەكەت گيمنىن شىرقادى.
وسىدان سوڭ، قىزمەتكەر بىلاي دەپ جاريالادى: ەندى جۇڭحۋا حالىق رەسپۋبليكاسىنىڭ ءتوراعاسى، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى شي جينپيڭدى سەرت بەرۋگە ۇسىنىس ەتەمىز.
ءتوراعانىڭ ورتاعا شىعۋ كەرنايى شالىنىپ، جاڭادان سايلانعان مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ءتوراعالار مىنبەسىندەگى ورنىنان تۇرىپ، نىق قاداممەن سەرت بەرۋ مىنبەسىنىڭ الدىنا كەلىپ تۇردى.
ءتوراعالار مىنبەسىنىڭ تورىنە ىلىنگەن مەملەكەت گەربى شۇعىلا شاشىپ تۇردى. زالداعى مەملەكەتتىك حالىق قۇرىلتايىنىڭ 3000عا جۋىق ۋاكىلى وسىناۋ قاسيەتتى ساتكە بىرگە كۋا بولدى.
شي جينپيڭ سول قولىن نەگىزگى زاڭنىڭ ۇستىنە قويىپ، وڭ قولىن كوتەرىپ جۇدىرىعىن ءتۇيىپ، ايبىندى سەرت بەردى.
«مەن مىنانى سەرت ەتەمىن: جۇڭحۋا حالىق رەسپۋبليكاسىنىڭ نەگىزگى زاڭىنا ادال بولامىن، نەگىزگى زاڭنىڭ بەدەلىن قورعايمىن، زاڭدا بەلگىلەنگەن قىزمەت مىندەتىمدى اتقارامىن، وتانعا ادال بولامىن، حالىققا ادال بولامىن، ءوز قىزمەتىمدى بايىپتى، مۇقيات، جاقسى ىستەپ، پاك ءارى كوپشىل بولىپ، حالىقتىڭ باقىلاۋىن قابىلدايمىن، باي، قۇدىرەتتى، دەموكراتيالى، وركەنيەتتى، جاراسىمدى، كورىكتى سوتسياليستىك وسىزاماندانعان قۇدىرەتتى مەملەكەت قۇرۋ ءۇشىن قۇلشىنا كۇرەسەمىن!»
سەرتتىڭ ءور داۋىسى حالىق سارايىن جاڭعىرتتى.
سەرت بەرۋ اقىرلاسقان سوڭ، شي جينپيڭ زالداعىلارعا ءيىلىپ ىززەت ءبىلدىردى. زالدى ۇزاققا دەيىن شاتىرلاعان شاپالاق ءۇنى كەرنەدى.
وسىدان سوڭ، مەملەكەتتىك حالىق قۇرىلتايى تۇراقتى كوميتەتىنىڭ جاڭادان سايلانعان باستىعى لي جانشۋ، مەملەكەتتىڭ جاڭادان سايلانعان ورىنباسار ءتوراعاسى ۋاڭ چيشان نەگىزگى زاڭ الدىندا جەكە - جەكە سەرت بەردى، مەملەكەتتىك حالىق قۇرىلتايى تۇراقتى كوميتەتىنىڭ جاڭادان سايلانعان ورىنباسار باستىقتارى، باس حاتشىسى نەگىزگى زاڭ الدىندا توپتىق سەرت بەردى.
