شينحۋا اگەنتتىگىنىڭ 3 - ايدىڭ 17 - كۇنى بەيجيڭنەن بەرگەن حابارى. 3 - ايدىڭ 17 - كۇنى رەسەي زۇڭتۇڭى پۋتين مەملەكەت ءتوراعاسى شي جينپيڭگە قۇتتىقتاۋ تەلەگرامماسىن جولداپ، شي جينپيڭنىڭ جۇڭحۋا حالىق رەسپۋبليكاسىنىڭ ءتوراعالىعىنا سايلانعاندىعىن قىزۋ قۇتتىقتادى.
پۋتين قۇتتىقتاۋ تەلەگرامماسىندا بىلاي دەدى: ءسىزدىڭ جۇڭحۋا حالىق رەسپۋبليكاسىنىڭ ءتوراعالىعىنا سايلانعانىڭىزدى شىن جۇرەكتەن قۇتتىقتايمىن. جۇڭگو مەملەكەتتىك حالىق قۇرىلتايى شىعارعان وسى قارار ءسىزدىڭ وسكەلەڭ بەدەلىڭىزدى تاعى ءبىر رەت دالەلدەدى ءارى ول ءسىزدىڭ ەلدەرىڭىزدىڭ ەكونوميكاسىنىڭ، قوعامىنىڭ تەز قارقىنمەن دامۋىن ىلگەرىلەتۋگە، حالىقارالىق ساحىنادا مەملەكەتتىڭ مۇددەسىن قورعاۋعا قوسقان ۇلەسىڭىزدى تۇراقتاندىرۋ بولىپ سانالادى. باستىسى، ءسىزدىڭ جەبەۋىڭىزدىڭ ناتيجەسىندە رەسەي مەن جۇڭگونىڭ قاتىناسى جاقىنعى جىلداردان بەرى بۇرىندى - سوڭدى بولىپ كورىلمەگەن بەلەسكە كوتەرىلىپ، ءىرى ەلدەر اراسىندا تەڭ، ءوزارا ءتيىمدى ىنتىماقتاستىقتى دامىتۋدىڭ ناعىز ۇلگىسىنە اينالدى. سىزبەن جاڭا سۇحبات وتكىزۋدى ەرەكشە قۋانىشپەن كۇتەمىن. ەكى جاق تىزە قوسا قۇلشىناتىن بولسا، رەسەي مەن جۇڭگونىڭ جالپى بەتتىك ستراتەگيالىق سەلبەستىك سەرىكتەستىك قاتىناسىن، ءسوز جوق، اناعۇرلىم بەكەمدەي تۇسەتىندىگىمىزگە، سونداي - اق وعان تىڭ ءمان قوساتىندىعىمىزعا كامىل سەنەمىن. مۇنىڭ تەرەڭ دوستىق ورناتقان رەسەي مەن جۇڭگو ەكى ەل حالقىنىڭ باقىتىن ونان ارى كۇشەيتىپ، ەۆروپا - ازيا قۇرلىعى مەن بۇكىل دۇنيە ءجۇزىنىڭ حاۋىپسىزدىگىن جانە ورنىقتىلىعىن جەبەيتىندىگىندە داۋ جوق. دەنىڭىزدىڭ ساۋ بولۋىن، ءىسىڭىزدىڭ ىلگەرى بولۋىن، مەملەكەت ءتوراعاسى سىندى وسى ماڭىزدى ورىندا ۇزدىكسىز تىڭ تابىستارعا قول جەتكىزۋىڭىزدى شىن جۇرەكتەن تىلەيمىن.
