شينحۋا اگەنتتىگىنىڭ 3 - ايدىڭ 19 - كۇنى بەيجيڭنەن بەرگەن حابارى. 3 - ايدىڭ 19 - كۇنى مەملەكەت ءتوراعاسى شي جينپيڭ رەسەيدىڭ زۇڭتۇڭى پۋتينمەن تەلەفوندا سويلەستى.
شي جينپيڭ رەسەيدىڭ زۇڭتۇڭ سايلاۋىنىڭ تابىستى وتكەنىن، پۋتيننىڭ رەسەيدىڭ زۇڭتۇڭى بولىپ قايتا سايلانعانىن قۇتتىقتادى. شي جينپيڭ بىلاي دەپ اتاپ كورسەتتى: زۇڭتۇڭ مىرزانىڭ ءساتتى تۇردە قايتا سايلانۋى − رەسەي حالقىنىڭ دۇرىس تالعامى. زۇڭتۇڭ مىرزانىڭ باسشىلىعىندا رەسەي حالقىنىڭ، ءسوز جوق، زەيىن - زەردەنى شوعىرلاندىرىپ، كۇش بىرىكتىرىپ، ىنتىماقتاسا العا باسىپ، مەملەكەتتى دامىتۋ قۇرىلىسىندا ۇزدىكسىز تىڭ تابىستارعا جەتەتىنىنە سەنەمىن. قازىر جۇڭگو دا، رەسەي دە مەملەكەتتى دامىتۋدىڭ، كوركەيتۋدىڭ شەشۋشى كەزەڭىندە تۇر. بيىل − جۇڭگو ج ك پ 19 - قۇرىلتايىنىڭ رۋحىن دايەكتىلەندىرەتىن، تياناقتاندىراتىن باستاما جىل، سونداي - اق رەفورما جاساپ، ەسىك اشۋدىڭ 40 جىلدىعى. بۇرىنعى جىلدارمەن سالىستىرعاندا، جۇڭگونىڭ بيىلعى مەملەكەتتىك «ەكى ءماجىلىسى» اناعۇرلىم كەلەلى ماڭىزعا يە. جاڭا كەزەكتى مەملەكەت قۇرىلىمدارى مەن مەملەكەتتىك ساياسي كەڭەستىڭ باسشىلارىن سايلاۋمەن بىرگە، ءبىز نەگىزگى زاڭعا وزگەرىس ەنگىزۋ جوباسى، باقىلاۋ - تەكسەرۋ زاڭى جوباسى سياقتى كەلەلى كەڭەستىك جوبالاردى قاراپ، جاڭا كەزەكتى مەملەكەتتىك كەڭەس قۇرىلىمدارى رەفورماسىن باستادىق. بۇل بۇكىل ەل حالقىن اناعۇرلىم ىنتىماقتاستىرىپ، ىنتالاندىرىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ ءۇشىن كۇرەسۋگە ءتيىمدى. زۇڭتۇڭ مىرزا تاياۋداعى ەل جاعدايى جونىندەگى بايانداماسىندا رەسەيدىڭ مەملەكەت قۇرىلىسى، حالىق تۇرمىسىن جاقسارتۋ، عىلىم - تەحنيكالىق جاڭالىق اشۋ سياقتىلار جونىندە ماڭىزدى ۇستانىمدار ورتاعا قويدى، مەن مۇنى ايرىقشا قۇپتايمىن. ەكى ەلدىڭ بەلگىلەنگەن بەتالىسپەن، ءوز جولىنان اۋىتقىماي، تىڭ ناتيجەگە قول جەتكىزەتىنىنە سەنەمىن.
شي جينپيڭ مىنالاردى باسا دارىپتەدى: جۇڭگو مەن رەسەي داۋىلدى تولقىندا قاتار جۇزگەن كەمە ىسپەتتى جان - جاقتى ستراتەگيالىق ىنتىماقتاستىق سەرىكتەستەرى، مەن زۇڭتۇڭ مىرزامەن كوپ مارتە كەزدەستىم، جۇڭگو - رەسەي قارىم - قاتىناسىنىڭ حالىقارالىق الماعايىپ وزگەرىستەردىڭ سىناعىنان ءوتىپ، تاريحتاعى ەڭ جاقسى كەزەڭگە جەتۋىن بىرگە ىلگەرىلەتتىك. الەمدەگى ەكى ءىرى ەل رەتىندە، جۇڭگو رەسەيمەن ۇزدىكسىز سەلبەسە قۇلشىنىپ، تىعىز باي−لانىس جاساپ، ىنتىماقتاستىقتى تەرەڭدەتىپ، ەكى ەل قارىم - قاتىناسىنىڭ كەلەسى قادامداعى دامۋىن بىرگە جوسپارلاپ، جۇڭگو - رەسەي قارىم - قاتىناسىن جاڭا داۋىرگە قادام تاستاۋعا جەتەكتەۋدى قالايدى.
پۋتين شي جينپيڭنىڭ جۇڭگونىڭ مەملەكەت ءتوراعاسى بولىپ قايتا سايلانعانىن تاعى ءبىر مارتە قۇتتىقتادى. پۋتين بىلاي دەدى: جۇڭگونىڭ مەملەكەتتىك حالىق قۇرىلتايى جاساعان بۇل ماڭىزدى ۇيعارىم ءسىزدىڭ اسقاق بەدەلىڭىزدى جانە بۇكىل جۇڭگو حالقىنىڭ سىزگە دەگەن قولداۋىن تاعى ءبىر رەت دالەلدەدى. جۇڭگونىڭ مەملەكەتتىك حالىق قۇرىلتايىنىڭ وسى رەت جاساعان ءبىرسىپىرا ۇيعارىمدارى جۇڭگونىڭ دامۋىن ونان ارى ىلگەرىلەتەتىن بۇكىلدەي دۇرىس ۇيعارىمدار، رەسەي بۇل ۇيعارىمداردى قۇتتىقتايدى جانە وعان باتىل قولداۋ كورسەتەدى. ءسىزدىڭ كۇش سالىپ ىلگەرىلەتۋىڭىزدىڭ ارقاسىندا، قازىر رەسەي مەن جۇڭگونىڭ جان - جاقتى ستراتەگيالىق ىنتىماقتاستىق سەرىكتەستىك قارىم - قاتىناسى تاريحتاعى ەڭ جوعارى دەڭگەيدە تۇر. رەسەي جۇڭگومەن دوستىعىن قادىرلەيدى، جۇڭگومەن جوعارى جىكتەگىلەر قارىم - قاتىناسىن جيىلەتىپ، ەكى ەلدىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىن تەرەڭدەتۋدى قالايدى.
