تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ ۋاعدا بويىنشا ءۇندىستاننىڭ زۇڭليى موديمەن تەلەفوندا سويلەستى

  شينحۋا اگەنتتىگىنىڭ 3 - ايدىڭ 20 - كۇنى بەيجيڭنەن بەرگەن حابارى. 3 - ايدىڭ 20 - كۇنى مەملەكەت ءتوراعاسى شي جينپيڭ ۋاعدا بويىنشا ءۇندىستاننىڭ زۇڭليى موديمەن تەلەفوندا سويلەستى. مودي الدىمەن شي جينپيڭنىڭ جۇڭگونىڭ مەملەكەت ءتوراعاسى بولىپ قايتا سايلانعاندىعىن قىزۋ قۇتتىقتادى. مودي بىلاي دەدى: ءسىزدىڭ قايتا سايلانۋىڭىز تۇتاس جۇڭگو حالقىنىڭ ءسىزدى قولدايتىندىعىن، ارداقتايتىندىعىن تاعى ءبىر رەت دالەلدەدى. ءۇندىستان مەن جۇڭگو بايىرعى وركەنيەتتى ەلدەر، سونداي - اق دۇنيە جۇزىندەگى ىقپالدى ەلدەر. ءۇندىستان جۇڭگونىڭ جوعارى جىكتەگىلەرىمەن قارىم - قاتىناستى نىعايتىپ، ەكى جاقتى قاتىناستى تەرەڭدەتىپ، حالىقارالىق ىستەردە ءوزارا سايكەسۋدى، سەلبەسۋدى كۇشەيتىپ، ءۇندىستان مەن جۇڭگونىڭ دامۋداعى تىعىز سەرىكتەستىك قاتىناسىن ىلگەرىلەتۋ جولىندا اناعۇرلىم زور ىلگەرىلەۋشىلىككە قول جەتكىزىپ، دۇنيە ءجۇزى مەن ءوڭىردىڭ بەيبىتشىلىگىن، دامۋىن ىلگەرىلەتۋدى قالايدى.

  شي جينپيڭ موديدىڭ تەلەفون بەرىپ قۇتتىقتاعاندىعىنا العىس ايتتى. شي جينپيڭ مىنالاردى اتاپ كورسەتتى: ەندى عانا جابىلعان جۇڭگونىڭ مەملەكەتتىك «ەكى ءماجىلىسى» ايرىقشا تابىستى بولدى. ءماجىلىس جاڭا كەزەكتى مەملەكەت قۇرىلىمدارىنىڭ جانە مەملەكەتتىك ساياسي كەڭەستىڭ باسشىلارىن سايلاپ شىقتى، نەگىزگى زاڭعا وزگەرىس ەنگىزۋ جوباسىن جانە تاعى باسقا ماڭىزدى كەڭەستىك جوبالاردى ماقۇلداپ، مەملەكەتتىك كەڭەس قۇرىلىمدارىنا رەفورما جاساۋدى باستادى. جۇڭگو الداعى جەردە رەفورمانى ونان ارى تەرەڭدەتىپ، ەسىكتى اشىق ۇستاۋدى كەڭەيتىپ، ءوزىنىڭ دامۋىن ىسكە اسىرۋمەن بىرگە، دۇنيە ءجۇزىنىڭ بىرگە دامۋىن، العا باسۋىن جەبەۋ جولىندا بارىنشا زور ۇلەس قوسادى.

    شي جينپيڭ مىنانى باسا دارىپتەدى: جۇڭگو مەن ءۇندىستان دامۋ ۇستىندەگى ءىرى ەلدەر، سونداي - اق بازارى جاڭادان گۇلدەنگەن نەگىزگى مەملەكەتتەر، دۇنيە ءجۇزىنىڭ كوپ ۇيەكتەنۋى مەن ەكونوميكانىڭ جاھاندانۋىن ىلگەرىلەتۋدىڭ تىرەكتى كۇشى. وتكەنگى ءبىرقانشا جىلدان بەرى زۇڭلي مىرزامەن تالاي رەت كەڭەسىپ، جۇڭگو مەن ءۇندىستاننىڭ دامۋدا اناعۇرلىم تىعىز سەرىكتەستىك قاتىناس ورناتۋى كەرەكتىگىن تۇراقتاندىرىپ، ەكى ەلدىڭ ءار سالاداعى ىنتىماقتاستىعىندا ارشىندى دامۋعا قول جەتكىزدىك. ءبىر مەزگىلدەن بەرى، جۇڭگو مەن ءۇندىستاننىڭ قاتىناسى بەلسەندى دامىپ، ناقتىلى ىستەر جونىندەگى ىنتىماقتاستىعى تەرەڭدەپ، حالىق اراسىنداعى دوستىق قارىم - قاتىناس كۇننەن - كۇنگە قويۋلادى. جۇڭگو ۇندىستانمەن تىزە قوسا قۇلشىنىپ، وسى تاماشا ارىندى ۇزدىكسىز ساقتاۋدى قالايدى. مەن زۇڭلي مىرزامەن ەكى ەل قاتىناسىنداعى جالپى جاعدايلىق سيپات، ۇزاق ۋاقىتتىق سيپات، ستراتەگيالىق سيپات الاتىن ماسەلەلەر جانە حالىقارالىق، وڭىرلىك جاعداي جونىندە پىكىرلەسۋدى كۇشەيتىپ، ەكى ەلدىڭ ساياسي جاقتا ءوزارا سەنىم ارتۋىن ىلگەرىلەتىپ، ەكى ەل قاتىناسىنىڭ دامۋىنا ماڭىزدى جەتەكشىلىك ەتىپ، ەكى ەل قاتىناسىنىڭ دامۋ دەڭگەيىن ۇزدىكسىز جوعارىلاتۋدى قالايمىن.

جاۋاپتى رەداكتور : 阿肯

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.