تيانشان تورابى   ›   ۇيرەنۋ   ›   ماڭىزدى ءسوز

مەملەكەتتىك 13 - كەزەكتى حالىق قۇرىلتايىنىڭ 1 - ماجىلىسىندە سويلەنگەن ءسوز

(2018 - جىلى 3 - ايدىڭ 20 - كۇنى)

شي جينپيڭ

  ۋاكىلدەر:  

  وسى جولعى ءماجىلىس مەنى جۇڭحۋا حالىق رەسپۋبليكاسىنىڭ ءتوراعالىعىنا تاعى دا سايلادى، مەن ۋاكىلدەر مەن بۇكىل ەلدەگىءار ۇلت حالقىنىڭ ماعان سەنىم ارتقاندىعىنا شىن جۇرەكتەن العىس ايتامىن!

  جۇڭحۋا حالىق رەسپۋبليكاسىنىڭ ءتوراعاسى سىندى وسى ارداقتى مىندەتتى ارقالاۋ − داڭقتى بورىش، كەلەلى جاۋاپكەرلىك. مەن نەگىزگى زاڭدا جۇكتەلگەن بورىشىمدى اۋەلگىدەي ادالدىقپەن اتقارىپ، وتانعا، حالىققا ادال بولىپ، ءوز مىندەتىمدى ويداعىداي وتەپ، بار قايراتىمدى سارقا جۇمساپ، قىزمەتتى شوگەلدىكپەن ىستەپ، شىن پەيىلمەن ەسە قوسىپ، حالىقتىڭ قىزمەتكەرى بولامىن، حالىقتىڭ باقىلاۋىن قابىلدايمىن، ۋاكىلدەر مەن بۇكىل ەلىمىزدەگى ءار ۇلت حالقىنىڭ سەنىمى مەن ءۇمىتىن استە جەردە قالدىرمايمىن!

  مەملەكەت ورگاندارىنداعى قىزمەتكەرلەر، مەيلى قىزمەت ورنى قانشالىق جوعارى بولسىن، تۇگەلدەي رەسپۋبليكامىزدىڭ جۇڭحۋا حالىق رەسپۋبليكاسى ەكەندىگىن ەستەرىنەن شىعارماي، قاشاندا حالىققا كوڭىلىنىڭ تورىنەن ورىن بەرىپ، قاشاندا بۇكىل ىنتا - پەيىلدەرىمەن حالىق ءۇشىن قىزمەت ەتىپ، قاشاندا حالىقتىڭ مۇددەسى مەن باقىتى جولىندا قۇلشىنا قىزمەت ىستەۋلەرى كەرەك.

  ۋاكىلدەر!

  حالىق − تاريحتى جاراتۋشى، حالىق − ناعىز قاھارمان. جۇڭحۋا ۇلتىنىڭ ايبىندى دامۋ تاريحىن جۇڭگو حالقى جازعان! باي مازمۇندى جۇڭحۋا وركەنيەتىن جۇڭحۋا ۇلتى جاراتقان! بارعان سايىن جاڭارا تۇسكەن جۇڭحۋا ۇلتىنىڭ رۋحىن جۇڭگو حالقى جەتىلدىرگەن! جۇڭحۋا ۇلتىنىڭ ەڭسە كوتەرۋدەن، بايۋدان قۇدىرەتتەنۋگە دەيىنگى ۇلى سەكىرۋىن جۇڭگو حالقى كۇرەس جۇرگىزۋ ارقىلى جۇزەگە اسىرعان!

  جۇڭگو حالقىنىڭ ەرەكشەلىگى، دارىنى نەشە مىڭ جىلعا جالعاسىپ، دامىپ بۇگىنگە جەتكەن جۇڭحۋا وركەنيەتىن جاراتىپ قالماستان، زامانىمىزداعى جۇڭگونىڭ دامۋى مەن العا باسۋىنا، زامانىمىزداعى جۇڭگولىقتاردىڭ رۋحاني دۇنيەسىنە تەرەڭ ىقپال كورسەتىپ وتىر. جۇڭگو حالقى ۇزاق ۋاقىت كۇرەس جۇرگىزۋ بارىسىندا قالىپتاستىرعان، جالعاستىرعان، دامىتقان ۇلى ۇلت رۋحى جۇڭگونىڭ وركەندەۋى مەن ادامزات وركەنيەتىنىڭ العا باسۋى جونىنەن قۇدىرەتتى رۋحاني كۇش ازىرلەدى.

  − جۇڭگو حالقى ۇلى جاسامپازدىق رۋحقا يە حالىق. نەشە مىڭ جىلدىق تاريح كەرۋەنىندە، جۇڭگو حالقى باستان - اياق قاجىرلىلىقپەن ەڭبەك ەتىپ، تاپقىرلىق جاراتىپ، جاڭالىق اشىپ كەلدى، ەلىمىزدە لاۋزى، كۇڭزى، جۋاڭزى، مىڭزى، موزى، سۇنزى، حان فيزى قاتارلى الەمگە ايگىلى ۇلى ويشىل عۇلامالار دۇنيەگە كەلدى، قاعاز جاساۋ، وق ءدارىسى، باسپا تەحنيكاسى، كومپاس قاتارلى ادامزات وركەنيەتىنىڭ اياق الىسىنا تەرەڭ ىقپال جاساعان ۇلى عىلىم - تەحنيكالىق جەتىستىكتەر تاپقىرلاندى، جىرناما، چۋ جىرلارى، حان ارناۋلارى، تاڭ ولەڭدەرى، سۇڭ بايتتەرى، يۋان درامالارى، ميڭ، چيڭ پروزالارى قاتارلى ۇلى ادەبي تۋىندىلار جاراتىلدى، گىسار، ماناس، جاڭعىر قاتارلى جۇرەكتى تەبىرەنتەتىن كەسەك تاريحي داستاندار ۇرپاقتان - ۇرپاققا جالعاستى، ۇلى قورعان، دۋجياڭ توسپاسى، ۇلى كانال، پاتشا ورداسى، بۇدالا سارايى قاتارلى ايبىندى دا ۇلى قۇرىلىستار سالىندى. بۇگىنگى تاڭدا، جۇڭگو حالقىنىڭ جاسامپازدىق رۋحى بۇرىن بولىپ كورمەگەن دارەجەدە اسقاقتاپ، ەلىمىزدىڭ كۇن سايىن العا باسىپ، الىپ قاداممەن دۇنيەنىڭ الدىڭعى لەگىندە جۇرۋىنە دەم بەرىپ وتىر. مەن ءبىر ميلليارد 300 ميلليوننان استام جۇڭگو حالقى وسىنداي جاسامپازدىق رۋحتى باستان - اياق ساۋلەلەندىرسە بولعانى، ءبىزدىڭ ارت - ارتىنان، ءسوز جوق، كەرەمەتتەر جاراتا الاتىندىعىمىزعا كامىل سەنەمىن.

  − جۇڭگو حالقى ۇلى كۇرەسكەرلىك رۋحقا يە حالىق. نەشە مىڭ جىلدىق تاريح كەرۋەنىندە، جۇڭگو حالقى قاشاندا جاڭالىققا ۇمتىلىپ، تالىقپاي تالپىنىپ، وتانىمىزدىڭ كەڭ - بايتاق كورىكتى تاۋ - وزەندەرىن اشتى جانە گۇلدەندىردى، ۇلان - قايىر تەڭىز جاعالاۋلارى مەن تەڭىز الاپتارىنان تىڭ ءورىس اشتى، تۇگىن تارتساڭ مايى شىعاتىن كەڭ - بايتاق ەگىستىكتەردى اشتى، زامانالار بويى ساۋىرىن سيپاتپاي كەلگەن نە ءبىر اساۋ وزەندەردى تىزگىندەدى، سان - ساناقسىز تابيعي اپاتتاردى جەڭدى، سامالاداي سامسىعان قالا - قالاشىقتاردى، اۋىل - قىستاقتاردى قۇردى، الۋان ءتۇرلى كاسىپ سالالارىن دامىتىپ، ءماندى دە ءساندى باياشات تۇرمىس قالىپتاستىردى. جۇڭگو حالقى دۇنيەدە وزدىگىنەن بىتە قوياتىن وڭاي ءىس بولمايتىنىن، باقىتتىڭ كۇرەسپەن كەلەتىنىن سوناۋ ەرتەدەن - اق بىلگەن. بۇگىنگى تاڭدا، جۇڭگو حالقى قولعا كەلتىرگەن بارلىق نارسەگە جۇڭگولىقتاردىڭ اقىل - پاراساتى شوعىرلانعان، جۇڭگولىقتاردىڭ ەرشىمدى ەڭبەك ەتكەن ماڭداي تەرى سىڭگەن، وندا جۇڭگولىقتاردىڭ وراسان زور قۇرباندىقتارى قامتىلعان. مەن ءبىر ميلليارد 300 ميلليوننان استام جۇڭگو حالقى وسىنداي ۇلى كۇرەسكەرلىك رۋحتى باستان - اياق ساۋلەلەندىرسە بولعانى، ءبىزدىڭ حالىققا ءتىپتى دە باقىتتى تۇرمىس جاراتۋ ۇلى نىساناسىن، ءسوز جوق، جۇزەگە اسىرا الاتىندىعىمىزعا كامىل سەنەمىن!

  − جۇڭگو حالقى ۇلى ىنتىماق رۋحىنا يە حالىق. نەشە مىڭ جىلدىق تاريح كەرۋەنىندە، جۇڭگو حالقى باستان - اياق ءبىر نيەتتە ىنتىماقتاسىپ، جاپا مەن راقاتتا بىرگە بولىپ، بىرلىككە كەلگەن كوپ ۇلتتى مەملەكەت قۇرىپ، 56 ۇلتتىڭ كوپ نەگىزدى ءبىر تۇلعالانعان، ءوزارا توعىسقان جاراسىمدى ۇلتتىق قاتىناسىن دامىتىپ، جۇڭحۋا ۇلتىنىڭ بەرەكەلى دە قارايلاسىمدى ۇلى شاڭىراعىن قالىپتاستىردى. اسىرەسە، تاياۋ زاماننان كەيىن، شەتەل شاپقىنشىلارى تىزەسىن قاتتى باتىرعان قاتاڭ جاعدايدا، ەلىمىزدەگى ءار ۇلت حالقى قول ۇستاسىپ، تىزە قوسا كىرىسىپ، ەرلىكپەن كۇرەس جاساپ، قاندى شايقاس جۇرگىزىپ، بارلىق سۇرقيا شاپقىنشىلاردى جەڭىپ، ۇلتتىڭ تاۋەلسىزدىگى مەن بوستاندىعىن قورعاپ، جۇڭحۋا ۇلتىنىڭ وتاندى قورعاۋىنىڭ، شەتەل شاپقىنشىلارىنىڭ قورلىق - زورلىعىنا قارسى تۇرۋىنىڭ ايبىندى داستانىن بىرگە جازدى. بۇگىنگى تاڭدا، جۇڭگو قول جەتكىزگەن كۇللى دۇنيەنى جالت قاراتقان دامۋ جەتىستىكتەرى، تىپتەن، بۇكىل ەلدەگى ءار ۇلت حالقىنىڭ ءبىر نيەت، ءبىر تىلەكتە بولا وتىرىپ ورتاق قۇلشىنۋىنىڭ جەمىسى. جۇڭگو حالقى بەرەكە - بىرلىكتىڭ كۇش - قۋات ەكەندىگىن، بەرەكە - بىرلىك بولعاندا عانا، العا باسۋعا بولاتىندىعىن، بەرەكەسى قاشقان ەلدىڭ دامۋىنىڭ، العا باسۋىنىڭ مۇمكىن ەمەس ەكەندىگىن وزدەرىنىڭ ءتول كەشىرمەلەرىنەن تەرەڭ تانىعان. مەن ءبىر ميلليارد 300 ميلليوننان استام جۇڭگو حالقى وسىنداي ۇلى ىنتىماق رۋحىن باستان - اياق ساۋلەلەندىرسە بولعانى، ءبىزدىڭ ەرلىكپەن العا ۇمتىلاتىن، المايتىن قامالى بولمايتىن قۇدىرەتتى كۇشتى، ءسوز جوق، قالىپتاستىرا الاتىندىعىمىزعا كامىل سەنەمىن!

  − جۇڭگو حالقى ۇلى ارمان رۋحىنا يە حالىق. نەشە مىڭ جىلدىق تاريح كەرۋەنىندە، جۇڭگو حالقى قاشاندا كوكەيىنە ارمان بۇگىپ، تالىقپاي تالپىندى، ءبىز دوڭگەلەك داۋلەتتى تۇرمىس ۇستانىمىن قالىپتاستىرىپ قانا قالماستان، دۇنيە كوپكە ورتاق دەيتىن كەڭ پەيىلدە بولدىق، پانگۋدىڭ اسپان مەن جەردىڭ اراسىن ءبولۋى، نۇي - ۋانىڭ اسپان تەسىگىن جاماۋى، فۋ شيدىڭ تيگرامدى جاساۋى، شىننۇڭنىڭ دارىلىك شوپتەردى اجىراتۋى، كۋا فۋدىڭ كۇندى قۋالاۋى، جيڭ ۋيدىڭ تەڭىزدى تىندىرۋى، يۇي گۇڭنىڭ تاۋدى كوشىرۋى سياقتى ەلىمىزدىڭ ەرتەدەگى اڭىزدارى جۇڭگو حالقىنىڭ باتىلدىقپەن تالپىنۋداعى جانە ارمانىن جۇزەگە اسىرۋداعى قايتپاس رۋحىن تەرەڭ بەينەلەگەن. جۇڭگو حالقى تاۋ قانشا بيىك بولعانىمەن، تىنباي ورمەلەي بەرسەڭ، اقىرى باسىنا شىعۋعا بولاتىنىنا، جول قانشا ۇزاق بولعانىمەن، تىنباي جۇرە بەرسەڭ، اقىرى جەتۋگە بولاتىنىنا سەنگەن. تاياۋ زاماننان بەرى، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ − جۇڭحۋا ۇلتىنىڭ ەڭ ۇلى ارمانىنا اينالدى، جۇڭگو حالقى قاجىماي - تالماي قۇلشىنىپ، اسقان تاباندىلىق كورسەتىپ، جاۋعا قارسى ەڭ سوڭىنا دەيىن قاندى شايقاس جۇرگىزەتىن قايتپاس جىگەرمەن، جاۋ قولىندا كەتكەن جەر - سۋدى ءوز كۇشىنە سۇيەنىپ ءومىر ءسۇرۋ نەگىزىندە قايتارىپ الاتىن بەرىك سەنىممەن، دۇنيەدەگى ۇلتتار قاتارىندا قاسقايىپ تۇراتىن قابىلەتپەن وسى ۇلى ارماندى جۇزەگە اسىرۋ ءۇشىن 170 نەشە جىل تىنباي كۇرەس جاسادى. بۇگىنگى تاڭدا، جۇڭگو حالقى جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا تاريحتاعى ءارقانداي كەزدەگىدەن دە جاقىندادى، ونى جۇزەگە اسىرۋعا سەنىمى كامىل جانە قۋاتى دا قاپتال جەتەدى. مەن ءبىر ميلليارد 300 ميلليوننان استام جۇڭگو حالقى وسىنداي ۇلى ارمان رۋحىن باستان - اياق ساۋلەلەندىرسە بولعانى، ءبىزدىڭ جۇڭحۋا ۇلتىنىڭ ۇلى گۇلدەنۋىن، ءسوز جوق، جۇزەگە اسىرا الاتىندىعىمىزعا كامىل سەنەمىن!

  جولداستار! وسىنداي ۇلى حالىقتىڭ، وسىنداي ۇلى ۇلتتىڭ، وسىنداي ۇلى ۇلتتىق رۋحتىڭ بولۋى − ءبىزدىڭ ماقتانىشىمىز، ءبىزدىڭ جۇڭگوشا سوتسياليزم جولىنا سەنىمدى، نازارياسىنا سەنىمدى، تۇزىمىنە سەنىمدى، مادەنيەتىنە سەنىمدى بەكەمدەۋىمىزدىڭ ءتۇپ نەگىزى، سونداي - اق ءارقانداي كەدەرگىنى بۇزىپ ءوتىپ، اسقان اۋەنمەن العا باسۋىمىزدىڭ ءتۇبىرلى كۇشى!

  ەلىمىز − جۇمىسشى تابى باسشىلىعىنداعى، جۇمسشى - شارۋا وداعىن نەگىز ەتكەن حالىق دەموكراتياسى ديكتاتۋراسىندىق سوتسياليستىك مەملەكەت، مەملەكەتتىڭ بارلىق بيلىگى حالىققا ءتان. ءبىز حالىقتىق تۇرعىدا، حالىقتىڭ نەگىزگى تۇلعالىق ورنىنا، ءسوزسىز، باستان - اياق تاباندى بولىپ، حالىقتان كىشى پەيىلدىكپەن ۇيرەنىپ، حالىقتىڭ ۇنىنە قۇلاق اسىپ، حالىقتىڭ اقىل - پاراساتىن قابىلداپ، حالىقتىڭ قولداۋ - قولداماۋىن، جاقتاۋ - جاقتاماۋىن، قۋانۋ - قۋانباۋىن، قوسىلۋ - قوسىلماۋىن بارلىق قىزمەتتەردىڭ تابىستارى مەن ساتسىزدىكتەرىن ولشەۋدىڭ ءتۇبىرلى ولشەمى ەتىپ، حالىقتىڭ ەڭ كوكەي تەستى، ەڭ تىكە، ەڭ رەال مۇددە ماسەلەلەرىن كۇش سالا شەشىپ، جالپى جۇڭگو حالقى مەن جۇڭحۋا پەرزەنتتەرىن جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ تاريحي ءۇردىسى بارىسىندا باقىت پەن داڭقتان تەڭ يگىلىكتەندىرۋىمىز كەرەك!

  ۋاكىلدەر!

  حالىقتا سەنىم بولعاندا عانا، مەملەكەتتە بولاشاق بولادى، مەملەكەتتە كۇش - قۋات بولادى. جۇڭگوشا سوتسياليزم جاڭا داۋىرگە قادام تاستادى، ەڭبەكشىل، ەرجۇرەك جۇڭگو حالقىنىڭ وزىندىك سەنىمى، وزىندىك ار - نامىسى، وزىندىك قۇدىرەتى ءتىپتى دە ارتا ءتۇستى. شىعىستاعى بايىرعى دا وسى زامانعى ءىرى ەل بولعان جۇڭگو جالىندى جىگەرىن، جالىن اتقان تىنىسىن ايگىلەۋدە، جۇڭگوشا سوتسياليزم جولى، نازارياسى، ءتۇزىمى، مادەنيەتى قۇدىرەتتى دە ومىرشەڭدىك قۋاتقا يە جالىندى كۇشىن كورسەتىپ، جۇڭحۋانىڭ ۇلان - بايتاق جەرىندە سانسىزداعان حيكىمەتتەر جارىققا شىعۋدا. ءبىز بولاشاققا تولىق سەنىمدەمىز.

  تاريح، جۇڭگونى تەك سوتسياليزم عانا قۇتقارا الاتىندىعىن، جۇڭگوشا سوتسياليزمگە تاباندى بولعاندا جانە ونى دامىتقاندا عانا، جۇڭحۋا ۇلتىنىڭ ۇلى گۇلدەنۋىن جۇزەگە اسىرا الاتىندىعىمىزدى دالەلدەدى ءارى ۇزدىكسىز دالەلدەۋدە. ەل ءىشى - سىرتى جاعدايىندا تەرەڭ دە كۇردەلى وزگەرىستەر تۋىلۋدا، ەلىمىزدىڭ دامۋى ءالى دە ماڭىزدى ستراتەگيالىق وراي مەزگىلىندە تۇر. ءبىز بۇرىن ويلاپ جەتە الماعان تاماشا دامۋ شارت - جاعدايلارىنا يە بولدىق، ءبىراق بۇرىن - سوڭدى بولىپ كورىلمەگەن كوپتەگەن قيىنشىلىقتار مەن سىن - سايىستارعا دا كەزدەسىپ وتىرمىز. جۇڭگو كوممۋنيستىك پارتياسىنىڭ مەملەكەتتىك 19 - قۇرىلتايىندا جاپپاي دوڭگەلەك داۋلەتتى قوعام ورناتۋدىڭ شەشۋشى جەڭىسىنە جەتىپ، جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىن باستاپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ ۇلى جوباسى جاسالدى. بۇل جوبانى رەالدىققا اينالدىرۋدىڭ ءوزى جاڭا ۇزاق جورىق بولىپ تابىلادى. باساتىن جول ءالى دە وتە ۇزاق بولعانىمەن، ءبىراق ۋاقىت كۇتىپ تۇرمايدى، تيتتەي دە سالعىرتتىق ىستەۋگە كەلمەيدى. قازىرگى كۇيگە عانا قاناعاتتانۋعا، جان تىنىشتىعىن كۇيىتتەۋگە، راقاتقا كەنەلگەندە تاقسىرەت - قيىنشىلىقتاردى ەستەن شىعارۋعا استە جول بەرمەي، ءسوز جوق، اۋەلگى ماقساتتى ۇمىتپاي، بورىشتى ەستە بەرىك ساقتاپ، قايراتتانا العا ۇمتىلىپ، جاڭا داۋىرگە ءتان شۇعىلالى تابىستار جاراتۋ جولىندا قۇلشىنايىق!

  ءبىز ەلىمىز دامۋىنىڭ جاڭا تاريحي ورنىنا ۇيلەسىپ، ەلىمىز قوعامىنداعى باستى قايشىلىقتىڭ وزگەرىسىن مىقتى مەڭگەرىپ، جۇڭگوشا سوتسياليزم ۇلى تۋىن بيىك ۇستاپ، پارتيا 19 - قۇرىلتايىنىڭ جانە پارتيا 19 - كەزەكتى ورتالىق كوميتەتى ەكىنشى، ءۇشىنشى جالپى ماجىلىستەرىنىڭ رۋحىن جان - جاقتى دايەكتىلەندىرىپ، ماركسيزم - لەنينيزمدى، ماۋ زىدۇڭ يدەياسىن، دىڭ شياۋپيڭ نازارياسىن، «ۇشكە ۋاكىلدىك ەتۋ» ماڭىزدى يدەياسىن، عىلمي دامۋ كوزقاراسىن، جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، قىزمەتتى ورنىقتىلىق بارىسىندا ىلگەرىلەتۋ سىندى نەگىزگى اۋەننەن، حالىقتى وزەك ەتۋ سىندى دامۋ يدەياسىنان جازباي، ۇلى كۇرەستى، ۇلى ينجەنەريانى، ۇلى ءىستى، ۇلى ارماندى ءبىر تۇتاس مەڭگەرىپ، «بەستى ءبىر تۇلعالاندىرۋ» جالپى تۇلعالىق ورنالاستىرۋىن ءبىر تۇتاس ىلگەرىلەتىپ، «ءتورتتى جاپپاي ورىنداۋ» ستراتەگيالىق ورنالاستىرۋىن سايكەستى ىلگەرىلەتىپ، جاڭا ءداۋىر جۇڭگوشا سوتسياليزم ىستەرىنىڭ جاڭا جاعدايىن جاراتۋ جولىندا كۇش سالا قۇلشىنايىق!

  ءبىزدىڭ نىسانامىز وسى عاسىردىڭ ورتاسىنا بارعاندا ەلىمىزدى باي، قۇدىرەتتى، دەموكراتيالى، وركەنيەتتى، جاراسىمدى، كوركەم سوتسياليستىك وسىزاماندانعان قۇدىرەتتى ەل ەتىپ قۇرىپ شىعۋ.

  ءبىز اناعۇرلىم كۇشتى تەبىنمەن، اناعۇرلىم تياناقتى شارالارمەن رەفورمانى جاپپاي تەرەڭدەتىپ، سىرتقا ەسىك اشۋ كولەمىن كەڭەيتىپ، جاڭا دامۋ ۇستانىمىن دايەكتىلەندىرىپ، ەكونوميكانىڭ جوعارى ساپامەن دامۋىن ىلگەرىلەتىپ، وسىزاماندانعان ەكونوميكا جۇيەسىن ورناتىپ، ەلىمىزدىڭ ەكونوميكالىق قۋاتىن، عىلىم - تەحنيكالىق قۋاتىن، جالپىلىق مەملەكەت قۋاتىن ۇزدىكسىز ارتتىرىپ، سوتسياليستىك بازار ەكونوميكاسىنىڭ ومىرشەڭدىك كۇشىن اناعۇرلىم تولىق ايگىلەۋىمىز كەرەك.

  ءبىز اناعۇرلىم كۇشتى تەبىنمەن، اناعۇرلىم تياناقتى شارالارمەن سوتسياليستىك دەموكراتيانى دامىتىپ، پارتيا باسشىلىعىنىڭ، حالىقتىڭ وزىنە - ءوزى قوجا بولۋىنىڭ، ەلدى زاڭمەن جونگە سالۋدىڭ ورگانيكالىق بىرلىگىنە تاباندى بولىپ، زاڭمەن جونگە سالىناتىن سوتسياليستىك مەملەكەت قۇرىپ، مەملەكەتتى جونگە سالۋ جۇيەسى مەن جونگە سالۋ قابىلەتىنىڭ وسىزاماندانۋىن ىلگەرىلەتىپ، ەڭ كەڭ وتانشىلدىق بىرلىكساپتى نىعايتىپ جانە دامىتىپ، حالىقتىڭ اناعۇرلىم كەڭ، اناعۇرلىم تولىق، اناعۇرلىم شىنايى دەموكراتيالىق ۇقىقتان يگىلىكتەنۋىنە كەپىلدىك ەتىپ، سوتسياليستىك دەموكراتيانىڭ ارتىقشىلىعىن اناعۇرلىم تولىق ايگىلەۋىمىز كەرەك.

  ءبىز اناعۇرلىم كۇشتى تەبىنمەن، اناعۇرلىم تياناقتى شارالارمەن مادەنيەتتە قۇدىرەتتى سوتسياليستىك ەل قۇرۋدى جەدەلدەتىپ، سوتسياليستىك وزەكتى قۇن كوزقاراسىن جەتىلدىرىپ جانە امالياتتا ايگىلەپ، جۇڭحۋانىڭ تاڭداۋلى ءداستۇرلى مادەنيەتىن جاسامپازدىقپەن جاڭالاۋدى، جاسامپازدىقپەن دامىتۋدى ىلگەرىلەتىپ، جۇڭحۋا وركەنيەتىنىڭ ىقپالىن، ۇيىسقىشتىعىن، باۋراۋ قۋاتىن اناعۇرلىم تولىق ايگىلەۋىمىز كەرەك.

  ءبىز اناعۇرلىم كۇشتى تەبىنمەن، اناعۇرلىم تياناقتى شارالارمەن حالىق تۇرمىسىن قامتاماسىزداندىرىپ جانە جاقسارتىپ، قوعامدىق جونگە سالۋدى كۇشەيتىپ جانە وندا جاڭالىق اشىپ، كەدەيلىكتەن قۇتىلدىرۋدان قامال الۋ شايقاسىندا باتىل جەڭىسكە جەتىپ، قوعامدىق ادىلدىك پەن ادىلەتتىلىكتى جەبەپ، مەكتەپكە دەيىنگى تاربيەدەن، ءبىلىم الۋدان، ەڭبەكاقىدان، ەمدەلۋدەن، قارتتاردى كۇتىمدەۋدەن، تۇرعىن ۇيدەن، كومەككە ءزارۋ جانداردىڭ كومەكتەن يگىلىكتەنۋ جاقتارىندا ۇزدىكسىز تىڭ ىلگەرىلەۋشىلىكتەرگە قول جەتكىزىپ، جالپى حالىقتىڭ بىرگە بايۋىن جۇزەگە اسىرۋدى قالىڭ حالىقتىڭ رەال تۇرمىسىندا اناعۇرلىم تولىق ايگىلەۋىمىز كەرەك.

  ءبىز اناعۇرلىم كۇشتى تەبىنمەن، اناعۇرلىم تياناقتى شارالارمەن ەكولوگيالىق وركەنيەت قۇرىلىسىن ىلگەرىلەتىپ، جاسىل ءوندىرىس ءتاسىلى مەن تۇرمىس ءتاسىلىن قالىپتاستىرۋدى تەزدەتىپ، قورشاعان ورتاعا قاتىستى كورنەكتى ماسەلەلەردى كۇش سالا شەشىپ، ەلىمىزدىڭ اسپانىنىڭ اناعۇرلىم تازا، تاۋىنىڭ اناعۇرلىم جاسىل، سۋىنىڭ اناعۇرلىم تۇنىق، قورشاعان ورتاسىنىڭ اناعۇرلىم كوركەم بولۋىن جۇزەگە اسىرىپ، ءمولدىر وزەندەر مەن جاسىل تاۋلاردىڭ ءوزى قىمباتتى بايلىق دەيتىن ۇستانىمدى وتانىمىزدىڭ كەڭ - بايتاق جەرىندە اناعۇرلىم تولىق ايگىلەۋىمىز كەرەك.

  پارتيانىڭ حالىق ارمياسىنا بولعان ابسوليۋتتى باسشىلىعىنا تاباندى بولىپ، جاڭا داۋىردەگى پارتيانىڭ ارميانى قۇدىرەتتەندىرۋ يدەياسىن جاپپاي دايەكتىلەندىرىپ، ارميانى ساياسي جولمەن قۇرۋدى، ارميانى رەفورما ارقىلى قۇدىرەتتەندىرۋدى، ارميانى عىلىم - تەحنيكا ارقىلى گۇلدەندىرۋدى، ارميانى زاڭمەن جونگە سالۋدى تىنباي ىلگەرىلەتىپ، جۇڭگوشا ەرەكشەلىككە يە، الەمدەگى ماڭداي الدى قارۋلى كۇش جۇيەسىن قالىپتاستىرۋدى تەزدەتىپ، وسى زامانعى سوعىس جۇرگىزۋدىڭ جۇڭگوشا جۇيەسىن ورناتىپ، حالىق ارمياسىنىڭ پارتيا مەن حالىق جۇكتەگەن جاڭا داۋىردەگى بورىشى مەن مىندەتىن شىنايى ۇستىنە الۋىن جەبەۋىمىز كەرەك. ءبىز «ءبىر ەل، ەكى ءتۇزىم»، «شياڭگاڭدى شياڭگاڭدىقتار باسقارۋ»، «اۋمىندى اۋمىندىقتار باسقارۋ»، وسكەلەڭ اۆتونوميا بولۋ باعىتىن جاپپاي دۇرىس دايەكتىلەندىرىپ، جۇمىستى نەگىزگى زاڭ مەن ءتۇبىرلى زاڭعا ساي قاتاڭ جۇرگىزىپ، ەرەكشە اكىمشىلىك رايون ۇكىمەتتەرى مەن اكىمدەرىنىڭ بيلىكتى زاڭ بويىنشا جۇرگىزىپ، مىندەتتەرىن بەلسەنە وتەۋىن، شياڭگاڭنىڭ، اۋمىننىڭ مەملەكەتتىڭ دامۋ جالپى جاعدايىمەن توعىسۋىن قولداپ، شياڭگاڭدىق، اۋمىندىق باۋىرلاستاردىڭ مەملەكەت تانىمى مەن وتانشىلدىق رۋحىن نىعايتىپ، شياڭگاڭنىڭ، اۋمىننىڭ باياندى گۇلدەنىپ - كوركەيۋىن، ورنىقتىلىعىن قورعاۋىمىز كەرەك. ءبىر جۇڭگو پرينسيبىندە، «92 - جىلعى ورتاق تانىمدا» تاباندى بولىپ، ەكى جاعالاۋ قاتىناسىنىڭ بەيبىت دامۋىن ىلگەرىلەتىپ، ەكى جاعالاۋدىڭ ەكونوميكا، مادەنيەت اۋىس - كۇيىس، سەلبەستىك ءورىسىن كەڭەيتىپ، تايۋاندىق باۋىرلاستارمەن ۇلى قۇرلىقتىڭ دامۋ ورايىنان تەڭ يگىلىكتەنىپ، تايۋاندىق باۋىرلاستاردىڭ ىرىس - قۇتىن ارتتىرىپ، وتاندى بەيبىت جولمەن بىرلىككە كەلتىرۋ اياق الىسىن ىلگەرىلەتۋىمىز كەرەك.

  مەملەكەتتىڭ يەلىك ۇقىعى مەن تەرريتوريا تۇتاستىعىن قورعاپ، وتاننىڭ بۇكىلدەي بىرلىككە كەلۋىن جۇزەگە اسىرۋ − بارشا جۇڭحۋا ۇلاندارىنىڭ ورتاق ارمانى، جۇڭحۋا ۇلتىنىڭ ءتۇبىرلى مۇددەسىنىڭ تياناعى. ۇلتتىڭ وسى ادىلەتتى ءىسى مەن تاريحتىڭ ۇلى اۋقىمى الدىندا وتاندى بولشەكتەيتىن ارەكەت اتاۋلى مەن زىمياندىق، ءسوزسىز، جەڭىلىسپەن تىنادى ءارى تۇگەلدەي حالىقتىڭ جازعىرۋى مەن تاريحتىڭ جازاسىنا تارتىلادى! جۇڭگو حالقىندا وتاندى بولشەكتەيتىن ارەكەت اتاۋلىنى بىت - شىت ەتەتىن بەرىك جىگەر، كامىل سەنىم، جەتەرلىك كۇش - قۋات بار. جۇڭگو حالقى مەن جۇڭحۋا ۇلتىندا ءبىر ورتاق سەنىم بار، ول − ۇلى وتاننىڭ ءاربىر سۇيەم جەرىن جۇڭگو تەرريتورياسىنان استە ءبولىپ اكەتۋگە كەلمەيدى ءارى ءبولىپ اكەتۋ مۇلدە مۇمكىن ەمەس!

  ۋاكىلدەر!

  ءبىز ءومىر ءسۇرىپ وتىرعان دۇنيە ۇمىتكە تولى، سىن - سايىستارعا دا تولى. جۇڭگو حالقى ەجەلدەن ادىلەتتىلىك سەزىمگە جانە تىلەۋلەستىك كوڭىلگە باي، ەجەلدەن ءوزىنىڭ بولاشاعىن، تاعدىرىن ءار ەل حالقىنىڭ بولاشاعىمەن، تاعدىرىمەن تىعىز بايلانىستىرىپ، قاي - قاشان دا ءالى دە سوعىس ورتىندە، اۋمالى - توكپەلى جاعدايدا، اشارشىلىق ازابىندا، كەدەيلىك قىسپاعىندا جاتقان ەلدەردىڭ حالقىنا نازار اۋدارىپ جانە ولارعا قالتقىسىز كومەك بەرىپ، قاي - قاشان دا ەڭ زور قۇلشىنىس جاساپ، ادامزاتتىڭ بەيبىتشىلىگى مەن دامۋى جولىندا ۇلەس قوسۋعا پەيىل بولىپ كەلەدى. جۇڭگو حالقىنىڭ بۇل ارمانى ىزگى ارمان، جۇڭگو استە وزگە ەلدىڭ مۇددەسىن قۇربان ەتۋ بوداۋىمەن ءوزىن دامىتپايدى، جۇڭگونىڭ دامۋى ەشبىر ەلگە حاۋىپ توندىرمەيدى، جۇڭگو ماڭگى زورەكەر بولمايدى، ماڭگى ىرگە كەڭەيتپەيدى. وزگەلەرگە حاۋىپ توندىرۋگە ادەتتەنىپ قالعاندار عانا باسقالاردىڭ ءبارىن قاتەرلى دەپ قارايدى. جۇڭگو حالقىنىڭ ادامزاتتىڭ بەيبىتشىلىگى مەن دامۋىنا ۇلەس قوساتىن شىنايى ارمانى مەن ناقتى ارەكەتىن ەشقانداي ادام قاتە تۇسىنبەۋى، ونان دا ماڭىزدىسى، بۇرمالاماۋى كەرەك. بۇل دۇنيەدە ادىلدىكتىڭ بولاتىنى، داۋسىز!

  جۇڭگو بەيبىتشىلىك، دامۋ، ىنتىماقتاستىق، تەڭ يگىلىكتەنۋ تۋىن ۇزدىكسىز بيىك ۇستاپ، بەيبىت دامۋ جولىمەن جۇرۋگە، ءوزارا تيىمدىلىك جەتكىزىپ، تەڭ يگىلىككە كەنەلۋدەي اشىق ستراتەگيانى اتقارۋعا باستان - اياق تاباندى بولادى. جۇڭگو حالىقارالىق ادىلەتتىلىكتى ۇزدىكسىز بەلسەندى قورعاپ، دۇنيە جۇزىندەگى ىستەردى ءار ەل حالقى اقىلداسىپ ىستەۋدى دارىپتەيدى، ءوز ەركىن وزگەلەرگە زورلاپ تاڭبايدى. جۇڭگو «ءبىر بەلدەۋ، ءبىر جول» قۇرىلىسىن ۇزدىكسىز بەلسەندى ىلگەرىلەتىپ، دۇنيە جۇزىندەگى ءارقايسى ەلدەرمەن بولعان اۋىس - كۇيىس ىنتىماقتاستىعىن كۇشەيتىپ، جۇڭگونىڭ رەفورما جاساپ دامۋى ارقىلى ادامزاتقا باقىت جاراتادى. جۇڭگو الەمدىك جونگە سالۋ جۇيەسىندە بۇرىلىس جاساۋعا جانە ونىڭ قۇرىلىسىنا ۇزدىكسىز بەلسەندى ات سالىسىپ، دۇنيە جۇزىنە اناعۇرلىم مول جۇڭگو اقىل - پاراساتىن، جۇڭگو جوباسىن، جۇڭگو كۇش - قۋاتىن تارتۋ ەتىپ، باياندى بەيبىت، جاپپاي حاۋىپسىز، ورتاق گۇلدەنىپ - كوركەيگەن، اشىق تا قامتىمدى، تازا دا كورىكتى دۇنيە قۇرۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسى قۇرىلىسىنىڭ شۇعىلاسىمەن دۇنيە ءجۇزىن نۇرلاندىرادى!

  ۋاكىلدەر!

  جۇڭگو كوممۋنيستىك پارتياسىنىڭ باسشىلىعى − جۇڭگوشا سوتسياليزمنىڭ ەڭ ماندىك ەرەكشەلىگى، جۇڭگو كوممۋنيستىك پارتياسى − مەملەكەتتىڭ ەڭ جوعارى ساياسي باسشى كۇشى، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ ءتۇبىرلى كەپىلى. پارتيا، ۇكىمەت، ارميا، حالىقتىق قۇرىلىم، عىلىم - ءبىلىم سالاسى سياقتى بارلىق سالاعا جانە بارلىق جەرگە پارتيا باسشىلىق ەتەدى. ەلىمىزدەگى پارتيا - توپتار، ۇيىمدار، ۇلتتار، جىكتەر، ءار سالا قايراتكەرلەر پارتيا ورتالىق كوميتەتىنىڭ توڭىرەگىنە تىعىز توپتاسىپ، «4 تانىمدى» نىعايتىپ، «4 سەنىمدى» بەكەمدەپ، بارشا حالىق جۇدىرىقتاي جۇمىلىپ، العا ىلگەرىلەۋ كەرەك.

  جۇڭگو كوممۋنيستىك پارتياسى حالىققا باستاماشى بولىپ، ۇلى قوعامدىق توڭكەرىستەر جۇرگىزۋ سىندى تاريحي بورىشتى ارقالاپ، وزىنە توڭكەرىس جاساۋعا، ءسوزسىز، باتىل بولىپ، پارتيانى جالپى ءۇشىن قۇرۋعا، بيلىكتى حالىق ءۇشىن جۇرگىزۋگە تاباندى بولىپ، پارتيانى جاپپاي قاتاڭ جونگە سالۋدى ىشكەرىلەي ىلگەرىلەتىپ، بارلىق كەرەناۋ، ءىرىپ - ءشىرۋ قۇبىلىستارىن باتىل جويىپ، حالىقپەن تىلەكتەس بولىپ، حالىقپەن بەينەتتە دە، زەينەتتە دە بىرگە بولىپ، حالىقپەن ىنتىماقتاسا كۇرەس جاساپ، ماركسيزمدىك بيلىك پارتياسىنىڭ اسىل قاسيەتىن ماڭگى ساقتاپ، ماڭگى ءداۋىردىڭ الدىڭعى لەگىندە ءجۇرىپ، ماڭگى جۇڭگو حالقى مەن جۇڭحۋا ۇلتىنىڭ تىرەگى بولۋ كەرەك.

  ۋاكىلدەر!

  «شىعىس جەلىمەن جەلپىنگەندە بار الاپ، كوكتەم گۇلى شەشەك اتتى جامىراپ». جۇڭگو كوممۋنيستىك پارتياسىنىڭ باسشىلىعىندا، 70 جىلعا جۋىق كۇرەس جاساۋ ارقىلى، ءبىزدىڭ حالىق رەسپۋبليكامىز تولىسىپ - كۇشەيىپ، جاڭاشا بەت - بەينەمەن دۇنيەنىڭ شىعىسىندا قاسقايىپ تۇر.

  جاڭا ءداۋىر ءاربىر ادامعا ءتان، ءاربىر ادام جاڭا ءداۋىردىڭ كۋاشىسى، جاراتۋشىسى، قۇرىلىسشىسى. ءبىز شىنايى ىنتىماقتاسىپ، بىرگە كۇرەس جۇرگىزەتىن بولساق، جۇڭگو حالقىنىڭ ارماندى جۇزەگە اسىرۋ اياق الىسىنا بوگەت بولاتىن ەشقانداي كۇش جوق!

  ءبىز جاڭا ءداۋىردىڭ جۇيتكىگەن شىعىس جەلىنە ءمىنىپ، قۇلشىنا ءتۇسىپ، رولدى مىقتى يگەرىپ، كۇش - قايرات جيىپ، ءبىر ميلليارد 300 ميلليوننان استام جۇڭگو حالقىنىڭ ۇلى ارمانىن تيەگەن جۇڭحۋانىڭ الىپ كەمەسىن جەلكەنىن كەڭ جايىپ، تولقىن جارا ۇمىتكە تولى بولاشاققا جۇيتكىتەمىز!

  كوپشىلىككە راقىمەت.

  (شينحۋا اگەنتتىگىنىڭ 3 - ايدىڭ 20 - كۇنى بەيجيڭنەن بەرگەن حابارى)

جاۋاپتى رەداكتور : 阿肯

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورابى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

بىزبەن بايلانىس جارناما قىزمەتى لەبىز قالدىرۋ ءبىز تۋرالى