ەكى ەل باسشىلارى جۇڭگو - كامەرۋن قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋگە ءبىر اۋىزدان قوسىلدى
شينحۋا اگەنتتىگىنىڭ 3 - ايدىڭ 22 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 22 - كۇنى حالىق سارايىندا كامەرۋننىڭ زۇڭتۇڭى بييامەن كەڭەس وتكىزدى. ەكى ەل باسشىلارى ەكى ەلدىڭ دوستىق نەگىزىنىڭ تەرەڭدىگى، ىنتىماقتاستىعىنىڭ كومەسكى كۇشىنىڭ مولدىعى سياقتى ارتىقشىلىقتاردى تولىق ساۋلەلەندىرىپ، جۇڭگو - كامەرۋن قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋگە ءبىر اۋىزدان قوسىلدى.
شي جينپيڭ بىلاي دەپ اتاپ كورسەتتى: بييا زۇڭتۇڭ − افريكاداعى بىلىكتى باسشى ءارى جۇڭگو حالقىنىڭ بايىرعى دوسى. زۇڭتۇڭ مىرزا − بيىل جۇڭگوعا ءبىرىنشى بولىپ ساپارلاي كەلگەن افريكا ەلىنىڭ باسشىسى ءارى جۇڭگونىڭ بيىلعى مەملەكەتتىك ەكى ماجىلىسىنەن كەيىن ساپارلاي كەلگەن تۇڭعىش شەتەل باسشىسى. كامەرۋن − جۇڭگونىڭ افريكاداعى ءداستۇرلى دوسى جانە ماڭىزدى ىنتىماقتاستىق سەرىگى. ديپلوماتيالىق قاتىناس ورناتقان 47 جىلدان بەرى، ەكى ەل قاشاندا ءبىر - بىرىنە قۇرمەت ەتىپ، تەڭ مامىلە جاساپ، ءبىر - ءبىرىنىڭ وزەكتى مۇددەسىنە ساياتىن جانە نازار اۋدارىپ وتىرعان كەلەلى ماسەلەلەردە ءوزارا قۇرمەت ەتىپ، ءوزارا قولداپ كەلەدى، جۇڭگو - كامەرۋن دوستىعى جۇرت جۇرەگىنە تەرەڭ ۇيالادى. جۇڭگو كامەرۋنمەن بىرگە ەكى ەلدىڭ ىنتىماقتاستىعىن تەرەڭدەتىپ، جۇڭگو - كامەرۋن قاتىناسىنىڭ ستراتەگيالىق سيپاتىن كۇشەيتىپ، جۇڭگو - كامەرۋن قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتىپ، ەكى ەل حالىقتارىنا اناعۇرلىم كوپ ىرىس - قۇت اكەلۋدى قالايدى.
شي جينپيڭ مىنانى باسا دارىپتەدى: جۇڭگو مەن كامەرۋن جوعارى جىكتەگىلەر، سونداي - اق ءار جىكتەگىلەر اراسىنداعى قارىم - قاتىناستى ساقتاپ، ءبىر - ءبىرىنىڭ وزەكتى مۇددەسىنە ساياتىن جانە نازار اۋدارىپ وتىرعان كەلەلى ماسەلەلەردە ءبىرىن - ءبىرى ۇزدىكسىز تۇردە تاباندىلىقپەن قولداۋى كەرەك. جۇڭگو كامەرۋننىڭ دامۋ جولىن ءوز - وزىنە قوجا بولا وتىرىپ تاڭداۋىن قولدايدى. ەكى ەلدىڭ ساۋدا بارىس - كەلىسىن كەڭەيتىپ، ءتۇيىندى سالالارداعى ءوزارا ءتيىمدى ىنتىماقتاستىقتى كۇشەيتۋ كەرەك. جۇڭگو كامەرۋننىڭ ونەركاسىپتەنۋ ءۇردىسىن قولداپ، جۇڭگونىڭ قۋاتتى كاسىپورىندارىن كامەرۋندا قارجى قوسىپ، شارۋاشىلىق قۇرۋعا ىنتالاندىرادى. گۋمانيتارلىق قارىم - قاتىناستى ۇزدىكسىز نىعايتىپ، حالىق تىلەگىنىڭ توعىسۋىن جەبەۋ كەرەك. جۇڭگو كامەرۋنمەن بەيبىتشىلىك، حاۋىپسىزدىك سالاسىنداعى جانە حالىقارالىق ىستەردەگى ىنتىماقتاستىقتى كۇشەيتىپ، افريكا مەن دامۋ ۇستىندەگى ەلدەردىڭ ورتاق مۇددەسىن قورعاۋدى قالايدى. كامەرۋننىڭ «ءبىر بەلدەۋ، ءبىر جول» قۇرىلىسىنا بەلسەنە ارالاسىپ، جۇڭگومەن بىرگە ءوزارا قۇرمەت ەتەتىن، ءادىل، ادىلەتتى، ىنتىماقتاسىپ تەڭ ۇتاتىن جاڭاشا حالىقارالىق قاتىناستىڭ ورناۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋعا ات سالىسۋىن قارسى الادى.
شي جينپيڭ مىنالاردى اتاپ كورسەتتى: ونداعان جىلداردان بەرى، جۇڭگو مەن افريكا رياسىز دوستاسىپ، بەرەكە - بىرلىكتە ىنتىماقتاستىق جاساپ كەلەدى. بۇل − قۋانىش پەن جۇبانىشتا بىرگە بولاتىن تاعدىرلاس ورتاق تۇلعا جانە ىنتىماقتاسىپ تەڭ ۇتاتىن مۇددە ورتاق تۇلعاسى. جۇڭگو دۇرىس ۇقىق - مۇددە كوزقاراسىن باسشىلىققا الىپ، افريكاعا شىنايى تۋىسقاندىق ساياسات قولدانادى. جۇڭگو - افريكا ىنتىماقتاستىعىنىڭ باستى ماقساتى − جۇڭگونىڭ وزىندىك دامۋىن افريكانىڭ دامۋىنا دەم بەرۋمەن تىعىز ۇشتاستىرىپ، ىنتىماقتاسىپ تەڭ ۇتۋدى، بىرگە دامۋدى جۇزەگە اسىرۋ. حالىقارالىق اۋقىمدا قانداي وزگەرىستەر بولسا دا، جۇڭگو دامىپ قاي دەڭگەيگە بارسا دا، جۇڭگو قاشاندا افريكا ەلدەرى سياقتى دامۋ ۇستىندەگى ەلدەرمەن بىرگە بولىپ، ماڭگى افريكانىڭ شىنايى دوسى جانە سەنىمدى سەرىگى بولادى.
بييا كامەرۋن ۇكىمەتى مەن حالقى اتىنان، شي جينپيڭنىڭ جۇڭگونىڭ مەملەكەت ءتوراعاسى بولىپ قايتا سايلانعاندىعىن تاعى دا شىن نيەتپەن قۇتتىقتادى. بييا مىنالاردى ءبىلدىردى: ءوزارا قۇرمەت ەتۋ نەگىزىندە ورناعان كامەرۋن - جۇڭگو دوستىعىنىڭ تاريحى تەرەڭ، ۋاقىتتىڭ سنىنان وتكەن. جۇڭگونىڭ ۇزاق ۋاقىتتان بەرگى دوستىق كومەگى كامەرۋننىڭ ەكونوميكاسىنىڭ، قوعامىنىڭ دامۋىن جەبەپ، كامەرۋن حالقىنا تىكەلەي باقىت جەتكىزدى. كامەرۋن كامەرۋن مەن جۇڭگونىڭ ستراتەگيالىق ىنتىماقتاستىعىن كۇشەيتۋگە كۇش سالادى، جۇڭگو كاسىپورىندارىنىڭ كامەرۋنعا قارجى قوسىپ، كامەرۋننىڭ ونەركاسىپ، اۋىل شارۋاشىلىعى، ەنەرگيا، قاتىناس، الەۋمەتتىك تۇرعىن ءۇي، جاڭا تەحنيكا جاقتارىنداعى دامۋىن جەبەۋىن قارسى الادى. كامەرۋن «ءبىر بەلدەۋ، ءبىر جول» دارىپتەمەسىن بارىنشا القايدى، جۇڭگو - افريكا ىنتىماقتاستىعى تالقى مىنبەرى اياسىنداعى ىنتىماقتاستىقتى قولدايدى. جۇڭگونىڭ افريكا جونىندەگى ساياساتى افريكادا جاپپاي قارسى الىنادى. كامەرۋن ءبىر جۇڭگو ساياساتىن تاباندىلىقپەن قولدايدى. كامەرۋن دا، جۇڭگو دا ءار ەلدىڭ يەلىك ۇقىعىنا قۇرمەت ەتۋدى، ىشكى ىسىنە ارالاسپاۋدى قۋاتتايدى، دۇنيە ءجۇزىنىڭ ساۋدا ەرەجەسىن قورعايدى، حالىقارالىق ىستەردە كەڭ اۋقىمدى ورتاق مۇددەسى مەن تۇرعىسى بار. كامەرۋن جۇڭگومەن ب م ۇ سياقتى كوپ جاقتى جۇلگەدە بارىس - كەلىس پەن ىنتىماقتاستىقتى نىعايتۋدى قالايدى.
كەڭەستەن كەيىن ەكى ەل باسشىلارى ەكونوميكالىق، تەحنيكالىق ىنتىماقتاستىق، ادام كۇشى بايلىعىن اشۋ، نەگىزدىك قۇرىلعى قۇرىلىسى، ءوندىرىس قۋاتى ىنتىماقتاستىعى سياقتى سالالارداعى ەكى جاقتى ىنتىماقتاستىق حۇجاتتارىنىڭ قول قويىلۋ ءساتىنىڭ كۋاسى بولدى.
كەڭەستىڭ الدىندا، شي جينپيڭ حالىق سارايىنىڭ سولتۇستىك زالىندا بييانى قارسى الۋ ءراسىمىن وتكىزدى. ءتوراعا شي جينپيڭنىڭ حانىمى پىڭ لييۋان، ج ك پ ورتالىق كوميتەتى ساياسي بيۋروسىنىڭ مۇشەسى ياڭ جيەچى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى شىن يۋەيۋە، مەملەكەتتىك كەڭەستىڭ مۇشەسى، قوسىمشا سىرتقى ىستەر مينيسترى ۋاڭ ي، مەملەكەتتىك ساياسي كەڭەستىڭ ورىنباسار ءتوراعالارى جاڭ چيڭلي، حى ليفىڭ، ت. ب كەڭەسكە قاتىناستى.
