ءتاڭىرتاۋ تورابى   ›   جاڭالىقتار   ›   ۇلتتار ىنتىماعىنىڭ بەرەكەلى شاڭىراعى

جۇرەككە جىلى جول سالعان

قۋاندىق كوبەن ۇلى

  بالالىق شاقتا ەستە قالعان ءاربىر وقيعا كينو كارتيناسىنداي ماڭگىلىك ساناڭدا ساقتالادى ەكەن. 1985 - جىلدارى التاي قالاسى الاقاق اۋىلىندا بولاتىنبىز. اتام اسقار تاتاناي ۇلىنىڭ 80 جاسقا تاياعان شاعى بولاتىن. ۋاقىت دوڭعالاعىمەن تالاي اۋمالى - توكپەلى زاماندى باسىنان وتكىزىپ، بۇگىنگى باقىتتى شاعىنا قول جەتكىزگەن اتامىز ءوزىن ءارقاشان كوڭىلدى ساناۋشى ەدى. نەمەرەسى بولعان ءبىز اتامنىڭ الدىندا ەرتەك، اڭىز تىڭداپ ەرجەتتىك.

  ءبىر جولى اتامنىڭ ارقاسىنا شيقان شىعىپ نەداۋىر مازالادى. ءوزى جازىلىپ كەتەدى دەپ جۇرگەندە جارا اسقىنىپ، اتامىز كۇندىز كۇلكى، تۇندە ۇيقىدان قالدى. اتامىزدى اۋىل شيپاحاناسىنا اپارعان ەدىك، في دى دەگەن شيپاگەر مەن ءابۋتالىپ دەگەن شيپاگەر بار ەكەن. في دى (ونىڭ شىن اتىنىڭ فۋ ي - دى ەكەنىن كەيىن ءبىلدىم) شيپاگەر جارانى كورىپ: مىنا شيقان ىشتەن شىقسا اقساقالدىڭ ومىرىنە حاۋىپ تونەتىن ەدى. باعىنا جاراي دەنەنىڭ سىرتىنا شىعىپتى. ساۋىقتىرۋعا شامامىز قاپتال جەتەدى، - دەدى قازاق تىلىندە جاتىق سويلەپ. ونىڭ ءسوزىن ءابۋتالىپ شيپاگەر دە قوستاپ، ارتىق الاڭداماۋىمىزدى ايتتى. سونىمەن اتامىز اۋىل شيپاحاناسىندا ەمدەلدى. في دى شيپاگەر ءار كۇنى ءبىزدىڭ ۇيگە كەلىپ اتامىزدىڭ ءدارىسىن اۋىستىرىپ تۇردى. ول كىسى كەلەتىن ۋاقىت ءتۇس الەتى بولعاندىقتان، ءبىز 5 − 6 بالا ول كىسىلەردىڭ داستارقانىندا بىرگە بولۋشى ەدىك. في دى سول كەزدە قىرىقتى قىرقالاعان، ءوز كاسىبىنە شوگەل، الاقاق اۋىلىنداعى ساناۋلى حانزۋ تۋىسقانداردىڭ ءبىرى ەدى. شيپاگەرلىك جولىندا تالاي قازاقتىڭ جانىن الىپ قالعانىن بۇكىل اۋىل ايتىپ، العىسىن جاۋدىراتىن - دى. ونان ارى قاراي في دى ءار كۇنى كەلىپ ءدارىسىن الماستىرىپ، كەيدە ۋكولىن قويىپ كەتىپ تۇردى. ول قازاقشانى تولىق بىلەتىندىكتەن اڭگىمەنىڭ كورىگىن قىزدىرادى. جايى كەلسە سوعىمنىڭ داستارقانىنا قاتىناسىپ، الاقاقتىڭ ارعى - بەرگى حيكاياسىن شەرتەتىن.

  ءبىر كۇنى ءدارى الماستىرىپ بولعان سوڭ، اتامىز في دىنى تاماق ءىشىپ، ونان سوڭ قىزمەتكە شىعۋىن ءوتىندى. داستارقان باسىنا جايعاسقاننان كەيىن، اتامىز ءوزى 1935 - جىلدارى ەڭ العاش «التاي گازەتىن» قۇرعان كەزىندە ءبىرقانشا حانزۋ جولداستارمەن بىرگە قىزمەتتەس بولعانىن، ءوزارا كومەكتەسىپ دوستاسقانىن، ءدام - تۇزى ارالاسقانىن ايتىپ ۇزىن اڭگىمەگە ءتۇسىپ كەتتى. ءبىز دە تىڭداۋدان جالىقپادىق. سونىمەن 1956 - جىلى التاي اۋدانى مادەنيەت مەكەمەسىنىڭ باستىعىندىق مىندەت وتەپ جۇرگەن كەزىندە، شينجياڭ مادەنيەت ۇيىرمەسىمەن بىرگە استانامىز بەيجيڭگە بارىپ، ءتوراعا ماۋ زىدۇڭمەن قول الىسقانىن جانە جۋ دى، ليۋ شياۋچي، حى لۇڭ قاتارلى مەملەكەت باسشىلارىمەن بىرگە بولعانىن اڭگىمەلەپ ءبىراق توقتادى. سونداعى توپتىق تۇسكەن سۋرەت تورىمىزدە ءىلۋلى تۇراتىن، ماعان قولىنا الدىرىپ، بارىمىزگە بىردەن تانىستىردى. قوناق كەتكەننەن كەيىن، اتامىز 7 نەمەرەسىن جيىپ الىپ، ۇلى جۇڭحۋا مادەنيەتى، حانزۋ حالقىنىڭ قاراپايىم دا ەڭبەكشىلدىگى جونىندە ۇزاق تاربيەلىك كەڭەس بەردى. مەن سول كەزدەردە جۇڭگونىڭ ءتورت تاپقىرلىعىن، ۇلى قورعاننىڭ دۇنيەدەگى تەڭدەسسىز قۇرىلىس ەكەنىن، ءتورتتى وسىزامانداندىرۋدىڭ ءداۋىر بولگىش جوبا ەكەنىن تولىق تۇسىنگەندەي بولدىم. بەرەكە - بىرلىك بولماي، ىنتىماق بولماي ءبار نارسەنىڭ ءساتتى بولمايتىندىعىن ءسابي ساناما ۇيالاتتىم.

  اكەمنىڭ قىزمەتى التاي ايماقتىق مادەنيەت باسقارماسى «التاي اياسى» جۋرنالىنا اۋىسۋىمەن، 1987 - جىلى 12 - ايدىڭ 4 - كۇنى الاقاق اۋىلىنان التاي قالاسىنداعى ايماقتىق اكىمشىلىك مەكەمەسىنىڭ اۋلاسىنا قونىس اۋداردىق. مۇندا 3 جىل تۇرعان سوڭ، ايماقتىڭ مەكەمەلەرىنە ءبىر تۇتاس سالىنعان «تۇڭجيانلۋ» اتتى اۋلاداعى 14 - عيماراتقا كوشىپ كىردىك. 3 قاتارى بار 4 قاباتتا جالپى 20 وتباسى وتىردىق. بىزدەن باسقاسىنىڭ ءبارى حانزۋ كورشىلەر ەدى. ال ءبىزدىڭ قابىرعا كورشىمىز گاۋ فاميليالى حانزۋ اقساقال بولدى. ولار «قورجا» بولعاندىقتان قازاقشا تىلگە جەتىك بولىپ قانا قالماستان، تۇرمىس تاسىلدەرى دە قازاقتارعا بەيىمدەلىپ كەتكەن - دى. ونىڭ ەكى بەلگىسىن ايتايىن: ءبىرى، سوعىم سويادى، ەكىنشىسى، ءبىزدىڭ ۇيدەن كەلى - كەلساپ الىپ ءبيداي ءتۇيىپ كوجە جاساپ ىشەدى. ال ۇستىدەگى كورشىمىز جاڭ شۋحاي قاريا، ءبىزدىڭ ۇيدە نە ناۋقان بولسا قاۋىن - قاربىزىن كوتەرىپ كەلەتىن دە، ءار جىلى كوكتەم مەرەكەسىندە شەكىلدەۋىك پەن قانتقا قارىق بولۋشى ەدىك. مىنە وسىنداي ءدام - تۇز الماسقان كورشىلەر 1994 - جىلى 4 - ايدىڭ 19 - كۇنى اتامىز قايتىس بولعاندا دا بىزبەن بىرگە قايعىردى ءارى اكەمە جۇباتۋ سوزدەرىن ايتىپ، كوڭىلىن اۋلادى. ءيا، مۇنىڭ ءبارى سيلاستىق، ادامگەرشىلىك ەدى.

  جاڭ شۋحاي قاريا 2015 - جىلى ءوز تۋعان جەرى شاندۇڭعا بارعاندا قايتىس بولدى، ايەلى مەن بالا - شاعالارى قايتىپ كەلگەن سوڭ، شەشەم ەكەۋىمىز كوڭىل ايتىپ كىرىپ شىققانبىز. 2016 - جىلى ءبىزدىڭ ۇلكەن ءۇي التاي قالاسىنىڭ باتىس رايونىنا كوشىپ كەتكەندىكتەن، كۇنىنە كەزدەسەتىن وراي ازايدى. بيىل 2 - ايدىڭ 18 - كۇنى ادەتىم بويىنشا كوكتەم مەرەكەسىنىڭ 3 - كۇنى ارنايى التايعا تۋىسشىلاپ بارىپ، جاڭ شۋحاي قاريانىڭ جۇبايى جاڭ جيلان اپايعا مەرەكە قۇتتى بولسىن ايتىپ امانداسا باردىم. ول كىسى ىستىق ىقىلاسپەن قارسى الىپ، ۇلكەندەردى سۇرادى. مەنىڭ بالا - شاعامنىڭ جاعدايىن ۇعىسىپ، ولارعا سالەم ايتتى.

  1995 - جىلى مەن ورتا مەكتەپتى تاۋىسىپ، جوعارى مەكتەپكە ەمتيحان تاپسىردىم. ايتەۋ باعىم جانىپ ىلە پەداگوگيكا ينستيتۋتىنا قابىلدانىپ، سول جىلى 9 - ايدىڭ 12 - كۇنى ىلە پەداگوگيكا ينستيتۋتىنا بارىپ وقۋعا ءتۇستىم. ءبىر كۇنى ساياسات فاكۋلتەتىنەن ۋاڭ حاۋ اتتى ستۋدەنت كەلىپ: سەن ينستيتۋتتىڭ تۋ قورعاۋ اترەتىنە قابىلداندىڭ، ەرتەڭ تاڭەرتەڭ وقىتۋ عيماراتىنىڭ الدىنا كەل! - دەدى دە كەتىپ قالدى. سونىمەن ەرتەسى ۋادەلى ۋاقىتتا وقىتۋ عيماراتىنىڭ الدىنا بارسام، 30عا تارتا ستۋدەنت جينالىپتى. ءبىزدى بويىمىزعا قاراپ قاتارعا تۇرعىزدى دا، الگى كەشەگى ۋاڭ حاۋ ءسوز ارەدىگىندە: ينستيتۋت ۇگىت ءبولىمىنىڭ كادرى ءارى ينستيتۋت تۋ قورعاۋ اترەتىنىڭ جەتەكشىسى فىڭ چيڭسۇڭ مۇعالىمدى سوزگە ۇسىنىس ەتەمىز، - دەدى. ءبارىمىز قول سوقتىق. ول ينستيتۋت تۋ قورعاۋ اترەتىنىڭ تۇڭعىش قۇرىلعاندىعىن، ءبىزدىڭ سول تۋ قورعاۋ اترەتىنىڭ تۇڭعىش مۇشەسى ەكەندىگىمىزدى ايتا كەلىپ: مۇنان كەيىن ءار كۇنى تاڭەرتەڭ بەيجيڭ ۋاقىتى ساعات 8 جارىمدا كەلىپ بولاسىڭدار، جاتتىعۋدان كەيىن تۋ شىعارامىز. ءار اپتادا ءبىر رەت ماشىق بار، ول كەزدە دە ءتارتىپ - تۇزىمگە تولىق بويسۇنۋلارىڭ كەرەك، - دەدى.

  55 جىلدىق ستۋدەنت كەزىمدە مەيلى شىلىڭگىر جازدا دا، قاقاعان قىستا دا ءبىر كۇن قالماي تاڭ بوزىندا مەملەكەت تۋىن، بەس جۇلدىزدى قىزىل تۋدى مەكتەپ اسپانىندا جەلبىرەتىپ تۇردىق. سونداي - اق ينستيتۋتتىڭ دەنە تاربيە جينالىستارىندا، كولەمدى قيمىلداردا، 1 - قازان مەملەكەت مەرەكەسى سىندى دابىرالى كەزدەردە دە ايبىندى تۇردە بەس جۇلدىزدى تۋدى شىعارۋ مىندەتىن اتقاردىق. كامانداداعى ۇيعۇر، حانزۋ، قازاق، حۇيزۋ ستۋدەنتتەر وتە ىنتىماقتى وتتىك.

  مەن دايىندىق ءبولىمدى تاۋىسقان سوڭ ادەبيەت فاكۋلتەتىنە الماستىم. سونىمەن ەكىنشى جىلدان باستاپ سول تۋ قورعاۋ اترەتىندەگى حانزۋ، حۇيزۋ ستۋدەنتتەردىڭ اراسىنا كوشىپ كەلدىم. ولار دا قۋانا قارسى الدى. ءبىر جاتاقتا ۋاڭ حاۋ، چى شينجيان، ما ۋيلۇڭ، شۇي حۇڭۋي، ا - يۋان قاتارلى 5 حانزۋ ساباقتاس، مەي گوجۇن اتتى حۇيزۋ ساباقتاسپەن بىرگە 3 جىل جاتاقتاس بولىپ، بىرگە تۇرمىس كەشىردىك، بىرگە ۇيرەندىك. مەن ولاردىڭ تۇرمىسىنا كومەكتەسەم، ولار مەنىڭ حانزۋشا ۇيرەنۋىمە جاردەمدەستى. سول كەزدە مەن اۋدارماعا قىزىعىپ، جاتاقتاستارىمنىڭ دەمەۋىمەن ءبىر قىدىرۋ ماقالا، اڭگىمە اۋدارىپ ينستيتۋتتىڭ گازەتىندە، ءتىپتى، ولكە كولەمىندەگى باسىلىمداردا جاريالادىم. ايتالىق، «نيۋتون ۋنيۆەرسيتەت تابالدىرىعىن اتتاعان كۇنى» اتتى اۋدارما ماقالا «عىلىم جانە ونەر» جۋرنالىندا، «حەمينگۋايدىڭ جاسامپازدىعى» اتتى اۋدارما ماقالا «التاي اياسى» جۋرنالىندا جاريالاندى. وسى حانزۋ تىلىنەن قازاقشاعا اۋدارعان تۋىندىلارىمنىڭ باسپادان شىعۋىنا سول حانزۋ جاتاقتاستارىمنىڭ زور كومەگى ءتيدى. كانيكولدان كەلگەندە، ولار مەنىڭ شەشەمنىڭ سالعان قۇرتىنان، جەنتىنەن جەپ جىرعاپ قالاتىن - دى. ال مەن ولاردىڭ كانيكولدا ۇناتقان ەڭ جاقسى ماقالالارىنىڭ ىشىنەن تارتىمدى 2 − 3 ماقالانى قازاقشالاپ اۋدارۋعا كىرىسۋشى ەدىم. كلاستا ساباقتاستارىممەن تىزە قوسا قۇلشىنساق، جاتاقتا تۋىسقان ۇلت ستۋدەنتتەرىمەن بىرگە تاماشا ۇيرەنۋ ورتاسىن جاراتتىق. سەنبى، جەكسەنبى كۇندەرى كۇندىز كىتاپحانادان ماتەريال كورسەك، كەشىندە بىرگە كينو كورىپ، ءار كۇنىمىز ءماندى دە ماعىنالى ءوتتى.

  2000 - جىلدارى ءبارىمىز ءار سالاعا قىزمەت ىستەپ، قوعام تابالدىرىعىن اتتادىق. سونان بەرى 18 جىل وتسە دە، دوستىعىمىزدى ۇمىتپاي، امان - سالەم جاساسىپ تۇرامىز.

  2016 - جىلى 12 - ايدان باستاپ، اۆتونوميالى رايون ۇلتتار ىنتىماعىنىڭ بەرەكەلى شاڭىراعى «تۋىستاسۋ اپتالىعى» قيمىلىن ورىستەتكەننەن بەرى، حوتانداعى تۋىسىما 8 رەت بارىپ - كەلدىم. 2016 - جىلى جىل سوڭىندا تۇڭعىش تۋىسشىلاپ بارعاندا، مەنىڭ تۋىسىم گۇما اۋدانى موجى قالاشىعى گازشاعا قىستاعىنىڭ تۇرعىنى ءبۇماريام اجە بولدى. ونىڭ 2 ۇلى، ءبىر قىزى بار ەكەن. ۇلىن ۇياعا، قىزىن قياعا قوندىرعان اجەنىڭ نەگىزگى شارۋاشىلىعى ديقانشىلىق. جەر ەمشەگىن ەمگەن قارت ديقاننىڭ 10 نەشە مۋ جەرى جانە اۋلاسىندا 15 ءتۇپ ورىك اعاشى بار ەكەن. جىلدىق كىرىسى 3000 يۋانعا جەتەر - جەتپەس بولعانىمەن، كۇنى كوڭىلدى ءوتىپ جاتقان سياقتى. تەك وڭ جاق كوزىنە شەل قاپتاعانىنا ءسال الاڭدايتىندىعىن ايتادى. جارتى جىلدىڭ الدىندا، حوتان ايماقتىق شيپاحاناعا بارىپ كورىنگەن ەكەن، «قولدان كەلمەيدى» دەپ دياگنوز قويىپتى. ءبىراق تۇرمىسقا ۇلكەن توسالعىسى بولماعان سوڭ ءبۇماريام اجە كوپ مۇڭايمايتىن كورىنەدى. مەن ول كىسىگە مىنا جاقتاعى ەمدەلۋ راسمياتىن تولىق ءبىتىرىپ، ۇرىمجىگە ۇلكەن شيپاحاناعا بارىپ كورىنۋىن ءارى ارناۋلى ۋاقىت شىعارىپ مىقتى شيپاگەرگە كورسەتەتىندىگىمدى ايتتىم. سوسىن ول كىسى جاعدايعا قاراپ جۇمىس جاسايتىندىعىن ايتتى. سول جولى ول كىسى نەمەرەسىن ەرتىپ كەلگەن ەكەن، مەن وعان الا كەلگەن سالەم - ساۋقىتىمدى بەردىم. قىسقا عانا 1 − 2 ساعاتتىق تانىسۋ ءبىزدى قيماس تۋىستارداي ەتىپ تاستادى. كەتەردە ءبۇماريام اجە ماعان ءبىر جاشىك ورىك بەردى. 2017 - جىلى 4 - ايدان 11 - ايعا دەيىن حوتانعا 6 رەت تۋىسشىلاپ باردىق. بىردە، تۋىستارىمىزبەن قىستاق كوميتەتىندە جولىقساق، ەندى بىردە، ۇيىنە بارىپ داستارقان باسىندا اڭگىمەلەستىك. كوپ كەزدەسۋ مەن ءجيى كەڭەسۋ ءبىزدى بارعان سايىن جاقىنداستىردى. مەن ولاردان ۇيعۇر حالقىنىڭ قاراپايىم، قاجىرلىلىعىن، مەيىرباندىعىن سەزىندىم. البەتتە، ولارعا قازىرگى قوعامنىڭ ابزالدىلىعىن، پارتيانىڭ مەيىر - شاپاعاتىن، ۇكىمەتتىڭ حالىققا جاساعان ءتيىمدى ساياساتىن ءار قىرىنان ءتۇسىندىردىم.

  2017 - جىلى 12 - ايدىڭ 23 - كۇنى ۇلتتار ىنتىماعىنىڭ بەرەكەلى شاڭىراعى «تۋىستاسۋ اپتالىعى» كەزىندە، قىزمەتتەستەرىممەن بىرگە تاڭەرتەڭ ەرتە پويەزبەن حوتاننىڭ گۇما اۋدانىنا اتتاندىق. بۇل جولى «تورتتە بىرگە بولۋ» جوباسىمەن بارعانبىز. 12 - ايدىڭ 24 - كۇنى تاڭەرتەڭ، موجى قالاشىعىنىڭ گازشاعا قىستاق كوميتەتىندەگى قىزمەت اترەتىنىڭ كادرى تولقىن سۇلتانشارىپ ۇلىنىڭ باستاۋىمەن، شينجياڭ تەلەۆيزياسىنىڭ 6 كادرى قىستاق تۇرعىنى مامەتجاننىڭ ۇيىنە تۇستىك. ءبىز جايعاسقان سوڭ ءۇي يەسى مامەتجاننىڭ وتباسىنداعىلارمەن تانىسىپ، بىرگە تاماقتاندىق. سول كۇنى تۇستەن كەيىن تۇرمىستىق بۇيىمدار مەن ىشپەك - جەمەك ساتىپ الىپ، ەرتەسى تاڭەرتەڭنەن باستاپ ءاربىر وتباسىنا كىرۋ جۇمىسىمىزدى باستادىق.

  12 - ايدا حوتان ايماعىنىڭ كۇندىزى جىلى بولعانىمەن، تۇندە اۋا رايى كۇرت سۋىتادى ەكەن. ءبىراق ءبىز جاتقان وتباسىنداعى تۋىستار كۇندىز - ءتۇنى وتتارىن جاعىپ، ءبىزدىڭ توڭىپ قالماۋىمىزعا كەپىلدىك ەتىپ تۇردى. قىستاقتاعى ءبىز كىرگەن وتباسىلار ىستىق ىقىلاسپەن قارسى الدى. ءتىپتى كەيدە سول ۇيدەن تاماقتانىپ، لايىقتى قاراجاتىن تولەيىك دەسەك، «ءبىز ءبىر ءۇيدىڭ بالاسىمىز عوي» دەپ، بەرگەن اقشامىزدى المادى. ءاربىر بارعان وتباسىلارعا «ءۇش ءتۇرلى كۇشپەن» باتىل كۇرەسىپ، «ەكىبەتكەيلەرگە» باتىل قارسى تۇرۋ جونىندە تاربيە جۇرگىزدىك ءارى پارتيا 19 - قۇرىلتايىنىڭ رۋحىن، پارتيانىڭ حالىققا ءتيىمدى ابزال ساياساتىن ۇگىتتەدىك.

  ءتورتىنشى كۇنى ءوزىمىز جاتقان وتباسىنىڭ مالىنا ءشوپ سالىپ، اۋلاسىن تازالاۋ، كومىر تاسۋ سياقتى جۇمىستارىنا كومەكتەستىك. سوڭعى كۇنى تۋىستارىمىزبەن بىرگە داستارقانداس بولدىق. حانزۋ، ۇيعۇر، قازاق 3 ۇلتتان قۇرالعان 10 نەشە ادام ءبىر ءۇيدىڭ بالاسىنداي شۇيىركەلەستىك. داستارقان ۇستىندە «مەنىڭ ۇلى وتانىم»ءانىن بىرگە شىرقادىق.

  ىنتىماقتىڭ العى شارتى ورتاق تانىم، ۇلى وتان، جۇڭحۋا ۇلتى، جۇڭحۋا مادەنيەتى، جۇڭگو كوممۋنيستىك پارتياسى، جۇڭگوشا سوتسياليزم سىندى 4 تانىم 56 ۇلتتىڭ ءتۇپ تانىمى ءارى رۋحاني جان دۇنيەسى. قىسقا عانا 6 كۇندىك بىرگە بولۋ ساپارىندا، ءبىز ءار ۇلت اراسىندا ەتەنە بايلانىس ورناتىپ، ءبىر - بىرىنە قارايلاساتىن، كۇيىنەتىن سۇيىسپەنشىلىكتى بايقادىق. تەك اۋىلداعى تۋىستارىمىزبەن تۋىستىعىمىز نىعايىپ قانا قالماستان، تەرەڭ سۇيىسپەنشىلىك تە ورناتتىق. ناقتى جاعدايدى تەكسەرىپ، ناقتى ءىس ىستەپ، ناقتى ونىمدىلىككە تالپىندىق.

    ىنتىماق − ءار ۇلتتى كوركەم بولاشاققا باستايتىن ءۇمىت قاينارى. وسى قاينار بۇلاقتىڭ كوزىن اشىپ، ۇلتتار ىنتىماعى، العاباسارلىعى تاربيەسىن تەرەڭدەتىپ، جۇڭحۋا ۇلتى ورتاق تۇلعا تانىمىن بەرىك ورناتىپ، ۇلتتاردىڭ ارالاسۋىن، ىشتەسۋىن، توعىسۋىن كۇشەيتىپ، ۇلتتاردىڭ اناردىڭ دانىندەي تىعىز ۇيىسىپ، ىنتىماقتاسا كۇرەس جۇرگىزىپ، بىرگە كوركەيىپ - گۇلدەنۋىن جەبەۋىمىز كەرەك. تەك ىنتىماق، بەرەكە بولعاندا عانا، ورنىقتىلىق بولادى، ورنىقتىلىق بولعاندا عانا، دامۋعا قول جەتكىزۋگە بولادى. وتانىمىز كۇن سايىن كوركەيە بەرسىن!

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «ءتاڭىرتاۋ تورابىنان» الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

  • سايرام كولىن اينالۋ ۆەلوسيپەد جارىسى شينجياڭ بۇراتالا موڭعۇل اۆتونوميالى وبلىسىنىڭ ساياحاتىنىڭ دامۋىنا قانات ءبىتىردى
  • 61 جاستاعى قارت توراپتا كەڭىنەن تارالعان ءبيدى ۇيرەندى
  • «ساياحات+دەنەتاربيە» ساياحات ساپاسىن جوعارىلاتتى
  • اۆتونوميالى رايون زەينەتكەرلەردىڭ نەگىزگى زەينەتاقىسىن رەتتەيدى
بىزبەن بايلانىس جارناما قىزمەتى لەبىز قالدىرۋ ءبىز تۋرالى