− «1 - مامىر» حالىقارالىق ەڭبەكشىلەر مەرەكەسى بايلانىسىمەن
«ەڭبەك ەڭ داڭقتى، ەڭبەك ەڭ ارداقتى، ەڭبەك ەڭ ۇلى، ەڭبەك ەڭ كوركەم». ەڭبەكتى قاستەرلەپ، ەڭبەكتى جىرلاپ وتىرعان كۇندەردە بۇكىل ەلدەگى جۇمىسشى تابى مەن قالىڭ ەڭبەكشى قاۋىمنىڭ مەرەكەسىنە شىن جۇرەكتەن قۇتتى بولسىن ايتامىز.
«تۇرمىس ەڭبەكپەن ءارلى، ەڭبەكشىل ادام ەشتەمەدەن تارىقپايدى». ۇلى كۇرەس رۋحىنا يە جۇڭگو حالقى قاشاندا ەسكىدەن ارىلىپ، جاڭالىققا كوشىپ، ءوزىن تالماي الۋەتتەندىرىپ كەلەدى. بيىل − رەفورما جاساپ، ەسىك اشقاندىعىمىزدىڭ 40 جىلدىعى، ۇلى وزگەرىستەرگە تولى وسى ۇلى ۇردىستە شياۋگاڭ قىستاعىنداعى تۇرعىنداردىڭ ونىمگە بىرلەستىرىپ، وتباسىلارىنا كوتەرمەگە بەرۋدىڭ بارماق تابى قالدى، «3 كۇندە ءبىر قابات ءۇي تۇرعىزۋداي» شىنجىن جىلدامدىعى ەستەلىككە الىندى، جۇمىس ىستەۋ ءۇشىن پويەزبەن قالالارعا بارعان شارۋا جۇمىسكەرلەردىڭ بەينەسى قالدى، عىلىم - تەحنيكا قىزمەتكەرلەرىنىڭ بەيتانىس سالالارعا توقتاۋسىز شەرۋ تارتقان ىزدەنىستەرى ورنەكتەلدى. بۇگىندە بىزدەگىنىڭ بارلىعىنا ەڭبەكشىلەردىڭ اقىل - پاراساتى شوعىرلانىپ، ەڭبەكشىلەردىڭ ماڭداي تەرى، ەڭبەكشىلەردىڭ بوداۋ بەرە وتىرىپ قوسقان ۇلەستەرى سىڭگەن. توقشىلىقتان دوڭگەلەك داۋلەتكە، توماعا - تۇيىقتىقتان ەسىك اشۋعا ءوتۋ بارىسىندا ەڭسە كوتەرۋدەن، اۋقاتتانۋدان قۇدىرەتتەنۋگە دەيىنگى ۇلى سەكىرۋدى قارسى الدى. ەڭ ۇلكەن وزگەرىس ەڭبەكشىلەردەن كەلدى، ەڭ جوعارى تابىس ەڭبەكشىلەرگە ءتان، ەڭ تاماشا ارمان ەڭبەكشىلەردىكى. ميلليونداعان ەڭبەكشى قاۋىم ۇلى ىستەردىڭ شىت جاڭا داستانىن بىرگە جازىپ، جۇڭحۋا ۇلتىنىڭ اسقاق داڭقىنا بىرگە قول جەتكىزدى.
سالتاناتپەن العا ىلگەرىلەپ، جەلكەن جايا ساپارعا اتتاندى. بۇگىنگى تاڭدا، جۇڭگوشا سوتسياليزم جاڭا داۋىرگە ءوتىپ، جاڭا جورىققا قادام قويعان ساتتە، ەڭبەكشىلەردىڭ رۋحاني قۇندىلىعىن ساۋلەلەندىرىپ، ەڭبەكتىڭ داۋىرلىك ماداق جىرىن اسقاقتاتىپ، قۇلشىنۋ ارقىلى ءداستۇردى جالعاستىرۋ، كۇرەس ارقىلى بولاشاق اشۋ ءتىپتى قاجەت.
جاڭا ءداۋىردى ەڭبەكپەن ورنەكتەپ، وزگەرىس بارىسىندا ۇلى ارماندى ىسكە اسىرايىق. پارتيانىڭ 19 - قۇرىلتايىندا بولاشاقتاعى جۇڭگونىڭ جاپپاي دوڭگەلەك داۋلەتتى قوعام قۇرۋدىڭ شەشۋشى جەڭىسىنە جەتۋ، جۇڭگوشا سوتسياليستىك وسىزاماندانعان قۇدىرەتتى مەملەكەت قۇرۋ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ سىندى ايبىندى جوباسى جاسالدى. وسى جوبانىڭ رەفورما جاساۋ، ەسىك اشۋ ۇردىسىندە رەالدىققا اينالاتىنىندا داۋ جوق. قالىڭ جۇمىسشى تابى مەن ەڭبەكشى بۇقارا − رەفورمانىڭ قولداۋشىسى، قاتىسۋشىسى، ىلگەرىلەتۋشىسى، يگىلىككە كەنەلۋشىسى. ايقىن تۋ ۇستاي وتىرىپ رەفورمانى قولداپ، رەفورماعا ات سالىسىپ، باتىلدىقپەن اتوي سالۋ، باتىلدىقپەن سىناپ كورۋ جىگەر - قايراتىن تاسقىنداتقاندا، ءوزىن جاڭالاۋ اقىل - پاراساتىن تاسقىنداتقاندا، مەنەن باسقا كىم بار دەگەن جاۋاپكەرلىكتى ارقالاعاندا عانا، ەڭبەك جاسامپازدىعىنىڭ ۇلى كۇشىن جالىنداتىپ، ارمان كەمەسىنىڭ جاڭا داۋىردە تولقىن جارا العا ءجۇزىپ، ارمانعا جەتۋگە دەم بەرۋگە بولادى.
ەڭبەكپەن جاڭا ءداۋىردى ورنەكتەپ، كۇرەس بارىسىندا تاماشا تۇرمىس جاراتايىق. دۇنيەدە ەڭبەكتەنبەي يگىلىكتەنەتىن جاقسىلىق تا، تەكتەن - تەككە كەلەتىن داۋلەت تە بولعان ەمەس، قۇلشىنا كۇرەسكەندە عانا ارماندى جۇزەگە اسىرۋعا بولادى. وتباسىلارى ءۇشىن ايتقاندا، ەڭبەك بولماسا زاتتىق بايلىق توپتالمايدى، تۇرمىستىق شارت - جاعداي جاقسارمايدى؛ جەكە ادام ءۇشىن ايتقاندا، ەڭبەك تابىستىڭ مىعىم نەگىزىن تۇرعىزىپ قانا قويماي، باعالى رۋحاني بايلىقتى دا قالىپتاستىرادى. جاڭا داۋىردەگى ەڭبەكشىلەر ۇيرەنىپ، ىستەپ، زەرتتەپ، شىنايى قابىلەتتى شىڭاپ، تاماشا تەحنيكانى يگەرگەندە، ءومىردىڭ ايشىقتى ساحناسىن تاۋىپ، ەڭبەك بارىسىندا كەڭ ورىسكە قۇلاش سەرمەپ، ەڭبەك بارىسىندا قۇنىن ايگىلەيدى، كەلبەتىن ايگىلەيدى، شاتتىقتى سەزىنەدى.
جاڭا ءداۋىردى ەڭبەكپەن ورنەكتەپ، جاڭالىق اشۋ بارىسىندا كوركەم بولاشاققا قول جەتكىزەيىك. جۇڭحۋا ۇلتىنىڭ ۇلى گۇلدەنۋى وپ - وڭاي ىسكە اسا سالمايدى. رەفورما تەرەڭ قويناۋعا قادام قويعاندا، قايتكەندە ايىقپاس دەرتتى الاستاپ، مۇددە قاساڭدىعىنىڭ قۇرساۋىن تالقانداپ، رەفورمانى سوڭىنا دەيىن جۇرگىزۋگە بولادى؟ «جاھاندانۋعا كەرى اعار» يدەيالىق اعىم كوتەرىلىپ، ساۋدا قورعانىمپازدىعى بەلەڭ بەرگەن تۇستا، قايتكەندە دەربەس زەرتتەۋ - اشۋ جانە جاڭالىق جاساۋ قابىلەتىن جوعارىلاتۋعا بولادى؟ ينفورماتسيالاندىرۋ توڭكەرىسىنىڭ ۇلى اعىسى كوتەرىلگەندە، قايتكەندە تاريحي ورايدى يگەرىپ، قارىشتاپ دامۋدى ىسكە اسىرۋعا بولادى؟ قازىرگى كەزدە جاڭاشىل ەڭبەكتى، جاسامپاز ەڭبەكتى دارىپتەپ، ەڭبەكشىلەردى وزىق تەحنيكالاردى ۇيرەنۋگە، ەرەك شەبەرلىكتەردى يگەرۋگە جىگەرلەندىرىپ، ءبىلىمدى، شەبەر، جاڭاشىل ەڭبەكشىلەر قوسىنىن قالىپتاستىرىپ، «جۇڭگو پاراساتىمەن جاساۋعا»، جۇڭگو جاسامپازدىعىنا سەنىم مەن ومىرشەڭدىك كۇش قوسۋ ءتىپتى قاجەت.
ەڭبەكشىلەردى ناقتى يگىلىككە كەنەلدىرىپ، داڭقتان يگىلىكتەندىرۋ − ەڭبەكتىڭ جاسامپازدىق كۇشىن جالىنداتۋدا باسىپ وتۋگە ءتيىستى جول. باس شۋجي شي جينپيڭ: ەڭبەكشىلەردىڭ ابىرويلى ەڭبەكتى، جاپپاي دامۋدى جۇزەگە اسىرۋىنا قۇلشىنا مۇمكىندىك جاساۋ كەرەك، - دەپ اتاپ كورسەتتى. وتكەن جىلى «جاڭا داۋىردەگى كاسىپ سالاسى جۇمىسشىلار قوسىنى قۇرىلىسىنىڭ رەفورما جوباسىنان» تارتىپ «تەحنيكالىق جۇمىسشىلاردىڭ يگىلىگىن جوعارىلاتۋ جونىندەگى پىكىرگە» دەيىن، ەڭبەكشىلەر ونان ارى قامتاماسىز ەتىلىپ، ونان ارى ابىرويعا يە بولدى. ەڭبەك رۋحى مەن ۇستا رۋحىن بارىنشا ساۋلەلەندىرىپ، ەڭبەك سۇيىسپەنشىلىگى مەن ەڭبەك قاسيەتىن جەتىلدىرىپ، بۇكىل قوعامدا ەڭبەك داڭقتى، ءبىلىم ارداقتى، دارىندىلار باعالى، جاسامپازدىق ۇلى دەيتىن اۋقىم قالىپتاستىرعاندا عانا، بارلىق ومىرشەڭدىك كۇشتىڭ جابال اتتانىسقا كەلۋىنە، بارلىق قاينار كوزدىڭ تولىق اشىلۋىنا مۇمكىندىك جاساپ، 100 ميلليونداعان حالىقتىڭ ەڭبەك جاسامپازدىعىنىڭ جويقىن كۇشىن توپتاۋعا بولادى.
جۇڭگو ارمانى ەڭ ايبىندى، ەڭبەكشىلەر ەڭ ارداقتى. رەفورمانىڭ جاڭا كەزەكتەگى ۇلى اعىسى تولقىن اتقان تۇستا ايبىندى ارمان نىساناسى مەجەلى مەرزىمدە ورىندالاتىن بولادى. ءبىز شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە تىعىز توپتاسىپ، قاجىرلى ەڭبەك جانە تالىقپاس قۇلشىنىس ارقىلى جاڭا ءداۋىردىڭ شۇعىلالى كارتيناسىن سالىپ، ۇلتتىڭ گۇلدەۋىنىڭ ايبىندى سيمفونياسىن اسقاقتاتايىق.
(شينحۋا اگەنتتىگىنىڭ 4 - ايدىڭ 30 - كۇنى بەيجيڭنەن بەرگەن حابارى)
