شينحۋا اگەنتتىگىنىڭ 5 - ايدىڭ 11 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ مەن ارگەنتينانىڭ زۇڭتۇڭى ماكري 5 - ايدىڭ 11 - كۇنى ءبىر - بىرىنە حات جولدادى. ەكى جاق جۇڭگو - ارگەنتينا قاتىناسى، 20 ەل توبى باسشىلارىنىڭ باس قوسۋى جانە ارگەنتينانىڭ كەزەكتەگى ەكونوميكا، فينانس جاعدايى سياقتىلار جونىندە پىكىر اۋىستىردى.
شي جينپيڭ حاتىندا بىلاي دەدى: بىلتىر ماكري زۇڭتۇڭ جۇڭگوعا كەلىپ، «ءبىر بەلدەۋ، ءبىر جول» حالىقارالىق ىنتىماقتاستىق باسشىلار تالقى مىنبەرىنە قاتىناستى ءارى مەملەكەت ىستەرى ساپارىندا بولدى، سول كەزدەگى ءبىز كەلىسكەن ءتۇرلى ورتاق تانىمدار بەلسەنە تياناقتاندىرىلدى، ەكى ەلدىڭ ءتۇرلى سالاداعى اۋىس - كۇيىسى، ىنتىماقتاستىعى ورنىقتى قاداممەن ىلگەرىلەدى. مەن جۇڭگو مەن ارگەنتينا قاتىناسىنىڭ دامۋىنا ايرىقشا ءمان بەرەمىن، سىزبەن بىرگە ەكى جاقتى قاتىناستىڭ دامۋىنا ۇزدىكسىز جەتەكشىلىك ەتىپ، كەلەلى نىسانداردى تىڭعىلىقتى ىلگەرىلەتۋدى، جۇڭگو مەن ارگەنتينانىڭ جالپى بەتتىك ستراتەگيالىق سەرىكتەستىك قاتىناسىنىڭ ءتىپتى بيىك ورەگە كوتەرىلۋىن ىلگەرىلەتۋدى قالايمىن.
شي جينپيڭ بىلاي دەدى: جۇڭگو ارگەنتينانىڭ بيىلعى 20 ەل توبى باسشىلار باس قوسۋىن وتكىزۋىن تاباندىلىقپەن قولدايدى، ارگەنتينامەن سايكەستىكتى، سەلبەستىكتى كۇشەيتىپ، باسشىلار باس قوسۋىنىڭ جالپى ارناسى مەن بەتالىسىن ويداعىداي يگەرىپ، كوپ جاقتىلىقتان جازباي، جەر شارىن جونگە سالۋدى كۇشەيتىپ، اشىق دۇنيە ەكونوميكاسىن قۇرىپ، باسشىلار باس قوسۋىن تابىسقا جەتكىزۋدى قالايدى.
ماكري حاتىندا بىلاي دەدى: ارگەنتينا مەن جۇڭگونىڭ جالپى بەتتىك ستراتەگيالىق سەرىكتەستىك قاتىناسى كۇننەن - كۇنگە نىعايدى ءارى مول تابىستارعا قول جەتكىزدى. ارگەنتينا «ءبىر بەلدەۋ، ءبىر جولدى» بىرگە قۇرۋ دارىپتەمەسىن بار كۇشپەن قولدايدى، جۇڭگومەن جان - جاقتى ىنتىماقتاستىقتى كۇشەيتۋدى قالايدى. ارگەنتينا 20 ەل توبىنىڭ ءتوراعا ەلى مىندەتىن وتەگەن كەزدە، حاڭجوۋ باسشىلار باس قوسۋىنداعى ورتاق تانىمعا جانە جەتىستىكتەرگە مۇراگەرلىك ەتەدى جانە ونى جالعاستىرادى.
ماكري شي جينپيڭگە ارگەنتينانىڭ كەزەكتەگى ىشكى ەكونوميكا، فينانس جاعدايىن، سونداي - اق توتەپ بەرۋ شارالارىن تانىستىردى.
شي جينپيڭ مىنانى اتاپ كورسەتتى: تاياۋدان بەرى سىرتقى فاكتورلاردىڭ اسەرىنەن ارگەنتينانى قامتىعان كەيبىر جاڭادان گۇلدەنگەن بازار ەلدەرىنىڭ ىشكى ەكونوميكالىق ورتاسى تىڭ سايىستارعا ءدوپ كەلدى. جۇڭگو ارگەنتينانىڭ مەملەكەتتىڭ ورنىقتىلىعى مەن دامۋى جولىندا جاساعان قۇلشىنىستارىن تاباندىلىقپەن قولدايدى ءارى قولىنان كەلگەن كومەگىن ايامايدى. ارگەنتينانىڭ ۋاقىتشا قيىنشىلىقتاردى جەڭىپ، ەكونوميكانىڭ ۇزاق ۋاقىت ورنىقتى جانە اقاۋسىز، باياندى ارتۋىن ىسكە اسىراتىندىعىنا سەنەدى. جۇڭگو ارگەنتينانىڭ داميتىندىعىنا تولىق سەنەدى، ەكى ەل قاتىناسىنىڭ بولاشاعىنا تولىق سەنەدى.
