ۋاڭ حۋنيڭ، حان جىڭ ماجىلىسكە قاتىناستى
شينحۋا اگەنتتىگىنىڭ 5 - ايدىڭ 11 - كۇنى بەيجيڭنەن بەرگەن حابارى. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى، ورتالىقتىڭ رەفورمانى جاپپاي تەرەڭدەتۋ كوميتەتىنىڭ مەڭگەرۋشىسى شي جينپيڭ 5 - ايدىڭ 11 - كۇنى تۇستەن كەيىن ورتالىقتىڭ رەفورمانى جاپپاي تەرەڭدەتۋ كوميتەتىنىڭ 2 - رەتكى ءماجىلىسىن باسقارىپ اشتى ءارى ماڭىزدى ءسوز سويلەدى. ول مىنالاردى باسا دارىپتەدى: پارتيا 19 - كەزەكتى ورتالىق كوميتەتىنىڭ ءۇشىنشى جالپى ماجىلىسىنەن بەرى، ورتالىق پەن مەملەكەت ورگاندارىنىڭ قۇرىلىم رەفورماسىندا كەلەلى ىلگەرىلەۋشىلىكتەرگە قول جەتتى، امالياتتان وتكىزە ءجۇرىپ قورىتىندىلاۋعا نازار اۋدارىپ، جاقسى تاجىريبەلەردى ويداعىداي كادەگە جاراتىپ، جەرگىلىكتى ورىنداردىڭ قۇرىلىم رەفورماسىن ۇقىپتىلىقپەن ۇيىمداستىرىپ، ورتالىق پەن جەرگىلىكتى ورىنداردىڭ قۇرىلىم رەفورماسىنىڭ قىزمەت ورنالاستىرۋى مەن ۇيىمداستىرىپ اتقارىلۋىن جاندى تۇردە ۇشتاستىرىپ جانە تارتىپپەن ىلگەرىلەتىپ، پارتيا مەن مەملەكەت ورگاندارىنىڭ قۇرىلىم رەفورماسىنىڭ جاپپاي جەڭىسكە جەتۋىنە كەپىلدىك ەتۋ كەرەك.
ورتالىقتىڭ رەفورمانى جاپپاي تەرەڭدەتۋ كوميتەتىنىڭ ورىنباسار مەڭگەرۋشىلەرى ۋاڭ حۋنيڭ مەن حان جىڭ ماجىلىسكە قاتىناستى.
ماجىلىستە «جەرگىلىكتى ورىنداردىڭ قۇرىلىم رەفورماسىنا قاتىستى ماسەلەلەر جونىندەگى جەتەكشى پىكىر»، «مەملەكەت مەنشىگىندەگى كاسىپورىنداردىڭ مۇلىكتىك قارىزدانۋىن شەكتەۋ جونىندەگى جەتەكشى پىكىر»، «ورتالىق پارتيا، ۇكىمەت ورگاندارى مەن ءىسورىندارىنىڭ ساۋدالىق ماقساتتاعى مەملەكەتتىك مۇلكىنە شوعىرلى، ءبىر تۇتاس باقىلاۋ - باسقارۋ جۇرگىزۋ سىناق تۇيىندەرىن ىلگەرىلەتۋ جونىندەگى اتقارۋ پىكىرى»، «جوعارى مەكتەپتەرگە تاۋەلدى كاسىپورىنداردىڭ ءتۇزىلىس رەفورماسى جونىندەگى جەتەكشى پىكىر»، «كاسىپورىن جۇمىسشى - قىزمەتكەرلەرىنىڭ نەگىزگى زەينەتكەرلىك قامسىزداندىرۋ قورىن ورتالىق رەتتەۋ ءتۇزىمى جوباسى»، «ورتالىق كاسىپورىنداردىڭ باسشى قىزمەتكەرلەرىن باسقارۋ بەلگىلەمەسى»، «تۇرمىستا سۇيەنىشى جوق قاڭعىباس جانە قايىرشى ادامدارعا جاردەمدەسۋ، ولاردى باسقارۋ قىزمەتىن كۇشەيتۋ جانە جاقسارتۋ جونىندەگى پىكىر»، «ەمدەۋ - دەنساۋلىق ساقتاۋ سالاسىنداعى كەشەندى باقىلاۋ - باسقارۋ ءتۇزىمىن رەفورمالاۋ، كەمەلدەندىرۋ جونىندەگى جەتەكشى پىكىر» جانە «پارتيانىڭ 18 - قۇرىلتايىنان بەرگى قاتىستى رەفورما مىندەتتەرى مەن جۇمىس ءبولىسىن رەتتەۋ جونىندەگى نۇسقاۋ سۇراۋ» مەن «پارتيا 19 - قۇرىلتايىنىڭ بايانداماسىنداعى ماڭىزدى رەفورما شارالارىن اتقارۋ جوباسى (2018 − 2022 - جىلدار)» ماقۇلداندى.
ماجىلىستە «پارتيا مەن مەملەكەت قۇرىلىمدارى رەفورماسىن تەرەڭدەتۋدىڭ ىلگەرىلەۋ جاعدايى جونىندەگى بايانداما» قارالدى. ماجىلىستە مىنالار اتاپ كورسەتىلدى: مەملەكەت مەنشىگىندەگى كاسىپورىنداردىڭ مۇلىكتىك قارىزدانۋىنا شەكتەۋ قويۋ − پارتيا 19 - قۇرىلتايىنىڭ رۋحىن تياناقتاندىرىپ، مەملەكەت مەنشىگىندەگى كاسىپورىنداردىڭ قارجىلىق سۇيمەنىن تومەندەتۋ مەن مەملەكەت مەنشىگىندەگى كاسىپورىنداردىڭ قارىز حاۋىپ - قاتەرىنەن ساقتانۋ، ونى باسەيتۋدەگى ماڭىزدى شارا. جاپپاي قامتۋ مەن تۇرلەرگە ايىرىپ باسقارۋدى ۇشتاستىرۋعا، ىشتەي باسقارۋدى كەمەلدەندىرۋ مەن سىرتتاي شەكتەۋدى كۇشەيتۋدى ۇشتاستىرۋعا تاباندى بولىپ، مەملەكەت مەنشىگىندەگى كاسىپورىنداردىڭ مۇلىكتىك قارىزدانۋىنا شەكتەۋ قويۋ مەحانيزمىن ورناتۋ جانە كەمەلدەندىرۋ ارقىلى باقىلاۋ - باسقارۋدى كۇشەيتىپ، ۇستىنەن وڭاۋ مەن تۇبىرىنەن وڭاۋدى ۇشتاستىرۋدى ىسكە اسىرىپ، قارىز دەڭگەيى جوعارى مەملەكەت مەنشىگىندەگى كاسىپورىنداردىڭ مۇلىكتىك قارىزدانۋ مولشەرلەمەسىنىڭ تەزدەن لايىقتى دەڭگەيگە تومەندەۋىنە جەبەۋشىلىك جاساۋ كەرەك.
ماجىلىستە مىنالار باسا دارىپتەلدى: ورتالىق پارتيا، ۇكىمەت ورگاندارى مەن ءىسورىندارىنىڭ ساۋدالىق ماقساتتاعى مەملەكەتتىك مۇلكىنە شوعىرلى، ءبىر تۇتاس باقىلاۋ - باسقارۋ جۇرگىزۋ سىناق تۇيىندەرىن ىلگەرىلەتۋدە ۇكىمەت پەن كاسىپورىندى، ۇكىمەت پەن مۇلىكتى بولۋگە، مەنشىك ۇقىعى مەن شارۋاشىلىق ۇقىعىن ايىرۋعا تاباندى بولىپ، ورتالىق پارتيا، ۇكىمەت ورگاندارى مەن ءىسورىندارىنىڭ قاراۋىنداعى كاسىپورىندارمەن قارىم - قاتىناسىن رەتكە كەلتىرىپ، مەملەكەتتىك كاپيتالدىڭ اينالىم تۇعىرىن ورناتىپ، مەملەكەتتىك كاپيتالدىڭ ورنالاسۋ قۇرىلىمىن ساپالىلاندىرىپ، مەملەكەتتىك كاپيتالدى ۇيلەستىرۋ مەن باقىلاۋ - باسقارۋدىڭ تيىمدىلىگىن جوعارىلاتىپ، مەملەكەتتىك مۇلىكتىڭ زايا بولۋىنان ءونىمدى تۇردە ساقتانىپ، كاسىپورىنداردىڭ اقاۋسىز دامۋىن جانە ساۋدالىق ماقساتتاعى مەملەكەتتىك مۇلىكتىڭ قۇنىنىڭ ساقتالۋى مەن ءوسۋىن ىسكە اسىرۋ كەرەك.
ماجىلىستە مىنالار اتاپ كورسەتىلدى: جوعارى مەكتەپتەرگە تاۋەلدى كاسىپورىنداردىڭ ءتۇزىلىس رەفورماسىندا، مەملەكەتتىك مۇلىكتى باسقارۋ ءتۇزىلىسى رەفورماسىنىڭ باعىت - باعدارىنان جازباي، ءبىلىم بەرۋدىڭ زاڭدىلىعى مەن بازار ەكونوميكاسىنىڭ زاڭدىلىقتارىنا قۇرمەت ەتىپ، جوعارى مەكتەپتەرگە تاۋەلدى كاسىپورىنداردى جاپپاي اداقتاپ جانە ارناعا سالىپ، مەنشىك ۇقىعى مەن جاۋاپكەرشىلىكتىڭ قاتىناسىن جونگە كەلتىرىپ، رەفورما قىزمەتىن تۇرلەر بويىنشا اتقارىپ، جوعارى مەكتەپتەردىڭ نازارىن ءبىلىم بەرۋگە شوعىرلاندىرىپ، ىشتەي دامۋدى ىسكە اسىرۋ كەرەك.
ماجىلىستە مىنالار باسا دارىپتەلدى: كاسىپورىن جۇمىسشى - قىزمەتكەرلەرىنىڭ نەگىزگى زەينەتكەرلىك قامسىزداندىرۋ قورىن ورتالىق رەتتەۋ ءتۇزىمىن ورناتۋ − زەينەتكەرلىك قامسىزداندىرۋىن مەملەكەت بويىنشا ءبىر تۇتاس جوسپارلاۋداعى ماڭىزدى شارا. ەلىمىزدىڭ نەگىزگى مەملەكەت جاعدايى مەن زەينەتكەرلىك قامسىزداندىرۋ ءتۇزىمى قۇرىلىسىنىڭ ءىس جۇزىندەگى جاعدايىن تياناق ەتىپ، قوعامنىڭ جالپى اۋىرتپالىعىن اۋىرلاتپاۋ جانە زەينەتكەرلىك قامسىزداندىرۋى جارناسىنىڭ ۇلەس سالماعىن جوعارىلاتپاۋ نەگىزىندە، ورتالىق رەتتەۋ قورىن جيناقتاۋ، قوردان تولەۋ، قوردى باسقارۋ، ورتالىق قازىنادان قوسىمشا كومەك بەرۋ ارقىلى وڭىرلەر ارا قور اۋىرتپالىعىن تەڭگەرىپ، قوردىڭ حاۋىپسىزدىگى مەن باياندىلىعىن ىسكە اسىرىپ، قازىنالىق اۋىرتپالىقتىڭ باقىلاۋدا بولۋىن ىسكە اسىرىپ، جەر - جەردىڭ زەينەتكەرلىك قامسىزداندىرۋىن ۋاعىندا، تولىعىمەن تاراتۋىنا كەپىلدىك ەتۋ كەرەك.
ماجىلىستە مىنالار اتاپ كورسەتىلدى: ورتالىق كاسىپورىنداردىڭ باسشى قىزمەتكەرلەرىن باسقارۋدى كۇشەيتۋدە كادرلاردى پارتيا باسقارۋ پرينسيبىنە، بازار مەحانيزمىنىڭ رولىن ساۋلەلەندىرۋگە، ءمورالدى دا قابىلەتتى بولۋعا، ءمورالدى الدىڭعى ورىنعا قويۋعا، قاتاڭ باسقارۋ مەن قامقورلىق جاساۋدى ۇشتاستىرۋعا جانە ىنتالاندىرۋ مەن شەكتەۋگە بىردەي ءمان بەرۋگە تاباندى بولىپ، جۇڭگوشا ەرەكشەلىككە يە مەملەكەت مەنشىگىندەگى كاسىپورىن ءتۇزىمىنىڭ تالابى مەن بازار باسەكەسىنىڭ قاجەتىنە ۇيلەسەتىن ادام تاڭداۋ، ادام ىستەتۋ مەحانيزمىن كەمەلدەندىرىپ، پارتياعا ادال، باتىلدىقپەن جاڭالىق اشاتىن، كاسىپورىن باسقارۋعا جۇيرىك، كاسىپورىندى گۇلدەندىرۋدە ناتيجەلى ەڭبەك ەتەتىن، پاك تە كىرشىكسىز ورتالىق كاسىپورىن باسشى قىزمەتكەرلەرى قوسىنىن قۇرۋ كەرەك.
ماجىلىستە مىنالار باسا دارىپتەلدى: تۇرمىستا سۇيەنىشى جوق قاڭعىباس جانە قايىرشى ادامدارعا جاردەمدەسۋ، ولاردى باسقارۋ قىزمەتىن كۇشەيتۋدە جانە جاقسارتۋدا حالىقتى وزەك ەتكەن دامۋ يدەياسىنا تاباندى بولىپ، تومەنگى شەككە كەپىلدىك ەتۋ، توردى نىعىزداۋ، مەحانيزم ورناتۋ تالابى بويىنشا، ءتۇزىلىس - مەحانيزم رەفورماسىن تەرەڭدەتىپ، جاۋاپكەرشىلىك جۇيەسىن كەمەلدەندىرىپ، تاۋەلدى جەردىڭ جاۋاپكەرشىلىگىن ايقىنداپ، باقىلاۋ - باسقارۋدى كۇشەيتىپ، جاۋاپكەرشىلىكتى قۋزاستىرۋدى قاتايتىپ، قاڭعىباس جانە قايىرشى ادامداردىڭ زاڭدى ۇقىق - مۇددەسىن شىن مانىندە قورعاۋ كەرەك.
ماجىلىستە مىنالار اتاپ كورسەتىلدى: ەمدەۋ - دەنساۋلىق ساقتاۋ سالاسىنداعى كەشەندى باقىلاۋ - باسقارۋ ءتۇزىمىن رەفورمالاۋ جانە كەمەلدەندىرۋ حالىق جۇرتشىلىعىنىڭ دەنساۋلىق ۇقىعىن قورعاۋدا ماڭىزدى مانگە يە. ەمدەۋ - دەنساۋلىق ساقتاۋ ىستەرىنىڭ دامۋ زاڭدىلىعى مەن ەرەكشەلىكتەرىن دۇرىس يگەرىپ، باقىلاۋ - باسقارۋ ۇستانىمىنا، تۇزىلىسىنە جانە تاسىلدەرىنە بۇرىلىس جاساپ، ۇكىمەت يەلىگىندەگى ەمدەۋ - دەنساۋلىق ساقتاۋ قۇرىلىمدارىن ءتۇيىندى تۇردە باقىلاۋ - باسقارۋدان جالپى سالالىق باقىلاۋ - باسقارۋعا، ىستەن بۇرىن قاراۋ - بەكىتۋگە ءمان بەرۋدەن ءىس ۇستىندەگى جانە ىستەن كەيىنگى جالپى بارىستى باقىلاۋ - باسقارۋعا، تاق باعىتتى باقىلاۋ - باسقارۋدان كەشەندى جانە بىرلەسكەن باقىلاۋ - باسقارۋعا بۇرىلىس جاساپ، باقىلاۋ - باسقارۋ قابىلەتى مەن باقىلاۋ - باسقارۋدىڭ دەڭگەيىن جوعارىلاتۋ كەرەك.
ماجىلىستە مىنالار باسا دارىپتەلدى: پارتيا 19 - كەزەكتى ورتالىق كوميتەتىنىڭ ءۇشىنشى جالپى ماجىلىسىنەن بەرى، پارتيا ورتالىق كوميتەتىنىڭ پارمەندى باسشىلىعىندا، پارتيا مەن مەملەكەت قۇرىلىمدارى رەفورماسىن تەرەڭدەتۋدە بىرىكتىرۋدىڭ تەبىنى ارتتىرىلىپ، رەفورمالاۋدىڭ قاعيدالارى ايقىندالىپ، ادامنىڭ جۇمىسى جاقسى ىستەلىپ، ەداۋىر قىسقا ۋاقىتتىڭ ىشىندە ماڭىزدى ىلگەرىلەۋشىلىكتەرگە قول جەتتى، ءار جاقتىڭ يدەياسى بىرلىككە كەلىپ، ىنتا - ىقىلاسى كوتەرىلىپ، قيمىل - ارەكەتى جىلدامداپ، ىلگەرىلەۋى بايىپتى بولىپ، تاۋ قوپارىپ، تاس جاراتىنداي تاماشا بەينە جارىققا شىقتى. بۇل پارتيا 18 - قۇرىلتايىنان بەرى ءبىزدىڭ رەفورمانى جاپپاي تەرەڭدەتۋگە باسشىلىق ەتىپ قالاعان نەگىزىمىزدىڭ جاقسى ەكەنىن، تاياۋ ءبىر مەزگىلدەگى قۇرىلىم رەفورماسىنىڭ قىزمەت مەحانيزمى مەن ادىستەرىنىڭ دە پارمەندى، ءونىمدى بولعانىن تولىق تۇسىندىرەدى.
ماجىلىستە مىنالار اتاپ كورسەتىلدى: پارتيا 19 - كەزەكتى ورتالىق كوميتەتى ءۇشىنشى جالپى ءماجىلىسىنىڭ ورنالاستىرۋىنا سايكەس، جەرگىلىكتى ورىنداردىڭ قۇرىلىم رەفورماسىن جەدەل قولعا الىپ، ىركەس - تىركەس ىلگەرىلەتۋ قاجەت. جالپى تالاپ مىناداي: پارتيا ورتالىق كوميتەتىنىڭ قۇرىلىم رەفورماسى جونىندەگى ورنالاستىرۋ - تالاپتارىن جاپپاي، بۇلجىتپاي دايەكتىلەندىرىپ جانە تياناقتاندىرىپ، پارتيا ورتالىق كوميتەتىنىڭ بەدەلى مەن ورتالىقتانعان ءبىر تۇتاس باسشىلىعىن باتىل قورعاپ، جوعارى مەن تومەننىڭ ۇلاسۋىنا، پارمەندى اتقارىلۋىنا كەپىلدىك ەتۋ؛ ولكە دارەجەلى جانە ونان تومەن قۇرىلىمدارعا ءتىپتى كوبىرەك دەربەس ۇقىقتار بەرىپ، جەرگىلىكتى ورىنداردىڭ جەرگىلىكتى جاعدايعا قاراي قۇرىلىم بەلگىلەپ، فۋنكتسيالار انىقتاۋىنا رۇقسات ەتۋ؛ ءار دارەجەلى پارتيا، ۇكىمەت قۇرىلىمدارىنىڭ شەكتى مولشەرىن باسقارۋدى قاتايتىپ، شتات باسقارۋداعى بۇلجىماس شەكتەۋلەردى كۇشەيتۋ؛ حالىق جۇرتشىلىعىنا قىزمەت ەتۋ مەن قولايلىلىق جاساۋعا جانە نەگىزگى ساتى ىستەرىنىڭ ەرەكشەلىگىنە ۇيلەستىرۋگە نازار اۋدارىپ، ىقشام، ءتيىمدى نەگىزگى ساتى باسقارۋ ءتۇزىلىسىن ورناتۋ؛ جالپىلىق اكىمشىلىك زاڭ اتقارۋ رەفورماسىن تەرەڭدەتىپ، بازار باقىلاۋ - باسقارۋ مەن زاڭ اتقارۋ تۇزىلىستەرىن كەمەلدەندىرۋ.
جەرگىلىكتى پارتكومدار قۇرىلىم رەفورماسى قىزمەتىنە باسشىلىقتى كۇشەيتىپ، قۇرىلىم رەفورماسى جوباسىنىڭ جاسالۋى مەن ۇيىمداستىرىپ اتقارىلۋىن ءبىر تۇتاس وي ەلەگىنەن وتكىزىپ، يدەيالىق - ساياسي قىزمەتتى رەفورمانىڭ تۇتاس بارىسىمەن ساباقتاستىرىپ، رەفورما كەزىندە ءتۇرلى قىزمەتتىڭ ءۇزىلىسسىز جانە ورنىقتى بولۋىنا كەپىلدىك ەتۋ كەرەك. ولكەلىك (اۆتونوميالى رايون، قالا) پارتكومداردىڭ فۋنكتسيالىق تاراۋلارى مەن ۇكىمەتتىڭ قۇرامداس تاراۋلارى جالپى جاقتان ورتالىق پەن مەملەكەتتىك ورگانداردىڭ قۇرىلىمىمەن سايكەسۋى قاجەت، وسى نەگىزدە، جەر - جەردىڭ جەرگىلىكتى ەكونوميكالىق، قوعامدىق ەرەكشەلىكتەر مەن قىزمەتتىڭ قاجەتىنە قاراي قاتىستى قۇرىلىمدار ورنالاستىرۋىنا بولادى. قىزمەت جاۋاپكەرشىلىگىنە بۇرىلىس جاساۋ مەن ونى ساپالىلاندىرۋعا كۇش سالۋ، جوعارى - تومەن ورىنداردىڭ قىزمەت جاۋاپكەرشىلىكتەرى تۇتاسىپ، ۇلاسىپ جاتاتىن بولۋى ءتيىس. قاتىستى جاقتار جەرگىلىكتى ورىنداردىڭ قۇرىلىم رەفورماسىنا جەتەكشىلىك ەتۋ تەبىنىن ارتتىرىپ، جاعداي مەن ماسەلەلەردى ءدال جانە ەگجەي - تەگجەيلى يگەرىپ، ءبىر باستان زەرتتەپ، شەشۋى قاجەت.
ماجىلىستە مىنالار باسا دارىپتەلدى: جەرگىلىكتى ورىندار رەفورمانى يگەرگەندە ماسەلەنى نىشان ەتۋدەن جازباي، شەشۋشى رول اتقاراتىن رەفورمالار جونىندە جاعدايعا تالداۋ جاساۋ مەن زەرتتەپ - تۇجىرىمداۋدى كۇشەيتىپ، ورايدى ۇستاپ، ىرىقتىلىقتى يگەرۋ كەرەك. جەرگىلىكتى رەفورمالارعا جەتەكشىلىك ەتۋ جانە ولاردى ىلگەرىلەتۋدە تۇرلەرگە ايىرىپ جەتەكتەۋگە كوڭىل ءبولۋ، جالپى جاعدايدىڭ بىركەلكىلىگى دە، ءىشىنارا يكەمدىلىك تە بولۋ، باعدار كورسەتۋ مەن ىنتالاندىرۋدىڭ رولىن ويداعىداي ساۋلەلەندىرۋ كەرەك.
ورتالىقتىڭ رەفورمانى جاپپاي تەرەڭدەتۋ كوميتەتىنىڭ مۇشەلەرى ماجىلىسكە قاتىناستى، ورتالىق پەن مەملەكەتتىك ورگانداردىڭ قاتىستى تاراۋلارىنداعى جاۋاپتى جولداستار ماجىلىسكە سىرتتاي قاتىناستى.
