شينحۋا اگەنتتىگىنىڭ 5 - ايدىڭ 12 - كۇنى چىڭدۋدان بەرگەن حابارى. ۋىنچۋانداعى جەر سىلكىنىسى اپاتىنىڭ 10 جىلدىعى بايلانىسىمەن وتكىزىلگەن حالىقارالىق تالقى ءماجىلىسى جانە قۇرلىقتاعى جەر سىلكىنىسى جونىندەگى 4 - كەزەكتى حالىقارالىق تالقى ءماجىلىسى 5 - ايدىڭ 12 - كۇنى سىچۋان ولكەسىنىڭ چىڭدۋ قالاسىندا اشىلدى، مەملەكەت ءتوراعاسى شي جينپيڭ ماجىلىسكە حات جولدادى.
شي جينپيڭ مىنالاردى اتاپ كورسەتتى: بيىل ۋىنچۋاندا سۇراپىل جەر سىلكىنگەندىگىنە 10 جىل بولدى. جۇڭگو كوممۋنيستىك پارتياسىنىڭ پارمەندى باسشىلىعىندا ۋىنچۋان جەر سىلكىنىسىندە اپاتقا ۇشىراعان رايوندى قالپىنا كەلتىرۋ، قايتا قۇرۋ قىزمەتى كۇللى الەمدى تاڭ قالدىرعان تابىستارعا قول جەتكىزىپ، حالىقارالىق قوعامنىڭ اپاتتان كەيىنگى قالپىنا كەلتىرۋىنە، قايتا قۇرۋىنا پايدالى تاجىريبەلەر توپتاپ، كەلەلى وي ۇسىندى.
شي جينپيڭ مىنالاردى باسا دارىپتەدى: ادامزاتتىڭ تابيعاتتىڭ زاڭدىلىعىن تانۋىنىڭ شەگى جوق، اپاتتان ساقتانۋ، اپات زيانىن ازايتۋ، اپاتقا قارسى اتتانىپ، اپاتتان اراشالاۋ ادامزاتتىڭ تىرشىلىك ەتۋىندەگى، دامۋىنداعى ماڭگىلىك تاقىرىپ. اپات تۋدىراتىن زاڭدىلىقتاردى عىلمي تانۋ، اپات زيانىن، حاۋىپ - قاتەرىن ءونىمدى ازايتۋ، ادام مەن تابيعاتتىڭ جاراسىمدى بىرگە ءومىر ءسۇرۋىن جۇزەگە اسىرۋ حالىقارالىق قوعامنىڭ تىزە قوسا قۇلشىنۋىن قاجەت ەتەدى. جۇڭگو حالىقتى وزەك ەتكەن دامۋ ۇستانىمىنا تاباندى بولىپ، ساقتانۋدى نەگىز ەتۋدەن، اپاتتان ساقتانۋدى، اپاتقا قارسى اتتانۋدى، اپاتتان اراشالاۋدى ءوزارا ۇشتاستىرۋدان جازباي، اپاتتان جان - جاقتى ساقتانۋ قابىلەتىن جاپپاي جوعارىلاتىپ، حالىقتىڭ باس اماندىعى مەن مال - مۇلىك حاۋىپسىزدىگىنە بەرىك كەپىل ازىرلەيدى. ۋاكىلدەردىڭ وسى رەتكى ءماجىلىستىڭ «جەر سىلكىنىسى حاۋىپ - قاتەرىنەن بىرگە ساقتانۋ» تاقىرىبىن ارقاۋ ەتىپ، بەلسەندىلىكپەن ات سالىسىپ، كەڭىنەن يگى اقىل - كەڭەس جيناقتاپ، اپاتتىڭ زيانىن ازايتۋدى جەبەۋدەگى حالىقارالىق سەلبەستىككە ات سالىسىپ، جاراتىلىستىق اپاتتاردىڭ حاۋىپ - قاتەرىن تومەندەتۋگە، ادامزاتتىڭ تاعدىرلاس ورتاق تۇلعاسىن تۇلعالاۋعا بەلسەندىلىكپەن ۇلەس قوسۋلارىن ءۇمىت ەتەمىن.
