سۇراۋ: ۋاڭ فاميليالى بەلگىلى سەرىكتەستىككە جۇمىسقا تۇرادى، ءبىر رەتكى قىزمەت اعاتتىعىنان سەرىكتەستىككە 2 مىڭ يۋان ەكونوميكالىق زيان تۋدىرادى.
سەرىكتەستىك: ۋاڭ فاميليالى ءوزىنىڭ قىزمەت جاۋاپكەرسىزدىگى سەبەبىنەن تۋىلعان اعاتتىعى ءۇشىن سەرىكتەستىككە سالعان ەكونوميكالىق زياندى تولەسىن، ەگەر تولەم تولەۋگە قۋاتى جەتپەسە، ەڭبەكاقىسى ارقىلى تولەسىن دەپ كەسىم جاساپ، ءار ايداعى ەڭبەكاقىسىن تۇگەلدەي تارتىپ قالۋعا بولا ما؟
ادۆوكات: ەلىمىز «ەڭبەك زاڭىنىڭ» 50-تارماعىندا: «جۇمىسشىنىڭ ەڭبەكاقىسىن ۇستاپ قالۋعا جانە كەشىكتىرىپ بەرۋگە بولمايدى» دەپ بەلگىلەنگەن. «ەڭبەكاقى تاراتۋدىڭ ۋاقىتتىق بەلگىلەمەسىندە»: «ادام ىستەتۋشى ورىن جۇمىسشىنىڭ ەڭبەكاقىسىن ءوزى بىلگەنىنشە تارتىپ قالۋعا بولمايدى» دەپ انىق بەلگىلەنگەن. جوعارىداعى بەلگىلەمەگە ساي، ادام ىستەتۋشى ورىن جۇمىسشىنىڭ ەڭبەكاقىسىن قالاعانىنشا تارتىپ قالۋعا بولمايدى، ويتپەگەندە، جۇمىسشىنىڭ ۇقىق-مۇددەسىنە قول سۇققاندىق ەسەپتەلىنەدى. دەسەدە، بۇل مەيلى قانداي جاعدايدا بولسىن، ادام ىستەتۋشى ورىن جۇمىسشىنىڭ ەڭبەكاقىسىن تارتىپ قالۋىنا مۇلدە بولمايدى دەگەندى تۇسىندىرمەيدى. «ەڭبەكاقى تاراتۋدىڭ ۋاقىتتىق بەلگىلەمەسىنىڭ» 16-تارماعىندا: «جۇمىسشى ءوزىنىڭ اعاتتىعى سەبەبىنەن ادام ىستەتۋشى ورىنعا مول ەكونوميكالىق زيان تۋدىرسا، ادام ىستەتۋشى ورىن ەڭبەك توقتامى كەلىسىمىندەگى تالاپ بويىنشا ەكونوميكالىق زياندى تولەتۋىنە بولادى. ەكونوميكالىق زيان تولەمى جۇمىسشىنىڭ ەڭبەكاقىسىنان تارتىلادى. ءبىراق، ءار اي سايىن تارتىلاتىن تولەم جالپى ەڭبەكاقىسىنىڭ %20نەن اسىپ كەتپەۋى كەرەك. تارتىلىپ قالعاننان كەيىنگى اسىپ قالعان ەڭبەكاقىسى سول ايداعى ەڭ تومەنگى ەڭبەكاقى ولشەمىنەن تومەن بولماۋى، قالايدا ەڭ تومەنگى ەڭبەكاقى ولشەمى بويىنشا تاراتىلۋى كەرەك» دەپ كورسەتىلگەن.
(«ادۆوكاتتىڭ كەڭەسى» كىتاپتان الىندى)
