شينحۋا اگەنتتىگىنىڭ 5 - ايدىڭ 15 - كۇنى بەيجيڭنەن بەرگەن حابارى (ءتىلشى حوۋ ليجۇن). مەملەكەت ءتوراعاسى شي جينپيڭ 5 - ايدىڭ 15 - كۇنى حالىق سارايىندا ترينيداد جانە توباگونىڭ زۇڭليى روۋليمەن كەزدەستى.
شي جينپيڭ روۋلي زۇڭلي مەن ونىڭ باسشىلىعىنداعى ترينيداد جانە توباگو حالىقتىق، ۇلتتىق قوزعالىس پارتياسىنىڭ ۇزاق ۋاقىتتان بەرى جۇڭگومەن قارىم - قاتىناسىنىڭ دامۋىن ىلگەرىلەتۋگە قوسقان ماڭىزدى ۇلەسىن القادى. شي جينپيڭ بىلاي دەپ باسا دارىپتەدى: جۇڭگو رەفورمانى جاپپاي تەرەڭدەتىپ، ەسىك اشۋدى كەڭەيتىپ، ءوزىنىڭ دامۋىن ىسكە اسىرۋمەن قاتار، بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىن نەگىز ەتىپ، ءار ەلمەن بىرگە دامۋدى ىسكە اسىرۋدى قالايدى؛ ءار ەلمەن بىرگە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە كۇش سالادى.
تاريحتىڭ وسىنداي ۇدەرىسىندە ءبىز ءبىرىن - ءبىرى قۇرمەتتەۋ، تەپە - تەڭ بولۋ، ءوزارا پايدا جەتكىزۋ، بىرگە دامۋ پرينسيبىنە ساي، كارايب رايونى ەلدەرىمەن بىرگە جاپپاي ىنتىماقتاستىق سەرىكتەستىك قاتىناسىن ورناتۋدى قالايمىز. ترينيداد جانە توباگو كارايب رايونىنداعى ءىرى ەل، جۇڭگونىڭ وسى وڭىردەگى ماڭىزدى ىنتىماقتاستىق سەرىگى، ەكى ەلدىڭ كوپتەگەن جاقتاردا تۇرعىسى جاقىن، كوزقاراستارى ۇقساس. جاڭا جاعدايدا تاراپتار بىرگە قۇلشىنىپ، ەكى ەل قارىم - قاتىناسىنىڭ ەكى جاقتى، وڭىرلىك جانە كوپ جاقتى دەڭگەيدەگى تىڭ دا زور دامۋىن ىسكە اسىرۋ كەرەك.
شي جينپيڭ بىلاي دەپ باسا دارىپتەدى: جۇڭگو - ترينيداد جانە توباگو ەكى جاق دامۋ ستراتەگياسىن، دامۋ جوباسىن ۇشتاستىرۋدى كۇشەيتىپ، ءار جىكتەگىلەردىڭ قارىم - قاتىناسىن جيىلەتىپ، تۇسىنىستىكتى جانە ءوزارا سەنىمدىلىكتى تەرەڭدەتۋ كەرەك. جۇڭگو ترينيداد جانە توباگومەن «ءبىر بەلدەۋ، ءبىر جول» قۇرىلىسى ىنتىماقتاستىعىن كۇشەيتىپ، ترينيداد جانە توباگونىڭ ەكونوميكاسىنىڭ، قوعامىنىڭ دامۋىنا كومەكتەسۋدى قالايدى. گۋمانيتارلىق اۋىس - كۇيىستى كۇشەيتىپ، جۇڭگو - ترينيداد جانە توباگو دوستىعىن جۇرت جۇرەگىنە اناعۇرلىم تەرەڭ ۇيالاتۋ كەرەك. جۇڭگو مەن ترينيداد جانە توباگو كليمات وزگەرىسى سياقتى جاھاندىق كەلەلى ماسەلەلەر جانە بىرلەسكەن مەملەكەتتەر ۇيىمى ىستەرى جونىندە ءجيى پىكىرلەسىپ، سايكەسىپ، ەكى ەلدىڭ جانە دامۋ ۇستىندەگى ەلدەردىڭ ورتاق مۇددەسىن باتىل قورعاۋ كەرەك. جۇڭگو كوپ جاقتى ورىنداردا ترينيداد جانە توباگو سياقتى كارايب ەلدەرى ءۇشىن ادىلدىكتى جاقتايدى، ترينيداد جانە توباگونىڭ جۇڭگو - كارايب ەلدەرى جانە جۇڭگو - لاتىن امەريكاسى ەلدەرى تۇلعالىق ىنتىماقتاستىعىن جەبەۋگە بەلسەنە ۇلەس قوسۋىن ءۇمىت ەتەمىن.
روۋلي بىلاي دەدى: ءتوراعا شي جينپيڭنىڭ 2013 - جىلى ترينيداد جانە توباگوعا جاساعان ءساتتى ساپارى ەكى ەل قارىم - قاتىناسىنىڭ ۇزاق ۋاقىت دامۋىنا بەرىك نەگىز قالادى، بۇل بۇگىنگە دەيىن ءبىزدىڭ ەسىمىزدەن كوتەرىلگەن جوق. جۇڭگونىڭ دامۋ جەتىستىكتەرى ادامدى سۇيىندىرەدى، ترينيداد جانە توباگونىڭ دا دامۋعا تالپىنىس جاساۋ ارمانى بار، ترينيداد جانە توباگونىڭ ءار سالاسى جۇڭگومەن اناعۇرلىم قويۋ ىنتىماقتاستىق ورناتۋدى ءۇمىت ەتەدى. سوناۋ 1806 - جىلى تۇڭعىش توپتاعى جۇڭگولىقتار العاش رەت تەڭىز جىبەك جولى ارقىلى ترينيداد جانە توباگوعا كەلگەن. جاڭا داۋىردە ترينيداد جانە توباگو ءتوراعا شي جينپيڭنىڭ «ءبىر بەلدەۋ، ءبىر جول» دارىپتەمەسىنە بەلسەنە ات سالىسىپ، ەكى جاقتىڭ ەكونوميكا - ساۋداسىن، قارجى قوسۋ كولەمىن جانە گۋمانيتارلىق اۋىس - كۇيىسىن كەڭەيتىپ، كارايب ەلدەرى مەن جۇڭگونىڭ، لاتىن امەريكاسى ەلدەرى مەن جۇڭگونىڭ قارىم - قاتىناسىنىڭ دامۋىنا دەم بەرۋدى قالايدى.
ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
شينحۋا اگەنتتىگىنىڭ 5 - ايدىڭ 15 - كۇنى بەيجيڭنەن بەرگەن حابارى (ءتىلشى حوۋ ليجۇن). مەملەكەت ءتوراعاسى شي جينپيڭ 5 - ايدىڭ 15 - كۇنى حالىق سارايىندا بو - اۋ ازيا تالقى مىنبەرىنىڭ القا مەڭگەرۋشىسى پان كيمۇنمەن كەزدەستى.
شي جينپيڭ مىنالاردى اتاپ كورسەتتى: بو - اۋ ازيا تالقى مىنبەرى وسى عاسىردىڭ باستاپقى كەزىندە قۇرىلعان، اۋەلگى ماقساتى − ازياداعى مەملەكەتتەردىڭ بىرلەسىپ ءوزىن الۋەتتەندىرۋ، سىن - سايىسقا بىرگە توتەپ بەرۋ، ازيانىڭ ىقپال كۇشىن زورايتۋ. تالقى مىنبەرىنىڭ بورىشى مەن تۇپكى ماقساتى − ازيا ەكونوميكاسىن ءبىر تۇلعالاندىرىپ، وڭىردەگى ەلدەردىڭ دۇنيە ءجۇزى ەلدەرىمەن اۋىس - كۇيىسىن، ىنتىماقتاستىعىن جەبەپ، ءوزارا تيىمدىلىك جاساپ، تەڭ ۇتۋدى ىسكە اسىرۋ. تالقى مىنبەرىنىڭ قۇرىلۋى مەن دامۋى جۇڭگونىڭ رەفورما جاساۋ، ەسىك اشۋ اياق الىسىمەن قاتار كەلە جاتىر. مەن تالقى مىنبەرىنىڭ داۋىرمەن بىرگە العا باسىپ، نازاردى ازياعا جانە بازارى جاڭادان گۇلدەنگەن ەكونوميكالىق تۇلعالارعا شوعىرلاندىرىپ، دۇنيە ءجۇزىنىڭ دامۋىنداعى كەلەلى امالي ماسەلەلەرگە نازار اۋدارىپ، دامۋداعى قيىن تۇيىندەردى شەشىپ، ەكونوميكانى جونگە سالۋدى كەمەلدەندىرىپ، باياندى دامۋدى ىسكە اسىرۋعا جاڭا تانىم، جاڭا وي جەلىسىن، جاڭا ءادىس - امال ازىرلەپ، جۇڭگو مەن دۇنيە ءجۇزىنىڭ بىرگە دامىپ، گۇلدەنىپ - كوركەيۋىن ىلگەرىلەتۋدە بەلسەندى رول اتقارۋىن ءۇمىت ەتەمىن. وتاعاسى ەل بولعان جۇڭگو تالقى مىنبەرى القاسىنىڭ قىزمەتىنە بۇرىنعىداي قولداۋ كورسەتە بەرەدى، تالقى مىنبەرىنىڭ ىقپالىن ۇزدىكسىز جوعارىلاتۋعا قولداۋ كورسەتەدى.
شي جينپيڭ مىنالاردى باسا دارىپتەدى: قازىر حالىقارادا بەلگىسىز، ورنىقسىز فاكتورلار بارعان سايىن كوبەيىپ، جاڭا ماسەلەلەر، تىڭ سايىستار ىركەس - تىركەس تۋىلۋدا، ەسىك اشۋ كەرەك پە، الدە تۇيىقتالۋ كەرەك پە؟ جاڭالىق اشۋ كەرەك پە، الدە كونەدەن جازباۋ كەرەك پە؟ تەڭ يگىلىكتەنۋ كەرەك پە، الدە ءوز پايداسىمەن عانا ساناسۋ كەرەك پە؟ بۇل جونىندە ازياداعى ەلدەردىڭ جانە حالىقارالىق قوعامنىڭ دۇرىس تاڭداۋ جاساۋىنا تۋرا كەلەدى. مەن بو - اۋ ازيا تالقى مىنبەرىنىڭ 2018 - جىلعى جىلدىق ماجىلىسىندە كوپشىلىككە ەكونوميكانىڭ جاھاندانۋى كەرى قايتارۋعا كەلمەيتىن ءداۋىر اعىمى ەكەندىگىن، دۇنيە جۇزىندەگى ەلدەردىڭ بولاشاق تاعدىرىنىڭ ەشقاشان ءدال بۇگىنگىدەي ءبىر - بىرىمەن تىعىز بايلانىسىپ، بىتە قايناسىپ كورمەگەندىگىن ايتقان ەدىم. ەكونوميكانىڭ جاھاندانۋىندا كورىلگەن ماسەلەلەردى شەشۋدە كونەدەن جازباۋ − ماسەلەنى شەشۋدىڭ امالى ەمەس، قايتا ءار جاقپەن سايكەسۋ عانا شىعار جول بولماق.
شي جينپيڭ بىلاي دەپ اتاپ كورسەتتى: جۇڭگونىڭ اشىلعان ەسىگى جابىلمايدى، ول بارعان سايىن ايقارا اشىلا تۇسەدى. ءبىز اشىق ورتادا ەسىك اشۋعا ۇيلەسەمىز، اشىق ورتادا دامۋعا قول جەتكىزەمىز. ءبىز كوپ جاقتىلىقتى تاباندىلىقپەن قولداپ، كوپ جاقتى ساۋدا ءتۇزىلىسىن قورعاپ، اشىق الەم ەكونوميكاسىن قۇرىپ، ەكونوميكانىڭ جاھاندانۋىنىڭ اناعۇرلىم اشىق، سيىسىمدى، جالپىعا پايدالى، تەڭگەرىمدى، تەڭ ۇتاتىن بەتالىسقا قاراي دامۋىن ىلگەرىلەتۋگە كۇش سالامىز. مەن تالقى مىنبەرىنىڭ بيىلعى جىلدىق ماجىلىسىندە جۇڭگونىڭ ەسىكتى دەربەس ايقارا اشۋ جاعىنداعى جاڭا كەزەكتى شارالارىن جاريالادىم، بۇل شارالار كوپ ۇزاماي تياناقتانىپ، ازيا مەن دۇنيە جۇزىنە اناعۇرلىم مول دامۋ ورايىن جاراتاتىن بولادى.
پان كيمۇن بىلاي دەدى: جۇڭگو ۇكىمەتىنىڭ بو - اۋ ازيا تالقى مىنبەرىن بار كۇشپەن قولداپ - قۋاتتاعانىنا العىس ايتامىن. قازىرگى جاعدايدا تالقى مىنبەرى جاھاندانۋدى قولداۋ، ەركىن ساۋدانى قولداۋ جونىندە ايقىن ينفورماتسيا تاراتۋعا مۇقتاج. جۇڭگونىڭ «ءبىر بەلدەۋ، ءبىر جول» دارىپتەمەسىنەن تولىق پايدالانىپ، ازيانىڭ ۇزدىكسىز ەسىك اشۋىن، جاڭالىق اشۋىن ىلگەرىلەتىپ، بارىنشا جاقسى دامۋدى ىسكە اسىرۋ كەرەك. ۇزاق بولاشاقتان قاراعاندا، تالقى مىنبەرى ازيانى تابان تىرەر تياناق ەتۋ نەگىزىندە ازيادان القىپ، دۇنيە ءجۇزى حالقىنىڭ جاراسىمدى قاتار ءومىر ءسۇرۋىن جەبەيتىن ماڭىزدى تۇعىرعا اينالۋى، ادامزاتتىڭ تاعدىرلاس ورتاق تۇلعاسىن قالىپتاستىرۋ جولىندا قۇلشىنىس جاساۋى كەرەك.
ياڭ جيەچى، ۋاڭ ي قاتارلىلار كەزدەسۋگە قاتىناستى.
