تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ شاڭحاي ىنتىماقتاستىق ۇيىمىنا مۇشە ەلدەر حاۋىپسىزدىك كەڭەسى حاتشىلارىنىڭ ماجىلىسىنە قاتىناسۋعا كەلگەن شەتەل ۋاكىلدەرى ۇيىرمەلەرىنىڭ باستىقتارىمەن توپتىق كەزدەستى

   شينحۋا اگەنتتىگىنىڭ 5 - ايدىڭ 22 - كۇنى بەيجيڭنەن بەرگەن حابارى (ءتىلشى حوۋ ليجۇن). مەملەكەت ءتوراعاسى شي جينپيڭ 5 - ايدىڭ 22 - كۇنى حالىق سارايىندا شاڭحاي ىنتىماقتاستىق ۇيىمىنا مۇشە ەلدەر حاۋىپسىزدىك كەڭەسى حاتشىلارىنىڭ 13 - ماجىلىسىنە قاتىناسۋ ءۇشىن جۇڭگوعا كەلگەن شەتەل ۋاكىلدەرى ۇيىرمەلەرىنىڭ باستىقتارىمەن توپتىق كەزدەستى.

  شي جينپيڭ مىنالاردى اتاپ كورسەتتى: شاڭحاي ىنتىماقتاستىق ۇيىمى قۇرىلعاننان بەرى، مۇشە ەلدەر ءوڭىردىڭ حاۋىپسىزدىگى مەن ورنىقتىلىعىن قورعاۋدى ءارقاشان باسىم باعىت ەتىپ، ىنتىماقتاستىق سالالارىن كەڭەيتىپ، ىنتىماقتاستىق امالياتىن بايىتىپ، «شىعىس تۇركستان» سياقتى «ءۇش ءتۇرلى كۇشكە» قاتاڭ سوققى بەرىپ، قولامتالى ماسەلەلەردىڭ تەرىس ىقپالىنىڭ كەڭەيۋىنەن، سىرتقا جايىلۋىنان بەلسەنە ساقتانىپ، ءوڭىردىڭ باياندى تىنىشتىعى مەن دامۋ - گۇلدەنۋىنە كەپىلدىك ەتۋگە ماڭىزدى ۇلەس قوستى. ۇيىمعا جاڭا مۇشەلەر قابىلدانعاننان كەيىن، شاڭحاي ىنتىماقتاستىق ۇيىمى اياسىنداعى حاۋىپسىزدىك ىنتىماقتاستىقتىڭ مۇمكىندىكتەرى اناعۇرلىم ارتىپ، ارقالاعان جاۋاپكەرشىلىگى اناعۇرلىم اۋىرلادى، ول قازىر وڭىردەگى ءار ەل حالقىنىڭ جانە حالىقارالىق قوعامنىڭ اناعۇرلىم كوپ ءۇمىتىن ارقالاپ وتىر. حاۋىپسىزدىك كەڭەسى حاتشىلارى ءماجىلىسى مەحانيزمى جاعدايدىڭ وزگەرىسىنە بەلسەنە ۇيلەسىپ، قىزمەت جاۋاپكەرشلىكتەرىن شىنايى اتقارىپ، مۇشە ەلدەردىڭ مەملەكەت حاۋىپسىزدىگى مەن قوعام ورنىقتىلىعىن قورعاۋىنا اناعۇرلىم پارمەندى قولداۋ كورسەتۋى كەرەك.

  شي جينپيڭ مىنالاردى باسا دارىپتەدى: قازىر ءوڭىردىڭ حاۋىپسىزدىك جاعدايى جالپى جاقتان ورنىقتى، سونىمەن بىرگە، ول «ءۇش ءتۇرلى كۇش»، ەسىرتكى اتكەزشىلىگى، مەملەكەتارالىق ۇيىمداسقان قىلمىس سياقتىلاردىڭ قاتاڭ سايىسىنا دا ءدوپ كەلىپ وتىر. بۇل بىزدەن تاۋقىمەت تانىمدى كۇشەيتىپ، سابىرلىلىقپەن وي جۇگىرتىپ، ءدال تۇجىرىمداپ، ۇيلەسىمدى ءبىر جاقتى ەتۋدى قاجەت ەتەدى. حاۋىپسىزدىك ىنتىماقتاستىعىنىڭ ستراتەگيالىق بەتالىسىن مىقتى يگەرىپ، ستراتەگيالىق ءوزارا سەنىمدىلىكتى ۇزدىكسىز نىعايتىپ، ساياسات جونىندەگى پىكىرلەسۋ مەن سايكەسۋدى كۇشەيتىپ، تەڭدىك پەن ادىلدىككە تاباندى بولىپ، قولامتالى ماسەلەلەردى ساياسي ديپلوماتيالىق تاسىلدەرمەن بەيبىت شەشۋدى بىرگە ىلگەرىلەتۋ كەرەك. ورتاق، جان - جاقتى، سەلبەسەتىن، باياندى حاۋىپسىزدىك كوزقاراسىن نەگىز ەتۋدى جالعاستىرىپ، حاۋىپسىزدىكتى جونگە سالۋدىڭ كەشەندى شارالارى قولدانىلاتىن، ۇستىنەن وڭاۋ مەن تۇبىرىنەن وڭاۋ قاتار يگەرىلەتىن ۇلگىلەرىن جالپىلاستىرىپ، شاڭحاي ىنتىماقتاستىق ۇيىمى اياسىنداعى حاۋىپسىزدىك ىنتىماقتاستىقتىڭ تىڭ ساتىعا كوتەرىلۋىن ىلگەرىلەتۋ كەرەك. حاۋىپسىزدىك ىنتىماقتاستىعىنىڭ ارەكەت قابىلەتىن كۇشەيتىپ، زاڭ اتقارۋ ىنتىماقتاستىعىنىڭ اناعۇرلىم ءجيى، كەمەلدى، جوعارى ءونىمدى تورىن ورناتىپ، حاۋىپسىزدىك سالاداعى ىنتىماقتاستىقتاردى ۇزدىكسىز ىلگەرىلەتىپ، ورنىقتىلىقتى قورعاۋ قابىلەتى قۇرىلىسىن بىرگە كۇشەيتۋ كەرەك.

  شي جينپيڭ مىنالاردى اتاپ كورسەتتى: جۇڭگو ءوز حاۋىپسىزدىگىن وڭىردەگى ەلدەردىڭ حاۋىپسىزدىگىمەن ۇزدىكسىز توعىستىرىپ، ۇيىمعا مۇشە ەلدەرمەن بىرگە ءوزارا قۇرمەت ەتەتىن، تەڭ دە ءادىل، ىنتىماقتاسىپ، تەڭ ۇتاتىن جاڭاشا حالىقارالىق قارىم - قاتىناستى بىرگە تۇلعالاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتەدى.

  رەسەي حاۋىپسىزدىك كەڭەسىنىڭ حاتشىسى پاترۋشەۆ، قىرعىزستان حاۋىپسىزدىك كەڭەسىنىڭ حاتشىسى ساعىنبايەۆ شەتەل ۇيىرمەلەرى اتىنان ىلگەرىندى - كەيىندى لەبىز ءبىلدىردى. ولار ءار ەل باسشىلارىنىڭ شي جينپيڭگە دەگەن ىقىلاستى سالەمىن جەتكىزىپ، شي جينپيڭنىڭ شاڭحاي ىنتىماقتاستىق ۇيىمىنا مۇشە ەلدەردىڭ حاۋىپسىزدىك ىنتىماقتاستىعىنا ايرىقشا ءمان بەرگەنىنە العىس ايتتى. ولار بىلاي دەستى: ءار ەل جۇڭگونىڭ شاڭحاي ىنتىماقتاستىق ۇيىمىنا ءتوراعالىق ەتۋشى ەل رەتىندە، باسشىلاردىڭ ورتاق تانىمدارىن تياناقتاندىرۋدى ىلگەرىلەتۋ، مۇشە ەلدەر ءدوپ كەلىپ وتىرعان ورتاق سىن - سايىستارعا قول ۇستاسا توتەپ بەرۋ، حالىقارالىق بەيبىتشىلىك پەن حاۋىپسىزدىكتى قورعاۋ ءۇشىن ورتاعا قويعان دارىپتەمەلەرىن قولدايدى. جۇڭگونىڭ باسقارۋىندا بۇل رەتكى حاۋىپسىزدىك كەڭەسى حاتشىلارى ءماجىلىسى لاڭكەستىككە، «ءۇش ءتۇرلى كۇشكە» سوققى بەرۋ، ينفورماتسيالىق حاۋىپسىزدىكتى نىعايتۋ، قوعام ورنىقتىلىعىن قورعاۋ سياقتى مۇشە ەلدەر بىرگە نازار اۋدارىپ وتىرعان ماسەلەلەر جونىندە ىشكەرىلەي تالقى جۇرگىزىپ، شاڭحاي ىنتىماقتاستىق ۇيىمىنىڭ حاۋىپسىزدىك سالاداعى ىنتىماقتاستىعىن كۇشەيتۋگە ىلگەرىلەگەن تۇردە ايقىن بەتالىس كورسەتىپ، چيڭداۋدا وتەتىن باسشىلار باس قوسۋىنا دايىندالۋ جونىندە ماڭىزدى رول اتقاردى. جاڭا جاعدايدا، شاڭحاي ىنتىماقتاستىق ۇيىمى اياسىنداعى حاۋىپسىزدىك ىنتىماقتاستىعى قۋاتتى ومىرشەڭدىك كۇشىن ونان ارى ايگىلەپ كەلەدى. ءار ەل كەڭ ءارى تىعىز ىنتىماقتاستىقتى نىعايتىپ، شاڭحاي ىنتىماقتاستىق ۇيىمىنىڭ حالىقارالىق ىستەردە اناعۇرلىم ۇلكەن رول اتقارۋىنا مۇمكىندىك جاساۋدى قالايدى.

    گو شىڭكۇن، جاۋ كىجى كەزدەسۋدە بىرگە بولدى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.