شينحۋا اگەنتتىگىنىڭ 6 - ايدىڭ 7 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭنىڭ بەكىتۋىمەن، جۇڭحۋا حالىق رەسپۋبليكاسىنىڭ «دوستىق وردەنى» 6 - ايدىڭ 8 - كۇنى العاش رەت تابىستالادى.
«جۇڭحۋا حالىق رەسپۋبليكاسىنىڭ مەملەكەتتىك وردەن جانە مەملەكەتتىك داڭق - اتاقتار تۋرالى زاڭى» بويىنشا، مەملەكەت جۇڭحۋا حالىق رەسپۋبليكاسىنىڭ «دوستىق وردەنىن» تاعايىندادى، ول ەلىمىزدىڭ سوتسياليستىك وسىزامانداندىرۋ قۇرىلىسى جانە جۇڭگو مەن شەتەلدىڭ اۋىس - كۇيىسىن، ىنتىماقتاستىعىن جەبەۋ، الەمنىڭ بەيبىتشىلىگىن قورعاۋ ءۇشىن ەرەن ۇلەس قوسقان شەتەلدىكتەرگە تابىستالاتىن ەڭ جوعارى مەملەكەتتىك داڭق بولىپ سانالادى. جۇڭحۋا حالىق رەسپۋبليكاسىنىڭ «دوستىق وردەنىن» تاعايىنداۋ جانە تابىستاۋدىڭ ماقساتى − جۇڭگو مەن شەتەل دوستىعىنىڭ ۇلگىسىن ورناتۋ ارقىلى دۇنيە جۇزىنە دوستىق، بەيبىتشىلىك، ادىلدىك، تەڭدىك سياقتى نەگىزگى ۇستانىمداردى تاراتىپ، دۇنيە ءجۇزىنىڭ جۇڭگو تۋرالى تۇسىنىگىن تەرەڭدەتۋ.
جۇڭحۋا حالىق رەسپۋبليكاسىنىڭ «دوستىق وردەنىنە» التىن ءتۇس، كوك ءتۇس نەگىزگى رەڭ ەتىلىپ، بەيبىتشىلىك كوگارشىنى، جەر شارى، ۇستاسقان قول، شامگۇل سياقتى ەلەمەنتتەر قولدانىلعان، وردەننىڭ باۋىنا جۇڭگو ءتۇيىنى، مىڭجاسار، مۋدان گۇلى، قاس تاس ساقينا، اسەم يتكەندىر سياقتى ەلەمەنتتەر قولدانىلىپ، ورنەكتەپ بەدەرلەۋ، كىرەۋكەلەپ زەرلەۋ سياقتى ءداستۇرلى قولونەر شەبەرلىكتەرى پايدالانىلعان. جوبالانۋىندا جانە جاسالۋىندا جۇڭگو حالقىنىڭ ءار ەل حالقىمەن دوستىق ىنتىماعى، باياندى دوستىعى ايگىلەنىپ، الەمدەگى بارشا مەملەكەتتەردىڭ بىرگە گۇلدەنىپ، دامۋىنا تىلەۋلەستىك بىلدىرىلگەن.
6 - ايدىڭ 8 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىنىڭ التىن زالىندا جۇڭحۋا حالىق رەسپۋبليكاسىنىڭ تۇڭعىش «دوستىق وردەنىن» تابىستايدى. ورتالىق تەلەۆيزيا وردەندى تابىستاۋ ءراسىمىن ۇستىنەن تاراتادى.
