ءتاڭىرتاۋ تورابى   ›   جاڭالىقتار   ›   ماڭىزدى حابارلار

«شاڭحاي رۋحىن» اسقاقتاتىپ، تاعدىرلاس ورتاق تۇلعا قۇرايىق

  − شاڭحاي ىنتىماقتاستىق ۇيىمىنا مۇشە ەلدەر باسشىلارى القالار كەڭەسىنىڭ 18 - رەتكى ماجىلىسىندە سويلەنگەن ءسوز

  (2018 - جىلى 6 - ايدىڭ 10 - كۇنى، چيڭداۋ)

  جۇڭحۋا حالىق رەسپۋبليكاسىنىڭ ءتوراعاسى شي جينپيڭ

   قۇرمەتتى كاسىپتەستەر:

  6 - ايداعى چيڭداۋ سىزعان سۋرەتتەي اسەم كوركىمەن كوز تارتادى. وسىناۋ تاماشا مەزگىلدە، سىزدەردىڭ شاڭحاي ىنتىماقتاستىق ۇيىمىنا مۇشە ەلدەر باسشىلارى القالار كەڭەسىنىڭ 18 - رەتكى ماجىلىسىنە قاتىناسۋعا وسىندا كەلگەندەرىڭىزدى قارسى الامىن. 2500 جىلدىڭ الدىندا جۇڭگونىڭ ەرتەدەگى ۇلى ويشىلى كۇڭزى: «نيەتتەس ساپارلاسىڭ الىستان كەلسە، قۋانىپ قالمايسىڭ با؟» دەگەن ەكەن. بۇگىن كۇڭزىنىڭ مەكەنى شاندۇڭ الىستان كەلگەن سيلى قوناقتارىن قۋانىشپەن قارسى الىپ وتىر، ءبىزدىڭ وسىندا شاڭحاي ىنتىماقتاستىق ۇيىمىن دامىتۋ ۇلى جوسپارىن اقىلداسۋىمىزدىڭ ەرەكشە ءمانى بار.

  ەندى 5 كۇننەن كەيىن، شاڭحاي ىنتىماقتاستىق ۇيىمى ءوزىنىڭ 17 جاس تۋعان كۇنىن قارسى الادى. بۇگىننەن وتكەنگە قايرىلا قاراساق، ۇيىمىمىز ايرىقشا دامۋ بارىسىنان ءوتىپ، ماڭىزدى جەتىستىككە قول جەتكىزدى.

  17 جىلدان بەرى، ءبىز «شاڭحاي ىنتىماقتاستىق ۇيىمىنىڭ ەرەجەسىن»، «شاڭحاي ىنتىماقتاستىق ۇيىمىنا مۇشە ەلدەردىڭ ۇزاق ۋاقىت تاتۋ كورشىلىك، دوستىق ىنتىماقتاستىعى تۋرالى شارتىن» نەگىز ەتىپ، وداقتاسپاۋ، قارسىلاسپاۋ، ءۇشىنشى تاراپقا باعىتتاماۋ سىندى ناتيجەلى سەرىكتەستىك قارىم - قاتىناس ورناتتىق. بۇل حالىقارالىق قارىم - قاتىناس نازارياسى مەن امالياتىنداعى ماڭىزدى جاڭالىق بولدى، ءبىز وڭىرلىك ىنتىماقتاستىقتىڭ جاڭا ۇلگىسىن اشىپ، ءوڭىردىڭ بەيبىتشىلىگى مەن دامۋى ءۇشىن تىڭ ۇلەس قوستىق.

  قازىرگى تاڭدا شاڭحاي ىنتىماقتاستىق ۇيىمى دۇنيە جۇزىندە جەر كولەمى ەڭ كەڭ، حالقى ەڭ كوپ، جان - جاقتى، وڭىرلىك ىنتىماقتاستىق ۇيىمى ەسەپتەلەدى، وعان مۇشە مەملەكەتتەردىڭ ەكونوميكاسى مەن حالقىنىڭ جالپى مولشەرى جەكە - جەكە دۇنيە ءجۇزىنىڭ %20ىن جانە %40ىن قۇراپ وتىر. شاڭحاي ىنتىماقتاستىق ۇيىمىندا 4 باقىلاۋشى ەل، 6 ديالوگتاسۋشى، 6 سەرىك بار، ول ب م ۇ سياقتى حالىقارالىق جانە وڭىرلىك ۇيىمدارمەن كەڭ ىنتىماقتاستىق قارىم - قاتىناسىن ورناتتى، ونىڭ حالىقارالىق ىقپالى ۇزدىكسىز جوعارىلاپ، الەمدىك بەيبىتشىلىك پەن دامۋدى جەبەيتىن، حالىقارالىق ادىلدىك پەن تەڭدىكتى قورعايتىن، نەمقۇرايدى قاراۋعا بولمايتىن ماڭىزدى كۇشكە اينالدى.

  شاڭحاي ىنتىماقتاستىق ۇيىمى جالىندى ومىرشەڭدىك كۇشىن، قۋاتتى ىنتىماقتاستىق كۇشىن ءارقاشان ساقتاپ كەلەدى، مۇنىڭ ءتۇبىرلى سەبەبى ونىڭ «شاڭحاي رۋحىن» جاسامپازدىقپەن ورتاعا قويۋىندا جانە ونى ءارقاشان جۇزەگە اسىرا بىلۋىندە، ءوزارا سەنىمدى، ءوزارا تيىمدىلىكتى، تەڭدىكتى، ءوزارا اقىل - كەڭەستى، مادەنيەتتەردىڭ سان الۋاندىعىنا قۇرمەت ەتۋدى، بىرلەسىپ دامۋعا دەگەن ۇمتىلىستى دارىپتەۋىندە. بۇل وركەنيەتتەردىڭ قاقتىعىسى، قىرعي قاباق سوعىسىندىق ويلاۋ، ىمىراعا كەلمەيتىن كونە، قاساڭ كوزقاراستاردىڭ شەڭبەرىنەن شىعىپ، حالىقارالىق قارىم - قاتىناستىڭ شىت جاڭا پاراعىن اشىپ، حالىقارالىق قوعامنىڭ كۇن سايىن كەڭەيگەن شىنايى مويىنداۋىنا يە بولدى.

  كاسىپتەستەر!

  «كۇڭزى دۇڭشان تاۋىنا شىقسا، لۋ ەلى الاقانداي، تايشان تاۋىنا شىقسا، جەر - جاھان توستاعانداي كورىنىپتى». دۇنيە ءجۇزىنىڭ جاپپاي دامۋ، جاپپاي وزگەرىس، جاپپاي رەتتەلۋ جاڭا جاعدايى الدىندا، ادامزات وركەنيەتىنىڭ العا باسۋ ىستەرىن اناعۇرلىم جاقسى ىلگەرىلەتۋ ءۇشىن، ءبىز، ءسوز جوق، بيىككە شىعىپ، الىسقا كوز تاستاۋىمىز، دۇنيە جۇزىلىك جاعداي مەن ءداۋىر اعىمىن دۇرىس تانۋىمىز جانە يگەرۋىمىز كەرەك.

  قازىرگى الەمدە وكتەمدىك جانە وكتەم ساياسي ءالى ءومىر سۇرۋدە، ءبىراق حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا دامۋىن ىلگەرىلەتۋ تۋرالى ۇندەرگە ەلەۋسىز قاراۋعا بولمايدى، حالىقارالىق قارىم - قاتىناستىڭ دەموكراتيالانۋى بوگەۋ بەرمەس ءداۋىر اعىمىنا اينالدى.

  ءتۇرلى ءداستۇرلى جانە ءداستۇرلى ەمەس حاۋىپسىزدىك قاتەرلەرى ۇزدىكسىز بەلەڭ بەرگەنىمەن، بەيبىتشىلىكتى قورعايتىن كۇشتەر ەڭ سوڭىندا بەيبىتشىلىكتى بۇزاتىن كۇشتەردى جەڭىپ شىعادى، حاۋىپسىزدىك پەن ورنىقتىلىق − جۇرت قالاۋى.

  ءبىر جاقتىلىقتا، ساۋدا قورعامپازدىعىندا، جاھاندانۋعا قارسى وي اعىمىندا تىڭ بەينەلەر ۇزدىكسىز جارىققا شىققانىمەن، «جەر شارى قىستاعىنا» اينالعان الەم ءار مەملەكەت مۇددەلەرىنىڭ بارعان سايىن توعىساتىن، تاعدىرى ورتاق، ىنتىماقتاسىپ، تەڭ ۇتاتىن ۇلكەن بەتالىسىن بەلگىلەپ وتىر.

  وركەنيەتتەر قاقتىعىسى، وركەنيەت باسىمدىعى سياقتى ەسكى سارىنداردىڭ سارقىنشاعى اۋىق - اۋىق بەلەڭ بەرگەنىمەن، وركەنيەتتەردىڭ سان الۋاندىعى ادامزات العا باسۋىنىڭ سارقىلماس قوزعاۋشى كۇشى، تۇرلىشە وركەنيەتتەردىڭ اۋىس - كۇيىسى، ءبىر - بىرىنەن ۇلگى الۋى ءار ەل حالقىنىڭ ورتاق تىلەگى بولىپ تابىلادى.

  كاسىپتەستەر!

  قازىر الەمدىك دامۋ ۇمىتكە تولى بولۋمەن بىرگە، سىن - سايىستارعا دا ءدوپ كەلىپ وتىر، ءبىزدىڭ بولاشاعىمىز شەكسىز نۇرلى، ءبىراق الداعى جولىمىز تەگىس بولا قويمايدى. ءبىز «شاڭحاي رۋحىن» ونان ارى اسقاقتاتىپ، داۋىرلىك قيىن ماسەلەلەردى شەشىپ، حاۋىپ - قاتەر، سىن - سايىستاردى باسەيتۋىمىز كەرەك.

  − ءبىز جاڭالىق اشا دامۋ، سايكەستى دامۋ، جاسىل دامۋ، اشىق دامۋ، بىرگە يگىلىككە كەنەلەتىن دامۋ كوزقاراسىن دارىپتەپ، ءار ەل ەكونوميكاسى مەن قوعامىنىڭ سايكەسە العا باسۋىن جۇزەگە اسىرىپ، دامۋدىڭ بىركەلكى بولماۋىنان تۋىنداعان ماسەلەلەردى شەشىپ، دامۋداعى ايىرماشىلىقتاردى ازايتىپ، ورتاق كوركەيۋدى جەبەۋىمىز كەرەك.

  − ءبىز ورتاق، جان - جاقتى، ىنتىماقتاسقان، باياندى حاۋىپسىزدىك كوزقاراسىن جۇزەگە اسىرىپ، قىرعي قاباق سوعىسىندىق ويلاۋدى، توپ بولىپ قارسىلاسۋدى تاستاپ، باسقا مەملەكەتتىڭ حاۋىپسىزدىگىن قۇربان ەتۋ ارقىلى ءوزىنىڭ ابسوليۋتتى حاۋىپسىزدىگىنە قول جەتكىزەتىن ىستەرگە قارسى تۇرىپ، جاپپاي حاۋىپسىزدىكتى جۇزەگە اسىرۋىمىز كەرەك.

  − اشىق، توعىسپالى، ءوزارا ءتيىمدى، تەڭ ۇتاتىن ىنتىماقتاستىق كوزقاراسىن نەگىز ەتىپ، ءوز پايداسىن عانا كوزدەيتىن ءوزىمشىل، اياعىنىڭ ۇشىنان ارى الىستى كورمەيتىن، تۇيىق، تار ءورىستى ساياساتتان باس تارتىپ، الەمدىك ساۋدا ۇيىمىنىڭ ەرەجەلەرىن قورعاپ، كوپ جاقتى ساۋدا ءتۇزىلىسىن قولداپ، اشىق الەمدىك ەكونوميكا قالىپتاستىرۋىمىز كەرەك.

  − ءبىز تەڭ، ءبىر - بىرىنەن ۇلگى الاتىن، ديالوگ جۇرگىزەتىن، سيىسىمدى وركەنيەت كوزقاراسىن ورناتىپ، وركەنيەتتەردىڭ اۋىس - كۇيىسى ارقىلى وركەنيەتتەر ارازدىعى شەڭبەرىنەن شىعۋىمىز، وركەنيەتتەردىڭ ءبىر - بىرىنەن ۇلگى الۋى ارقىلى وركەنيەتتەر قاقتىعىسىنىڭ شەڭبەرىنەن شىعۋىمىز، وركەنيەتتەردىڭ قاتار ءومىر ءسۇرۋى ارقىلى وركەنيەت باسىمدىعى شەڭبەرىنەن شىعۋىمىز كەرەك.

  − ءبىز، اقىلداسۋ، بىرگە قۇرۋ، بىرگە يگىلىكتەنۋ سىندى جاھاندىق جونگە سالۋ كوزقاراسىنا تاباندى بولىپ، جاھاندىق جونگە سالۋ جۇيەسىن ۇزدىكسىز رەفورمالاپ، كەمەلدەندىرىپ، ءار ەلدىڭ قول ۇستاسا وتىرىپ ادامزاتتىڭ تاعدىرلاس ورتاق تۇلعاسىن ورناتۋىن ىلگەرىلەتۋىمىز كەرەك.

  كاسىپتەستەر!

  «شاڭحاي رۋحى» ءبىزدىڭ ورتاق بايلىعىمىز، شاڭحاي ىنتىماقتاستىق ۇيىمى − ءبىزدىڭ ورتاق مەكەنىمىز. ءبىز ۇزدىكسىز تۇردە «شاڭحاي رۋحىنىڭ» جەتەكشىلىگىندە، ءبىر جاعادان باس، ءبىر جەڭنەن قول شىعارىپ، ىزگى نيەتپەن ىنتىماقتاستىق جاساسىپ، جۇدىرىقتاي جۇمىلا وتىرىپ شاڭحاي ىنتىماقتاستىق ۇيىمىنىڭ تاعدىرلاس ورتاق تۇلعاسىن قۇرىپ، جاڭاشا حالىقارالىق قاتىناس ورناتۋدى ىلگەرىلەتىپ، باياندى بەيبىت، جاپپاي حاۋىپسىز، بىرگە گۇلدەنگەن، اشىق تا باۋىرمال، كىرشىكسىز دە كوركەم دۇنيەگە قاراي قول ۇستاسا قادام تاستاۋىمىز كەرەك. بۇل تۋرالى مىنا ۇسىنىستاردى ورتاعا قويماقشىمىن:
 ءبىرىنشى، بەرەكە - بىرلىك پەن ءوزارا سەنىمنىڭ قۇدىرەتتى كۇشىن ۇيىستىرايىق. ءبىز چيڭداۋ جارناماسى، ۇزاق ۋاقىتتىق تاتۋ كورشىلىك، دوستىق ىنتىماقتاستىق شارتىن اتقارۋ باعدارلاماسى سياقتى حۇجاتتاردى جاپپاي تياناقتاندىرىپ، اركىمنىڭ تاڭداعان دامۋ جولىنا قۇرمەت ەتىپ، ءوزارا وزەكتى مۇددە مەن كوڭىل ءبولىپ وتىرعان كەلەلى ماسەلەلەرگە تەڭ ءمان بەرىپ، باسقالاردىڭ ورنىندا تۇرىپ ويلاۋ ارقىلى ءوزارا تۇسىنىستىكتى ارتتىرۋ، پارىقتاردى ساقتاپ، ۇقساستىققا ۇمتىلىپ، تاتۋلىق پەن بەرەكە - بىرلىكتى جەبەۋ ارقىلى ۇيىمنىڭ ۇيىسۋ كۇشى مەن جۇمىلدىرۋ كۇشىن ۇزدىكسىز ارتتىرۋىمىز كەرەك.

  ەكىنشى، بەيبىتشىلىك پەن حاۋىپسىزدىكتىڭ ورتاق نەگىزىن مىقتاپ ورناتايىق. ءبىز «ءۇش ءتۇرلى كۇشكە» سوققى بەرۋدىڭ 2019 - جىلدان 2021 - جىلعا دەيىنگى ىنتىماقتاستىق باعدارلاماسىن بەلسەنە تياناقتاندىرىپ، لاڭكەستىككە قارسى «بەيبىتشىلىك ەلشىسى» سياقتى بىرلەسكەن مانەۆرلەردى ۇزدىكسىز وتكىزىپ، قورعانىس حاۋىپسىزدىگى، زاڭ اتقارۋ حاۋىپسىزدىگى، ينفورماتسيا حاۋىپسىزدىگى جاقتارىنداعى ىنتىماقتاستىقتى كۇشەيتۋىمىز كەرەك. «شاڭحاي ىنتىماقتاستىق ۇيىمى − اۋعانستان بايلانىس گرۋپپاسىنىڭ» رولىن ساۋلەلەندىرىپ، اۋعانستاننىڭ بەيبىت قايتا قۇرۋ ۇدەرىسىن ىلگەرىلەتۋىمىز كەرەك. كەلەشەكتەگى 3 جىلدا، جۇڭگو جۇڭگو − شاڭحاي ىنتىماقتاستىق ۇيىمى حالىقارالىق ءادىليالىق اۋىس - كۇيىس، ىنتىماقتاستىق تاربيە بازاسى سياقتى تۇعىرلاردان پايدالانىپ، تاراپتار ءۇشىن 2000 زاڭ اتقارۋشى قىزمەتكەردى تاربيەلەپ بەرىپ، زاڭ اتقارۋ قابىلەتى قۇرىلىسىن كۇشەيتۋدى قالايدى.

  ءۇشىنشى، بىرگە دامۋ مەن گۇلدەنۋدىڭ سەرپىندى قوزعالتقىشىن قالىپتاستىرايىق. ءبىز دامۋ ستراتەگيالارىنىڭ ءتۇيىسۋىن جەبەپ، بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىن نەگىز ەتىپ، «ءبىر بەلدەۋ، ءبىر جول» قۇرىلىسىن ىلگەرىلەتىپ، وڭىرلىك ساۋدانىڭ قولايلاسۋ ۇدەرىسىن تەزدەتىپ، حالىقارالىق جول تاسىمالىن قولايلاستىرۋ كەلىسىمى سياقتى ىنتىماقتاستىق حۇجاتتارىن جەدەل تياناقتاندىرۋىمىز كەرەك. جۇڭگو تاراپتاردىڭ بيىل 11 - ايدا شاڭحايدا وتەتىن تۇڭعىش كەزەكتى جۇڭگو حالىقارالىق يمپورت كورمەسىنە بەلسەنە قاتىناسۋىن قارسى الادى. جۇڭگو ۇكىمەتى چيڭداۋدا جۇڭگو − شاڭحاي ىنتىماقتاستىق ۇيىمىنىڭ جەرگىلىكتى ەكونوميكا - ساۋدا ىنتىماقتاستىعىنان ۇلگى كورسەتۋ اۋماعىن قۇرۋدى قولدايدى ءارى «جۇڭگو − شاڭحاي ىنتىماقتاستىق ۇيىمىنىڭ زاڭدىق قىزمەت كورسەتۋ كوميتەتىن» قۇرىپ، ەكونوميكا - ساۋدا ىنتىماقتاستىعىنا زاڭدىق قولداۋ كورسەتەدى.

  مەن جۇڭگونىڭ شاڭحاي ىنتىماقتاستىق ۇيىمى بانكە بىرىككەن تۇلعاسىنىڭ اياسىندا 30 ميلليارد يۋانعا تەڭ ارنايى قارىز اقشا تاعايىندايتىندىعىن جاريالايمىن.

  ءتورتىنشى، گۋمانيتارلىق اۋىس - كۇيىس ىنتىماقتاستىعىنىڭ ورتاق دانەكەرىن شيراتا تۇسەيىك. ءبىز مۇشە ەلدەردىڭ قورشاعان ورتانى قورعاۋ ىنتىماقتاستىعى ويى سياقتى حۇجاتتاردى بەلسەنە تياناقتاندىرىپ، جاستاردىڭ اۋىس - كۇيىس لاگەرى سياقتى ايگىلى ماركا نىسانداردى ۇزدىكسىز جاقسى جۇرگىزىپ، وقۋ - اعارتۋ، عىلىم - تەحنيكا، مادەنيەت، ساياحات، دەنساۋلىق ساقتاۋ، اپات زيانىن ازايتۋ، اقپارات قۇرالدارى سياقتى ءار سالاداعى ىنتىماقتاستىقتى تىڭعىلىقتى ىلگەرىلەتۋىمىز كەرەك. كەلەشەكتەگى 3 جىلدا، جۇڭگو مۇشە ەلدەرگە ادام كۇشى بايلىعىن اشۋ بويىنشا 3000 ادام تاربيەلەپ، جۇرتتىڭ شاڭحاي ىنتىماقتاستىق ۇيىمى شاڭىراعى جونىندەگى تۇسىنىگى مەن مويىنداۋىن كۇشەيتەدى. جۇڭگو فىڭيۇن − 2 اۋا رايى جاساندى سەرىگىنەن پايدالانىپ تاراپتارعا مەتەورولوگيالىق قىزمەت كورسەتۋدى قالايدى.

  بەسىنشى، حالىقارالىق ىنتىماقتاستىقتىڭ سەرىكتەستىك تورىن بىرگە كەڭەيتەيىك. ءبىز باقىلاۋشى ەلدەر، ديالوگتاسۋشى سەرىكتەر سياقتى وڭىردەگى مەملەكەتتەرمەن اۋىس - كۇيىس، ىنتىماقتاستىقتى كۇشەيتىپ، ب م ۇ سياقتى حالىقارالىق جانە وڭىرلىك ۇيىمدارمەن سەرىكتەستىك قاتىناستى نىعايتىپ، حالىقارالىق اقشا قورى ۇيىمى، دۇنيە بانكەسى سياقتى حالىقارالىق فينانس قۇرىلىمدارىمەن ديالوگ وتكىزىپ، قولامتالى ماسەلەلەردى شەشۋدى ىلگەرىلەتۋگە، الەمدىك جونگە سالۋدى كەمەلدەندىرۋگە ۇلەس قوسۋىمىز كەرەك.

  كاسىپتەستەر!
 ءبىر جىلدان بەرى، مۇشە ەلدەردىڭ زور كۇشپەن قولداۋى مەن كومەگىنىڭ ارقاسىندا جۇڭگو ءتوراعا ەلدىك قىزمەتىن ورىندادى ءارى وسى جولعى باس قوسۋدى وتكىزدى. وسى ارادا مەن كوپشىلىككە شىن نيەتپەن العىس ايتامىن. جۇڭگو مۇشە ەلدەرمەن بىرگە بەلسەندى ىسكەرلىك، دوستىق ىنتىماقتاستىق رۋحىن نەگىز ەتىپ، وسى جولعى ءماجىلىستىڭ ورتاق تانىمىن جاپپاي تياناقتاندىرىپ، كەلەسى كەزەكتەگى ءتوراعا ەل قىرعىزستاننىڭ قىزمەتىن قولداپ، ۇيىمنىڭ ءتىپتى جارقىن كوركەم بولاشاعىن قول ۇستاسا قۇرۋدى قالايدى.

  سىزدەرگە راقىمەت!

  (شينحۋا اگەنتتىگىنىڭ 6 - ايدىڭ 10 - كۇنى چيڭداۋدان بەرگەن حابارى)

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «ءتاڭىرتاۋ تورابىنان» الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

بىزبەن بايلانىس جارناما قىزمەتى لەبىز قالدىرۋ ءبىز تۋرالى