− ءتوراعا شي جينپيڭنىڭ شاڭحاي ىنتىماقتاستىق ۇيىمىنىڭ چيڭداۋ باسشىلار باس قوسۋىندا سويلەگەن ماڭىزدى ءسوزى جونىندە (3)
مانات تاۋ كوك تەڭىزبەن جالعاسىپ، چيڭداۋ قالاسىندا الىستان كەلگەن دوستار باس قوستى. حۋاڭپۋجياڭ وزەنى جاعاسىنان حۋاڭحاي تەڭىزىنىڭ جاعالاۋىنا دەيىن، قادامى جۇڭگودان باستالعان شاڭحاي ىنتىماقتاستىق ۇيىمى وسى جەردە تاعى ءبىر مارتە اتقا قوندى.
«كوپشىلىكتىڭ بىرگە قۇلشىنۋىندا شاڭحاي ىنتىماقتاستىق ۇيىمىنىڭ بولاشاعىنىڭ، ءسوز جوق، اناعۇرلىم نۇرلى بولاتىنىنا كامىل سەنەمىن!» شاڭحاي ىنتىماقتاستىق ۇيىمىنا مۇشە ەلدەردىڭ باسشىلارىمەن بىرگە تىلشىلەردى قابىلداعاندا، ءتوراعا شي جينپيڭ چيڭداۋ باسشىلار باس قوسۋى قول جەتكىزگەن ماڭىزدى تابىستاردى تانىستىرىپ، «شاڭحاي ىنتىماقتاستىق ۇيىمى ەرەجەسىنىڭ» باستى ماقساتى مەن پرينسيبىنە بويسۇنۋدى قايتالاي دارىپتەپ، ءوزارا سەنىم، ءوزارا تيىمدىلىك، تەڭدىك، ءوزارا اقىل - كەڭەس، مادەنيەتتەردىڭ سان الۋاندىعىنا قۇرمەت ەتۋ، بىرلەسىپ دامۋعا دەگەن ۇمتىلىس سىندى «شاڭحاي رۋحىن» اسقاقتاتۋعا ۇندەپ، تاتۋ كورشىلىك دوستىققا تاباندى بولۋدىڭ، سىندارلى ىنتىماقتاستىقتاردى تەرەڭدەتۋدىڭ جارقىن بولاشاعىنا كوز تاستاپ، شاڭحاي ىنتىماقتاستىق ۇيىمىنىڭ تاريحتىڭ جاڭا كەزەڭىنە وتكەندەگى دامۋ جوباسىن كەسكىندەپ، حالىقارالىق قوعامدا كەڭ اڭىس قوزعادى.
شاڭحايداعى باسشىلار باس قوسۋىندا ماقسات پەن پرينسيپتى ايقىنداۋدان، بىشكەكتەگى باسشىلار باس قوسۋىندا اتقارۋ باعدارلاماسىن ماقۇلداۋعا، دۋشانبەدەگى باسشىلار باس قوسۋىندا دامۋ ستراتەگياسىن جاساۋدان تاشكەنتتەگى باسشىلار باس قوسۋىندا ارەكەت جوسپارىن تياناقتاندىرۋعا دەيىنگى 17 جىلدا، ءار رەتكى باسشىلار باس قوسۋىنىڭ وتكىزىلۋى شاڭحاي ىنتىماقتاستىق ۇيىمىنىڭ جەتىلۋ بارىسىنىڭ بەلگىلەرىنە اينالىپ، ءار جەتىستىكتىڭ جۇزەگە اسۋى ءوزارا پايدا جەتكىزىپ، تەڭ ۇتۋدىڭ زور مۇمكىندىگىن كورسەتتى. بۇگىنگى تاڭدا، شاڭحاي ىنتىماقتاستىق ۇيىمى تاريحتىڭ جاڭا كەزەڭىنە ءوتتى. جاڭا جاعدايدا، تەك چيڭداۋ باسشىلار باس قوسۋى قول جەتكىزگەن ورتاق تانىمدار مەن جەمىستەردى جان - جاقتى جۇزەگە اسىرعاندا عانا، شاڭحاي ىنتىماقتاستىق ۇيىمىنىڭ باياندى، اقاۋسىز، ورنىقتى دامۋىنا كەپىلدىك ەتىپ، دامۋ جوباسىنىڭ شىندىققا اينالۋىنا مۇمكىندىك جاساۋعا بولادى.
قازىر الەم قاۋىرت دامۋ، زور وزگەرىس، جاپپاي رەتتەلۋ كەزەڭىندە تۇر، دۇنيە ءجۇزىنىڭ كوپ ۇيەكتەنۋى، ەكونوميكانىڭ جاھاندانۋى ىشكەرىلەي دامۋدا، مەملەكەت پەن مەملەكەتتىڭ ءبىر - بىرىنە سۇيەنىپ ءومىر ءسۇرۋى اناعۇرلىم نىعايا ءتۇستى، حالىقارالىق بارىس - كەلىس پەن ىنتىماقتاستىقتى كەڭەيتۋ اسا ماڭىزدى بولىپ وتىر. شاڭحاي ىنتىماقتاستىق ۇيىمى تەك ىنتىماقپەن سەلبەسۋدى كۇشەيتىپ، بەيبىت ىنتىماقتاستىق ورناتاتىن، ءوزارا تەڭ مامىلە جاساساتىن، اشىق، سيىسىمدى بولاتىن، تەڭ ۇتىپ، بىرگە يگىلىكتەنەتىن سەرىكتەستىك قارىم - قاتىناستى تەرەڭدەتكەندە عانا، باياندى ورنىقتىلىق پەن دامۋدى جۇزەگە اسىرىپ، الەمنىڭ بەيبىتشىلىگى مەن ورنىقتىلىعىن قورعاۋ، ادامزاتتىڭ دامۋ - گۇلدەنۋىن جەبەۋ ءۇشىن تىڭ، اناعۇرلىم كەسەك ۇلەس قوسا الادى.
«ەڭ ۇلكەن پايدا − تىنىشتىق، ەڭ ۇلكەن قاتەر − بىلىقپالىق». ءوڭىردىڭ حاۋىپسىزدىگى مەن ورنىقتىلىعىن قورعاۋ − شاڭحاي ىنتىماقتاستىق ۇيىمى اياسىنداعى ىنتىماقتاستىقتىڭ باسىم باعىتى. شاڭحاي ىنتىماقتاستىق ۇيىمىنىڭ باياندى دامۋىنىڭ حاۋىپسىزدىك نەگىزىن بەكەمدەۋ ءۇشىن، ءتوراعا شي جينپيڭ دارىپتەگەندەي، ورتاق، جان - جاقتى، ىنتىماقتاسقان، باياندى حاۋىپسىزدىك كوزقاراسىن نەگىزگە الىپ، لاڭكەستىككە قارسى اقپاراتتار اۋىستىرۋدى جانە بىرلەسكەن ءىس - ارەكەتتەردى تەرەڭدەتىپ، قاتىستى زاڭدىق نەگىز جانە قابىلەت قۇرىلىسىن كۇشەيتىپ، «ءۇش ءتۇرلى كۇشكە»، ەسىرتكى اتكەزشىلىگىنە، مەملەكەت ارالىق ۇيىمداسقان قىلمىسقا، ينتەرنەتتىك قىلمىسقا ۇتىمدى سوققى بەرىپ، ءوڭىردىڭ حاۋىپسىزدىگى مەن ورنىقتىلىعىن بىرلەسىپ قورعاۋ كەرەك.
ناقتى ىنتىماقتاستىق − شاڭحاي ىنتىماقتاستىق ۇيىمى دامۋىنىڭ ماتەريالدىق نەگىزى جانە تۇپكى قوزعاۋشى كۇشى، ەكونوميكانىڭ جاھاندانۋى مەن وڭىرلىك ءبىر تۇلعالانۋعا ۇيلەسۋ − جالپى بەتالىس. ءبىر جاقتان، الەمدىك ساۋدا ۇيىمى ەرەجەلەرىنىڭ قۇزىرەتتىلىگى مەن ونىمدىلىگىن قورعاپ، اشىق، سيىسىمدى، جاريا، كەمسىتپەيتىن، ەرەجەنى نەگىز ەتەتىن كوپ جاقتى ساۋدا ءتۇزىلىسىن بەكەمدەپ، ءارقانداي فورماداعى ساۋدا قورعامپازدىعىنا قارسى تۇرۋ كەرەك. ەندى ءبىر جاقتان، ءوزارا پايدا جەتكىزىپ، تەڭ ۇتۋ پرينسيبىن نەگىز ەتۋدى جالعاستىرىپ، وڭىرلىك ەكونوميكالىق ىنتىماقتاستىق تۋرالى ورنالاستىرۋلاردى كەمەلدەندىرىپ، «ءبىر بەلدەۋ، ءبىر جول» قۇرىلىسى اياسىنداعى ىنتىماقتاستىق پەن دامۋ ستراتەگيالارىن ءتۇيىستىرۋدى كۇشەيتىپ، ەكونوميكا - ساۋدا، قارجى سالۋ، فينانس، ءوزارا بايلانىس، اۋىل شارۋاشىلىعى سياقتى سالالارداعى ىنتىماقتاستىقتاردى نىعايتىپ، ساۋدا مەن قارجى سالۋعا قولايلى جاعداي جاساۋدى ىلگەرىلەتىپ، ءوڭىردىڭ توعىسپالى دامۋىنىڭ جاڭا اۋقىمىن قالىپتاستىرۋ كەرەك. تەك وسىلاي ىستەگەندە عانا، وڭىردەگى ءار ەل حالقىن باقىتقا كەنەلتىپ، الەمدىك ەكونوميكانىڭ دامۋىنا قوزعاۋشى كۇش ۇستەۋگە بولادى.
«ەكى ەلدىڭ قارىم - قاتىناسى ەكى ەل حالقىنىڭ بارىس - كەلىسى نەگىزىندە ورنايدى». مۇشە ەلدەردىڭ ىنتىماعى شاڭحاي ىنتىماقتاستىق ۇيىمىنىڭ دامۋ - ۇلعايۋىنىڭ ءتۇبىرلى كەپىلى جانە دارا باسىمدىعى، ءسوز جوق، ءار ەلدىڭ ۇزاق تاريح جانە شۇعىلالى مادەنيەت بايلىعىن قادىرلەۋ كەرەك. «جاستاردىڭ اۋىس - كۇيىس لاگەرىن»، «ماتەريالدىق ەمەس مادەني مۇرالار مىنبەرىن»، «جاستار حورىنىڭ جازدىق لاگەرىن» وتكىزىپ، «عىلىم - تەحنيكالىق سەرىكتەستىك جوسپارىن» باستاپ، اقپارات قۇرالدارى باسشىلارىنىڭ تۇڭعىش كەزەكتى باس قوسۋىن ۇيىمداستىردى... اماليات مىنانى دالەلدەدى: مادەنيەتتەردىڭ سان الۋاندىعى مەن قوعامدىق قۇن كوزقاراسىنا ءوزارا قۇرمەت ەتۋ نەگىزىندە، مادەنيەت، ءبىلىم بەرۋ، عىلىم - تەحنيكا، قورشاعان ورتا، دەنساۋلىق ساقتاۋ، ساياحات، جاستار، اقپارات قۇرالدارى، سپورت سياقتى سالالاردا ناتيجەلى ىنتىماقتاستىقتاردى جالعاستىرعاندا عانا، مادەنيەتتەردىڭ ءبىر - بىرىنەن ۇلگى الۋىن، حالىقتار تىلەگىنىڭ توعىسۋىن جەبەۋگە بولادى.
جەل وڭىنان تۇرىپ، جەلكەن كوتەرۋدىڭ دە ءساتى جەتتى. جاڭا تاريحي باستامادا، بەلسەندى، ناقتى، دوستىق ىنتىماقتاستىق رۋحىمەن چيڭداۋ باسشىلار باس قوسۋىنىڭ ورتاق تانىمدارىن جاپپاي جۇزەگە اسىرىپ، تاڭداۋلى ءداستۇردى اسقاقتاتىپ، ءار سالاداعى ىنتىماقتاستىقتاردى ىلگەرىلەتسەك، ءبىز ءوڭىردىڭ باياندى تىنىشتىعى مەن گۇلدەنىپ - دامۋى ءۇشىن اناعۇرلىم كەسەك ۇلەس قوسىپ، الەمنىڭ بەيبىتشىلىگى مەن دامۋىنا اناعۇرلىم كوپ «شاڭحاي ىنتىماقتاستىق ۇيىمىنىڭ كۇشىن» ۇستەي الامىز.
(شينحۋا اگەنتتىگىنىڭ 6 - ايدىڭ 12 - كۇنى بەيجيڭنەن بەرگەن حابارى)
