قۇمىل تىلشىلەر پۋنكتىنەن كۋ جۇنفىڭ، جاۋ يۇيۋي
قىزىپ تۇرعان مايعا قىزىل بۇرىش سالساڭىز، ءدامى ءتىل ۇيىرەتىن مايعا شىلانعان قىزىل بۇرىش بولىپ شىعادى. ال زىعىر مايىن وندىرەتىن عۇپۇر ابدول تۋعان باۋىرىنداي بولىپ كەتكەن ۋ يۇندۇڭعا جولىققان كەزدە، القاۋعا تاتيتىنداي مەيىرگە تولى سۇيىسپەنشىلىك تۋىندايدى.
«ماي تارتۋ زاۆودىن اشقالى 4 جىل بولدى، مەن 3 جىل قارىز الدىم، ۋ اعامنىڭ كومەگى بولماعاندا بۇل زاۆودتى بۇگىنگە دەيىن جۇرگىزە المايتىن ەدىم»، - دەدى عۇپۇر 5 - ايدىڭ 25 - كۇنى اسەرلەنىپ.
عۇپۇر مەن ۋ يۇندۇڭنىڭ اڭگىمەسىن ولاردىڭ بالالىق شاعىنان باستاۋعا تۋرا كەلەدى. قۇمىل قالاسى ەۋىرعول رايونى استانا قالاشىعى تۇيەقارىن قىستاعىنىڭ تۇرعىنى عۇپۇر مەن كورشىسى ۋ يۇندۇڭ قۇرداس بولعاندىقتان قارشادايىنان بىرگە وسەدى. عۇپۇر زەرەك ءارى ىسكەر بولاتىن، ۇلكەندى - كىشىلى ەلەكتر سايماندارىن، ءتۇرلى اۋىل شارۋاشىلىق ماشينا - سايماندارىن جوندەي الاتىن، وسى ونەرىنىڭ ارقاسىندا ول ءۇي ەلەكتر جابدىقتارىن دانەكەرلەۋ - جوندەۋ دۇكەنىن اشىپ، ماڭىنداعى اۋىلداستارعا قىزمەت كورسەتەدى. ۋ يۇندۇڭ بولسا استانا قالاشىعىنداعى ماقتا ەگەتىن اۋقاتتى شاڭىراق، ەگىن ەگۋدىڭ مايتالمانى. عۇپۇر ۇزاق جىلداردان بەرى ۋ يۇندۇڭنىڭ اۋىل شارۋاشىلىق ماشينا - سايماندارىن اقىسىز جوندەپ بەرسە، ۋ يۇندۇڭ ونىڭ ماقتا ەگۋىنە جەتەكشىلىك ەتەدى، وسىلاي ءبىر - بىرىنە قول ۇشىن بەرە ءجۇرىپ، اۋقاتتانۋدىڭ جولىندا ءبىر - بىرىنە سۇيەنىش بولادى.
2015 - جىلى عۇپۇر 500 مىڭ يۋان قارجى قوسىپ، ماي تارتۋ زاۆودىن قۇرادى، الايدا قۇرىلعىلارىن ورناتىپ، سىناقتان وتكىزىپ بولىپ، شيكىزات كىرگىزىپ ءوندىرىسىن باستايتىن كەزدە، عۇپۇر قارجى جەتىسپەۋ سالدارىنان شيكىزات ساتىپ الا المايدى.
«اعا، قولىمداعى بار قارجىنى زاۆود سالۋعا جۇمسادىم، شيكىزات الۋعا اقشا قالماي قالدى»، - دەپ عۇپۇر ۋ يۇندۇڭعا تەلەفون شالادى.
«مەن ساعان 50 مىڭ يۋان قارىز بەرىپ تۇرايىن»، - دەيدى ۋ يۇندۇڭ قولما - قول. سول جىلى عۇپۇر شيكىزات الۋعا جالپى 200 مىڭ يۋان جۇمسايدى، مۇنىڭ تورتتەن ءبىر بولەگىن ۋ يۇندۇڭ قارىزعا بەرىپ تۇرعان ەدى.
ءار جىلدىڭ 9 - ايى، ماي تارتۋعا پايدالاناتىن شەكىلدەۋىك، زىعىر سىندى اۋىل شارۋاشىلىق ونىمدەرى ارت - ارتىنان بازارعا شىعىپ، شيكىزات الاتىن ەڭ تاماشا مەزگىل، الايدا وسى مەزگىل كەلگەن سايىن عۇپۇردىڭ قولىندا اينالىمعا سالاتىن ماندىمدى قارجى بولماي قالادى. 2016 - جىلى 9 - ايدا ۋ يۇندۇڭ عۇپۇرعا 100 مىڭ يۋان قارىز بەرىپ تۇرادى؛ وتكەن جىلى 9 - ايدا اۋىل شارۋاشىلىق ونىمدەرىنىڭ باعاسىندا تولقۋ بولعاندىقتان، ۋ يۇندۇڭنىڭ ەگىنشىلىكتەن كىرگىزگەن كىرىسى ازايسادا عۇپۇرعا تاعى 30 مىڭ يۋان قارىز بەرەدى.
ۋ يۇندۇڭنىڭ عۇپۇرعا كومەكتەسۋى اعاسىنىڭ ىنىسىنە قارايلاسقان ءبىر وتباسىنىڭ شارۋاسى سياقتى، قولىنان كەلگەن كومەگىن ايامايدى. ويتكەنى عۇپۇر دا ونى تۋعان اعاسىنداي كورىپ، نەشە جىلدان بەرى قانشا رەت تراكتورىن جوندەپ، اۋىل شارۋاشىلىق ماشينا - سايماندارىن دانەكەرلەپ بەرگەنى ەشكىمنىڭ دە ەسىندە جوق.
وتكەن جىلى كۇزدىڭ ءبىر كۇنى، ۋ يۇندۇڭ تراكتورمەن ماقتا ساتىپ الاتىن جەرگە ماقتا اپارا جاتقان. الايدا جارىم جولعا بارعاندا، ارتقى دوڭگەلەكتەن كىنارات شىعادى. ۋ يۇندۇڭ عۇپۇرعا تەلەفون شالادى، ۇيىندە جۇمىس ىستەپ جاتقان عۇپۇر قولىنداعى جۇمىسىن تاستاي سالىپ، تراكتور بۇزىلعان جەرگە جەتەدى. عۇپۇر كىلتيپان شىققان جەرىن ءبىر ساعاتتاي الىسىپ ءجۇرىپ جوندەپ بەرەدى، ۋ يۇندۇڭ تراكتورىن ايداپ جولعا شىعادى. بىرنەشە كۇننەن كەيىن، ۋ يۇندۇڭ عۇپۇرعا جوندەۋ اقىسىن بەرگەندە عۇپۇر الماي قويادى.
نە ءۇشىن قولىنداعى جۇمىسىن تاستاي سالىپ ونىڭ تراكتورىن جوندەپ بەرەدى؟ ويتكەنى ەگىنشىلىكتىڭ قىر - سىرىنا قانىق عۇپۇر ماقتا وڭاي جاناتىن زات، جول بويىندا كوپ تۇرسا قاتەرلى ەكەنىن ابدەن بىلەدى. جانە ەگىنشىلىكتىڭ قاربالاس كەزىندە، ەگىس جۇمىستارى ءبىر - بىرىنە بايلانىستى، تراكتوردى ۋاعىندا جوندەمەسە، تۇستە ماقتا تەرەتىن جۇمىسشىلارعا تاماق جەتكىزىپ بەرە الماي قالادى دا، تۇستەن كەيىن اتىز باسىنداعى ماقتانى ۇيىنە تاسۋعا ۇلگىرمەيدى.
ۋ يۇندۇڭنىڭ كومەگىنىڭ ارقاسىندا، عۇپۇردىڭ ماي تارتۋ زاۆودىنىڭ ءوندىرىس ساۋداسى بارعان سايىن جاقسارادى. ءبىرىنشى جىلى ءتۇرلى ازىقتىق مايدان 40 نەشە توننا؛ ەكىنشى جىلى 80 نەشە توننا وندىرسە؛ ءۇشىنشى جىلعا بارعاندا 100 نەشە تونناعا جەتكىزەدى؛ بيىل الدىڭعى جارىم جىلدا، ماي تارتۋ زاۆودى وندىرگەن ازىقتىق ماي 120 توننادان اسادى. قازىر عۇپۇر ازىقتىق مايدى قوراپتاۋ جۇمىسىمەن قاربالاس بولىپ ءجۇر. «قاراشى، مەنىڭ ماي تارتۋ زاۆودىم كىشكەنتاي بالا سياقتى جىل سايىن وسۋدە، جىل سايىن ۇلكەيۋدە، بارعان سايىن كەمەلدەنۋدە»، - دەدى عۇپۇر.
عۇپۇر جىل سايىن زاۆودىندا وندىرگەن ازىقتىق مايدان نەشە ءجۇز كيلوگرام ماي الىپ، قىستاقتاعى كەدەي وتباسىلاردان، مۇمكىندىگى شەكتەۋلى جانداردان حال سۇرايدى. عۇپۇر بىلاي دەدى: مەن ۇلتتار ىنتىماعىنىڭ يگىلىگىنەن كەنەلگەن جانمىن، مەن ءىس جۇزىندىڭ ارەكەتىم ارقىلى ۇلتتار ىنتىماعىن قورعاپ، ۇلتتار ىنتىماعىن جەبەپ، ءار ۇلت قىستاق تۇرعىندارىنىڭ ءتىپتى دە جاراسىمدى وتۋىنە دەم بەرىپ، ۇلتتار ىنتىماعىنىڭ نەگىزىن ءتىپتى دە بەكەمدەيمىن.
