رايونىمىز جيىنى 3 ميلليون 536 مىڭ ادام - رەت ساياحاتشى قابىلدادى
ءتىلشىمىز جيا چۇنشيا 6 - ايدىڭ 18 - كۇنى ۇرىمجىدەن حابارلايدى. اۆتونوميالى رايوندىق ساياحاتتى دامىتۋ كوميتەتىنەن ۇعىسۋعا قاراعاندا، ورازا ايت، قياق كۇرىش مەرەكەلەرى كەزىندە رايونىمىزدىڭ ساياحات ونىمدەرىمەن قامداۋى الۋان تۇرلىلەنىپ، ساياحات بازارى بارىنشا قىزعان. 6 - ايدىڭ 15 - كۇنىنەن 18 - كۇنىنە دەيىن رايونىمىز جيىنى 3 ميلليون 536 مىڭ ادام - رەت ساياحاتشى قابىلداپ، ساياحاتتىق جالپى تۇتىنۋ 3 ميلليارد 211 ميلليون يۋان بولعان.
مەرەكە كەزىندە شينجياڭنىڭ جەر - جەرى، ءارقايسى كورىنىستىك اۋماقتار شينجياڭنىڭ ءىشى مەن سىرتىنان كەلگەن كوپتەگەن ساياحاتشىلاردى قابىلدادى. 6 - ايدىڭ 17 - كۇنى تۇرپاننىڭ تەمپەراتۋراسى C°37قا جەتتى، كۇن شىجىپ تۇرسا دا ساياحاتشىلاردىڭ سانى مول بولدى. جالىنتاۋداعى 12 مەتر بيىك تەرمومەتردىڭ الدىندا جىجياڭنىڭ جوۋشانىنان كەلگەن ساياحاتشى ۋ شياۋ ساپارلاسىنىڭ كومەگىندە سۋرەتكە ءتۇستى: «بۇرىن جالىنتاۋدى <باتىسقا ساياحات> سەريالىنان عانا كورگەمىن، وسى جولى ءوز كوزىممەن كوردىم، جالىنتاۋدىڭ اتاعى ايتسا ايتقانداي ەكەن، قالايدا سۋرەتكە ءتۇسۋىم كەرەك». ءتىپتى دە كوپ ساياحاتشىلار تۋىستارىن ەرتىپ ساياحاتتاۋ، قالا ماڭىنداعى كورىنىستىك اۋماقتارعا ءبىر كۇندىك ساياحاتتاۋ سياقتى ساياحاتتاۋ فورمالارىن تاڭدادى. تيانشان بوعدا كولى، جانبۇلاق كورىنىستىك اۋماقتارىنىڭ كۇندىك ورتاشا ساياحاتشى قابىلداۋ مولشەرى 10 مىڭعا جۋىقتادى. ءۇرىمجى دىحۇي ۋاندا الاڭى، حۇيجياشىداي سياقتى جاڭاشا ۋنيۆەرسال ساۋدا ورىندارىندا ادامدار سەڭدەي سوعىلىسىپ، ساۋدا كۇسەت بولدى.
تۇتاس الاپتىق ساياحاتتىڭ دامۋىنا ىلەسە، رايونىمىزداعى كەرۋەنكولىك ساياحاتى، اۋىل - قىستاق ساياحاتى، مادەنيەت ساياحاتى ءۇرتىس قىزدى. 6 - ايدىڭ 15 - كۇنى ەلىمىزدەگى 12 ولكە، قالادان كەلگەن 23 كەرۋەنكولىك قۇمىلعا جينالىپ جولعا شىعىپ، «كەرۋەنكولىكپەن شينجياڭدى ساياحاتتاۋ» اتىنداعى ساياحات قيمىلىن باستادى، ولار شينجياڭداعى 48 اۋدان، قالانى ارالاپ، جيىنى 11 مىڭ كيلومەتردەن استام جول باسادى، بۇل ساپاردا ساياحاتشىلار شينجياڭنىڭ كوركەم كورىنىستەرىن تۇگەل ارالاپ، شينجياڭنىڭ ەرەكشە ۇلتتىق سالت - سانا مادەنيەتىنە قانىعادى. 6 - ايدىڭ 16 - كۇنىنەن 18 - كۇنىنە دەيىن يانجي حۇيزۋ اۆتونوميالى اۋدانى ساياحاتشىلاردى يانجيدىڭ شياڭسىحۋ كولىندە وتكىزىلگەن «شينجياڭنىڭ وڭتۇستىگىندەگى اۋىلدار» ەرەكشەلىگىنە يە مادەنيەت ساياحات قيمىلىنا قاتىناسۋعا شاقىردى.
قيمىلدا حۋا - ىر كوركەمونەرى ءان - ءبي كونسەرتى، مادەنيەت ولەڭدەرىن وقۋ سياقتىلاردان سىرت، شياڭسىحۋ كولى كورىنىستىك اۋماعىنداعى قۇستار سۋرەتى تۋىندى كورمەسى، كولدە قايىق ەسىپ ساياحاتتاۋ سياقتى كوپتەگەن ويىندار وتكىزىلدى.
ساياحاتشىلاردىڭ مەرەكەسىن شات - شادىمان وتكىزۋى ءۇشىن، شينجياڭداعى ايماق، وبلىس، قالالاردىڭ ساياحات باسقارۋ تاراۋلارى ءبىر قىدىرۋ الۋان فورمالى، بۇقارانىڭ قاتىناسۋ تەبىنى زور ساياحاتتىق، مەرەكەلىك قيمىلداردى جولعا قويدى، ءارقايسى كورىنىستىك اۋماقتار حالىققا تيىمدىلىك جەتكىزۋ شارالارىن مولىنان اتقارىپ، ءار ۇلت بۇقاراسىنا اناعۇرلىم كوپ باقىت سەزىمىن سيلادى. فۋكاڭ قالاسى «10 مىڭ سانشيلىك ساياحاتشىنىڭ فۋكاڭدا قونىپ، بوعدا كولىن تەگىن ساياحاتتاۋى» اتىنداعى شينجياڭعا كومەكتەسۋ تاقىرىپتىق قيمىلىن ورىستەتتى؛ تۇرپاننىڭ كورىنىستىك اۋماقتارىندا ساياحات كەسكىندەرىن تالاپ بويىنشا ينتەرنەتكە شىعارعان الدىڭعى 10 ساياحاتشىعا تۇرپان ساياحاتىنىڭ جىلدىق بەلەتى بەرىلۋمەن بىرگە، شاعىن بەينە جازبانى ۋيچات دوستار شەڭبەرىنە شىعارعاندار ءبىر قۇمىرا كارىز مينەرال سۋىنا يە بولادى؛ اۋات اۋدانى دولان تايپاسى كورىنىستىك اۋماعى «اۋات اۋدانىنىڭ 5 - كەزەكتى ورىك مەرەكەسى جانە دولاندىقتاردىڭ قياق كۇرىش مەرەكەسىن وتكىزۋى» قيمىلىن وتكىزدى، قيمىل كەزىندە كورىنىستىك اۋماقتىڭ بەلەتى بارلىق ساياحاتشىعا جارىم باعادا ساتىلدى، ءۇشتۇرپان اۋدانى يانچۋان تاۋى كورىنىستىك اۋماعى «ءۇشتۇرپان اۋدانى ورتەڭ وتى ساياحات مەرەكەسىن» وتكىزىپ، سول كۇنگى بەلەتتى تۇگەل تەگىن بەرىپ، ءتىپتى دە كوپ ساياحاتشىنى وزىنە باۋرادى.
مەرەكەنىڭ الدىندا، اۆتونوميالى رايوندىق ساياحاتتى دامىتۋ كوميتەتى ءتۇرلى دانەكەرلەر ارقىلى دەمالىس كەزىندەگى ساياحات جونىندەگى ينفورماتسيالاردى، ساياحات ەسكەرتپەلەرىن جاريالاۋمەن بىرگە، ساياحات حاۋىپسىزدىگى مەن بازاردى باقىلاۋ - باسقارۋدى كۇشەيتىپ، قىزمەت كورسەتۋ ساپاسىن جوعارىلاتۋعا ءمان بەرىپ، مادەنيەتتى ساياحاتتاۋدى دارىپتەپ، رايونىمىزدىڭ ساياحات بازارىنىڭ «حاۋىپسىز، ءتارتىپتى، ساپالى، ءونىمدى، وركەنيەتتى بولۋداي» دەمالىس ساياحاتى قىزمەت نىساناسىن جۇزەگە اسىردى.
