ءتىلشىمىز حي حۇڭۋي 6 - ايدىڭ 18 - كۇنى موريدان حابارلايدى. 6 - ايدىڭ 16 - كۇنى موري قازاق اۆتونوميالى اۋدانى يگەنبۇلاق اۋىلى يۋەلياڭدي قىستاعىنا بارعانىمدا قاتار - قاتار سالىنعان لاپاس ۇيلەر وزىندىك ەرەكشەلىكتى ايگىلەپ، بايىرعى ءداستۇرلى قىستاق پەن جاپ - جاسىل قىرات - قىرقالار قۇپ جاراسىپ، ايرىقشا كورىنىس قالىپتاستىرعاندىعىن كوردىم. مەرەكە كەزىندە ساياحاتشىلاردىڭ كوپتىگىنەن قىستاق دىر - دۋمانعا بولەنىپتى.
تاياۋ جىلداردان بەرى، موري اۋدانى اۋىل - قىستاق ساياحاتى مەن اۋىل - قىستاقتى كوركەيتۋ ستراتەگياسىن تىعىز ۇشتاستىرىپ، ءداستۇرلى قىستاقتى قورعاۋدى، اشۋدى، قىستاق تۇرعىندارىنىڭ تۇرمىسىن جاقسارتۋدى كورىكتى اۋىل - قىستاق قۇرىلىسىمەن ۇشتاستىرىپ، اۋىل مادەنيەتىن جالعاستىرۋ ەرەكشەلىگىنە يە بايىرعى قىستاق كورىنىسىن قالىپتاستىرىپ، شينجياڭنىڭ ءىشى - سىرتىنداعى ساياحاتشىلاردى مولىنان باۋرادى.
دەمالىس كەزىنەن پايدالانىپ وتباسىنداعىلارمەن، دوستارىمەن سىرتقا ساياحاتتاي شىققان ءۇرىمجى قالاسىنىڭ تۇرعىنى تاۋ شياڭحۇڭ فوتواپپاراتىمەن كوركەم كورىنىستەردى سۋرەتكە ءتۇسىرىپ جاتتى، «بۇل ارانىڭ ورتاسى تاماشا، سالت - ساناسى قاراپايىم، جەرگىلىكتى ءتۇسى قويۋ، ەرەكشەلىگى وتە ايقىن، كوڭىل سەرگىتىپ، بوي جازاتىن تاپتىرماس جەر ەكەن»، - دەدى ول.
سول كۇنى وسى قىستاقتىڭ تۇرعىنى يان شياڭبيننىڭ يانلاۋ - ۋ قوناقجايى دا قوناقتارعا لىق تولدى، ءدال وسى كۇنى قىزىنا قۇدالىق ايتتىرىپ جاتقان كەزگە تۋرا كەلىپ، دىر - دۋماندى تاماشالاۋعا ساياحاتشىلار دا كوپ جينالدى. اۋلادا بۇلدىرگەن، جاسىل كوكونىس قاۋلاپ ءوسىپ تۇر، تازا، جانعا جايلى بولمەلەر ساياحاتشىلاردى بىردەن باۋرادى.
«كىرىسىم بۇرىنعى ەگىن ەككەندەگىدەن 2 − 3 ەسە ارتتى، اقشا تاۋىپ، سەنىمىم ارتا ءتۇستى، تازالىق بولمەسىن قايتادان بەزەندىرىپ، ساياحاتشىلارعا اناعۇرلىم جايلى قونىس، كوڭىلدى ورتا ازىرلەۋدى جوسپارلاپ وتىرمىن»، - دەدى يان شياڭبين.
اۋدان ءىس جۇزىندىكتى شىعار ءتۇيىن ەتىپ، اۋىل - قىستاق ساياحاتى مەن اۋىل - قىستاقتى كوركەيتۋ ستراتەگياسىن تىعىز ۇشتاستىرىپ، «تاۋ، وزەندى كورۋگە بولاتىن، اۋىل كوركى ساعىنىشىن باساتىن» جەرگىلىكتى سالتتى كورنەكتىلەندىردى ءارى «بولمە سىرتىنان ۇزاق تاريح ەلەستەسە، بولمە ءىشى 5 جۇلدىزدى قوناقسارايداي» سەزىلەتىن مادەنيەتتىك قىزمەت كورسەتۋ يقۋاتىن ايگىلەدى، يگەنبۇلاق اۋىلى يۋەلياڭدي قىستاعىن، سايزىگۋ قىستاعىن، شيجىر قالاشىعى شۇيموگۋ قىستاعىن ۋاكىل ەتكەن اۋىل - قىستاق ساياحاتىنان ۇلگى كورسەتۋ ءتۇيىنىن قۇردى.
سول كۇنى شيجىر قالاشىعى شۇيموگۋ قىستاعى شۇيمولىقتار قوناقجايىنىڭ قوجايىنى چىن شياۋلان دا ءپىشاننان كەلگەن ءبىر توپ ساياحاتشىنى قارسى الدى، قوناقتار اۋلاداعى زالالسىز جاسىل كوكونىستەرگە ءتانتى بولىپ، كوكونىس باعىندا تۇرىپ قۋىرماش بۇيىرتتى. «ءبىز 10 نەشە ءتۇرلى جاسىل كوكونىس ەكتىك، بۇل ارا تاۋ ساعاسىنا، سۋ جاعاسىنا ورنالاسقان، كۇن جىلىعاندا قوناقتار ءتىپتى كوبەيەدى، شۇيمو وزەنى سايالاۋ، كوڭىل اشۋ، دەمالۋ رايونىنىڭ باسىمدىعى وسىدا جاتىر»، - دەدى چىن شياۋلان.
موري قازاق اۆتونوميالى اۋداندىق ساياحاتتى دامىتۋ كوميتەتى پارتيا باسشىلىق گرۋپپاسىنىڭ شۋجيى جاڭ يۇيتاڭ بىلاي دەدى: موري 6 اۋىل - قالاشىقتى، مەملەكەتتىك 7 ءداستۇرلى قىستاقتى قامتىعان تيانشان موري جۇڭگو اۋىل شارۋاشىلىق باقشاسىن سالۋدا، سالىنىپ بىتكەننەن كەيىن ەگىنشىلىك مادەنيەتى، دەنساۋلىق كۇتۋ، دەمالۋ، تىنىعۋ، وسى زامان مەن ءداستۇر ءوزارا توعىسقان حاۋىپسىز دەنساۋلىق ساقتاۋ، كۇتىنۋدەي شارۋالار اۋلاسى ۇلگىسىندەگى اۋىل تۇرمىسىن باستان كەشىرۋ رايونىنا اينالادى.
