ءتىلشىمىز لياڭ ليحۋا 6 - ايدىڭ 18 - كۇنى ۇرىمجىدەن حابارلايدى. 6 - ايدىڭ 15 - كۇنى ءۇرىمجى اۋدانى نانشان حالىقارالىق ساياحات رايونىنىڭ شارۋالار شاتتىعى ساياجايى دۋماندى بەينەگە شومدى، كوپتەگەن قالا تۇرعىندارى جەكە كولىگىمەن وتباسىنداعىلاردى ەرتىپ دەمالىس كۇندەرىن وتكىزگەلى وسى اراعا كەلدى.
تاياۋ جىلداردان بەرى، ءۇرىمجى اۋدانى ءۇرىمجى نانشان حالىقارالىق ساياحات رايونىنىڭ شارۋالار شاتتىعى ساياجايىن دامىتۋىنا قولداۋ كورسەتىپ، ءتىپتى دە كوپ ساياحاتشىلاردى باۋراۋمەن بىرگە، جەرگىلىكتى قىستاق تۇرعىندارىنىڭ جۇمىستانۋىن جەبەدى، كىرىستەرىن ارتتىردى.
ءتۇس مەزگىلىندە، مەن ءۇرىمجى اۋدانى بانفاڭگۋ اۋىلىنىڭ «داجۋاڭيۋان» شارۋالار شاتتىعى ساياجايىنا بارعانىمدا، قاقپا الدىنداعى اۆتوتۇراقتا دەرلىكتەي ورىن قالماپتى، اۋلا ادامدارعا لىق تولىپتى. قوجايىن كاڭ كاي ماعان: بۇگىن ساۋدا وتە كۇسەت بولدى، مەرەكە - مەيرام، دەمالىس كۇندەرى ءبىزدىڭ بۇل ارادا بوس ورىن قالمايدى، ءار كۇنى 600گە (رەت) تاياۋ ساياحاتشى قابىلدايمىز، قوناق بولمە مەن ارناۋلى بولمەلەردىڭ ەرتەڭگى پايدالانىلۋىنا تاپسىرىس بەرىلىپ بولدى، - دەدى.
«قازىر ۋاقىتىم شىعا قالسا، نانشانعا كەلىپ، شارۋالار شاتتىعى ساياجايىندا وتىرىپ، تازا اۋادان تىنىستاپ، ۇلى تابيعاتتىڭ كوركىنەن ءلاززات الىپ، اۋىل سالتاناتىنىڭ راحاتىن سەزىنگىم كەلەدى»، - دەدى لي مىرزا.
«داشياگۋ جينجياشانجۋاڭ ساياجايىنىڭ» قوجايىنى چىن شىجۇن: قازىر ساۋدام وتە كۇسەت، ساياحاتشىلار بارعان سايىن كوبەيۋدە، اسىرەسە، اپتا سوڭى مەن مەرەكە، دەمالىس كۇندەرى اسحانا ادامعا لىق تولادى، جىلدىق كىرىسىم 100 مىڭ يۋاننىڭ ۇستىندە»، - دەدى.
ءۇرىمجى اۋداندىق پارتكوم ۇگىت ءبولىمى اقپارات كەڭسەسىنىڭ مەڭگەرۋشىسى نان حاي بىلاي دەدى: ءۇرىمجى اۋداندىق ۇكىمەت جەرگىلىكتى قىستاق تۇرعىندارىن شارۋالار شاتتىعى ساياجايىن اشۋعا ىنتالاندىرىپ، كەدەيلەردى سۇيەمەلدەۋ ساياساتىن جاسادى، وسىنىڭ ارقاسىندا قىستاق تۇرعىندارىنىڭ كىرىسى نەداۋىر جوعارىلادى. سونىمەن بىرگە، ءۇرىمجى اۋدانى نانشان كورىنىس رايونىنىڭ ەكولوگيالىق ورتاسىن قورعاۋعا كۇش سالىپ، شارۋالار شاتتىعى ساياجايىندا «كومىردى گازعا اينالدىرۋ» قىزمەتىن بارىنشا ىلگەرىلەتتى، سونداي - اق شارۋالار شاتتىعى ساياجايىنىڭ تيجارات بارىسىندا تۋىنداعان اس - سۋ قوقىر - قوقسىعىن شوعىرلى ءبىر جاقتى ەتىپ، نانشاننىڭ تۇنىق اۋاسى مەن اۋىل - قىستاق كورىنىسىن قورعادى.
«تاياۋ جىلداردان بەرى، نانشاننىڭ ءمولدىر سۋى، جاسىل تاۋى ساياحاتشىلاردى باۋراپ، ساياحات ونىمدىلىگى بارعان سايىن جاقساردى. كەلەر قادامدا ءبىز نانشان حالىقارالىق ساياحات رايونىنىڭ اياسىن ءتىپتى دە كەڭەيتىپ، ءتىپتى دە كوپ ەل ءىشى - سىرتى ساياحاتشىلارىن وسى ارادا سەرۋەندەۋگە، ساياحاتتاۋعا باۋرايمىز»، - دەدى نان حاي نىق سەنىممەن.
