ايەل باقىتى نەمەن ولشەنەدى؟ قانداي ايەل باقىتتى؟ باقىتتى ايەل اتانۋ ءۇشىن نە كەرەك؟ بۇل سۇراقتارعا جاۋاپ رەتىندە پسيحولوگ يۋليا سۆياش باقىتتى ايەلگە ءتان 10 بەلگىنى اتاپ كورسەتتى:
1. ول باقىتتىڭ سوڭىنان جۇگىرمەيدى. باقىتتىڭ سوڭىنان جۇگىرۋ ەڭ تانىمال ءارى ەڭ پايداسىز سپورت ءتۇرى. بارلىعىمىز جۇگىرەمىز: جارىق بولاشاققا، ەرتەڭگى كۇنگە، كەلەسى جىلعا، ت. ت. ال، ناعىز باقىتتى ايەل «سپورتتىڭ» بۇل تۇرىمەن اينالىسپايدى. ول كۇندەلىكتى ءومىر اعىسىمەن ەش ۋايىمسىز سىرعىپ وتىرادى.
2. ول «ءومىردىڭ كەرەمەتى الدا، بولاشاقتا» دەگەن قاعيدامەن ەمەس، ءومىردىڭ ءار كۇنىنىڭ كەرەمەتىمەن ءومىر سۇرەدى. ول الدەنەنى باستاۋ ءۇشىن دۇيسەنبىنى، ەرتەڭگى كۇندى، ارىقتاۋدى نە باسقا دا وقيعانى كۇتپەيدى. مۇنىڭ بارلىعى بوس سىلتاۋ ەكەنىن، قاشان دا قولايلى جاعداي تۋعىزۋ، تەك وزىنە بايلانىستى ەكەنىن بىلەدى.
3. ول ايەل ەكەنىن ماقتان تۇتادى. ايەل بولىپ تۋىلۋدىڭ ءوزى ۇلكەن باقىت دەپ تۇسىنەدى. ول ايەل بويىنداعى نازىكتىكتى ەرەكشە باعالايدى.
4. تىم باياۋ، ياعني ءومىر اعىسىنان ءبىر- ەكى قادام ارتتا قالىپ ءومىر ءسۇرۋ بۇل جاي عانا تىرشىلىك ەتۋ دەپ اتالادى. سونىمەن قاتار، مۇرنىنا سۋ جەتپەي، كۇنى-ءتۇنى ەكى اياعىنا مازا جوق، شاپقىلاپ جۇرەتىندەر بولادى. مۇندايدا ءومىر تىم قىزىقسىز كورىنەدى. باقىتتى ايەل وسىنى جاقسى بىلەدى. ول ءومىردىڭ ورنەگىنە ساي عۇمىر كەشىپ، ونىڭ اعىسى مەن تولقىنىن بولجاپ بىلەدى.
5. ول ءوزىمشىل ەمەس، قاراپايىم ءارى باسقالارعا قولداۋ بىلدىرۋگە دايىن. دەسە دە، ول ءوزىن ءبىرىنشى ورىنعا قويادى. ول ءۇشىن ءوز ءومىرى، ءوز ورتاسى، اينالىساتىن ءىسى قىزىقتى ءارى ماڭىزدى. ىشكى تۇيسىگى، جۇرەگى «جوق» دەپ تۇرسا، ول ەشقاشان «ءيا» دەمەيدى. ءاردايىم وزىنە سەنەدى.
6. وعان ەلدىڭ باعاسى قاجەت ەمەس. ول ءاردايىم ءوز ماقسات-مىندەتتەرىمەن ءومىر سۇرەدى. ونى قالاي ويلاستىرۋ، قالاي ىسكە اسىرۋدى ءوزى بىلەدى. ەگەر دە ونىڭ ويىنداعىسى قالىپتى ستاندارتتان اۋىتقىپ وزگەشە بولىپ جاتسا، بۇعان ول الاڭدامايدى. ونىڭ ءىسىن وزگەلەر ءوز قالاۋلارىنشا باعالاۋىنا جول بەرەدى. ويتكەنى، ەلدىڭ ءبارىنىڭ كوڭىلىنەن شىعۋ مۇمكىن ەمەستىگىن جاقسى تۇسىنەدى. باقىتتى ايەل نە ىستەسە دە، وزگەلەردىڭ وڭ باعاسىن الۋ ءۇشىن ەمەس، وزىنە قاجەت بولعان سوڭ ىستەيدى.
7. ول ۇلگىلى بولۋدان اۋلاق. بۇل ونىڭ اينالاسىنداعىلارعا نەمقۇرايلى قارايتىنىن بىلدىرمەيدى. كوپشىلىككە «كەرەمەت» كورىنىپ، ىشتەي جابىرقاۋدى قالامايدى. «سىرتى ءبۇتىن، ءىشى ءتۇتىن» دەگەن ءتامسىلدى جاقسى تۇسىنەدى. سوندىقتان، الدىمەن جاننىڭ جايلىلىعىن ويلايدى. بىرەۋگە ۇلگى بولۋ ءۇشىن، ءوزىن قۇرباندىققا شالۋعا دايىن ەمەس.
8. ول «مەنىڭ ءومىرىم وڭاي ەمەس» دەيتىندەردىڭ قاتارىنان ەمەس. قانشا جەردەن شارشاپ، كۇنى-ءتۇنى جۇمىس ىستەپ جاتسا دا، ونى ءوزى ءۇشىن ىستەيتىنىن جاقسى تۇسىنەدى جانە قالاي شارشاعانىن ايتىپ، ەشكىمگە شاعىمدانىپ جۇگىنبەيدى.
9. جالعىزدىق ول ءۇشىن سىيلىقپەن تەڭ. جالعىز قالعاندا جابىرقاماۋ ءۇشىن ول كىمدى بولسا، سونى جانىنا شاقىرۋدان اۋلاق. باقىتتى ايەل ءوزىن زەرتتەۋدەن جالىقپايدى. جالعىزدىق ول ءۇشىن تەرەڭ ويعا شومىپ، تىنىشتىق كۇيگە ەنۋ ءۇشىن تاپتىرماس ۋاقىت.
10. ول قاشان دا ءوز تابيعي جاسىن قۇرمەتتەيدى جانە جاقسى كورەدى. ول 20 جىل بۇرىنعى جاسىنداعىداي كورىنۋ ءۇشىن تىرىسپايدى. ارينە، بۇل وزىنە كۇتىم جاسامايدى دەگەندى بىلدىرمەيدى. باقىتتى ايەل قاي جاستا دا باقىتتى.
