سىرتقى ىستەر مينيسترلىگى جۇڭگو، شەتەل اقپارات قۇرالدارىنا قۇلاق قاعىس ەتۋ ءماجىلىسىن اشىپ، قاتىستى جاعدايلاردى تانىستىردى
شينحۋا اگەنتتىگىنىڭ 7 - ايدىڭ 6 - كۇنى بەيجيڭنەن بەرگەن حابارى. سىرتقى ىستەر مينيسترلىگى 7 - ايدىڭ 6 - كۇنى جۇڭگو، شەتەل اقپارات قۇرالدارىنا قۇلاق قاعىس ەتۋ ءماجىلىسىن اشتى. سىرتقى ىستەر مينيسترىنىڭ كومەكشىسى چىن شياۋدۇڭ ءتوراعا شي جينپيڭنىڭ جۇڭگو - اراب ەلدەرى سەلبەستىك تالقى مىنبەرىنىڭ 8 - كەزەكتى مينيستر دارەجەلىلەر ءماجىلىسىنىڭ اشىلۋ سالتىنا قاتىناسۋىنا قاتىستى جاعدايلاردى تانىستىردى، سونداي - اق تىلشىلەردىڭ سۇراۋىنا جاۋاپ بەردى.
چىن شياۋدۇڭ بىلاي دەدى: 7 - ايدىڭ 10 - كۇنى ءتوراعا شي جينپيڭ حالىق سارايىندا جۇڭگوعا مەملەكەت ىستەرى بابىمەن ساپارلاي كەلگەن كۆەيتتىڭ ءامىرى ساباقپەن، مينيسترلەر ماجىلىسىنە قاتىناساتىن 21 اراب ەلدەرىنىڭ سىرتقى ىستەر مينيسترلەرىمەن نەمەسە مينيسترلەرمەن، سونداي - اق اراب ەلدەرى وداعىنىڭ باس حاتشىسىمەن بىرگە جۇڭگو - اراب ەلدەرى سەلبەستىك تالقى مىنبەرىنىڭ 8 - كەزەكتى مينيستر دارەجەلىلەر ءماجىلىسىنىڭ اشىلۋ سالتىنا قاتىناسادى ءارى ماڭىزدى ءسوز سويلەيدى. بۇل ءتوراعا شي جينپيڭنىڭ اراب دۇنيەسىنە 3 - رەت ماڭىزدى ساياسات جاريالاۋى بولىپ، بۇل جۇڭگونىڭ جۇڭگو - اراب ەلدەرى قاتىناسىنىڭ دامۋىنا، جۇڭگو - اراب ەلدەرى سەلبەستىك تالقى مىنبەرى قۇرىلىسىنا باسا ءمان بەرەتىندىگىن جانە بار كۇشپەن قولدايتىندىعىن ايگىلەيدى.
چىن شياۋدۇڭ مىنانى اتاپ كورسەتتى: جۇڭگو - اراب ەلدەرى سەلبەستىك تالقى مىنبەرى قۇرىلعان 14 جىلدان بەرى، كولەمى مەن ىقپالى ۇزدىكسىز زورايىپ، جۇڭگو - اراب ەلدەرى توپتىق كەڭەسىن جانە سەلبەستىگىن پارمەندى جەبەدى. وڭتايلى ساتتە اشىلاتىن وسى كەزەكتى مينيسترلەر ماجىلىسىنە جۇڭگو مەن اراب ەلدەرى باسا ءمان بەرىپ، ءۇمىت كۇتۋدە. ءتوراعا شي جينپيڭنىڭ اشىلۋ سالتىنا قاتىناسۋى ءارى ماڭىزدى ءسوز سويلەۋى وسى كەزەكتى مينيسترلەر ماجىلىسىندەگى ماڭىزدى ءىس، مۇنىڭ ماڭىزى زور، ىقپالى تەرەڭ. ءبىرىنشى، جۇڭگو - اراب ەلدەرى قاتىناسىنىڭ تىڭ ورەگە جەتۋىنە جەتەكشىلىك ەتەدى. ءتوراعا شي جينپيڭ جۇڭگو - اراب ەلدەرى قاتىناسىن جوعارى دەڭگەيدە جوبالاۋدى، توپتىق سەلبەستىكتى جوبالاۋدى، تالقى مىنبەرى قۇرىلىسىنا جەتەكشىلىك ەتۋدى ونان ارى كۇشەيتۋ سياقتى جاقتاردان جۇڭگو جاقتىڭ كوزقاراسىن پايىمدايدى، مۇنىڭ جاڭا كەزەڭدە جۇڭگو - اراب ەلدەرى قاتىناسىنىڭ دامۋىنا ايقىن العا باسۋ بەتالىسىن كورسەتىپ بەرەتىندىگىنە، ءتۇبىرلى ولشەممەن قامتاماسىز ەتەتىندىگىنە سەنىمىمىز كامىل. ەكىنشى، «ءبىر بەلدەۋ، ءبىر جولدى» بىرگە قۇرۋدىڭ تىڭ جاعدايىن اشۋدى جەبەيدى. ءتوراعا شي جينپيڭ جۇڭگو - اراب ەلدەرىنىڭ «ءبىر بەلدەۋ، ءبىر جولدى» بىرگە قۇرۋ سەلبەستىگىن ونان ارى كۇشەيتۋ جونىندە ماڭىزدى دارىپتەمەلەر العا قويادى، مۇنداعى شارالاردىڭ كوبى كۇشتى كورەگەندىك، جاسامپازدىق جانە ءورىس اشۋ سيپاتىنا يە. مۇنان سىرت، وسى كەزەكتى مينيسترلەر ماجىلىسىندە «بەيجيڭ مالىمدەمەسى»، «2018 − 2020 - جىلعا دەيىنگى قيمىل اتقارۋ جوسپارى» سياقتى جەتىستىك حۇجاتتارىن ماقۇلداۋ جوسپارلاندى، بۇل 10 نەشە سەلبەستىك سالاسىنا سايادى، جۇڭگو مەن اراب ەلدەرىنىڭ بولاشاقتا «ءبىر بەلدەۋ، ءبىر جولدى» بىرگە قۇرۋىنا ايقىن، ۇتىمدى جول كارتاسىن بەلگىلەپ بەرەدى. ءۇشىنشى، ورتا شىعىستىڭ بەيبىتشىلىگى مەن دامۋىن جەبەۋگە تىڭ تىرىسشاڭدىقتار كورسەتىلەدى. ءتوراعا شي جينپيڭ اشىلۋ سالتىنداعى سوزىندە كەزەكتە ورتا شىعىستىڭ ءدوپ كەلگەن كورنەكتى ماسەلەلەرىنە جانە تۇرلىشە جاقتاردىڭ قاجەتىنە بىرلەستىرىپ «جۇڭگو جوباسىن» بايىمداپ، جۇڭگو جاقتىڭ قۇلشىنىسىن تانىستىرادى. جۇڭگو جاق اراب ەلدەرىمەن بىرگە قۇلشىنىپ، ورتا شىعىستىڭ بەيبىتشىلىگى مەن دامۋىن بىرگە جەبەپ، جۇڭگو - اراب ەلدەرىنىڭ تاعدىرلاس ورتاق تۇلعاسىن قۇلشىنا قالىپتاستىرىپ، سول ارقىلى ادامزاتتىڭ تاعدىرلاس ورتاق تۇلعاسىن قۇرۋدى جەبەۋگە اناعۇرلىم زور ۇلەس قوسۋدى قالايدى.
چىن شياۋدۇڭ مىنانى باسا دارىپتەدى: كەزەكتە جۇڭگوشا سوتسياليزم جاڭا داۋىرگە ءوتتى، اراب ەلدەرى دە وزگەرىس جاساۋ، ءوزىن الۋەتتەندىرۋدەي شەشۋشى كەزەڭدە تۇر. جۇڭگو - اراب ەلدەرى قاتىناسىنىڭ دامۋى ەكى جاقتىڭ ىستەرىنە، وڭىرلىك ىستەرگە جانە الەمدىك ىستەرگە پايدالى. ءتوراعا شي جينپيڭنىڭ ماڭىزدى ءسوزىن بىرگە كۇتەمىز، ءسوزدىڭ جۇڭگو - اراب ەلدەرى قاتىناسىنىڭ دامۋىنا تىڭ تەبىن قوسىپ، جۇڭگو - اراب ەلدەرى سەلبەستىگىنىڭ تىڭ بولاشاعىن اشىپ، وڭىرلىك بەيبىتشىلىككە تىڭ ءۇمىت اكەلەتىندىگىنە سەنەمىز.
