ءتاڭىرتاۋ تورابى   ›   بىلگەنگە مارجان   ›   وتباسى جانە تۇرمىس

بالا تاربيەسى انا قۇرساعىندا باستالادى

  بالا تاربيەسى جاتىردا جاتقانىنان باستالادى. بۇل − اقيقات. بالانى تەك ەس بىلگەنىندە تاربيەلەۋ دەگەنىمىز — بالا تاربيەلەۋدى كوپ ۋاقىتقا كەشەۋىلدەتىپ العاندىق.

  جاتىردا جاتقان ءسابي الەمدى قالاي قابىلدايدى؟

  ەڭ الدىمەن، ءسابيدىڭ اناسىنىڭ جاتىرىندا جاتىپ الەمدى قالاي قابىلدايتىنىن ءبىلىپ الۋ قاجەت.

  دۇنيەگە كەلمەي - اق ءسابيدىڭ ەستۋ قابىلەتى قالىپتاسادى. 16 - شى اپتاسىندا - اق ول اناسىنىڭ تامىر جۇيەسىندەگى قان اينالىسىنىڭ دىبىسىن ەستىپ جاتادى، الايدا، ونىڭ كىشكەنتاي قۇلاقتارى 24 - شى اپتاعا قاراي قالىپتاسىپ بىتەدى. ول اناسىنىڭ جۇرەك سوعىسىنا ۇيرەنە باستايدى، اناسىنىڭ داۋىسىنا، اناسى تىڭداپ جاتقان اۋەنگە ەلەڭدەي باستايدى. تۋىلا سالىسىمەن - اق ءسابي تەك تۋعان اناسىنىڭ داۋىسىن عانا ەمەس، سونىمەن قوسا، اينالاسىنداعى ادامداردىڭ دا دىبىسىن بىلە باستايدى. زەرتتەۋ ناتيجەسىنە جۇگىنسەك، ءسابي ءوز تۋعان تىلىندە سويلەگەن ادامعا كوپ قىزىعۋشىلىق تانىتادى.

  ءسابيدىڭ اكەسىنىڭ داۋىسىن پارىقتاۋى دا اسا ماڭىزدى. اكەسى سابيىمەن اناسىنىڭ جاتىرىندا جاتقاندا - اق سويلەسىپ، تىعىز بايلانىس ورناتا باستاسىن. ءسابي مىندەتتى تۇردە ونى ەستيدى، سەبەبى، ۇرىق ماڭايىنداعى سۇيىقتىق دىبىستاردى جاقسى جەتكىزەدى. مۇنداي بايلانىس اكە مەن بالا اراسىنداعى جاقسى قاتىناستى قالىپتاستىرادى.

  ءسابي تەك ەستىپ قانا قويماي، اناسىنىڭ سويلەۋ مانەرىنە قاراي قيمىلدايدى. سوندىقتان، ءوزىڭىزدىڭ جانىڭىزدى تىنىشتاندىراتىن داۋىس ىرعاعى مەن جاي شىققان دىبىس ءسابيىڭىزدى دە تىنىشتاندىرادى. ال، قىزۋلى اڭگىمەلەر نەمەسە داۋىسى قاتتى اۋەندەر كەزىندە، ول اياقتارىمەن تەبە باستايدى ياعني مازاسىزدانادى.

  سونىمەن بىرگە، اناسىنىڭ جاتىرىندا جاتىپ ءسابيدىڭ سەزۋ قابىلەتى دە قالىپتاسا باستايدى، ءيىس پەن ءار ءتۇرلى دامدەردى قابىلداي الادى.

  ەڭ اۋەلى، سەزۋ قابىلەتى داميدى، سوندىقتان، جۇكتىلىكتىڭ ەڭ العاشقى كەزەڭىندە - اق سابيمەن قارىم - قاتىناس جاساۋعا بولادى (ءىشىڭىزدى سيپاپ). ەگەر جۇكتىلىك كەزىندە وسىنداي قاتىناس ورناتساڭىز، كەلەشەكتە ونى اياعىنان نە قولىنان سيپالاپ وتىرىپ ۇيىقتاتۋعا بولادى.

  16 - شى اپتاعا قاراي قىزىل شاقانىڭ ءدام سەزۋ رەتسيەەپتورلارى قالىپتاسادى. اناسى جەگەن ازىقتىڭ ءبارى ءسابي اعىزاسىنا جولداسى ارقىلى جەتىپ، ماڭايىنداعى سۋعا سىڭەدى. وسىلايشا، ءسابي تاماقتىڭ ءدامىن بىلەدى (باس سۋعا اششى جانە ءتاتتى زاتتاردى ەنگىزۋ ارقىلى زەرتتەۋشىلەر ءسابيدىڭ ءتاتتى سۇيىقتىقتى قۇمارلانا جۇتاتىنىن، ال، ەگەر اششىسى تۇسسە تۇنەرىپ قالاتىنىن انىقتادى). وعان قوسا، ءسابيدىڭ تۋىلعاننان سوڭ جەيتىن تاماقتارى اناسىنىڭ جۇكتى كەزىندە جەگەندەرىنە بايلانىستى. سوندىقتان، ەگەر ءوسىپ كەلە جاتقان ءسابيىڭىزدىڭ بولاشاقتا تاماقتىڭ بارلىعىن دەرلىك، تالعاماي جەگەنىن قالاساڭىز، جۇكتىلىك كەزىندە ءار ءتۇرلى تاماقتانعانىڭىز ءجون.

  جاتىردا جاتقان ءسابيدى قالاي تاربيەلەۋگە بولادى نەمەسە بولاشاق اناعا ارنالعان «تاپسىرمالار»

  ءسابيدىڭ جاعدايىنا مۇقيات قاراڭىز. ءار ءتۇرلى ارەكەتتەرگە قالاي جاۋاپ بەرەتىنىن ەسىڭىزدە ساقتاڭىز جانە ونىڭ قيمىلىنىڭ ماعىناسىن تۇسىنۋگە تىرىسىڭىز. ءسابيىڭىزدىڭ «قالاۋىن» انىقتاعان سوڭ، وعان ۇنايتىن نارسەلەرمەن كوبىرەك اينالىسىڭىز.

  ءسابي (تەك جاتىردا عانا ەمەس، تۋىلعان سوڭ دا) سىرتقى الەمدى اناسىنىڭ ەموتسياسى ارقىلى قابىلدايدى. شامامەن 20 - شى اپتادان باستاپ سابيىڭىزگە ءوزى اياق باساتىن الەمى تۋرالى اڭگىمەلەپ بەرىڭىز. مۇنىمەن تابيعات اياسىندا وتىرىپ (ونىڭ سۇلۋلىعىن سيپاتتاپ) اينالىسقان جاقسى. بۇلاي ءسىز تەك ءسابيىڭىزدىڭ ومىرگە دەگەن جاعىمدى قاتىناسى مەن كوزقاراسىن قالىپتاستىرىپ قانا قويمايسىز، سونىمەن بىرگە، بولاشاقتا ونىمەن ءتىل تابىسۋعا ۇيرەنەسىز. ءسابي ىرعاقتى اۋەندەردى ەسىندە تەز ساقتاپ قالادى. سوندىقتان، كۇندەلىكتى قايتالاناتىن ارەكەتتەردى (تاڭەرتەڭگىلىك ۇيقىدان تۇرۋ، كەشكە ۇيقىعا جاتۋ، جۋىنۋ، تاماقتانۋ) ەستە قالارلىق قىسقا اۋەندەرمەن باستاعان ءجون. وسىلايشا قاراپايىم، قىسقا ىرعاقتى اۋەندەر ارقىلى ءسىز ءسابيىڭىزدى تۋىلماي جاتىپ - اق كۇن تارتىبىنە ۇيرەتە باستايسىز.

  جاڭا تۋعان نارەستەمەن قارىم - قاتىناس (پرەناتالدى تاربيە)

  جاڭا عىلمي باعىت - ترانسپەرسونالدى پسيحولوگيا — بوسانۋ ءساتىن ادامنىڭ ساناسى مەن پسيحيكاسىنىڭ قالىپتاسۋىنىڭ نەگىزى دەپ قاراستىرادى. ەگەر جۇكتىلىك، بوسانۋ جانە بوسانعاننان كەيىنگى كەزەڭ اۋىر جاعدايلاردا وتسە نەمەسە ءسابي اناسىنىڭ ەموتسيالى قاتىناسىن سەزىنبەسە، ونىڭ بارلىق ءومىرى ۇرەيمەن وتەدى، ءوز - وزىنە سەنىمسىز بولادى، اينالاسىمەن قارىم - قاتىناس جاساعاندا قينالادى، الەمگە دەگەن اگرەسسيۆتى كوزقاراس پايدا بولادى، ومىردەگى قيىندىقتارمەن بەتپە - بەت كەلگەندە پسيحيكالىق اۋىتقۋشىلىقتار جانە جۇيكە جۇيەسىنىڭ بۇزىلۋى بايقالادى. مۇنداي ماسەلەلەردىڭ الدىن الۋ ءۇشىن، پرەناتالدى تاربيە ادىستەرى قولدانىلادى.

  پرەناتالدى تاربيەنىڭ نەگىزگى مىندەتى — بولاشاق اناعا تۋىلماي تۇرىپ سابيىمەن تولىققاندى بايلانىس ورناتۋعا كومەكتەسۋ. بالالىق شاعىندا انالىق مەيىرىمدى سەزىنىپ وسكەن ايەلگە بۇل قيىندىق تۋدىرمايدى. ال، كەيبىرىن ۇيرەنۋ قاجەت.

  دايىنداعان: بەگزات باقا قىزى

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «ءتاڭىرتاۋ تورابىنان» الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

  • ادام مەن تابيعاتتىڭ جاراسىمدى داستانىن جازدى
  • قالاسى كوركەم، حالقى باي جاڭا كارتينانى كەستەلەدى
  • ءشول دالادان «جاسىل قورعان» تۇرعىزدى
  • ءشول دالا جاسىل جەلەك جامىلدى
بىزبەن بايلانىس جارناما قىزمەتى لەبىز قالدىرۋ ءبىز تۋرالى