شينحۋا اگەنتتىگىنىڭ 7 - ايدىڭ 9 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ مەن كاتاردىڭ ءامىرى تاميم 7 - ايدىڭ 9 - كۇنى ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن قۇتتىقتادى.
شي جينپيڭ تەلەگرامماسىندا بىلاي دەپ اتاپ كورسەتتى: جۇڭگو مەن كاتار ديپلوماتيالىق قارىم - قاتىناس ورناتقان 30 جىلدان بەرى، ەكى جاقتىڭ بىرگە قۇلشىنۋىندا ەكى جاقتى قارىم - قاتىناس تاماشا دامۋ بەتالىسىن ساقتادى.
ەكى ەلدىڭ ساياسي جاقتاعى سەنىمدىلىگى ۇزدىكسىز نىعايىپ، ءتۇرلى سالاداعى سەلبەستىگى ورنىقتى قاداممەن ىلگەرىلەپ، گۋمانيتارلىق اۋىس - كۇيىسى كۇن سايىن جيىلەدى. ءسىز 2014 - جىلى 11 - ايدا جۇڭگودا ءساتتى تۇردە مەملەكەتتىك ساپاردا بولدىڭىز، ءبىز جۇڭگو مەن كاتاردىڭ ستراتەگيالىق سەلبەستىك قاتىناس ورناتقاندىعىن بىرگە جاريالاپ، جۇڭگو - كاتار قارىم - قاتىناسىنىڭ تىڭ پاراعىن اشتىق. مەن كاتارمەن قارىم - قاتىناستى دامىتۋعا وسكەلەڭ ءمان بەرەمىن، كاتاردىڭ «ءبىر بەلدەۋ، ءبىر جول» قۇرىلىسىنا بەلسەنە ات سالىسقاندىعىن القايمىن، سىزبەن بىرگە قول ۇستاسا قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن تىڭ باستاما ەتىپ، جۇڭگو - كاتار قارىم - قاتىناسىنىڭ ۇزبەي العا دامۋىن ىلگەرىلەتىپ، ەكى ەلگە جانە ەكى ەل حالىقتارىنا اناعۇرلىم ويداعىداي باقىت جاراتۋدى قالايمىن.
تاميم تەلەگرامماسىندا بىلاي دەدى: ءسىز كاتار - جۇڭگو قارىم - قاتىناسىنا وسكەلەڭ ءمان بەردىڭىز، مەن بۇنى ەرەكشە القايمىن ءارى بۇعان شىنايى العىس ايتامىن. مەن سىزبەن بىرگە قۇلشىنىپ، ەكى ەلدىڭ ءتۇرلى سالاداعى قارىم - قاتىناسىنىڭ دامۋىنا قولداۋ كورسەتىپ جانە ىلگەرىلەتىپ، ەكى ەل حالىقتارىنىڭ ورتاق مۇددەسىن جەبەۋدى قالايمىن. كاتار «ءبىر بەلدەۋ، ءبىر جول» قۇرىلىسىنا ۇزدىكسىز بەلسەنە ات سالىسىپ، بىرگە گۇلدەنۋدى ىسكە اسىرادى.
