ءتىلشىمىز لي چۇنشيا 7 - ايدىڭ 12 - كۇنى ۇرىمجىدەن حابارلايدى. اۆتونوميالى رايوندىق ادام كۇشى بايلىعى جانە قوعامدىق قامتاماسىزداندىرۋ مەڭگەرمەسىنەن ۇعىسۋعا قاراعاندا، بيىل اۆتونوميالى رايونىمىز كاسىپورىنداردان جانە ورگان ءىسورىندارىنان زەينەتكە شىققانداردىڭ نەگىزگى زەينەتاقى دەڭگەيىن ۇزدىكسىز جوعارىلاتادى، بۇدان بۇكىل شينجياڭداعى ءبىر ميلليون 380 مىڭ زەينەتكەر يگىلىكتەنەدى ەكەن.
بۇل رەتكى زەينەتاقىنى جالپى بەتتىك رەتتەۋ دەڭگەيى 2017 - جىلعى بارلىق زەينەتكەرلەردىڭ جان باسىندىق ايلىق ورتاشا نەگىزگى زەينەتاقىسىنىڭ %5ى مولشەرىندە بولادى، رەتتەۋ كولەمى 2017 - جىلى 12 - ايدىڭ 31 - كۇنىنەن بۇرىن بەلگىلەمە بويىنشا زەينەتكە شىعۋ راسمياتىن بىتىرگەن، سونداي - اق قىزمەتشىلەردىڭ نەگىزگى زەينەتاقىسىن اي بويىنشا الىپ تۇرعان زەينەتكەرلەردى قامتيدى، رەتتەۋ ۋاقىتى 2018 - جىلى 1 - ايدىڭ 1 - كۇنىنەن باستاپ اتقارىلادى، 1 - ايدان 6 - ايعا دەيىنگى رەتتەۋ سوماسى تولىقتاپ بەرىلەدى.
بيىلعى زەينەتاقىنى رەتتەۋدىڭ ەرەكشەلىگى: كاسىپورىنداردان جانە ورگان ءىسورىندارىنان زەينەتكە شىققانداردىڭ نەگىزگى زەينەتاقى دەڭگەيىن بىردەي رەتتەۋدە كاسىپورىندار مەن ورگان ءىسورىندارىنىڭ زەينەتاقى ءتۇزىمىن «بىرىكتىرۋ» ايگىلەندى؛ «تۇراقتى سوما بويىنشا رەتتەۋ، بايلانىستىرىپ رەتتەۋ جانە لايىقتى بەيىمدەلۋ ءوزارا بىرلەستىرىلگەن» رەتتەۋ ءادىسى اتقارىلىپ، «ۇزاق ۋاقىت تاپسىرعاندار كوپ الۋ» سىندى ىنتالاندىرۋ مەحانيزمى ايگىلەندى؛ جاسى ۇلعايعان زەينەتكەرلەرگە، جاپالى، شەت - شالعاي وڭىرلەردەگى زەينەتكەرلەرگە جانە ءبىر ءبولىم ادامدارعا قامقورلىق جاسالىپ، ءتۇيىندى تۇردە قامقورلىق جاساۋ ايگىلەندى.
دەمالىسقا شىققاندار، سونداي - اق جاڭا جۇڭگو قۇرىلۋدان بۇرىن توڭكەرىستىك قىزمەتكە قاتىناسقان، بۇرىنعى ەڭبەك - كادرلار مينيسترلىگىنىڭ ەڭبەك - كادرلار قامسىزداندىرۋى[1983] 3 - ءنومىرلى حۇجاتىنا ۇيلەسەتىن، زەينەتكە شىققان سوڭ بۇرىنعى ولشەمدى ەڭبەكاقىسى سول كۇيىندە بەرىلىپ تۇرعان قارت جۇمىسشىلار وسى رەتكى زەينەتكەرلەردىڭ نەگىزگى زەينەتاقىسىن رەتتەۋ كولەمىنە ەنگىزىلمەيدى.
بۇل رەتكى رەتتەۋ اۆتونوميالى رايونىمىزدىڭ كاسىپورىن زەينەتكەرلەرىنىڭ زەينەتاقىسىن 2005 - جىلدان بەرى ءۇرتىس 14 - جىل رەتتەۋى، سونداي - اق 2016 - جىلدان بەرى كاسىپورىن، ورگان ءىسورىندارى زەينەتكەرلەرىنىڭ زەينەتاقى دەڭگەيىن ءبىر تۇتاس ساياسات، ءبىر تۇتاس ولشەم بويىنشا، ءۇرتىس 3 جىل بىردەي ءوسىرۋى بولىپ تابىلادى، بۇل ءار ءتۇرلى زەينەتكەرلەردىڭ مامىلەسىن رەتتەۋدى بىرتىندەپ «بىرىكتىرۋ» بەتالىسىن جانە قاعيدانىڭ ادىلدىگىن ونان ارى ايگىلەدى.
تالاپ بويىنشا، جەر - جەر 7 - ايدىڭ سوڭىنان بۇرىن رەتتەلىپ قوسىلعان زەينەتاقىنى زەينەتكەرلەردىڭ قولىنا تيگىزەدى.
