شينحۋا اگەنتتىگىنىڭ 7 - ايدىڭ 19 - كۇنى گۋاڭجوۋدان بەرگەن حابارى (ءتىلشى لي شيۇڭيىڭ). «ورتالىق زالداعى قاقپا جاقتاعى ءبىر اۋىز جاتاعان ءۇي − جۋ يۇنچيڭ قۇرباننىڭ ومىرگە كەلگەن جەرى». «جۋ يۇنچيڭنىڭ اسىلگى اتى جۋ يۇن، 1907 - جىلى مەيشيان اۋدانىندا تۋعان، ارميامىزدىڭ العاشقى كەزدەگى كورنەكتى قولباسشىسى». بۇل گۋاڭدۇڭ مەيجوۋ قالاسى مەيجياڭ رايونىنداعى جۋ يۇنچيڭ كونە تۇراعىنان تاراعان بايانداۋ ءۇنى، تاياۋ اۋماقتاعى الەۋمەتتىك اۋماقتان كەلگەن 20 نەشە پارتيا مۇشەسى پارتيا بەلگىسىن تاعىپ، ساباق بەرەتىن مۇعالىمنىڭ جۋ يۇنچيڭ قۇرباننىڭ توڭكەرىستىك اڭگىمەسى تۋرالى تانىستىرۋىن تىڭداپ تۇر.
جۋ يۇنچيڭ، 1907 - جىلى گۋاڭدۇڭ مەيجوۋدا تۋعان، 1921 - جىلى كوكەسىنە ىلەسىپ يندونەزياعا جۇمىس ىستەۋگە بارعان، 1924 - جىلى گۋاڭجوۋعا ورالىپ، سول جىلى حۋاڭپۋ اسكەري مەكتەبىنىڭ 3 - كەزەگىنە ەمتيحان بەرىپ قابىلدانىپ، اسكەري مەكتەپتەگى العاباسار ۇيىم − «جاس اسكەريلەر بىرلەستىگىنە» قاتىناسقان. 1925 - جىلى 10 - ايدا جۋ يۇنچيڭ كەرتارتپا ميليتاريست چىن جيۇڭميڭدى جازالاۋ ماقساتىنداعى 2 - رەتكى شىعىسقا جورىققا قاتىناسادى، ۇرىستا اقىل - ايلاسىمەن، ەرلىگىمەن جوۋ ىنلايدىڭ ماقتاۋىنا يە بولادى، سول جىلى جۇڭگو كوممۋنيستىك پارتياسىنا مۇشە بولادى.
1926 - جىلى 1 - ايدا جۋ يۇنچيڭ حۋاڭپۋ اسكەري مەكتەبىنەن وقۋ تاۋىسقاننان كەيىن، پارتيانىڭ تالابى بويىنشا گۋاڭجوۋدا قالىپ، توڭكەرىستىك قيمىلدارمەن شۇعىلدانادى. سول جىلى كۇزدە جۋ يۇنچيڭ ج ك پ بەيجياڭ ەرەكشە كوميتەتىنىڭ مۇشەسى بولىپ تاعايىندالىپ، بەيجياڭ شارۋالار ارمياسى مەكتەبىن قۇرۋعا جاۋاپتى بولادى. ونىڭ ۇيىمداستىرۋى مەن باسشىلىق ەتۋىندە، ج ك پ بەيجياڭ ەرەكشە كوميتەتى ىلگەرىندى - كەيىن 2 دۇركىن شارۋالار ارمياسى كۋرسىن وتكىزىپ، شارۋالار ارمياسى كادرلارىنان 260 نەشە ادامدى تاربيەلەيدى. 1927 - جىلى 4 - ايدا، جۋ يۇنچيڭ شارۋالار ارمياسى مەكتەبىنىڭ 2 - كەزەكتى كۋرسانتتارى مەن بەيجياڭ شارۋالار ارمياسى ۇلكەن اترەتىن باستاپ حۋنانعا بارىپ، حۋنان شارۋالار قوزعالىسىنا اشىق قولداۋ كورسەتەدى. 1927 - جىلى 6 - ايدا جۋ يۇنچيڭ پارتيا ۇيىمىنىڭ شەشىمى بويىنشا ۋحانعا بارىپ، ۋحان شارۋالار ساياسي جاتتىعۋ كلاسىنىڭ مەڭگەرۋشىسى بولادى.
سول جىلى 9 - ايدا جۋ يۇنچيڭ كۇزگى جيىن - تەرىن كوتەرىلىسىنە قاتىناسادى ءارى كوتەرىلىسشى بولىممەن بىرگە جيڭگاڭشان تاۋىنا شىعىپ، جيڭگاڭشان توڭكەرىستىك بازاسىن قۇرۋ كۇرەسىنە قاتىناسادى.
1928 - جىلى جازدا جۋ يۇنچيڭ قىزىل 4 - ارميا 31 - تۋانىنىڭ باستىعى مىندەتىن ارقالاپ، ماۋ زىدۇڭ، جۋ دىنىڭ تىكەلەي باسشىلىعىمەن لۇڭيۋانكوۋعا شابۋىل جاساۋ، يۇڭشين قالاسىن قورشاۋ سياقتى اتاقتى شايقاستارعا قاتىناسادى. 1928 - جىلى 8 - ايدىڭ اياعىندا ول پارتيا ۋاكىلى حى تيڭيىڭمەن بىرگە ءبىر يىڭعا جەتپەيتىن اسكەر كۇشىنە قولباسشىلىق ەتىپ، حاۋىپ - قاتەرگە قاراماي قارسىلىق كورسەتىپ، حۋنان - جياڭشي گومينداڭ ارمياسى 4 تۋانىنىڭ الما - كەزەك شابۋىلىن تويتارىپ، حۋاڭياڭجيەنى قورعاۋ شايقاسىنىڭ جەڭىسىنە قول جەتكىزەدى.
1929 - جىلى 1 - ايدا جۋ يۇنچيڭ قىزىل 31 - تۋاندى باستاپ، قىزىل 4 - ارميانىڭ نەگىزگى كۇشىمەن بىرگە وڭتۇستىك جياڭشي، باتىس فۋجيان جەرىنە جورىق تارتىپ، جاڭا توڭكەرىستىك بازا اشىپ، دابايدي، چاڭسىنجاي سياقتى ماڭىزدى شايقاستاردا قول باستاپ، نەگىزگى شابۋىل مىندەتتەرىن موينىنا الادى. سول جىلى 3 - ايدا ول قىزىل 4 - ارميانىڭ سانموۋجاڭى بولىپ اۋىستىرىپ تاعايىندالادى. سول جىلدىڭ اياعىندا جۋ يۇنچيڭ گۋتيان ماجىلىسىنە قاتىناسىپ، ماۋ زىدۇڭنىڭ دۇرىس پىكىرىنە تاباندى قولداۋ كورسەتەدى.
1930 - جىلى 6 - ايدا جۋ يۇنچيڭ قىزىل 1 - جۇنتۋاننىڭ سانموۋجاڭى بولىپ تاعايىندالادى، 8 - ايدا قىزىل 1 - باعىت ارمياسىنىڭ سانموۋجاڭى بولىپ تاعايىندالادى. 1930 - جىلدىڭ اياعىندا ورتالىق توڭكەرىستىك بازاسىنىڭ 1 - رەتكى «قورشاپ جويۋعا» قارسى لۇڭگاڭ شايقاسىندا، جۋ يۇنچيڭ ماۋ زىدۇڭ، جۋ دىنىڭ جوسپار بەلگىلەپ، اسكەري ءبولىم ورنالاستىرىپ، شايقاسقا قولباسشىلىق ەتۋىنە جاردەمدەسىپ، جاڭ حۇيزان شىسىن تولىق جويىپ، 1 - رەتكى «قورشاپ جويۋعا» قارسى تۇرۋدىڭ جەڭىسىنە قول جەتكىزۋدە ماڭىزدى رول اتقارادى، ماۋ زىدۇڭ ونى «پارمەندى قولعانات» دەپ ماقتايدى.
1931 - جىلى كوكتەمدە جۋ يۇنچيڭ شارشاپ - شالدىعۋدان اۋىر ناۋقاستانىپ، جياڭشي ولكەسى جي - ان اۋدانى دۇڭگۋ شيپاحاناسىنا جاتىپ ەمدەلەدى، 5 - ايدىڭ 22 - كۇنى شيپاحانادا گومينداڭ ارمياسى جاعىنان ولتىرىلەدى، سول جىلى 24 جاستا عانا ەدى. 1983 - جىلى جۋ يۇنچيڭ ورتالىق اسكەري ىستەر كوميتەتى جاعىنان جۇڭگو توڭكەرىسىنە كورنەكتى ۇلەس قوسقان 193 اسكەري قايراتكەردىڭ قاتارىنا ەنگىزىلىپ، «جۇڭگو ۇلكەن كەمەل سوزدىگى. اسكەري ىستەر» تاراۋىنا كىرگىزىلەدى. جۋ يۇنچيڭنىڭ كونە تۇراعى 1987 - جىلى 11 - ايدا مەيشيان اۋدانى حالىق ۇكىمەتى جاعىنان اۋدان دارەجەلى ءتۇيىندى مادەني ەسكەرتكىشتەر قورعاۋ ورنى بولىپ بەكىتىلەدى. 2012 - جىلى جۋ يۇنچيڭ كونە تۇراعى قايتادان مەيجياڭ رايوندىق مادەني ەسكەرتكىشتەردى قورعاۋ ورنى بولىپ جاريالانادى.
