حابارىن جازعان ءتىلشىمىز لۋ يان
شەريا اۋدانى شەريا قالاشىعى سايوستەڭ قىستاعىنداعى 35 جاستاعى قىستاق تۇرعىنى روزىمامەت ماتروزى وتكەن جىلى كەپتەر باعىپ كەدەيلىكتەن قۇتىلىپ، قىستاقتاعى تانىمال ادامعا اينالدى.
6 - ايدىڭ 28 - كۇنى ءتىلشى روزىمامەتتىڭ اۋلاسىنان ۇلكەندى - كىشىلى 3 كەپتەر قاپاسىندا كەپتەرلەردىڭ ۇشىپ - قونىپ، جەم تەرىپ جەپ جۇرگەنىن كوردى.
روزىمامەت قىستاقتاعى كەپتەر باعۋ شەبەرى، بۇرىنعى كەزدەرى قارا جۇمىس ىستەپ كۇن كورىپ، كەدەيلىكتەن قۇتىلا الماعان. 2017 - جىلى شەريا اۋداندىق تۇرعىن ءۇي جانە قالا، اۋىل قۇرىلىسى مەكەمەسىنىڭ «ۇعىسۋ، تيىمدىلىك جاساۋ، توعىستىرۋ» بويىنشا قىستاقتا تۇراتىن قىزمەت اترەتى وتباسىلارىن ارالاپ جاعداي ۇعىسقان كەزدە، ونىڭ كەپتەر باعىمشىلىعى كاسىبىن دامىتىپ، كەدەيلىكتەن قۇتىلىپ، بايۋ جولىنا تۇسۋىنە ءجون كورسەتتى. قىستاقتا تۇراتىن قىزمەت اترەتىنىڭ جانە قىستاق «ەكى كوميتەتىنىڭ» كومەكتەسۋى مەن قولداۋىنىڭ ارقاسىندا، روزىمامەت 40 مىڭ يۋان قارىز اقشا الىپ، 100 شارشى مەترلىك قاپاس سالىپ، 100 كەپتەر باقتى، كەپتەر 20 كۇندە بالاپان باسىپ شىعاردى، سول جىلى 10 مىڭ يۋان كىرىس كىرگىزدى. ايەلى ايىنا 2000 يۋان ەڭبەكاقىمەن اسحانادا جۇمىس ىستەدى، وسىلايشا ولاردىڭ وتباسىنىڭ تۇرمىسى تۇبەگەيلى جاقساردى.
كەپتەر باعىمشىلىعىنىڭ پايداسىن تاتقان روزىمامەت وزىنە سەنىمى ارتا ءتۇستى. بيىل جىل باسىندا ول تاعى جاڭادان كەپتەر قاپاسىن سالىپ، 800 كەپتەر ساتىپ الدى، ءار كەپتەرگە ۇكىمەت 5 يۋان قوسىمشا قاراجات بەردى، 3 ايدا ونىڭ كەپتەرى 1100گە جەتتى. ول تىلشىگە بىلاي دەدى: بيىل كەپتەر سانىن مەجەمەن 5000عا جەتكىزەمىن بە دەپ وتىرمىن، ءبىر كەپتەر 15 − 20 يۋان، ءبىر جۇپ كەپتەر جۇمىرتقاسى 10 يۋاننان ساتىلادى دەپ ەسەپتەسەك، 100 مىڭ يۋان كىرىس كىرگىزۋگە بولادى، وزىندىك قۇنىن شىعارىپ تاستاعاندا، 76 مىڭ يۋان تازا كىرىس كىرەدى.
سايوستەڭ قىستاعىنىڭ تالاي جىلدىق كەپتەر باعۋ تاريحى بار، قىستاقتاعى 503 وتباسىنىڭ 400دەن استامى كەپتەر باعادى. روزىمامەتتىڭ ۇلگى بولۋىنىڭ ارقاسىندا، قىستاق تۇرعىندارىندا كەدەيلىكتەن قۇتىلۋ سەنىمى ورنادى. «روزىمامەتتىڭ كەپتەر باعىپ كەدەيلىكتەن قۇتىلعانىن كورىپ، بيىل مەن دە 500 كەپتەر باعامىن»، - دەدى قىستاق تۇرعىنى ءماتتۇرسىن ياسىن تىلشىگە.
روزىمامەت كەدەيلىكتەن قۇتىلعان سوڭ قىستاق تۇرعىندارىنا كومەكتەسۋدى ەستەن شىعارماي، ءوزىنىڭ كەپتەر باعۋ تەحنيكاسىن قىستاق تۇرعىندارىنا قالتقىسىز ۇيرەتتى.
37 جاستاعى قىستاق تۇرعىنى ابدۇللا مامەتيمىن مۇگەدەك بولعاندىقتان ەگىس جۇمىستارىن ىستەي الماي، كەدەيلىكتەن قۇتىلا الماعان. بىلتىر ول قىزمەت اترەتىنىڭ كومەگىندە 100 كەپتەر ساتىپ الدى، روزىمامەتتىڭ تەحنيكالىق جەتەكشىلىگىنىڭ ارقاسىندا بيىل كەپتەرىن 200دەن اسىردى. «كەپتەر باعىمشىلىعىنىڭ وزىندىك قۇنى، ەڭبەك كۇشەمەلىلىگى تومەن، مەن كەدەيلىكتەن قۇتىلىپ، كىرىسىمدى ارتتىرۋدىڭ جولىن اقىرى تاپتىم»، - دەدى ابدۇللا.
قىستاق پارتيا ياچەيكاسىنىڭ شۋجيى ءنۇرالي ءيۇسىپ بىلاي دەدى: قىستاقتان ەندى كەپتەر باعىمشىلىعى كووپەراتيۆىن قۇرامىز، روزىمامەت كووپەراتيۆتىڭ جەتەكشسى بولادى. تاعى كولەمدى كەپتەر باعۋ فەرماسىن جانە مانەرلەۋ زاۆودىن سالىپ، كەپتەر ەتىن، جۇمىرتقاسىن مانەرلەپ، باعىمشىلىق، مانەرلەۋ تىزبەگىن جۇزەگە اسىرىپ، كاسىپ سالالاندىرا دامىتۋ جولىمەن ءجۇرىپ، كوپتەگەن قىستاق تۇرعىندارىن كەپتەر باعىپ، بايۋعا جەتەلەيمىز.
