چىن چۋانگو، شوكىرات زاكىر دەرەۋ ورنالاستىرۋ جاساپ، قاتەردەن اراشالاۋ، اپاتتان قۇتقارۋ قىزمەتىن بار كۇشپەن ويداعىداي ىستەپ، حالىق بۇقاراسىنىڭ باس اماندىعى مەن مال - مۇلىك حاۋىپسىزدىگىنە شىن مانىندە كەپىلدىك ەتۋدى تالاپ ەتتى
تىلشىلەرىمىز ياۋ تۇڭ، دۇڭ شاۋحۋا 8 - ايدىڭ 1 - كۇنى ۇرىمجىدەن حابارلايدى. 7 - ايدىڭ 31 - كۇنى تاڭعى ساعات 6دان باستاپ قۇمىل قالاسى يجوۋ رايونى تاسبالىق اۋىلىنىڭ ءىشىنارا وڭىرلەرىندە كەنەت نوسەر جاۋدى، جاۋىن - شاشىن مولشەرىنىڭ شوعىرلى، تۇتقيىل بولۋىنان سەل اپاتى تۋىلىپ، سەلدىڭ ەڭ جوعارى اعىسى سەكۋندىنا 700 تەكشەمەترگە جەتتى. قازىرگە دەيىن 345 ءۇي قۇلاپ، ءىشىنارا تاس جول، تەمىر جول، ەلەكتر، حابار بايلانىس قۇرىلعىلارى ءبۇلىندى. اپاتقا ۇشىراعان بۇقارا حاۋىپسىز ورىنعا دەر كەزىندە كوشىرىلىپ ورنالاستىرىلدى. اپاتتىڭ ناقتى جاعدايى ىشكەرىلەي انىقتالۋدا.
اپات تۋىلعاننان كەيىن اۆتونوميالى رايوندىق پارتكوم مەن ۇكىمەت باسا ءمان بەردى، اۆتونوميالى رايوندىق پارتكومنىڭ شۋجيى چىن چۋانگو، اۆتونوميالى رايوننىڭ ءتوراعاسى شوكىرات زاكىر دەرەۋ ورنالاستىرۋ جاساپ، قاتەردەن اراشالاۋ، اپاتتان قۇتقارۋ قىزمەتىن بار كۇشپەن ورىستەتىپ، اپاتقا ۇشىراعان بۇقارانى باسقا جەرگە شۇعىل كوشىرىپ ورنالاستىرۋدى؛ اپاتتان قۇتقارۋ بۇيىمدارىن دەرەۋ جەتكىزىپ، اپاتقا ۇشىراعان بۇقارانىڭ جاتىن ورنى، ىشەر اسى، ىشەر سۋى بولۋىنا، قاجەتتى تۇرمىسىنىڭ قامتاماسىز ەتىلۋىنە كەپىلدىك ەتۋدى، بۇلىنگەن نەگىزدىك قۇرىلعىلاردى جەدەل قالپىنا كەلتىرۋدى؛ قاتىستى تاراۋلاردان اۋا رايىنىڭ وزگەرىسىنە قاداعالاي نازار اۋدارىپ، ساقتاندىرۋ ينفورماتسياسىن دەر كەزىندە تاراتىپ، قوسانجار اپاتتان قاتاڭ ساقتانۋدى؛ اۆتونوميالى رايونىمىزدىڭ جەر - جەرىنەن ءتۇيىندى وڭىرلەردى قاداعالاپ، اۋ جايۋ ۇلگىسىندە تۇگەل تەكسەرىپ، ساقتانۋ شارالارىن باعىتتامالى تياناقتاندىرىپ، حالىقتىڭ باس اماندىعى مەن مال - مۇلىك حاۋىپسىزدىگىنە كەپىلدىك ەتۋدى تالاپ ەتتى.
جەرگىلىكتى پارتكوم مەن ۇكىمەت قوعام حاۋىپسىزدىگى، قارۋلى ساقشى، ءورت ءوشىرۋ - ورتتەن ساقتانۋ، دەنساۋلىق ساقتاۋ، قاتىناس سياقتى قۇتقارۋشى - كومەك بەرۋشى كۇشتەردى اپات تۋىلعان ورىنعا بارىپ، قاتەردەن اراشالاۋ، اپاتتان قۇتقارۋ قىزمەتىن بار كۇشپەن ورىستەتۋگە دەرەۋ ۇيىمداستىردى.
قازىر اپاتقا ۇشىراعان بۇقارانىڭ كوڭىل كۇيى تۇراقتى، قوعامدىق جالپى جاعداي جاراسىمدى، ورنىقتى.
