− سانجى وبلىستىق ساپانى تەحنيكالىق باقىلاۋ مەكەمەسىنەن شونجى اۋدانى شيبەيۋان قالاشىعىنىڭ ىرتۇن قىستاعىندا تۇراتىن «ۇعىسۋ، تيىمدىلىك جاساۋ، توعىستىرۋ» قىزمەت اترەتى تۋرالى
ءتىلشى جاڭ تيڭ
شونجى اۋدانى شيبەيۋان قالاشىعىنىڭ ىرتۇن قىستاعىندا جەر از، ادام كوپ، ارتىق ەڭبەككۇشتى باسقا سالاعا ويىستىرىپ جۇمىسقا ورنالاستىرۋ قيىن بولاتىن. سانجى حۇيزۋ اۆتونوميالى وبلىستىق ساپانى تەحنيكالىق باقىلاۋ مەكەمەسىنىڭ قىستاقتا تۇراتىن قىزمەت اترەتى قىستاق «ەكى كوميتەتى» القاسىنىڭ قابىلەتتى كوتەرىپ، بەدەل - ابىرويىن نىعايتۋىنا كومەكتەسۋمەن قاتار، بۇقارالىق قىزمەتتى جاقسى ىستەۋگە كۇش سالىپ، كىرىستى ارتتىرۋ، بايۋ جولىن امالدىڭ بارىنشا كەڭەيتىپ، حالىق تۇرمىسىنا قاتىستى جانە دامۋعا تۇساۋ بولىپ وتىرعان ءبىر قاتار قولامتالى، قيىن ماسەلەلەردى شەشتى.
بۇگىنگى كۇندە، قىستاقتىڭ جولى تۇزەلىپ، قىستاق تۇرعىندارىنىڭ جۇزىنەن كۇلكى ەستى؛ مەكتەپكە باراتىن جولدا شام جايناپ، بالالاردىڭ جۇرەگى نۇرلانا ءتۇستى؛ جاڭا قازىلعان قۇدىقتان سۋ اتىلىپ شىعىپ، قىستاق تۇرعىندارىنىڭ كوزىنەن دە تەبىرەنىستىڭ جاسى توگىلدى...
وتباسىنا قاراي شارا اتقارىپ، كىرىستى ارتتىرۋدىڭ جۇيەلى ءادىس - امالدارىن بەلگىلەدى
7 - ايدىڭ 29 - كۇنى ءتىلشى ىرتۇن قىستاعىنىڭ تۇرعىنى رازاق ءيۇسۇپتىڭ جەمىس باعىنا بارعاندا، ۇلكەندى - كىشىلى، ءتۇرلى - ءتۇستى جەرگىلىكتى تاۋىقتار جەمىس اعاشىنىڭ تۇبىندە مامىرلاپ جايىلىپ ءجۇر ەكەن.
ءبىر جىل ىلگەرى، رازاق تومەن كىرىستى قاۋىمنىڭ قاتارىندا ەدى. ۇيىندە ەگىستىك جەر از، سول كەزدە ونىڭ اۋقاتتانۋعا ىنتاسى دا جوق بولاتىن، جەمىس باعىن باپتاۋعا نەمقۇرايدى قاراپ، ءۇپى - ءتاپى كۇن وتكىزىپ جاتقان ەدى.
قىزمەت اترەتىندەگىلەر وتباسىن ارالاپ احۋال ۇعىسقاندا، رازاقتىڭ جەمىس باعى توعاي اراسى باعىمشىلىعىن دامىتۋعا وتە ىڭعايلى ەكەنىن بايقاپ، ونى جەمىس باعىندا جەرگىلىكتى تاۋىق وسىرۋگە ۇگىتتەيدى. باستاپتا بۇعان رازاق پەيىل بەرمەيدى: «تاۋىق وسىرۋگە قاراجات كەرەك، ونىڭ ۇستىنە تاۋىق وسىرۋدەن تاجىريبەم جوق، الدا - جالدا تاۋىققا دەرت كەلسە قايتەم؟». رازاق قايتا - قايتا باس تارتسا دا، قىزمەت اترەتى مەن قىستاق «ەكى كوميتەتىنىڭ» مۇشەلەرى وعان سابىرلىلىقپەن يدەيالىق قىزمەت ىستەپ، ونى الاڭنان ارىلتادى، رازاق اقىرى سىناپ كورۋگە ماقۇل بولادى. قىزمەت اترەتى اقشا شىعارىپ، شي - اننان 600 قارا تاۋىق بالاپانىن الدىرادى ءارى وعان باعىمشىلىق بىلىمدەرىن ۇيرەتۋگە ارنايى ادام ورنالاستىرادى. جىل سوڭىنا قاراي قارا تاۋىقتار قاتارعا قوسىلعاندا، قىزمەت اترەتى ونىڭ ساتۋىنا كومەكتەسەدى، توعاي اراسى باعىمشىلىعىنىڭ ارقاسىندا رازاق 20 مىڭ يۋان اقشا تابادى. بۇنىڭ ءدامىن العان ول بيىل ىرىقتى تۇردە باعىمشىلىق كولەمىن كەڭەيتەدى، توعايدا وسىرىلگەن قارا تاۋىق، ماحۋا تاۋىق، اق جىبەك تاۋىقتىڭ سانى 5000عا تايايدى، ول مەجەمەن 200 مىڭ يۋان كىرىس كىرگىزبەك.
«قازىر ءار كۇنى تۇلا بويىمدى كۇش كەرنەپ، جاتسام - تۇرسام اۋقاتتانۋدى ويلايمىن». رازاق بىلاي دەدى: پارتيانىڭ جاقسى ساياساتى، جاقسى كادرلارى مەنى وزگەرتتى، مەنى قۇلشىنا كۇرەس جۇرگىزۋگە ويلاندىردى.
بۇگىندە «ءبىر وتباسى، ءبىر ادام، ءبىر شارا» كومەكتەسۋ، سۇيەمەلدەۋ جوسپارىنا سايكەس، ىرتۇن قىستاعى توعايدا قارا تاۋىق ءوسىرۋ، تورت دۇكەنى، باعىمشىلىق كاسىپتىك كووپەراتيۆى سياقتى 3 وڭىرلىك ايگىلى ماركانى ءتۇيىندى تۇردە سۇيەمەلدەپ، سومداپ، قازىرگە دەيىن 27 قىستاق تۇرعىنىنىڭ جۇمىسقا ورنالاسۋىنا جەتەكشىلىك ەتتى.
كوپ جاقتىڭ كۇشىن بىرىكتىرىپ، اۋقاتتانۋ جولىن كەڭەيتتى
قىزمەت اترەتى قىستاق تۇرعىندارىن سىرتقا شىعىپ ەڭبەك ىستەۋگە ىنتالاندىرىپ، «تاپسىرىس + كۋرس» ءتاسىلىن قولدانىپ، كاسىپورىنداردىڭ ەڭبەك بايلىعىمەن بەلسەندى تۇردە بايلانىس جاساپ، ەگىنشى - مالشىلاردىڭ كەشكى مەكتەبىنە سۇيەنە وتىرىپ قىستاق تۇرعىندارىن شەبەرلىككە تاربيەلەپ، كاسىپورىنداردا قانداي دارىندىلار كەمشىل بولسا سونداي دارىندىلار تاربيەلەۋ پرينسيبى بويىنشا، كەستەشىلىك، مال ءوسىرۋ سياقتى كوپ ءتۇرلى شەبەرلىك تاربيەسىن ورىستەتتى؛ كۋرسانتتاردى كاسىپورىندارعا بارىپ ەكسكۋرسيالاۋعا، ۇيرەنۋگە ۇيىمداستىرىپ، قىستاق تۇرعىندارىنىڭ ءبىر ونەر يگەرۋىنە مۇمكىندىك جاساپ، ۇيدە جۇمىس كۇتۋدى ۇيدە شارۋاشىلىق قۇرۋعا اينالدىردى.
قىستاق تۇرعىنى ءازيزام ماقسۇتتىڭ تىگىنشىلىك ونەرى بار ەدى، قىستاقتاعى اپەكە - سىڭلىلەرىنىڭ ۇيدە بوس وتىرعانىن كورىپ، ولاردى تىگىنشىلىك ونەرىن ۇيرەنۋگە جەتەكتەۋدى ويلايدى، ءبىراق ورىن مەن جابدىق جوق ەدى. بيىل جىل باسىندا قىزمەت اترەتى جاعدايدى ۇققاننان كەيىن، جان - جاققا شاپقىلاپ، ءازيزامعا شارۋاشىلىق قۇرۋ ارناۋلى قاراجاتىنان 500 مىڭ يۋان الىپ بەرەدى ءارى ورىن بەلگىلەپ، جابدىقتار ساتىپ الۋىنا كومەكتەسەدى. قازىر ءازيزامنىڭ شارۋاشىلىق قۇرۋ ورتالىعى 200 ادامدى تاربيەلەپ، 48 ايەل مەن مۇگەدەكتىڭ جۇمىسقا ورنالاسۋىن شەشتى.
قىزمەت اترەتى جۇندۇڭ ونەركاسىپ رايونىمەن، تيانشان ۇن زاۆودىمەن جۇمىسشى الۋ كەلىسىمىن جاساپ، زاۆودقا ۋاقتىلى تۇردە ارتىق ەڭبەككۇشتەردى جىبەرىپ وتىردى، قازىرگە دەيىن 18 ەڭبەككۇشتى شىعاردى. قىزمەت اترەتى قىستاقتىڭ ءپاتتار ەڭبەكپەن قىزمەت كورسەتۋ كاسىپتىك كووپەراتيۆى مەن شونجى شيبەيۋان وسما جۇمىسكەرلەر اترەتى دەگەن ەكى كاسىپتىك كووپەراتيۆ قۇرۋىنا كومەكتەسىپ، ارتىق ەڭبەككۇشتەن 100دەن استام ادامدى قابىلدادى.
سونىمەن قاتار، «جىبەرگەن ورىن + كاسىپورىن + قيىنشىلىعى بار وتباسى + قىزمەت اترەتى» ءتورت ءبىر تۇلعالانعان سەلبەستىك مودەلىن اتقارىپ، كوپ جاقتىڭ كۇشىن بىرىكتىرىپ، قىستاق تۇرعىندارىنىڭ اۋقاتتانۋ جولىن مۇمكىندىكتىڭ بارىنشا كەڭەيتتى.
نىسان ارقىلى جەتەكتەپ، شىنايى سۇيىسپەنشىلىكپەن ناقتى ىستەر ىستەدى
«بۇرىن قىستاقتا سۋ تاپشى بولعاندىقتان، كوپ جەر قاراۋسىز قالىپ ەدى. وتكەن جىلى قىزمەت اترەتى مەن قىستاق <ەكى كوميتەتى> بىزگە كومەكتەسىپ قۇدىق قازىپ بەرگەلى ءبىز سۋعا باس قاتىرمايتىن بولدىق، اق قالعان جەرلەرگە قايتا ەگىن ەگىلدى»، - دەدى قىستاق تۇرعىنى ساتتار ابدىراحىمان تىلشىگە.
«بۇرىن ەسىگىمىزدىڭ الدىنداعى جول توپىراق جول ەدى، اشىق كۇندەرى شاڭ قاۋىپ، جاۋىندى كۇنى لاي كەشەتىنبىز. قازىر اسفالت جول توسەلدى، جاڭبىرلى كۇنى دالاعا شىعۋعا قولايلى»، - دەدى قىستاق تۇرعىنى مىجيت ساتتار.
ءبىر ءبولىم بۇقارانىڭ اۋىق - اۋىق قىستاق تۇرعىندار كوميتەتىنىڭ الاڭىنا جينالىپ ءبي بيلەيتىنىن كورگەن قىزمەت اترەتىندەگىلەر قىستاقتىڭ بۇقارالىق ءان - ءبي اترەتىنىڭ قۇرىلۋىنا مۇرىندىق بولادى، كوپشىلىكتىڭ ويىنى قازىر بارعان سايىن ايشىقتالىپ، قاتىناسقان قىستاق تۇرعىندارىنىڭ قاتارى ۇزدىكسىز مولايىپ كەلەدى.
وتكەن جىلدان بەرى، قىزمەت اترەتى حالىق تۇرمىسى نىساندارى قۇرىلىسىن بەلسەنە ورىستەتىپ، كوپ جاقتان نەگىزدىك قۇرىلعى قۇرىلىستارى قاراجاتىنان 20 ميلليون يۋانعا قول جەتكىزدى، قىستاقتىڭ نەگىزدىك قۇرىلعىلارى ايتارلىقتاي جاقساردى. بيىل قىزمەت اترەتى حالىق تۇرمىسى نىساندارىن بار كۇشپەن ەنگىزىپ جانە تياناقتاندىرىپ، 2017 - جىلى بەلگىلەنگەن قۇبىر جەلىسىن جاڭالاۋ نىسانىن بەلسەندىلىكپەن ىلگەرىلەتتى، قازىر 700 مىڭ يۋان نىسان قاراجاتىنا قول جەتكىزىپ، 10 - ايدا قۇبىر جەلىسىن جاڭالاۋ نىسانىن جاپپاي ورىنداپ، بۇقارانىڭ اۋىز سۋ حاۋىپسىزدىگىن قامتاماسىز ەتۋگە كۇش سالۋدا.
تىلشىلىك بارىسىندا، قىستاق تۇرعىندارى قىستاقتاعى وزگەرىستەردى جابىلا ايتىستى، ولاردى رازى ەتكەنى ءبىر - ءبىر ناقتىلى حالىق تۇرمىسى نىساندارى عانا ەمەس، قىزمەت اترەتىنىڭ قىستاق تۇرعىندارىنا شىن ىقىلاسىن ارناۋى دا ەدى.
