ەرىكتى ءتىلشى جياڭ فىڭ
ءوزىنىڭ كومەكتەسۋ - سۇيەمەلدەۋ وبيەكتى جايلى ءسوز بولعاندا، ءۇرىمجى اۋداندىق حالىقتىق قارۋلى ءبولىمنىڭ باستىعى لي جيڭچاۋدىڭ جانارىنا جاس ۇيىرىلە قالادى.
2016 - جىلدىڭ سوڭىندا لي جيڭچاۋ ءۇرىمجى قالاسى سايباق رايونى لۋيۋانجيە اۋماعىن باسقارۋ كوميتەتى شۋاڭحى الەۋمەتتىك اۋماعىنىڭ تۇرعىنى ەرلانبەك جۇماتاي ۇلىمەن جۇپ قۇراپ، تۋىس بولادى. اڭگىمەلەسۋ بارىسىندا، لي جيڭچاۋ ەرلانبەكتىڭ اكەسىنىڭ ۇزاق جىل توسەك تارتىپ جاتقانىن، شەشەسىنىڭ دە دەنساۋلىعىنىڭ ءالسىز ەكەنىن، ءبىر وتباسىنىڭ تۇرمىس اۋىرتپالىعىنىڭ ەرلانبەكتىڭ موينىندا ەكەنىن بىلەدى.
ول كەزدە، ەرلانبەكتىڭ قىزمەتى جوق بولاتىن، كۇندىك ىستەي ءجۇرىپ، قارتايىپ قالعان اۋرۋشاڭ اكە - شەشەسىنە قارايلاساتىن.
«باۋىرىم، تۇراقتى قىزمەتىڭ بولسا، قالىڭدىقتى دا وڭاي تاباسىڭ». لي جيڭچاۋ ەرلانبەكتەن: ۇلانبايدىڭ ماڭىنداعى تاس جول قورعاۋ اترەتى ادام قابىلداپ جاتىر ەكەن، ايىنا 2000 يۋان بەرەتىن كورىنەدى، سەنىڭ بارعىڭ كەلە مە؟ - دەپ سۇرايدى، ەرلانبەك بۇعان قۋانا قوسىلادى.
تۇراقتى قىزمەت تاپقان سوڭ ەرلانبەك قىزمەتكە قۇلشىنا كىرىسەدى.
2017 - جىلى ول ءوزىنىڭ جاقسى كورەتىن قىزىمەن باس قۇراپ، وتاۋ كوتەرەدى. باۋىرىنىڭ باقىتتى تۇرمىس كەشىرىپ جاتقانىن كورگەن لي جيڭچاۋ ەرەكشە قۋانادى.
ۇيلەنىپ كوپ وتپەي ەرلانبەكتىڭ جۇبايى تۇتقيىل ناۋقاسقا شالدىعادى، ءبىر ءۇيلى جان نە ىستەرىن بىلمەي داعدارىپ تۇرعاندا، ەرلانبەك لي جيڭچاۋعا تەلەفون سوعادى. جاعدايدان حابارلى بولعان لي جيڭچاۋ دەرەۋ ەرلانبەكتىڭ ۇيىنە بارىپ، ايەلىن تۇندەلەتە اۆتونوميالى رايوندىق حالىق شيپاحاناسىنا اكەلەدى ءارى ەمدەۋ اقىسىنا جانىنان 5000 يۋان اقشا شىعارادى. دەر كەزىندە ەمدەلگەندىكتەن، ەرلانبەكتىڭ جۇبايى كوپ وتپەي شيپاحانادان شىعادى.
كەيىن كەلە لي جيڭچاۋدىڭ كومەگىندە ەرلانبەكتىڭ جۇبايى دا الەۋمەتتىك اۋماقتاعى الەۋمەتتىك يگىلىك سيپاتىنداعى قىزمەت ورنىنان جۇمىس تاۋىپ، ءبىر ءۇيلى جاننىڭ تۇرمىسى بارعان سايىن جاقسارادى.
2018 - جىلى كوكتەم مەرەكەسىندە ەرلانبەك وتباسى وتباسىلىق سۋرەتكە ءتۇسۋ ءۇشىن، لي جيڭچاۋدى ارنايى شاقىرادى، سۋرەتكە تۇسكەندە، ەرلانبەك لي جيڭچاۋدى اكەسىنىڭ قاسىنا تۇرعىزادى، ول لي جيڭچاۋدى تۋعان اعاسىنداي كورەدى.
«ما جۇن، مەرەكەڭىز قۇتتى بولسىن!». بيىل ورازا ايتتا لي جيڭچاۋ ۇن - مايىن الىپ، ءۇرىمجى اۋدانى يۇڭفىڭ اۋىلى يۇڭفىڭ قىستاعىنداعى تاعى ءبىر تۋىسىنا امانداسا كەلەدى.
ما جۇن الىستان لي جيڭچاۋدى كورىپ، قۋانعانىنان: اعاي، اعاي، - دەپ الاقايلاپ الدىنان شىعادى. لي جيڭچاۋ اكەلگەن ۇن مەن مايىن ما جۇننىڭ اكەسى ما يۋحايعا بەرىپ، ولارعا مەرەكە قۇتتى بولسىن ايتادى.
52 جاستاعى ما يۋحايدىڭ بەلى اۋىراتىندىقتان، اۋىر جۇمىس ىستەي المايدى، ءبىر ءۇيلى جان ايەلىنىڭ لياڭپي ساتۋىنا سۇيەنىپ كۇن كورەدى ەكەن.
لي جيڭچاۋ العاش رەت وسى وتباسىنا كەلگەندە، ما جۇننىڭ بوتەن ادام كورسە بولدى بۇقپانتايلاي قالاتىنىن بايقايدى. كەمتار بولعاندىقتان، ول ءوزىن قوراش سانايدى ەكەن دە، باسقالارمەن كوپ قارىم - قاتىناس جاساۋدى قالامايدى ەكەن.
ما يۋحاي وتباسىنىڭ جاعدايىن كورگەن لي جيڭچاۋ ىشتەي قاتتى ابىرجيدى. كوپ وتپەي لي جيڭچاۋ ما يۋحاي وتباسىنىڭ يۇڭفىڭ اۋىلى بازارىنان لياڭپي دۇكەنىن اشۋىنا كومەكتەسەدى، ولار ايىنا بىرنەشە مىڭ يۋان كىرىس كىرگىزەدى. لي جيڭچاۋ ۋاقىتى شىقسا بولدى، ما جۇننىڭ ۇيىنە كەلىپ، ونىمەن اڭگىمەلەسىپ تۇرادى، ونى ەرتىپ دالادا سەيىلدەيدى. سونىمەن بارا - بارا مىنەزى تۇيىق ما جۇن بۇرىنعىدان كوپ جاقسارىپ، ۇيىنەن شىعىپ سىرتقى دۇنيەمەن جاناسا باستايدى.
لي جيڭچاۋدىڭ ءۇرىمجى اۋدانى سارداۋان اۋىلىندا دۇيسەن سەكەن ۇلى ەسىمدى تاعى ءبىر مالشى تۋىسى بار. جاقىندا وتباسىنىڭ تىرەگى بولعان دۇيسەن سەكەن ۇلى جىعىلىپ جاراقاتتانىپ، توسەك تارتىپ جاتىپ قالادى، جۇمىس ىستەۋگە امالسىز قالادى، ونىڭ ۇستىنە ايەلىنىڭ دە دەنساۋلىعى ءالسىز بولعاندىقتان، وتباسىندا ەشقانداي ەكونوميكالىق كىرىس بولمايدى، 2 بالاسى وقۋدان قول ۇزۋگە شاق قالادى.
لي جيڭچاۋ وسى كەدەي وتباسىنا 1600 يۋان قارجىلاي كومەكتەسىپ، كۇرىش، ۇن، ماي، وقۋ قۇرالدارىن ساتىپ الىپ بەرەدى ءارى دۇيسەن سەكەن ۇلىنا كوڭىلىن جۇباتىپ، بالالاردىڭ وقۋ قاراجاتىنان الاڭداماۋدى ايتادى.
دۇيسەن سەكەن ۇلىنىڭ دەنساۋلىعى قالپىنا كەلگەننەن كەيىن، لي جيڭچاۋ وعان قىزمەت قاراستىرادى ءارى ونىڭ سيىر، قويلارىن ساتىسىپ، وتباسىلىق كىرىسىن ارتتىرۋىنا كومەكتەسەدى.
«ءبىز ومىرلىك جاقسى تۋىستارمىز. تۋىستارىمنىڭ نۇرلى ءجۇزى مەن شىنايى كوز جانارلارىن كورگەن سايىن ءوزىمدى ناعىز باقىتتى ادام سەزىنەمىن»، - دەدى لي جيڭچاۋ.
