ءتىلشىمىز شيە حۇيبيان
«مىنانى مىقتاپ قوراپتاپ، جاپسىرعىمەن وراپ تاستاڭدار». 8 - ايدىڭ 5 - كۇنى ءتىلشى نيۋ يانچيڭگە جولىققان كەزىندە ونىڭ شيمەي سالىنعان قوراپتاردى ءبىر - بىردەن تەكسەرىپ جاتقاندىعىن كورەدى. «قازىر شيمەيدىڭ بازارعا سالىناتىن كەزى. شيمەي وڭاي بۇزىلىپ كەتەتىن جەمىس، ونى، ءسوز جوق، جاقسىلاپ قوراپتاۋ كەرەك، بولماسا بۇزىلىپ ءدامى وزگەرىپ كەتەدى». نيۋ يانچيڭ ايتا ءجۇرىپ تەكسەرىپ، جاپسىرعى دۇرىس جاپسىرىلماعاندارىنىڭ ءبارىن قايتادان جاپسىرىپ شىعۋدى تالاپ ەتتى.
«ءبىرىنشى قالدىرعان اسەر وتە ماڭىزدى، جەمىس تە سولاي». نيۋ يانچيڭ: 2013 - جىلى اقسۋ قالاسىنا تۇڭعىش رەت ساياحاتتاي كەلگەنىمدە، شينجياڭنىڭ شىلانىنىڭ ۇلكەندىگىن كورىپ تاڭ قالدىم، تاتىپ كورسەم سونداي ءدامدى ەكەن، ءدال سول ساتتە «ەلەكتروندى ساۋدا ارقىلى شينجياڭنىڭ ەرەكشە اۋىل شارۋاشىلىق ونىمدەرىن جالپىلاستىرسام» دەگەن ويعا كەلدىم، - دەدى.
وسىنداي ءتاتتى قيالدىڭ جەتەگىندە، 2014 - جىلى داشۋە بىتىرگەننەن كەيىن نيۋ يانچيڭ اقسۋعا تاعى كەلەدى. باستابىندا الارمان كوپ بولماعان سوڭ، ءونىمدى ءۇنحات دوستىق شەڭبەرىندە تانىستىرادى. امالياتتا جۇمىس ونىڭ ويلاعانىنداي ءساتتى بولمايدى. تاپسىرىس قابىلداعانمەن زات اينالىم اقىسىنىڭ قىمباتتىعى سەبەبىنەن پايدا تاپقاننىڭ ورنىنا زيان شەگەدى دە، ءبىر ايعا جەتپەيتىن ۋاقىتتىڭ ىشىندە قالتاسى قاعىلىپ شىعا كەلەدى.
ءبىراق 90 - جىلدىڭ تۇلەگى بولعان قايسار بويجەتكەن سەنىمنەن جازبايدى. وي جەلىسىنە بۇرىلىس جاساپ، جايما جايىپ جەمىس ساتادى. سول كەزدە باستان كەشكەندەرىن ايتقان سايىن جىگەرلەنىپ: توتەنشە جاپالى بولعانىمەن، كوپ نارسە ۇيرەنىپ الدىم، - دەدى.
ءبىر جىلعا جۋىق جايما جايۋ بارىسىندا ول ەگۋدەن، تاسىمالداۋدان تارتىپ ساتۋعا دەيىن، جەرگىلىكتى جەمىس - جيدەك بازارىنىڭ قىرى مەن سىرىنا ابدەن قانىق بولادى. 2016 - جىلى جىل باسىندا، دوسىنىڭ تانىستىرۋىمەن، نيۋ يانچيڭ اقسۋ ەلەكتروندى ساۋدا ونەركاسىپ باقشاسىنا كىرۋگە ءوتىنىش بەرەدى، سونىمەن جۇمىس ورنىنىڭ 3 جىلدىق ماياقىسىن كەشىرىم ەتۋدەي ءتيىمدى ساياساتتان يگىلىكتەنىپ قانا قالماستان، كەزىندە شەشە الماي باسى قاتقان زات اينالىم ماسەلەسى دە، اقسۋ ەلەكتروندى ساۋدا ونەركاسىپ باقشاسىنىڭ تەگىن قويما سالىپ بەرۋ، توڭازىتىپ تاسىمالداۋ ارقىلى شەشىم تابادى.
قويما مەن تاسىمالداۋ ماسەلەسى شەشىلگەننەن كەيىن، نيۋ يانچيڭ تيجارات ءورىسىن كەڭەيتۋ جونىندە بەلسەنە ىزدەنىس جاسايدى. العاشىندا الما ساتۋدى نەگىز ەتكەن بولاتىن، كەيىن قاۋىن، ورىك، شيمەي، جۇقا قابىقتى جاڭعاق سياقتى ءتۇرلى ەرەكشە اۋىل شارۋاشىلىق ونىمدەرىن ساتۋعا ويىسادى. اقسۋ ەلەكتروندى ساۋدا ونەركاسىپ باقشاسى تۇعىرىنىڭ ابزالدىلىعىنان پايدالانىپ، ونىڭ سىرتىندا تانىسقان الارماندار قاينارىنىڭ، «جەلىدە + جەلىدەن تىس» ءوزارا ۇشتاستىرۋ ءتاسىلى ارقىلى، ونەركاسىپ باقشا رايونىنان ىرگە تەپكەن العاشقى جىلى ساتىلىم سوماسىن 200 مىڭ يۋاننان اسىردى.
شارۋاشىلىقتى ونان ارى ارناعا ءتۇسىرۋ ءۇشىن، 2016 - جىلى نيۋ يانچيڭ اقسۋ باتىس بولىك نيۋنيۋ ەلەكتروندى ساۋدا ىستەرى شەكتى سەرىكتەستىگىن تىزىمگە الدىرىپ قۇرادى. سودان باستاپ سەرىكتەستىكتىڭ شارۋاشىلىق جاعدايى جىلدان - جىلعا جاقسارىپ، 2017 - جىلدىڭ سوڭىندا سەرىكتەستىكتىڭ ساۋدا سوماسى 10 ميلليون يۋانعا جەتەدى.
ساتىلىم سوماسىن 200 مىڭ يۋاننان 10 ميلليون يۋانعا جەتكىزۋدە نيۋ يانچيڭنىڭ سۇيەنگەنى − ءونىمنىڭ ساپاسىنا كەپىلدىك ەتۋ. «اۋا رايى فاكتورىنىڭ ىقپالىنان، ءونىمنىڭ ساپاسىندا پارىق بولادى، ساپاسىنا قاراي باعاسى دا ۇقسامايدى، ءبىز الارماندارعا اشىعىن ايتامىز». جايشىلىقتا نيۋ يانچيڭ ەگىنشىلىكپەن شۇعىلداناتىن وتباسىلارىن ارالاپ، جەمىس اعاشىنىڭ ءوسۋ جاعدايىن تەكسەرىپ، شارۋالارعا قالاي ءۇزۋدى، قالاي قوراپتاۋدى ۇستىندە ۇيرەتىپ، ءونىمنىڭ ساپاسىنا تۋ باستان كەپىلدىك ەتتى.
مۇنان سىرت، نيۋ يانچيڭ ۋاكىل ساۋداگەر دامىتۋ فورماسى ارقىلى بۇكىل ەلدىڭ جەر - جەرىندەگى دۇكەندەردى تاۋارمەن قامدايدى. «قازىر شينجياڭنان سىرت كوپتەگەن جەردەن قامبا اشتىق»، - دەدى نيۋ يانچيڭ. اۋەلگى ارمانىن ىسكە اسىرعاننان كەيىن، نيۋ يانچيڭ جاڭا نىسانانى كوزدەدى، «الداعى جەردە سەرىكتەستىك ساتىلاتىن ەرەكشە اۋىل شارۋاشىلىق ونىمدەرىنىڭ ءتۇرىن كوبەيتىپ، ساتۋ تەبىنىن ارتتىرىپ، سەرىكتەستىكتىڭ ىقپالىن كۇشەيتىپ، شينجياڭنىڭ اناعۇرلىم كوپ اۋىل شارۋاشىلىق ونىمدەرىن بۇكىل ەلىمىزدىڭ جەر - جەرىنە جەتكىزەدى»، - دەدى.
