8-ايدىڭ 4-كۇنى، الارماندار شينجياڭ جەمىس-جيدەك توبى شەكتى سەرىكتەستىگىنىڭ شي-يۇي گويۋان ەرەكشە ونىمدەر جارمەنكە ورتالىعىندا كەپتىرىلگەن جەمىس-جيدەك ساتىپ الۋدا. سۋرەتتى ءتىلشىمىز جىن شىشين تۇسىرگەن.
ءتىلشىمىز ليۋ دۇڭلاي 8 - ايدىڭ 13 - كۇنى تۇرپاننان حابارلايدى. «8 - ايدىڭ 5 - كۇنى تۇرپان قالاسى گاۋچاڭ رايونى مەيىز كاسىبى قوعامى قۇرىلدى، كاسىپ سالاسى ولشەمدى بىرلىككە كەلتىرىپ، شارۋاشىلىق دامۋى تىڭ ساتىعا قادام تاستادى»، - دەيدى 8 - ايدىڭ 12 - كۇنى تۇستەن بۇرىن تۇرپان قالاسى گاۋچاڭ رايونى مەيىز كاسىبى قوعامىنىڭ باستىعى، شينجياڭ جەمىس شارۋاشىلىعى توبىنىڭ بولىمشە سەرىكتەستىگى بولعان شينجياڭ تۇرپان جەمىس شارۋاشىلىعى شەكتى سەرىكتەستىگىنىڭ باسالقاسى جاڭ شىشيۇڭ.
سوڭعى جىلدارى اۆتونوميالى رايوندىق پارتكوم مەن ۇكىمەتتىڭ پارمەندى قولداۋىندا شينجياڭ جەمىس شارۋاشىلىعى توبى شينجياڭنىڭ ەرەكشە جەمىس ورمانى بايلىعى باسىمدىعىن تياناق ەتىپ، ءارقايسى ايماق، وبلىستارمەن بار كۇشپەن سەلبەسىپ، ەرەكشە ەگىمشىلىكتى كۇش سالا دامىتىپ، شينجياڭنىڭ ەرەكشە اۋىل شارۋاشىلىق ونىمدەرىنىڭ باسىمدىققا يە رايونى قۇرىلىسىنا ۇزبەي كۇش قوستى.
ۇعىسۋعا قاراعاندا، تۇرپان قالاسى مەملەكەت بويىنشا ساپالى ۇرىقسىز ءجۇزىم وندىرەتىن ءتۇيىندى رايون ەكەن، قازىر ەگىلگەن اۋماق 400 مىڭ مۋعا، ەگىمشىلىكپەن شۇعىلدانعاندار 200 مىڭ ادامعا جەتكەن، مۇنان سىرت، 30 مىڭ ادام وسى كاسىپكە قىزمەت كورسەتەدى ەكەن. جاڭ شىشيۇڭ: سەرىكتەستىك ەل ىشىندەگى مەيىز بازارىنىڭ باعا تۇراقتاندىرۋ ۇقىعىنا يە بولۋ، قولايلى ساۋدا ورنىن جانە ساۋدا ءتاسىلىن ازىرلەۋ ارقىلى ەگىنشىلەردى ناقتى يگىلىككە كەنەلتىپ، تۇرپاننىڭ ءجۇزىم شارۋاشىلىعىنىڭ ساپاسىن جوعارىلاتىپ، ونىمدىلىگىن ارتتىرۋىن جەدەلدەتتى، - دەدى.
سونىمەن بىرگە، جەمىس شارۋاشىلىعى توبى ولشەمدەندىرىپ ەگۋدى جالپىلاستىرۋ، ىسكە قوسۋ، جەلىدە جانە جەلىدەن تىس ساتۋ ارقىلى قىرۋار ەرەكشە اۋىل شارۋاشىلىق ونىمدەرىنىڭ تۇتىنۋشىلار اراسىندا كۇن سايىن تاماشا القاۋعا يە بولۋىنا مۇمكىندىك جاراتتى.
اقسۋ حۇڭچيپو الماسىنىڭ اتى الىس - جاقىنعا ايگىلى. «210 مىڭ مۋلىق جەمىس باعىمىز تۇگەلدەي ولشەمدەندىرىلىپ ەگىلگەن. قازىر بۇتارلاۋ، ءۇزۋ اترەتتەرىنىڭ جۇمىس ءبولىسى ايقىن، كوپشىلىك وسى شارۋاشىلىقتى بىرگە كوتەرىپ، يگىلىگىن بىرگە كورەدى»، - دەيدى شينجياڭ حۇڭچيپو اۋىل شارۋاشىلىعىن دامىتۋ توبى شەكتى سەرىكتەستىگى باعبانشىلىق ءوندىرىس ءبولىمىنىڭ باستىعى بي ۋىنجۇن.
جەمىس شارۋاشىلىعى توبى تاعى جەرگىلىكتى ۇكىمەتپەن سايكەسە كۇش سالىپ، شينجياڭنىڭ ەرەكشەلىگى، باسىمدىعى ايقىن اۋىل شارۋاشىلىق ونىمدەرىن جەلىدە ساتۋدى جانە ماركا جاراتۋدى ىلگەرىلەتۋ ارقىلى وسى ونىمدەردىڭ بازارداعى اتاعى مەن قۇنىن ارتتىردى.
شاپشال سىبە اۆتونوميالى اۋدانى كەن اۋىلى كول تەكچىگى قىستاعىنىڭ ەگىنشىسى جين گاۋفىڭنىڭ بۇل جونىندە اسەرى تەرەڭ: «سوڭعى 2 جىلدا اۋدان ورگانيكالىق كۇرىشكە سىپاتتاما بەرۋدى بار كۇشپەن جۇرگىزدى، سونىمەن قوسا، شينجياڭ جەمىس شارۋاشىلىعى توبى ۋاكىل بولعان ەلەكتروندى ساۋدا كاسىپورنىنىڭ ۇزدىكسىز تانىستىرۋىنىڭ ارقاسىندا كۇرىشىمىزدىڭ باعاسى نەداۋىر جوعارىلادى، ورگانيكالىق كۇرىشتىڭ ءار كيلوگرامى ەڭ تومەن بولعاندا 40 يۋان دا 50 يۋان بولدى، زالالسىز كۇرىشتىڭ ءار كيلوگرامى 6.8 يۋاننان 15 يۋانعا قىمباتتادى. 40 مۋ جەرگە ەككەن ورگانيكالىق كۇرىشتەن كىرەتىن كىرىسىم ارتتى»، - دەيدى ول.
بيىلدان باستاپ اۋىل شارۋاشىلىعىن كاسىپ سالالاندىرۋداعى مەملەكەتتىك ءتۇيىندى باستاماشى كاسىپورىن بولعان شينجياڭ جەمىس شارۋاشىلىعى توبى قۇرىلىمدى ويلاستىرىپ جوبا جاساپ، قولدا بار قامبادا ساقتاۋ، وڭدەۋ قۇرىلعىسىنان تولىق پايدالانۋ نەگىزىندە، تۇرپان، اقسۋ، ياركەن، قاعىلىق، حوتان، ءپايزاۋات سياقتى جەرلەردە قامبادا ساقتاۋ، وڭدەۋ ساۋدا ورتالىعىنان 8ىن جاڭادان قۇرۋدى جوسپارلادى.
شينجياڭ جەمىس شارۋاشىلىعى توبىنىڭ ورىنباسار باس ديرەكتورى لوۋ چاۋيىڭ: جەمىس شارۋاشىلىعى توبى بازا قۇرۋ ارقىلى ءونىمنىڭ توركىنىن قۋزاستىرۋ جۇيەسىن بىرتىندەپ ورناتادى، كەمەلدەندىرەدى، سونىمەن بىرگە، بازانىڭ شارپۋ اۋماعىنداعى اۋىل شارۋاشىلىق ونىمدەرىنىڭ بازارعا كىرۋ ولشەمىن ورنىقتى جوعارىلاتىپ، بازار كۇشى ارقىلى اۋىل شارۋاشىلىق ەگىمشىلىك وبيەكتىسىن ونىمدەردىڭ ساپاسىن باسقارۋعا - مەڭگەرۋگە ماجبۇرلەپ، سول ارقىلى جەرگىلىكتى ۇكىمەتپەن، سەلبەستىك كووپەراتيۆتەرمەن بىرىككەن كۇش قالىپتاستىرىپ، ەرەكشە اۋىل شارۋاشىلىق ونىمدەرىنىڭ باسىمدىققا يە رايونى قۇرىلىسىن بىرگە ىلگەرىلەتەدى، - دەدى.
قازىر رايونىمىزدا جەمىس شارۋاشىلىعى توبى ۋاكىل بولعان اۆتونوميالى رايون دارەجەلىدەن جوعارى اۋىل شارۋاشىلىعىن كاسىپ سالالاندىرۋداعى ءتۇيىندى باستاماشى كاسىپورىن 509عا جەتتى. «كاسىپورىن + سەلبەستىك كووپەراتيۆى + ەگىنشى» ۇلگىسى شينجياڭنىڭ ەرەكشە اۋىل شارۋاشىلىق ونىمدەرىنىڭ قامداۋ - ساتۋ سىندى ەكى جاعىن تىعىز بايلانىستىردى.
