ەرىكتى ءتىلشى جيڭ يۋان 8 - ايدىڭ 14 - كۇنى التايدان حابارلايدى. اۆتونوميالى رايوننىڭ «ءجۇز زاڭگەر ءجۇز كەزەك بايانداما جاساۋ» ۇگىت - لەكسيا ۇيىرمەسىنىڭ ارناۋلى تاقىرىپتىق بايانداما ءماجىلىسى 8 - ايدىڭ 14 - كۇنى التايدا وتكىزىلدى.
اۆتونوميالى رايوندىق پارتكوم پارتيا مەكتەبى زاڭ عىلىمىن وقىتۋ - زەرتتەۋ ءبولىمىنىڭ ورىنباسار مەڭگەرۋشىسى، پروفەسسور لي چۇڭلين «نەگىزگى زاڭعا وزگەرىس ەنگىزۋدىڭ كەلەلى ماڭىزى جانە نەگىزگى مازمۇنى» دەگەن تاقىرىپتا ارناۋلى ءتۇسىندىرۋ بايانداماسىن جاسادى. ارناۋلى تاقىرىپتاعى باياندامادا نەگىزگى زاڭعا وزگەرىس ەنگىزۋدىڭ كەلەلى ماڭىزىن جانە نەگىزگى مازمۇنىن وزەك ەتىپ، نەگىزگى زاڭعا 5 - رەت وزگەرىس ەنگىزۋدىڭ تەرەڭ ءمانىن جەتە تانۋ، نەگىزگى زاڭعا 5 - رەت وزگەرىس ەنگىزۋ جوباسىنىڭ باي مازمۇنىن دۇرىس يگەرۋ، نەگىزگى زاڭنىڭ جاڭا داۋىردەگى ەل باسقارۋدىڭ امالياتىندا اتقاراتىن ماڭىزدى رولى سىندى ءۇش جاقتان تەرەڭ بايىمداۋ جاسالدى. باياندامانىڭ كوزقاراسى ايقىن، مازمۇنى باي، ۇعىنىقتى بولدى، ساياساتتىق، نازاريالىق دەڭگەيى جوعارى بولۋمەن بىرگە امالياتپەن تىعىز ۇشتاستىرىلدى. بۇل نەگىزگى زاڭعا 5 - رەت وزگەرىس ەنگىزۋ جوباسىنىڭ وزەكتى مازمۇنى مەن رۋحاني ءمانىن جاپپاي تۇسىنۋدە، دۇرىس يگەرۋدە، نەگىزگى زاڭ تانىمىن كۇشەيتىپ، نەگىزگى زاڭ رۋحىن ساۋلەلەندىرىپ، نەگىزگى زاڭنىڭ بەدەلىن قورعاپ، نەگىزگى زاڭدا بەلگىلەنگەن بورىشتى وتەۋدە بەلسەندى ىلگەرىلەتۋ رولىن اتقارادى.
«بۇگىن ۇگىت - لەكسيانى تىڭداپ تەرەڭ اسەر الدىم، پارتيا مۇشەسى ساناتىندا مەن، بۇدان بىلايعى قىزمەتتە وزىمە قاتاڭ تالاپ قويىپ، ءوز ارەكەتىم ارقىلى ۇلگى كورسەتىپ، زاڭمەن جونگە سالۋدى مەكتەپتەرگە جەتكىزۋ سياقتى جولدارمەن ازامات جاسىنا تولماعانداردىڭ زاڭ تانىمى مەن مەملەكەت حاۋىپسىزدىگى تانىمىن جوعارىلاتىپ، زاڭعا قۇرمەت ەتەتىن، زاڭدى ۇيرەنەتىن، زاڭعا بويسۇناتىن، زاڭدى قولدانا بىلەتىن جاقسى ازامات بولىپ، مەملەكەتتى زاڭمەن جونگە سالۋعا، شينجياڭدى زاڭمەن جونگە سالۋعا ءوز ۇلەسىمدى قوسامىن»، - دەدى التاي ايماقتىق پارتكوم ساياسي - زاڭ كوميتەتى ورنىقتىلىقتى قورعاۋ قىزمەتىن قۋزاۋ - تەكسەرۋ كەڭسەسىنىڭ مەڭگەرۋشىسى ياۋ چى.
